Shivapurana 2.3.36: ṣaṭtriṃśo'dhyāyaḥ | himālayasya śivāya kālīpradānaniścayavarṇanam
Śivapurāṇa (complete text) 2.3.36
- Language
- Sanskrit
Contents
- 2.3.36.34 — 5 parts
ṣaṭtriṃśo'dhyāyaḥ | himālayasya śivāya kālīpradānaniścayavarṇanam
2.3.36.1
brahmovāca |
vasiṣṭhasya vacaḥ śrutvā sagaṇo'pi himālayaḥ |
vismito bhāryayā śailānuvāca sa girīśvaraḥ ||
2.3.36.2
himālaya uvāca |
he mero girirāṭ sahya gandhamādana mandara |
maināka vindhya śailendrāḥ sarve śṛṇuta madvacaḥ ||
2.3.36.3
vasiṣṭho hi vadatyevaṃ kiṃ me kāryaṃ vicāryate |
yathā tathā ca śaṃsadhvaṃ nirṇīya manasākhilam ||
2.3.36.4
brahmovāca |
tacchutvā vacanaṃ tasya sumerupramukhāśca te |
procurhimālayaṃ prītyā sunirṇīya mahīdharāḥ ||
2.3.36.5
śailā ūcuḥ |
adhunā kiṃ vimarśena kṛtaṃ kāryaṃ tathaiva hi |
utpanneyaṃ mahābhāga devakāryārthameva hi ||
2.3.36.6
pradātavyā śivāyeti śivasyārthe'vatāriṇī |
anayārādhito rudro rudreṇa yadi bhāṣitā ||
2.3.36.7
brahmovāca |
etacchrutvā vacasteṣāṃ mervādīnāṃ himācalaḥ |
suprasannataro'bhūd vai jahāsa girijā hṛdi ||
2.3.36.8
arundhatī ca tāṃ menāṃ bodhayāmāsa kāraṇāt |
nānāvākyasamūhenetihāsairvividhairapi ||
2.3.36.9
atha sā menakā śailapatnī buddhvā prasannadhīḥ |
munīnarundhatīṃ śailaṃ bhojayitvā bubhoja ca ||
2.3.36.10
atha śailavaro jñānī susaṃsevya munīṃśca tān |
uvāca sāñjaliḥ prītyā prasannātmā gatabhramaḥ ||
2.3.36.11
himācala uvāca |
saptarṣayo mahābhāgā vacaḥ śṛṇuta māmakam |
vismayo me gataḥ sarvaḥ śivayoścaritaṃ śrutam ||
2.3.36.12
madīyaṃ ca śarīraṃ vai patnī menā sutā sutāḥ |
ṛddhiḥ siddhiśca cānyadvai śivasyaiva na cānyathā ||
2.3.36.13
brahmovāca |
ityuktvā sa tadā putrīṃ dṛṣṭvā tatsādaraṃ ca tām |
bhūṣayitvā tadaṅgāni ṛṣyutsaṅge nyaveśayat ||
2.3.36.14
uvāca ca punaḥ prītyā śailarāja ṛṣīṃstadā |
ayaṃ bhāgo mayā tasmai dātavya iti niścitam ||
2.3.36.15
ṛṣaya ūcuḥ |
śaṅkaro bhikṣukaste'tha svayaṃ dātā bhavān gire |
bhaikṣyañca pārvatī devī kimataḥ paramuttamam ||
2.3.36.16
himavan śikharāṇānte yaddhetoḥ sadṛśī gatiḥ |
dhanyastvaṃ sarvaśailānāmadhipaḥ sarvato varaḥ ||
2.3.36.17
brahmovāca |
evamuktvā tu kanyāyai munayo vimalāśayāḥ |
āśiṣaṃ dattavantaste śivāya sukhadā bhava ||
2.3.36.18
spṛṣṭvā kareṇa tāṃ tatra kalyāṇaṃ te bhaviṣyati |
śuklapakṣe yathā candro vardhantāṃ tvadguṇāstathā ||
2.3.36.19
ityuktvā munayaḥ sarve dattvā te giraye mudā |
puṣpāṇi phalayuktāni pratyayaṃ cakrire tadā ||
2.3.36.20
arundhatī tadā tatra menāṃ sā sumukhī mudā |
guṇaiśca lobhayāmāsa śivasya paramā satī ||
2.3.36.21
haridrākuṅkumaiḥ śailaśmaśrūṇi pratyamārjayat |
laukikācāramādhāya maṅgalāyanamuttamam ||
2.3.36.22
tataśca te caturthe'hni sandhārya lagnamuttamam |
parasparaṃ ca santuṣya sañjagmuḥ śivasannidhim ||
2.3.36.23
tatra gatvā śivaṃ natvā stutvā vividhasūktibhiḥ |
ūcuḥ sarve vasiṣṭhādyā munayaḥ parameśvaram ||
2.3.36.24
ṛṣaya ūcuḥ |
devadeva mahādeva parameśa mahāprabho |
śṛṇvasmadvacanaṃ prītyā yatkṛtaṃ sevakaistava ||
2.3.36.25
bodhito girirājaśca menā vividhasūktibhiḥ |
setihāsaṃ maheśāna prabuddho'sau na saṃśayaḥ ||
2.3.36.26
vākyadattā girīndreṇa pārvatī te hi nānyathā |
udvāhāya pragaccha tvaṃ gaṇairdevaiśca saṃyutaḥ ||
2.3.36.27
gaccha śīghraṃ mahādeva himācalagṛhaṃ prabho |
vivāhaya yathā rītiḥ pārvatīmātmajanmane ||
2.3.36.28
brahmovāca |
tacchrutvā vacanaṃ teṣāṃ laukikācāratatparaḥ |
prahṛṣṭātmā maheśānaḥ prahasyedamuvāca saḥ ||
2.3.36.29
maheśa uvāca |
vivāho hi mahābhāgā na dṛṣṭo na śruto mayā |
yathā purā bhavadbhistadvidhiḥ procyo viśeṣataḥ ||
2.3.36.30
brahmovāca |
tadākarṇya maheśasya laukikaṃ vacanaṃ śubham |
pratyūcuḥ prahasantaste devadevaṃ sadāśivam ||
2.3.36.31
ṛṣaya ūcuḥ |
viṣṇumāhūya vai śīghraṃ sasamājaṃ viśeṣataḥ |
brahmāṇaṃ sasutaṃ prītyā tathā devaṃ śatakratum ||
2.3.36.32
tathā ṛṣigaṇānsarvān yakṣagandharvakinnarān |
siddhān vidyādharāṃścaiva tathā caivāpsarogaṇān ||
2.3.36.33
etāṃścānyānprabho sarvānānayasveha sādaram |
sarvaṃ saṃsādhayiṣyanti tvatkāryaṃ te na saṃśayaḥ ||
2.3.36.34
brahmovāca |
ityuktvā sapta ṛṣayastadājñāṃ prāpya te mudā |
svadhāma prayayuḥ sarve śaṃsantaḥ śaṅkarīṃ gatim ||
2.3.36.34.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe saptarṣivacanaṃ nāma ṣaṭtriṃśo'dhyāyaḥ ||
2.3.36.34.p2
śrīgaṇeśāya namaḥ ||
2.3.36.34.p3
śrīgaurīśaṅkarābhyāṃ namaḥ ||
2.3.36.34.p4
śrīśivamahāpurāṇam ||
2.3.36.34.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe