[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 2.3.35 # Shivapurana 2.3.35: pañcatriṃśo'dhyāyaḥ | padmāpippalādacaritavarṇanam Śivapurāṇa (complete text) 2.3.35 - **Language:** Sanskrit ## Contents - [2.3.35.62](https://indike.org/pramana/in.purana.siva*complete-2.2.3.35.62) — 5 parts ### pañcatriṃśo'dhyāyaḥ | padmāpippalādacaritavarṇanam ### [2.3.35.1](https://indike.org/pramana/in.purana.siva*complete-2.2.3.35.1) nārada uvāca | anaraṇyasya caritaṃ sutādānasamanvitam | śrutvā girivarastāta kiṃ cakāra ca tadvada || ### [2.3.35.2](https://indike.org/pramana/in.purana.siva*complete-2.2.3.35.2) brahmovāca | anaraṇyasya caritaṃ kanyādānasamanvitam | śrutvā papraccha śaileśo vasiṣṭhaṃ sāñjaliḥ punaḥ || ### [2.3.35.3](https://indike.org/pramana/in.purana.siva*complete-2.2.3.35.3) śaileśa uvāca | vasiṣṭha muniśārdūla brahmaputra kṛpānidhe | anaraṇyacaritrante kathitaṃ paramādbhutam || ### [2.3.35.4](https://indike.org/pramana/in.purana.siva*complete-2.2.3.35.4) anaraṇyasutā yasmāt pippalādaṃ muniṃ patim | samprāpya kimakārṣītsā taccaritraṃ mudāvaham || ### [2.3.35.5](https://indike.org/pramana/in.purana.siva*complete-2.2.3.35.5) vasiṣṭha uvāca | pippalādo munivaro vayasā jarjaro'dhikaḥ | gatvā nijāśramaṃ nāryānaraṇyasutayā tayā || ### [2.3.35.6](https://indike.org/pramana/in.purana.siva*complete-2.2.3.35.6) uvāsa tatra suprītyā tapasvī nātilampaṭaḥ | tatrāraṇye girivare sa nityaṃ nijadharmakṛt || ### [2.3.35.7](https://indike.org/pramana/in.purana.siva*complete-2.2.3.35.7) athānaraṇyakanyā sā siṣeve bhaktito munim | karmaṇā manasā vācā lakṣmīrnārāyaṇaṃ yathā || ### [2.3.35.8](https://indike.org/pramana/in.purana.siva*complete-2.2.3.35.8) ekadā svarṇadīṃ snātuṃ gacchantīṃ susmitāṃ ca tām | dadarśa pathi dharmaśca māyayā nṛparūpadhṛk || ### [2.3.35.9](https://indike.org/pramana/in.purana.siva*complete-2.2.3.35.9) cāruratnarathasthaśca nānālaṅkārabhūṣitaḥ | navīnayauvanaśśrīmānkāmadevasamaprabhaḥ || ### [2.3.35.10](https://indike.org/pramana/in.purana.siva*complete-2.2.3.35.10) dṛṣṭvā tāṃ sundarīṃ padmāmuvāca sa vṛṣo vibhuḥ | vijñātuṃ bhāvamantaḥsthaṃ tasyāśca muniyoṣitaḥ || ### [2.3.35.11](https://indike.org/pramana/in.purana.siva*complete-2.2.3.35.11) dharma uvāca | ayi sundari lakṣmīrvai rājayogye manohare | atīva yauvanasthe ca kāmini sthirayauvane || ### [2.3.35.12](https://indike.org/pramana/in.purana.siva*complete-2.2.3.35.12) jarāturasya vṛddhasya pippalādasya vai muneḥ | satyaṃ vadāmi tanvaṅgi samīpe naiva rājase || ### [2.3.35.13](https://indike.org/pramana/in.purana.siva*complete-2.2.3.35.13) vipraṃ tapassu nirataṃ nirghṛṇaṃ maraṇonmukham | tyaktvā māṃ paśya rājendraṃ ratiśūraṃ smarāturam || ### [2.3.35.14](https://indike.org/pramana/in.purana.siva*complete-2.2.3.35.14) prāpnoti sundarī puṇyātsaundaryaṃ pūrvajanmanaḥ | saphalaṃ tadbhavetsarvaṃ rasikāliṅganena ca || ### [2.3.35.15](https://indike.org/pramana/in.purana.siva*complete-2.2.3.35.15) sahasrasundarīkāntaṃ kāmaśāstraviśāradam | kiṅkaraṃ kuru māṃ kānte samparityajya taṃ patim || ### [2.3.35.16](https://indike.org/pramana/in.purana.siva*complete-2.2.3.35.16) nirjane kānane ramye śaile śaile nadītaṭe | viharasva mayā sārdhaṃ janmedaṃ saphalaṃ kuru || ### [2.3.35.17](https://indike.org/pramana/in.purana.siva*complete-2.2.3.35.17) vasiṣṭha uvāca | ityevamuktavantaṃ sā svarathādavaruhya ca | grahītumutsukaṃ haste tamuvāca pativratā || ### [2.3.35.18](https://indike.org/pramana/in.purana.siva*complete-2.2.3.35.18) padmovāca | gaccha dūraṃ gaccha dūraṃ pāpiṣṭhastvaṃ narādhipa | māṃ cetpaśyasi kāmena sadyo naṣṭo bhaviṣyasi || ### [2.3.35.19](https://indike.org/pramana/in.purana.siva*complete-2.2.3.35.19) pippalādaṃ muniśreṣṭhaṃ tapasā pūtavigraham | tyaktvā kathaṃ bhajeyaṃ tvāṃ strījitaṃ ratilampaṭam || ### [2.3.35.20](https://indike.org/pramana/in.purana.siva*complete-2.2.3.35.20) strījitasparśamātreṇa sarvaṃ puṇyaṃ praṇaśyati | strījitaḥ parapāpī ca taddarśanamaghāvaham || ### [2.3.35.21](https://indike.org/pramana/in.purana.siva*complete-2.2.3.35.21) satkriyo hyaśucirnityaṃ sa pumān yaḥ striyā jitaḥ | nindanti pitaro devā mānavāḥ sakalāśca tam || ### [2.3.35.22](https://indike.org/pramana/in.purana.siva*complete-2.2.3.35.22) tasya kiṃ jñāna sutapojapahomaprapūjanaiḥ | vidyayā dānataḥ kiṃ vā strībhiryasya mano hṛtam || ### [2.3.35.23](https://indike.org/pramana/in.purana.siva*complete-2.2.3.35.23) mātaraṃ māṃ striyo bhāvaṃ kṛtvā yena bravīṣi ha | bhaviṣyati kṣayastena kālena mama śāpataḥ || ### [2.3.35.24](https://indike.org/pramana/in.purana.siva*complete-2.2.3.35.24) vasiṣṭha uvāca | śrutvā dharmaḥ satīśāpaṃ nṛpamūrtiṃ vihāya ca | dhṛtvā svamūrtiṃ deveśaḥ kampamāna uvāca saḥ || ### [2.3.35.25](https://indike.org/pramana/in.purana.siva*complete-2.2.3.35.25) dharma uvāca | mātarjānīhi māṃ dharmaṃ jñānināṃ ca gurorgurum | parastrīmātṛbuddhiṃ ca kurvantaṃ satataṃ sati || ### [2.3.35.26](https://indike.org/pramana/in.purana.siva*complete-2.2.3.35.26) ahaṃ tavāntaraṃ jñātumāgatastava sannidhim | tavāhañca mano jāne tathāpi vidhinoditaḥ || ### [2.3.35.27](https://indike.org/pramana/in.purana.siva*complete-2.2.3.35.27) kṛtaṃ me damanaṃ sādhvi na viruddhaṃ yathocitam | śāstiḥ samutpathasthānāmīśvareṇa vinirmitā || ### [2.3.35.28](https://indike.org/pramana/in.purana.siva*complete-2.2.3.35.28) svayaṃ pradātā sarvebhyaḥ sukhaduḥkhavarānkṣamaḥ | sampadaṃ vipadaṃ yo hi namastasmai śivāya hi || ### [2.3.35.29](https://indike.org/pramana/in.purana.siva*complete-2.2.3.35.29) śatruṃ mitraṃ saṃvidhātuṃ prītiñca kalahaṃ kṣamaḥ | sraṣṭuṃ naṣṭuṃ ca yassṛṣṭiṃ namastasmai śivāya hi || ### [2.3.35.30](https://indike.org/pramana/in.purana.siva*complete-2.2.3.35.30) yena śuklīkṛtaṃ kṣīraṃ jale śaityaṃ kṛtaṃ purā | dāhīkṛto hutāśaśca namastasmai śivāya hi || ### [2.3.35.31](https://indike.org/pramana/in.purana.siva*complete-2.2.3.35.31) prakṛtirnirmitā yena tattvāni mahadāditaḥ | brahmaviṣṇumaheśādyā namastasmai śivāya hi || ### [2.3.35.32](https://indike.org/pramana/in.purana.siva*complete-2.2.3.35.32) brahmovāca | ityuktvā puratastasyāstasthau dharmo jagadguruḥ | kiñcinnovāca cakitastatpātivratyatoṣitaḥ || ### [2.3.35.33](https://indike.org/pramana/in.purana.siva*complete-2.2.3.35.33) padmāpi nṛpakanyā sā pippalādapriyā tadā | sādhvī taṃ dharmamājñāya vismitovāca parvata || ### [2.3.35.34](https://indike.org/pramana/in.purana.siva*complete-2.2.3.35.34) padmovāca | tvameva dharma sarveṣāṃ sākṣī nikhilakarmaṇām | kathaṃ mano me vijñātuṃ viḍambayasi māṃ vibho || ### [2.3.35.35](https://indike.org/pramana/in.purana.siva*complete-2.2.3.35.35) yattatsarvaṃ kṛtaṃ brahman nāparādho babhūva me | tvaṃ ca śapto mayājñānātstrīsvabhāvād vṛthā vṛṣa || ### [2.3.35.36](https://indike.org/pramana/in.purana.siva*complete-2.2.3.35.36) kā vyavasthā bhavettasya cintayāmīti sāmpratam | citte sphuratu sā buddhiryayā śaṃ saṃllabhāmi vai || ### [2.3.35.37](https://indike.org/pramana/in.purana.siva*complete-2.2.3.35.37) ākāśo'sau diśaḥsarvā yadi naśyantu vāyavaḥ | tathāpi sādhvīśāpastu na naśyati kadācana || ### [2.3.35.38](https://indike.org/pramana/in.purana.siva*complete-2.2.3.35.38) satye pūrṇaścatuṣpādaḥ paurṇamāsyāṃ yathā śaśī | virājase devarāja sarvakālaṃ divāniśam || ### [2.3.35.39](https://indike.org/pramana/in.purana.siva*complete-2.2.3.35.39) tvaṃ ca naṣṭo bhavasi cetsṛṣṭināśo bhavettadā | itikartavyatāmūḍhā vṛthāpi ca vadāmyaham || ### [2.3.35.40](https://indike.org/pramana/in.purana.siva*complete-2.2.3.35.40) pādakṣayaśca bhavitā tretāyāṃ ca surottama | pādo'pare dvāpare ca tṛtīyo'pi kalau vibho || ### [2.3.35.41](https://indike.org/pramana/in.purana.siva*complete-2.2.3.35.41) kaliśeṣe'khilāśchinnā bhaviṣyanti tavāṅghrayaḥ | punaḥsatye samāyāte paripūrṇo bhaviṣyasi || ### [2.3.35.42](https://indike.org/pramana/in.purana.siva*complete-2.2.3.35.42) satye sarvavyāpakastvaṃ tadanyeṣu ca kutracit | yugavyavasthayā sa tvaṃ bhaviṣyasi yathā tathā || ### [2.3.35.43](https://indike.org/pramana/in.purana.siva*complete-2.2.3.35.43) ityevaṃ vacanaṃ satyaṃ mamāstu sukhadaṃ tava | yāmyahaṃ patisevāyai gaccha tvaṃ svagṛhaṃ vibho || ### [2.3.35.44](https://indike.org/pramana/in.purana.siva*complete-2.2.3.35.44) brahmovāca | ityākarṇya vacastasyāḥ santuṣṭo'bhūd vṛṣaḥ sa vai | tadevaṃvādinīṃ sādhvīmuvāca vidhinandana || ### [2.3.35.45](https://indike.org/pramana/in.purana.siva*complete-2.2.3.35.45) dharma uvāca | dhanyāsi patibhaktāsi svasti te'stu pativrate | varaṃ gṛhāṇa tvatsvāmī tvatparitrāṇakāraṇāt || ### [2.3.35.46](https://indike.org/pramana/in.purana.siva*complete-2.2.3.35.46) yuvā bhavatu te bhartā ratiśūraśca dhārmikaḥ | rūpavān guṇavānvāgmī santatasthirayauvanaḥ || ### [2.3.35.47](https://indike.org/pramana/in.purana.siva*complete-2.2.3.35.47) cirañjīvī sa bhavatu mārkaṇḍeyātparaśśubhe | kuberāddhanavāṃścaiva śakrādaiśvaryavānapi || ### [2.3.35.48](https://indike.org/pramana/in.purana.siva*complete-2.2.3.35.48) śivabhakto harisamassiddhastu kapilātparaḥ | buddhyā bṛhaspatisamaḥ samatvena vidheḥ samaḥ || ### [2.3.35.49](https://indike.org/pramana/in.purana.siva*complete-2.2.3.35.49) svāmisaubhāgyasaṃyuktā bhava tvaṃ jīvanāvadhi | tathā ca subhage devi tvaṃ bhava sthirayauvanā || ### [2.3.35.50](https://indike.org/pramana/in.purana.siva*complete-2.2.3.35.50) mātā tvaṃ daśaputrāṇāṃ guṇināṃ cirajīvinām | svabharturadhikānāṃ ca bhaviṣyasi na saṃśayaḥ || ### [2.3.35.51](https://indike.org/pramana/in.purana.siva*complete-2.2.3.35.51) gṛhā bhavantu te sādhvi sarvasampatsamanvitāḥ | prakāśavantaḥ satataṃ kuberabhavanādhikāḥ || ### [2.3.35.52](https://indike.org/pramana/in.purana.siva*complete-2.2.3.35.52) vasiṣṭha uvāca | ityevamuktvā santasthau dharmaḥ sa girisattama | sā taṃ pradakṣiṇīkṛtya praṇamya svagṛhaṃ yayau || ### [2.3.35.53](https://indike.org/pramana/in.purana.siva*complete-2.2.3.35.53) dharmastathāśiṣo dattvā jagāma nijamandiram | praśaśaṃsa ca tāṃ prītyā padmāṃ saṃsadi saṃsadi || ### [2.3.35.54](https://indike.org/pramana/in.purana.siva*complete-2.2.3.35.54) sā reme svāminā sārdhaṃ yūnā rahasi santatam | paścādbabhūvuḥ satputrāstadbharturadhikā guṇaiḥ || ### [2.3.35.55](https://indike.org/pramana/in.purana.siva*complete-2.2.3.35.55) babhūva sakalā sampaddampatyoḥ sukhavardhinī | sarvānandavṛddhikarī paratreha ca śarmaṇe || ### [2.3.35.56](https://indike.org/pramana/in.purana.siva*complete-2.2.3.35.56) śailendra kathitaṃ sarvamitihāsaṃ purātanam | dampatyośca tayoḥ prītyā śrutaṃ te paramādarāt || ### [2.3.35.57](https://indike.org/pramana/in.purana.siva*complete-2.2.3.35.57) buddhvā tattvaṃ sutāṃ dehi pārvatīmīśvarāya ca | kuruṣaṃ tyaja śailendra menayā svastriyā saha || ### [2.3.35.58](https://indike.org/pramana/in.purana.siva*complete-2.2.3.35.58) saptāhe samatīte tu durlabhe'tiśubhe kṣaṇe | lagnādhipe ca lagnasthe candre svatnayānvite || ### [2.3.35.59](https://indike.org/pramana/in.purana.siva*complete-2.2.3.35.59) mudite rohiṇīyukte viśuddhe candratārake | mārgamāse candravāre sarvadoṣavivarjite || ### [2.3.35.60](https://indike.org/pramana/in.purana.siva*complete-2.2.3.35.60) sarvasadgrahasaṃsṛṣṭe'sadgrahadṛṣṭivarjite | sadapatyaprade jīve patisaubhāgyadāyini || ### [2.3.35.61](https://indike.org/pramana/in.purana.siva*complete-2.2.3.35.61) jagadambāṃ jagatpitre mūlaprakṛtimīśvarīm | kanyāṃ pradāya girijāṃ kṛtī tvaṃ bhava parvata || ### [2.3.35.62](https://indike.org/pramana/in.purana.siva*complete-2.2.3.35.62) brahmovāca | ityuktvā muniśārdūlo vasiṣṭho jñānisattamaḥ | virarāma śivaṃ smṛtvā nānālīlākaraṃ prabhum || ### [2.3.35.62.c1](https://indike.org/pramana/in.purana.siva*complete-2.2.3.35.62.c1) iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe padmāpippalādacaritavarṇanaṃ nāma pañcatriṃśo'dhyāyaḥ || ### [2.3.35.62.p2](https://indike.org/pramana/in.purana.siva*complete-2.2.3.35.62.p2) śrīgaṇeśāya namaḥ || ### [2.3.35.62.p3](https://indike.org/pramana/in.purana.siva*complete-2.2.3.35.62.p3) śrīgaurīśaṅkarābhyāṃ namaḥ || ### [2.3.35.62.p4](https://indike.org/pramana/in.purana.siva*complete-2.2.3.35.62.p4) śrīśivamahāpurāṇam || ### [2.3.35.62.p5](https://indike.org/pramana/in.purana.siva*complete-2.2.3.35.62.p5) dvitīyāyāṃ rudrasaṃhitāyāṃ tṛtīyaḥ pārvatīkhaṇḍe ## Linked texts (4) - [Brahmavaivartapurāṇa](https://indike.org/pramana/in.purana.brahmavaivarta.3.40.3) — Vyāsa, Sanskrit - [Janmakhaṇḍa](https://indike.org/pramana/in.sampradaya.general.sakta.janmakhanda.43.1) — Sanskrit - [Kṛṣṇajanmakhaṇḍa](https://indike.org/pramana/in.purana.krsnajanmakhanda.52.5) — Sanskrit - [Bṛhatkathākośa](https://indike.org/pramana/in.jaina.post.katha.brhatkathakosa.199.30) — Hariṣeṇa, Sanskrit --- Source: [https://indike.org/pramana/in.purana.siva*complete-2.2.3.35](https://indike.org/pramana/in.purana.siva*complete-2.2.3.35) · Pramāṇa