Shivapurana 2.3.30: triṃśo'dhyāyaḥ | pārvatīpratyāgamanamahotsavaḥ
Śivapurāṇa (complete text) 2.3.30
- Language
- Sanskrit
Contents
- 2.3.30.54 — 5 parts
triṃśo'dhyāyaḥ | pārvatīpratyāgamanamahotsavaḥ
2.3.30.1
nārada uvāca |
vidhe tāta mahābhāga dhanyastvaṃ paramārthadṛk |
adbhuteyaṃ kathāśrāvi tvadanugrahato mayā ||
2.3.30.2
gate hare svaśaile hi pārvatī sarvamaṅgalā |
kiṃ cakāra gatā kutra tanme vada mahāmate ||
2.3.30.3
brahmovāca |
śṛṇu suprītitastāta yajjātaṃ tadanantaram |
hare gate nijasthāne tad vadāmi śivaṃ smaran ||
2.3.30.4
pārvatyapi sakhīyuktā rūpaṃ kṛtvā tu sārthakam |
jagāma svapiturgehaṃ mahādeveti vādinī ||
2.3.30.5
pārvatyāgamanaṃ śrutvā menā ca sa himācalaḥ |
divyaṃ yānaṃ samāruhya prayayau harṣavihvalaḥ ||
2.3.30.6
purohitaśca paurāśca sakhyaścaivāpyanekaśaḥ |
sambandhinastathānye ca sarve te ca samāyayuḥ ||
2.3.30.7
bhrātaraḥ sakalā jagmurmainākapramukhāstadā |
jayaśabdaṃ prabruvanto mahāharṣasamanvitāḥ ||
2.3.30.8
saṃsthāpya maṅgalaghaṭaṃ rājavartmani rājite |
candanāgarukastūrīphalaśākhāsamanvite ||
2.3.30.9
supurodhābrāhmaṇaiśca munibhirbrahmavādibhiḥ |
nārībhirnartakībhiśca gajendrādisuśobhitaiḥ ||
2.3.30.10
paritaḥ parito rambhāstambhavṛndasamanvite |
patiputravatīyoṣitsamūhairdīpahastakaiḥ ||
2.3.30.11
dvijavṛndaiśca saṃyukte kurvadbhirmaṅgaladhvanim |
nānāprakāravādyaiśca śaṅkhadhvanibhiranvite ||
2.3.30.12
etasminnantare durgājagāma svapurāntikam |
viśantī nagaraṃ devī dadarśa pitarau punaḥ ||
2.3.30.13
suprasannau pradhāvantau harṣavihvalamānasau |
dṛṣṭvā kālī suprahṛṣṭā svālibhiḥ praṇanāma tau ||
2.3.30.14
tau sampūrṇāśiṣaṃ dattvā cakratustau svavakṣasi |
he vatse tvevamuccārya rudantau premavihvalau ||
2.3.30.15
tataḥ svakīyā apyasyā anyā nāryo'pi sammudā |
bhrātṛstriyo'pi suprītyā dṛḍhāliṅganamādadhuḥ ||
2.3.30.16
sādhitaṃ hi tvayā samyak sukāryaṃ kulatāraṇam |
tvatsadācaraṇenāpi pāvitāḥ smākhilā vayam ||
2.3.30.17
iti sarve supraśaṃsya praṇemustāṃ praharṣitāḥ |
candanaiḥ suprasūnaiśca samānarcuḥ śivāṃ mudā ||
2.3.30.18
tasminnavasare devā vimānasthā mudāmbare |
puṣpavṛṣṭiṃ śubhāṃ cakrurnatvā tāṃ tuṣṭuvuḥ stavaiḥ ||
2.3.30.19
tadā tāṃ ca rathe sthāpya sarve śobhānvite vare |
puraṃ praveśayāmāsuḥ sarve viprādayo mudā ||
2.3.30.20
atha viprāḥ purodhāśca sakhyo'nyāśca striyaḥ śivam |
gṛhaṃ praveśayāmāsurbahumānapurassaram ||
2.3.30.21
striyo nirmañchanaṃ cakrurviprā yuyujurāśiṣaḥ |
himavānmenakā mātā mumodāti munīśvara ||
2.3.30.22
svāśramaṃ saphalaṃ mene kuputrātputrikā varā |
himavānnāradaṃ tvāṃ ca saṃstuvan sādhu sādhviti ||
2.3.30.23
brāhmaṇebhyaśca bandibhyaḥ parvatendro dhanaṃ dadau |
maṅgalaṃ pāṭhayāmāsa sa dvijebhyo mahotsavam ||
2.3.30.24
evaṃ svakanyayā hṛṣṭau pitarau bhrātarastathā |
jāmayaśca mahāprītyā samūṣuḥ prāṅgaṇe mune ||
2.3.30.22_2
tataḥ sa himavān tāta suprahṛṣṭāḥ prasannadhīḥ |
sammānya sakalānprītyā snātuṃ gaṅgāṃ jagāma ha ||
2.3.30.26
etasminnantare śambhuḥ sulīlo bhaktavatsalaḥ |
sunartakanaṭo bhūtvā menakāsannidhiṃ yayau ||
2.3.30.27
śṛṅgaṃ vāme kare dhṛtvā dakṣiṇe ḍamaruṃ tathā |
pṛṣṭhe kanthāṃ raktavāsā nṛtyagānaviśāradaḥ ||
2.3.30.28
tatassunaṭarūpo'sau menāyā prāṅgaṇe mudā |
cakre sunṛtyaṃ vividhaṃ gānaṃ cātimanoharam ||
2.3.30.29
śṛṅgaṃ ca ḍamaruṃ tatra vādayāmāsa sudhvanim |
mahatīṃ vividhāṃ tatra sa cakāra manoharām ||
2.3.30.30
tāṃ draṣṭuṃ nāgarāḥ sarve puruṣāśca striyastathā |
ājagmuḥ sahasā tatra bālā vṛddhā api dhruvam ||
2.3.30.31
śrutvā sugītaṃ taddṛṣṭvā sunṛtyaṃ ca manoharam |
sahasā mumuhuḥ sarve menāpi ca tadā mune ||
2.3.30.32
mūrcchāṃ samprāpa sā durgā vilokya hṛdi śaṅkaram |
triśūlādikacihnāni bibhrataṃ cātisundaram ||
2.3.30.33
vibhūtibhūṣitaṃ ramyamasthimālāsamanvitam |
trilocanojjvaladvaktraṃ nāgayajñopavītakam ||
2.3.30.34
varaṃ vṛṇvityuktavantaṃ gauravarṇaṃ maheśvaram |
dīnabandhu dayāsindhuṃ sarvathā sumanoharam ||
2.3.30.35
hṛdayasthaṃ haraṃ dṛṣṭvedṛśaṃ sā praṇanāma tam |
varaṃ vavre mānasaṃ hi patirme tvaṃ bhaveti ca ||
2.3.30.36
varaṃ dattvā śivāṃ cātha tādṛśaṃ prītito hṛdā |
antardhāya punastatra sunanarta sa bhikṣukaḥ ||
2.3.30.37
tato menā suratnāni svarṇapātrasthitāni ca |
tasmai dātuṃ yayau prītyā tadbhūtiprītamānasaḥ ||
2.3.30.38
tāni na svīcakārāsau bhikṣāṃ yāce śivāṃ ca tām |
punaḥ sunṛtyaṃ gānaśca kautukātkartumudyataḥ ||
2.3.30.39
menā tadvacanaṃ śrutvā cukopāti suvismitā |
bhikṣukaṃ bhartsayāmāsa bahiṣkartumiyeṣa sā ||
2.3.30.40
etasminnantare tatra gaṅgāto girirāyayau |
dadarśa purato bhikṣuṃ prāṅgaṇasthaṃ narākṛtim ||
2.3.30.41
śrutvā menāmukhād vṛttaṃ tatsarvaṃ sucukopa saḥ |
ājñāṃ cakārānucarānbahiṣkartuñca taṃ naṭam ||
2.3.30.42
mahāgnimiva duḥsparśaṃ prajvalantaṃ sutejasam |
na śaśāka bahiṣkartuṃ ko'pi taṃ munisattama ||
2.3.30.43
tataḥ sa bhikṣukastāta nānālīlāviśāradaḥ |
darśayāmāsa śailāya svaprabhāvamanantakam ||
2.3.30.44
śailo dadarśa taṃ tatra viṣṇurūpadharaṃ drutam |
kirīṭinaṃ kuṇḍalinaṃ pītavastraṃ caturbhujam ||
2.3.30.45
yadyatpuṣpādikaṃ dattaṃ pūjākāle gadābhṛte |
gātre śirasi tatsarvaṃ bhikṣukasya dadarśa ha ||
2.3.30.46
tato dadarśa jagatāṃ sraṣṭāraṃ sa caturmukham |
raktavarṇaṃ paṭhantaṃ ca śrutisūktaṃ girīśvaraḥ ||
2.3.30.47
tataḥ sūryasvarūpaṃ ca jagaccakṣussvarūpakam |
dadarśa girirājaḥ sa kṣaṇaṃ kautukakāriṇam ||
2.3.30.48
tato dadarśa taṃ tāta rudrarūpaṃ mahādbhutam |
pārvatī sahitaṃ ramyaṃ vihasantaṃ sutejasam ||
2.3.30.49
tatastejassvarūpaṃ ca nirākāraṃ nirañjanam |
nirupādhiṃ nirīhaṃ ca mahādbhutamarūpakam ||
2.3.30.50
evaṃ bahūni rūpāṇi tasya tatra dadarśa saḥ |
suvismito babhūvāśu paramānandasaṃyutaḥ ||
2.3.30.51
athāsau bhikṣuvaryo hi tasmāttasyāśca sūtikṛt |
bhikṣāṃ yayāce durgāṃ tāṃ nānyajjagrāha kiñcana ||
2.3.30.52
na svīcakāra śailendro mohitaśśivamāyayā |
bhikṣuḥ kiñcinna jagrāha tatraivāntardadhe tataḥ ||
2.3.30.53
tadā babhūva sujñānaṃ menāśaileśayoriti |
āvāṃ śivo vañcayitvā svasthānaṃ gatavānprabhuḥ ||
2.3.30.54
tayorvicintya tatraivaṃ śive bhaktirabhūtparā |
mahāmokṣakarī divyā sarvānandapradāyinī ||
2.3.30.54.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe pārvatīpratyāgamanamahotsavavarṇanaṃ nāma triṃśo'dhyāyaḥ ||
2.3.30.54.p2
śrīgaṇeśāya namaḥ ||
2.3.30.54.p3
śrīgaurīśaṅkarābhyāṃ namaḥ ||
2.3.30.54.p4
śrīśivamahāpurāṇam ||
2.3.30.54.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Brahmavaivartapurāṇa — Vyāsa, Sanskrit