Shivapurana 2.3.3: tṛtīyo'dhyāyaḥ | viṣṇvādidevaiḥ kṛtā śivastutiḥ
Śivapurāṇa (complete text) 2.3.3
- Language
- Sanskrit
Contents
tṛtīyo'dhyāyaḥ | viṣṇvādidevaiḥ kṛtā śivastutiḥ
2.3.3.1
nārada uvāca |
vidhe prājña mahādhīmanvada me vadatāṃ vara |
tataḥ paraṃ kimabhavaccaritaṃ viṣṇusadguroḥ ||
2.3.3.2
adbhuteyaṃ kathā proktā menāpūrvagatiḥ śubhā |
vivāhaśca śrutaḥ samyak paramaṃ caritaṃ vada ||
2.3.3.3
menāṃ vivāhya sa giriḥ kṛtavān kiṃ tataḥ param |
pārvatī kathamutpannā tasyāṃ vai jagadambikā ||
2.3.3.4
tapaḥ sudussahaṃ kṛtvā kathaṃ prāpa patiṃ haram |
etatsarvaṃ samācakṣva vistarācchāṅkaraṃ yaśaḥ ||
2.3.3.5
brahmovāca |
mune tvaṃ śṛṇu suprītyā śāṅkaraṃ suyaśaḥ śubham |
yacchrutvā brahmahā śuddhyetsarvānkāmānavāpnuyāt ||
2.3.3.6
yadā menāvivāhaṃ tu kṛtvāgacchadgirirgṛham |
tadā samutsavo jātastriṣu lokeṣu nārada ||
2.3.3.7
himācalo'pi suprītaścakāra paramotsavam |
bhūsurān bandhuvargāṃśca parānānarca saddhiyā ||
2.3.3.8
sarve dvijāśca santuṣṭā dattvāśīrvacanaṃ varam |
yayustasmai svasvadhāma bandhuvargāstathāpare ||
2.3.3.9
himācalo'pi suprīto menayā sukhade gṛhe |
reme'nyatra ca susthāne nandanādivaneṣvapi ||
2.3.3.10
tasminnavasare devā mune viṣṇvādayo'khilāḥ |
munayaśca mahātmānaḥ prajagmurbhūdharāntike ||
2.3.3.11
dṛṣṭvā tānāgatāndevānpraṇanāma mudā giriḥ |
sammānaṃ kṛtavān bhaktyā praśaṃsan svavidhiṃ mahān ||
2.3.3.12
sāñjalirnataśīrṣo hi sa tuṣṭāva subhaktitaḥ |
romodgamo mahānāsīdgireḥ premāśravo'patan ||
2.3.3.13
tataḥ praṇamya suprīto himaśailaḥ prasannadhīḥ |
uvāca praṇato bhūtvā mune viṣṇvādikānsurān ||
2.3.3.14
himācala uvāca |
adya me saphalaṃ janma saphalaṃ sumahattapaḥ |
adya me saphalaṃ jñānamadya me saphalāḥ kriyāḥ ||
2.3.3.15
dhanyo'hamadya sañjāto dhanyā me sakalā kṣitiḥ |
dhanyaṃ kulaṃ tathā dārāḥ sarvaṃ dhanyaṃ na saṃśayaḥ ||
2.3.3.16
yataḥ samāgatā yūyaṃ militvā sarva ekadā |
māṃ nideśayata prītyocitaṃ matvā svasevakam ||
2.3.3.17
brahmovāca |
iti śrutvā mahīdhrasya vacanaṃ te surāstadā |
ūcurharyādayaḥ prītāḥ siddhiṃ matvā svakāryataḥ ||
2.3.3.18
devā ūcuḥ |
himācala mahāprājña śṛṇvasmadvacanaṃ hitam |
yadarthamāgatāḥ sarve tad brūmaḥ prītito vayam ||
2.3.3.19
yā purā jagadambomā dakṣakanyābhavadgire |
rudrapatnī hi sā bhūtvā cikrīḍe suciraṃ bhuvi ||
2.3.3.20
pitṛto'nādaraṃ prāpya saṃsmṛtya svapaṇaṃ satī |
jagāma svapadaṃ tyaktvā taccharīraṃ tadāmbikā ||
2.3.3.21
sā kathā viditā loke tavāpi himabhūdhara |
evaṃ sati mahālābho bhaveddevagaṇasya hi ||
2.3.3.21.p1
sarvasya bhavataścāpi syuḥ sarve te vaśāḥ surāḥ | 22 ||
2.3.3.23
brahmovāca |
ityākarṇya vacasteṣāṃ haryādīnāṃ girīśvaraḥ |
tathāstviti prasannātmā provāca na ca ādarāt ||
2.3.3.24
atha te ca samādiśya tadvidhiṃ paramādarāt |
svayaṃ jagmuśca śaraṇamumāyāḥ śaṅkarastriyaḥ ||
2.3.3.25
susthale manasā sthitvā sasmarurjagadambikām |
praṇamya bahuśastatra tuṣṭuvuḥ śraddhayā surāḥ ||
2.3.3.26
devā ūcuḥ |
devyume jagatāmamba śivalokanivāsini |
sadāśivapriye durge tvāṃ namāmo maheśvari ||
2.3.3.27
śrīśaktiṃ pāvanāṃ śāntāṃ puṣṭiṃ paramapāvanīm |
vayaṃ namāmahe bhaktyā mahadavyaktarūpiṇīm ||
2.3.3.28
śivāṃ śivakarāṃ śuddhāṃ sthūlāṃ sūkṣmāṃ parāyaṇām |
antarvidyāsuvidyābhyāṃ suprītāṃ tvāṃ namāmahe ||
2.3.3.29
tvaṃ śraddhā tvaṃ dhṛtistvaṃ śrīstvameva sarvagocarā |
tvaṃ dīdhitissūryagatā svaprapañcaprakāśinī ||
2.3.3.30
yā ca brahmāṇḍasaṃsthāne jagajjīveṣu yā jagat |
āpyāyayati brahmāditṛṇāntaṃ tāṃ namāmahe ||
2.3.3.31
gāyatrī tvaṃ vedamātā tvaṃ sāvitrī sarasvatī |
tvaṃ vārtā sarvajagatāṃ tvaṃ trayī dharmarūpiṇī ||
2.3.3.32
nidrā tvaṃ sarvabhūteṣu kṣudhā tṛptistvameva hi |
tṛṣṇā kāntiśchavistuṣṭiḥ sarvānandakarī sadā ||
2.3.3.33
tvaṃ lakṣmīḥ puṇyakartṝṇāṃ tvaṃ jyeṣṭhā pāpināṃ sadā |
tvaṃ śāntiḥ sarvajagatāṃ tvaṃ dhātrī prāṇapoṣiṇī ||
2.3.3.34
tvaṃ tattvarūpā bhūtānāṃ pañcānāmapi sārakṛt |
tvaṃ hi nītibhṛtāṃ nītirvyavasāyasvarūpiṇī ||
2.3.3.35
gītistvaṃ sāmavedasya granthistvaṃ yajuṣāṃ hutiḥ |
ṛgvedasya tathā mātrātharvaṇasya parā gatiḥ ||
2.3.3.36
samastagīrvāṇagaṇasya śakti-stamomayī dhātṛguṇaikadṛśyā |
rajaḥ prapañcāttu bhavaikarūpā yā naḥ śrutā bhavyakarī stuteha ||
2.3.3.37
saṃsārasāgarakarālabhavāṅgaduḥkha-nistārakāritaraṇiṃ ca nivītahīnām |
aṣṭāṅgayogaparipālanakelidakṣāṃ vindhyāgavāsaniratāṃ praṇamāma tāṃ vai ||
2.3.3.38
nāsākṣivaktrabhujavakṣasi mānase ca dhṛtyā sukhāni vitanoti sadaiva jantoḥ |
nidreti yāti subhagā jagatī bhavānāṃ sā naḥ prasīdatu bhavasthitipālanāya ||
2.3.3.39
brahmovāca |
iti stutvā maheśānīṃ jagadambāmumāṃ satīm |
supremamanasaḥ sarve tasthuste darśanepsavaḥ ||
2.3.3.39.c1
iti śrīśivamahāpurāṇe ditīyāyāṃ rudrasaṃhitāyāṃ tṛtīye pārvatīkhaṇḍe devastutirnāma tṛtīyo'dhyāyaḥ ||
2.3.3.39.p2
śrīgaṇeśāya namaḥ ||
2.3.3.39.p3
śrīgaurīśaṅkarābhyāṃ namaḥ ||
2.3.3.39.p4
śrīśivamahāpurāṇam ||
2.3.3.39.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Kālikāpurāṇa — Sanskrit