Shivapurana 2.3.35: pañcatriṃśo'dhyāyaḥ | padmāpippalādacaritavarṇanam
Śivapurāṇa (complete text) 2.3.35
- Language
- Sanskrit
Contents
- 2.3.35.62 — 5 parts
pañcatriṃśo'dhyāyaḥ | padmāpippalādacaritavarṇanam
2.3.35.1
nārada uvāca |
anaraṇyasya caritaṃ sutādānasamanvitam |
śrutvā girivarastāta kiṃ cakāra ca tadvada ||
2.3.35.2
brahmovāca |
anaraṇyasya caritaṃ kanyādānasamanvitam |
śrutvā papraccha śaileśo vasiṣṭhaṃ sāñjaliḥ punaḥ ||
2.3.35.3
śaileśa uvāca |
vasiṣṭha muniśārdūla brahmaputra kṛpānidhe |
anaraṇyacaritrante kathitaṃ paramādbhutam ||
2.3.35.4
anaraṇyasutā yasmāt pippalādaṃ muniṃ patim |
samprāpya kimakārṣītsā taccaritraṃ mudāvaham ||
2.3.35.5
vasiṣṭha uvāca |
pippalādo munivaro vayasā jarjaro'dhikaḥ |
gatvā nijāśramaṃ nāryānaraṇyasutayā tayā ||
2.3.35.6
uvāsa tatra suprītyā tapasvī nātilampaṭaḥ |
tatrāraṇye girivare sa nityaṃ nijadharmakṛt ||
2.3.35.7
athānaraṇyakanyā sā siṣeve bhaktito munim |
karmaṇā manasā vācā lakṣmīrnārāyaṇaṃ yathā ||
2.3.35.8
ekadā svarṇadīṃ snātuṃ gacchantīṃ susmitāṃ ca tām |
dadarśa pathi dharmaśca māyayā nṛparūpadhṛk ||
2.3.35.9
cāruratnarathasthaśca nānālaṅkārabhūṣitaḥ |
navīnayauvanaśśrīmānkāmadevasamaprabhaḥ ||
2.3.35.10
dṛṣṭvā tāṃ sundarīṃ padmāmuvāca sa vṛṣo vibhuḥ |
vijñātuṃ bhāvamantaḥsthaṃ tasyāśca muniyoṣitaḥ ||
2.3.35.11
dharma uvāca |
ayi sundari lakṣmīrvai rājayogye manohare |
atīva yauvanasthe ca kāmini sthirayauvane ||
2.3.35.12
jarāturasya vṛddhasya pippalādasya vai muneḥ |
satyaṃ vadāmi tanvaṅgi samīpe naiva rājase ||
2.3.35.13
vipraṃ tapassu nirataṃ nirghṛṇaṃ maraṇonmukham |
tyaktvā māṃ paśya rājendraṃ ratiśūraṃ smarāturam ||
2.3.35.14
prāpnoti sundarī puṇyātsaundaryaṃ pūrvajanmanaḥ |
saphalaṃ tadbhavetsarvaṃ rasikāliṅganena ca ||
2.3.35.15
sahasrasundarīkāntaṃ kāmaśāstraviśāradam |
kiṅkaraṃ kuru māṃ kānte samparityajya taṃ patim ||
2.3.35.16
nirjane kānane ramye śaile śaile nadītaṭe |
viharasva mayā sārdhaṃ janmedaṃ saphalaṃ kuru ||
2.3.35.17
vasiṣṭha uvāca |
ityevamuktavantaṃ sā svarathādavaruhya ca |
grahītumutsukaṃ haste tamuvāca pativratā ||
2.3.35.18
padmovāca |
gaccha dūraṃ gaccha dūraṃ pāpiṣṭhastvaṃ narādhipa |
māṃ cetpaśyasi kāmena sadyo naṣṭo bhaviṣyasi ||
2.3.35.19
pippalādaṃ muniśreṣṭhaṃ tapasā pūtavigraham |
tyaktvā kathaṃ bhajeyaṃ tvāṃ strījitaṃ ratilampaṭam ||
2.3.35.20
strījitasparśamātreṇa sarvaṃ puṇyaṃ praṇaśyati |
strījitaḥ parapāpī ca taddarśanamaghāvaham ||
2.3.35.21
satkriyo hyaśucirnityaṃ sa pumān yaḥ striyā jitaḥ |
nindanti pitaro devā mānavāḥ sakalāśca tam ||
2.3.35.22
tasya kiṃ jñāna sutapojapahomaprapūjanaiḥ |
vidyayā dānataḥ kiṃ vā strībhiryasya mano hṛtam ||
2.3.35.23
mātaraṃ māṃ striyo bhāvaṃ kṛtvā yena bravīṣi ha |
bhaviṣyati kṣayastena kālena mama śāpataḥ ||
2.3.35.24
vasiṣṭha uvāca |
śrutvā dharmaḥ satīśāpaṃ nṛpamūrtiṃ vihāya ca |
dhṛtvā svamūrtiṃ deveśaḥ kampamāna uvāca saḥ ||
2.3.35.25
dharma uvāca |
mātarjānīhi māṃ dharmaṃ jñānināṃ ca gurorgurum |
parastrīmātṛbuddhiṃ ca kurvantaṃ satataṃ sati ||
2.3.35.26
ahaṃ tavāntaraṃ jñātumāgatastava sannidhim |
tavāhañca mano jāne tathāpi vidhinoditaḥ ||
2.3.35.27
kṛtaṃ me damanaṃ sādhvi na viruddhaṃ yathocitam |
śāstiḥ samutpathasthānāmīśvareṇa vinirmitā ||
2.3.35.28
svayaṃ pradātā sarvebhyaḥ sukhaduḥkhavarānkṣamaḥ |
sampadaṃ vipadaṃ yo hi namastasmai śivāya hi ||
2.3.35.29
śatruṃ mitraṃ saṃvidhātuṃ prītiñca kalahaṃ kṣamaḥ |
sraṣṭuṃ naṣṭuṃ ca yassṛṣṭiṃ namastasmai śivāya hi ||
2.3.35.30
yena śuklīkṛtaṃ kṣīraṃ jale śaityaṃ kṛtaṃ purā |
dāhīkṛto hutāśaśca namastasmai śivāya hi ||
2.3.35.31
prakṛtirnirmitā yena tattvāni mahadāditaḥ |
brahmaviṣṇumaheśādyā namastasmai śivāya hi ||
2.3.35.32
brahmovāca |
ityuktvā puratastasyāstasthau dharmo jagadguruḥ |
kiñcinnovāca cakitastatpātivratyatoṣitaḥ ||
2.3.35.33
padmāpi nṛpakanyā sā pippalādapriyā tadā |
sādhvī taṃ dharmamājñāya vismitovāca parvata ||
2.3.35.34
padmovāca |
tvameva dharma sarveṣāṃ sākṣī nikhilakarmaṇām |
kathaṃ mano me vijñātuṃ viḍambayasi māṃ vibho ||
2.3.35.35
yattatsarvaṃ kṛtaṃ brahman nāparādho babhūva me |
tvaṃ ca śapto mayājñānātstrīsvabhāvād vṛthā vṛṣa ||
2.3.35.36
kā vyavasthā bhavettasya cintayāmīti sāmpratam |
citte sphuratu sā buddhiryayā śaṃ saṃllabhāmi vai ||
2.3.35.37
ākāśo'sau diśaḥsarvā yadi naśyantu vāyavaḥ |
tathāpi sādhvīśāpastu na naśyati kadācana ||
2.3.35.38
satye pūrṇaścatuṣpādaḥ paurṇamāsyāṃ yathā śaśī |
virājase devarāja sarvakālaṃ divāniśam ||
2.3.35.39
tvaṃ ca naṣṭo bhavasi cetsṛṣṭināśo bhavettadā |
itikartavyatāmūḍhā vṛthāpi ca vadāmyaham ||
2.3.35.40
pādakṣayaśca bhavitā tretāyāṃ ca surottama |
pādo'pare dvāpare ca tṛtīyo'pi kalau vibho ||
2.3.35.41
kaliśeṣe'khilāśchinnā bhaviṣyanti tavāṅghrayaḥ |
punaḥsatye samāyāte paripūrṇo bhaviṣyasi ||
2.3.35.42
satye sarvavyāpakastvaṃ tadanyeṣu ca kutracit |
yugavyavasthayā sa tvaṃ bhaviṣyasi yathā tathā ||
2.3.35.43
ityevaṃ vacanaṃ satyaṃ mamāstu sukhadaṃ tava |
yāmyahaṃ patisevāyai gaccha tvaṃ svagṛhaṃ vibho ||
2.3.35.44
brahmovāca |
ityākarṇya vacastasyāḥ santuṣṭo'bhūd vṛṣaḥ sa vai |
tadevaṃvādinīṃ sādhvīmuvāca vidhinandana ||
2.3.35.45
dharma uvāca |
dhanyāsi patibhaktāsi svasti te'stu pativrate |
varaṃ gṛhāṇa tvatsvāmī tvatparitrāṇakāraṇāt ||
2.3.35.46
yuvā bhavatu te bhartā ratiśūraśca dhārmikaḥ |
rūpavān guṇavānvāgmī santatasthirayauvanaḥ ||
2.3.35.47
cirañjīvī sa bhavatu mārkaṇḍeyātparaśśubhe |
kuberāddhanavāṃścaiva śakrādaiśvaryavānapi ||
2.3.35.48
śivabhakto harisamassiddhastu kapilātparaḥ |
buddhyā bṛhaspatisamaḥ samatvena vidheḥ samaḥ ||
2.3.35.49
svāmisaubhāgyasaṃyuktā bhava tvaṃ jīvanāvadhi |
tathā ca subhage devi tvaṃ bhava sthirayauvanā ||
2.3.35.50
mātā tvaṃ daśaputrāṇāṃ guṇināṃ cirajīvinām |
svabharturadhikānāṃ ca bhaviṣyasi na saṃśayaḥ ||
2.3.35.51
gṛhā bhavantu te sādhvi sarvasampatsamanvitāḥ |
prakāśavantaḥ satataṃ kuberabhavanādhikāḥ ||
2.3.35.52
vasiṣṭha uvāca |
ityevamuktvā santasthau dharmaḥ sa girisattama |
sā taṃ pradakṣiṇīkṛtya praṇamya svagṛhaṃ yayau ||
2.3.35.53
dharmastathāśiṣo dattvā jagāma nijamandiram |
praśaśaṃsa ca tāṃ prītyā padmāṃ saṃsadi saṃsadi ||
2.3.35.54
sā reme svāminā sārdhaṃ yūnā rahasi santatam |
paścādbabhūvuḥ satputrāstadbharturadhikā guṇaiḥ ||
2.3.35.55
babhūva sakalā sampaddampatyoḥ sukhavardhinī |
sarvānandavṛddhikarī paratreha ca śarmaṇe ||
2.3.35.56
śailendra kathitaṃ sarvamitihāsaṃ purātanam |
dampatyośca tayoḥ prītyā śrutaṃ te paramādarāt ||
2.3.35.57
buddhvā tattvaṃ sutāṃ dehi pārvatīmīśvarāya ca |
kuruṣaṃ tyaja śailendra menayā svastriyā saha ||
2.3.35.58
saptāhe samatīte tu durlabhe'tiśubhe kṣaṇe |
lagnādhipe ca lagnasthe candre svatnayānvite ||
2.3.35.59
mudite rohiṇīyukte viśuddhe candratārake |
mārgamāse candravāre sarvadoṣavivarjite ||
2.3.35.60
sarvasadgrahasaṃsṛṣṭe'sadgrahadṛṣṭivarjite |
sadapatyaprade jīve patisaubhāgyadāyini ||
2.3.35.61
jagadambāṃ jagatpitre mūlaprakṛtimīśvarīm |
kanyāṃ pradāya girijāṃ kṛtī tvaṃ bhava parvata ||
2.3.35.62
brahmovāca |
ityuktvā muniśārdūlo vasiṣṭho jñānisattamaḥ |
virarāma śivaṃ smṛtvā nānālīlākaraṃ prabhum ||
2.3.35.62.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe padmāpippalādacaritavarṇanaṃ nāma pañcatriṃśo'dhyāyaḥ ||
2.3.35.62.p2
śrīgaṇeśāya namaḥ ||
2.3.35.62.p3
śrīgaurīśaṅkarābhyāṃ namaḥ ||
2.3.35.62.p4
śrīśivamahāpurāṇam ||
2.3.35.62.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (2)
- Brahmavaivartapurāṇa — Vyāsa, Sanskrit
- Bṛhatkathākośa — Hariṣeṇa, Sanskrit