Shivapurana 2.3.31: ekatriṃśo'dhyāyaḥ | śivamāyāvarṇanam
Śivapurāṇa (complete text) 2.3.31
- Language
- Sanskrit
Contents
ekatriṃśo'dhyāyaḥ | śivamāyāvarṇanam
2.3.31.1
brahmovāca |
tayorbhaktiṃ śive jñātvā parāmavyabhicāriṇīm |
sarve śakrādayo devāścicinturiti nārada ||
2.3.31.2
devā ūcuḥ |
ekāntabhaktyā śailaścetkanyāṃ tasmai pradāsyati |
dhruvaṃ nirvāṇatāṃ sadyaḥ sa prāpsyati ca bhārate ||
2.3.31.3
anantaratnādhāraścetpṛthvīṃ tyaktvā prayāsyati |
ratnagarbhābhidhā bhūmirmithyaiva bhavitā dhruvam ||
2.3.31.4
sthāvaratvaṃ parityajya divyarūpaṃ vidhāya saḥ |
kanyāṃ śūlabhṛte dattvā śivalokaṃ gamiṣyati ||
2.3.31.5
mahādevasya sārūpyaṃ lapsyate nātra saṃśayaḥ |
tatra bhuktvā varānbhogāṃstato mokṣamavāpsyati ||
2.3.31.6
brahmovāca |
ityālocya surāḥ sarve kṛtvā cāmantraṇaṃ mithaḥ |
prasthāpayitumaicchaṃste guruṃ tatra suvismitāḥ ||
2.3.31.7
tataḥ śakrādayo devāḥ sarve guruniketanam |
jagmuḥ prītyā savinayā nārada svārthasādhakāḥ ||
2.3.31.8
gatvā tatra guruṃ natvā sarve devāḥ savāsavāḥ |
cakrurnivedanaṃ tasmai gurave vṛttamādarāt ||
2.3.31.9
devā ūcuḥ |
guro himālayagṛhaṃ gacchāsmatkāryasiddhaye |
tatra gatvā prayatnena kuru nindāṃ ca śūlinaḥ ||
2.3.31.10
pinākinā vinā durgā varaṃ nānyaṃ variṣyati |
anicchayā sutāṃ dattvā phalaṃ tūrṇaṃ labhiṣyati ||
2.3.31.11
kālenaivādhunā śaila idānīṃ bhuvi tiṣṭhatu |
anekaratnādhāraṃ taṃ sthāpaya tvaṃ kṣitau gurau ||
2.3.31.12
brahmovāca |
iti devavacaḥ śrutvā pradadau karṇayoḥ karam |
na svīcakāra sa guruḥ smarannāma śiveti ca ||
2.3.31.13
atha smṛtvā mahādevaṃ bṛhaspatirudāradhīḥ |
uvāca devavaryāṃśca dhikkṛtvā ca punaḥ punaḥ ||
2.3.31.14
bṛhaspatiruvāca |
sarve devāḥ svārthaparāḥ parārthadhvaṃsakārakāḥ |
kṛtvā śaṅkaranindāṃ hi yāsyāmi narakaṃ dhruvam ||
2.3.31.15
kaścinmadhye ca yuṣmākaṃ gacchecchailāntikaṃ surāḥ |
sampādayetsvābhimataṃ śailendraṃ pratibodhya ca ||
2.3.31.16
anicchayā sutāṃ dattvā sukhaṃ tiṣṭhatu bhārate |
tasmai bhaktyā sutāṃ dattvā mokṣaṃ prāpsyati niścitam ||
2.3.31.17
paścātsaptarṣayaḥ sarve bodhayiṣyanti parvatam |
pinākinā vinā durgā varaṃ nānyaṃ variṣyati ||
2.3.31.18
athavā gacchata surā brahmalokaṃ savāsavāḥ |
vṛttaṃ kathayata svaṃ tatsa vaḥ kāryaṃ kariṣyati ||
2.3.31.19
brahmovāca |
tacchrutvā te samālocyājagmurmama sabhāṃ surāḥ |
sarve nivedayāñcakrurnatvā tadgatamādarāt ||
2.3.31.20
devānāṃ tadvacaḥ śrutvā śivanindākaraṃ tadā |
vedavaktā vilapyāhaṃ tānavocaṃ surānmune ||
2.3.31.21
brahmovāca |
nāhaṃ kartuṃ kṣamo vatsāḥ śivanindāṃ sudussahām |
sampadvināśarūpāñca vipadāṃ bījarūpiṇīm ||
2.3.31.22
surā gacchata kailāsaṃ santoṣayata śaṅkaram |
prasthāpayata taṃ śīghraṃ himālayagṛhaṃ prati ||
2.3.31.23
sa gacchedupaśaileśamātmanindāṃ karotu vai |
paranindā vināśāya svanindā yaśase matā ||
2.3.31.24
brahmovāca |
śrutveti madvaco devā māṃ praṇamya mudā ca te |
kailāsaṃ prayayuḥ śīghraṃ śailānāmadhipaṃ girim ||
2.3.31.25
tatra gatvā śivaṃ dṛṣṭvā praṇamya natamastakāḥ |
sukṛtāñjalayaḥ sarve tuṣṭuvustaṃ surā haram ||
2.3.31.26
devā ūcuḥ |
devadeva mahādeva karuṇākara śaṅkara |
vayaṃ tvāṃ śaraṇāpannāḥ kṛpāṃ kuru namo'stu te ||
2.3.31.27
tvaṃ bhaktavatsalaḥ svāminbhaktakāryakaraḥ sadā |
dīnoddharaḥ kṛpāsindhurbhaktāpadvinimocakaḥ ||
2.3.31.28
brahmovāca |
iti stutvā maheśānaṃ sarve devāḥ savāsavāḥ |
sarvaṃ nivedayāñcakrustadvṛttaṃ tata ādarāt ||
2.3.31.29
tacchrutvā devavacanaṃ svīcakāra maheśvaraḥ |
devān suyāpayāmāsa tānāśvāsya vihasya saḥ ||
2.3.31.30
devā mumudire sarve śīghraṃ gatvā svamandiram |
siddhaṃ matvā svakāryaṃ hi praśaṃsantaḥ sadāśivam ||
2.3.31.31
tataḥ sa bhagavāñchambhurmaheśo bhaktavatsalaḥ |
prayayau śailabhūpañca māyeśo nirvikāravān ||
2.3.31.32
yadā śailaḥ sabhāmadhye samuvāsa mudānvitaḥ |
bandhuvargaiḥ parivṛtaḥ pārvatīsahitaḥ svayam ||
2.3.31.33
etasminnantare tatra hyājagāma sadāśivaḥ |
daṇḍī chatrī divyavāsā bibhrattilakamujjvalam ||
2.3.31.34
kare sphaṭikamālāṃ ca śālagrāmaṃ gale dadhat |
japannāma harerbhaktyā sādhuveṣadharo dvijaḥ ||
2.3.31.35
taṃ ca dṛṣṭvā samuttasthau sagaṇo'pi himālayaḥ |
nanāma daṇḍavadbhūmau bhaktyātithimapūrvakam ||
2.3.31.36
nanāma pārvatī bhaktyā prāṇeśaṃ viprarūpiṇam |
jñātvā taṃ manasā devī tuṣṭāva parayā mudā ||
2.3.31.37
āśiṣaṃ yuyuje vipraḥ sarveṣāṃ prītitaśśivaḥ |
śivāyā adhikaṃ tāta mano'bhilaṣitaṃ hṛdā ||
2.3.31.38
madhuparkādikaṃ sarvaṃ jagrāha brāhmaṇo mudā |
dattaṃ śailādhirājena himāgena mahādarāt ||
2.3.31.39
papraccha kuśalaṃ cāsya himādriḥ parvatottamaḥ |
taṃ dvijendraṃ mahāprītyā sampūjya vidhivanmune ||
2.3.31.40
punaḥ papraccha śaileśastaṃ tataḥ ko bhavāniti |
uvāca śīghraṃ viprendro girīndraṃ sādaraṃ vacaḥ ||
2.3.31.41
viprendra uvāca |
brāhmaṇo'haṃ giriśreṣṭha vaiṣṇavo budhasattamaḥ |
ghaṭikīṃ vṛttimāśritya bhramāmi dharaṇītale ||
2.3.31.42
manoyāyī sarvagāmī sarvajño'haṃ gurorbalāt |
paropakārī śuddhātmā dayāsindhurvikārahā ||
2.3.31.43
mayā jñātaṃ harāya tvaṃ svasutāṃ dātumicchasi |
imāṃ padmasamāṃ divyāṃ vararūpāṃ sulakṣaṇām ||
2.3.31.44
nirāśrayāyāsaṅgāya kurūpāyāguṇāya ca |
śmaśānavāsine vyālagrāhirūpāya yogine ||
2.3.31.45
digvāsase kugātrāya vyālabhūṣaṇadhāriṇe |
ajñātakulanāmne ca kuśīlāyāvihāriṇe ||
2.3.31.46
vibhūtidigdhadehāya saṅkruddhāyāvivekine |
ajñātavayase'tīva kujaṭādhāriṇe sadā ||
2.3.31.46.p1
sarvāśrayāya bhramiṇe nāgahārāya bhikṣave kumārganiratāyātha vedā'dhvatyāgine haṭhāt | 47 ||
2.3.31.48
iyaṃ te buddhiracala na hi maṅgaladā khalu |
vibodha jñānināṃ śreṣṭha nārāyaṇakulodbhava ||
2.3.31.49
na te pātrānurūpaśca pārvatīdānakarmaṇi |
mahājanaḥ smeramukhaḥ śrutamātrādbhaviṣyati ||
2.3.31.50
paśya śailādhipa tvaṃ ca na tasyaiko'sti bāndhavaḥ |
mahāratnākaraḥ tvaṃ ca tasya kiñciddhanaṃ na hi ||
2.3.31.51
bāndhavānmenakāṃ kudhrapate śīghraṃ sutāṃstathā |
sarvānpṛccha prayatnena paṇḍitānpārvatīṃ vinā ||
2.3.31.52
rogiṇo nauṣadhaṃ śaśvadrocate girisattama |
kupathyaṃ rocate'bhīkṣṇaṃ mahādoṣakaraṃ sadā ||
2.3.31.53
brahmovāca |
ityuktvā brāhmaṇaḥ śīghraṃ sa vai bhuktvā mudānvitaḥ |
jagāma svālayaṃ śānto nānālīlākaraśśivaḥ ||
2.3.31.53.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivamāyāvarṇanaṃ nāmaikatriṃśo'dhyāyaḥ ||
2.3.31.53.p2
śrīgaṇeśāya namaḥ ||
2.3.31.53.p3
śrīgaurīśaṅkarābhyāṃ namaḥ ||
2.3.31.53.p4
śrīśivamahāpurāṇam ||
2.3.31.53.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Brahmavaivartapurāṇa — Vyāsa, Sanskrit