Shivapurana 2.3.37: saptatriṃśo'dhyāyaḥ | pārvatīvivāhasambhārasaṅgrahavarṇanam
Śivapurāṇa (complete text) 2.3.37
- Language
- Sanskrit
Contents
saptatriṃśo'dhyāyaḥ | pārvatīvivāhasambhārasaṅgrahavarṇanam
2.3.37.1
nārada uvāca |
tāta prājña vadedānīṃ saptarṣiṣu gateṣu ca |
kimakārṣīddhimagiristanme kṛtvā kṛpāṃ prabho ||
2.3.37.2
brahmovāca |
gateṣu teṣu muniṣu saptasvapi munīśvara |
sārundhatīṣu himavān yadakārṣīd bravīmi te ||
2.3.37.3
tata āmantrya svabhrātṝn mervādīn sasutapriyaḥ |
mahāmanāḥ sa mumude himavān parvateśvaraḥ ||
2.3.37.4
tadājñaptastataḥ prītyā himavān lagnapatrikām |
lekhayāmāsa suprītyā gargeṇa svapurodhasā ||
2.3.37.5
atha prasthāpayāmāsa tāṃ śivāya sa patrikām |
nānāvidhāstu sāmagryaḥ svajanairmuditātmabhiḥ ||
2.3.37.6
te janāstatra gatvā ca kailāse śivasannidhim |
daduḥ śivāya tatpatraṃ tilakaṃ saṃvidhāya ca ||
2.3.37.7
sammānitā viśeṣeṇa prabhuṇā ca yathocitam |
sarve te prītimanasa ājagmuḥ śailasannidhim ||
2.3.37.8
sammānitānviśeṣeṇa maheśenāgatān janān |
dṛṣṭvā suharṣitān śailo mumodātīva cetasi ||
2.3.37.9
tato nimantraṇaṃ cakre svabandhūnāṃ pramoditaḥ |
nānādeśasthitānāṃ ca nikhilānāṃ sukhāspadam ||
2.3.37.10
tataḥ sa kārayāmāsa svannasaṅgrahamādarāt |
nānāvidhāśca sāmagrīrvivāhakaraṇocitāḥ ||
2.3.37.11
taṇḍulānāṃ bahūn śailān pṛthukānāṃ tathaiva ca |
guḍānāṃ śarkarāṇāṃ ca lavaṇānāṃ tathaiva ca ||
2.3.37.12
kṣīrāṇāṃ ca ghṛtānāṃ ca dadhnāṃ vāpīścakāra saḥ |
yavādidhānyapiṣṭānāṃ laḍḍukānāṃ tathaiva ca ||
2.3.37.13
śaṣkulīnāṃ svastikānāṃ śarkarāṇāṃ tathaiva ca |
amṛtekṣurasānāṃ ca tatra vāpīścakāra saḥ ||
2.3.37.14
bahvīrhaiyaṅgavānāṃ ca hyāsavānāṃ tathaiva ca |
nānā pakvānnasaṅghāṃśca mahāsvādurasām̐stathā ||
2.3.37.19
nānā vyañjanavastūni gaṇadevahitāni ca |
amūlyanānāvastrāṇi vahniśaucāni yāni ca ||
2.3.37.16
maṇiratnaprakārāṇi suvarṇarajatāni ca |
dravyāṇyetāni cānyāni saṅgṛhya vidhipūrvakam ||
2.3.37.17
maṅgalaṃ kartumārebhe girirmaṅgalakṛddine |
saṃskāraṃ kārayāmāsuḥ pārvatyāḥ parvatastriyaḥ ||
2.3.37.18
tā maṅgalaṃ mudā cakrurbhūṣitā bhūṣaṇaiḥ svayam |
puradvijastriyo hṛṣṭā lokācāraṃ pracakrire ||
2.3.37.19_2
sotsavaṃ vividhaṃ tatra sumaṅgalapurassaram |
himālayo'pi hṛṣṭātmā kṛtvācāraṃ sumaṅgalam ||
2.3.37.20
sarvabhāvena suprīto bandhuvargāgamotsukaḥ |
etasminnantare tasya bāndhavāśca nimantritāḥ ||
2.3.37.21
ājagmuḥ sastriyo hṛṣṭāḥ sasutāḥ saparicchadāḥ |
tadeva śṛṇu devarṣe giryāgamanamādṛtaḥ ||
2.3.37.22
varṇayāmi samāsena śivaprītivivṛddhaye |
devālayagiriryo hi divyarūpadharo mahān ||
2.3.37.23
nānāratnaparibhrājatsamājaḥ saparicchadaḥ |
nānāmaṇimahāratnasāramādāya yatnataḥ ||
2.3.37.24
suveṣālaṅkṛtaḥ śrīmān jagāma sa himālayam |
mandaraḥ sarvaśobhāḍhyaḥ sanārītanayo giriḥ ||
2.3.37.25
sūpāyanāni saṅgṛhya jagāma vividhāni ca |
astācalo'pi divyātmā sopāyana udāradhīḥ ||
2.3.37.26
bahuśobhāsamāyukta ājagāma mudānvitaḥ |
udayācala ādāya sadratnāni maṇīnapi ||
2.3.37.27
atyutkṛṣṭaparīvāra ājagāma mahāsukhī |
malayo girirājo hi saparīvāra ādṛtaḥ ||
2.3.37.28
sudivyaracanāyukta āyayau bahusadbalaḥ |
sadyo darduranāmā ca muditaḥ sakalatrakaḥ ||
2.3.37.29
bahuśobhānvitastāta yayau himagirergṛham |
niṣado'pi prahṛṣṭātmā saparicchada āyayau ||
2.3.37.30
sasutastrīgaṇaḥ prītyā yayau himagirergṛham |
ājagāma mahābhāgyo bhūdharo gandhamādanaḥ ||
2.3.37.31
karavīrastathaivāpi mahāvibhavasaṃyutaḥ |
mahendraḥ parvataśreṣṭha ājagāma himālayam ||
2.3.37.32
sagaṇaḥ sasutastrīko bahuśobhāsamanvitaḥ |
pāriyātro hi hṛṣṭātmā maṇiratnākarairyutaḥ ||
2.3.37.32.p1
sagaṇaḥ saparīvāra āyayau himabhūdharam |
krauñcaḥ parvatarājo hi mahābalaparicchadaḥ |
ājagāma giriśreṣṭhaḥ samupāyana ādṛtaḥ | 33 ||
2.3.37.34
puruṣottamaśailo'pi saparicchada ādṛtaḥ |
mahopāyanamādāyājagāma himabhūdharam ||
2.3.37.35
nīlaḥ salīlaḥ sasutaḥ sastrīko dravyasaṃyutaḥ |
ājagāma himāgasya gṛhamānandasaṃyutaḥ ||
2.3.37.36
trikūṭaścitrakūṭo'pi veṅkaṭaḥ śrīgiristathā |
gokāmukhī nāradaśca himagehamupāgamat ||
2.3.37.37
vindhyaśca parvataśreṣṭho nānāsampatsamanvitaḥ |
ājagāma prahṛṣṭātmā sadāratanayaḥ śubhaḥ ||
2.3.37.38
kālañjaro mahāśailo bahuharṣasamanvitaḥ |
bahubhiḥ svagaṇaiḥ prītyājagāma himabhūdharam ||
2.3.37.39
kailāsastu mahāśailo mahāharṣasamanvitaḥ |
ājagāma kṛpāṃ kṛtvā sarvopari lasatprabhuḥ ||
2.3.37.40
anye'pi bhūbhṛto ye hi dvīpeṣvanyeṣvapi dvija |
ihāpi ye'calāḥ sarve āyayuste himālayam ||
2.3.37.41
nimantritā nagāstatra tena pūrvaṃ mudā mune |
āyayurnikhilāḥ prītyā vivāhaśśivayoriti ||
2.3.37.42
tadā sarve samāyātāḥ śoṇabhadrādayaḥ khalu |
bahuśobhā mahāprītyā vivāhaśśivayoriti ||
2.3.37.43
nadyaḥ sarvāḥ samāyātā nānālaṅkārasaṃyutāḥ |
divyarūpadharāḥ prītyā vivāhaśśivayoriti ||
2.3.37.44
godāvarī ca yamunā brahmastrīrveṇikā tathā |
āyayau himaśailaṃ vai vivāhaśśivayoriti ||
2.3.37.45
gaṅgā tu sumahāprītyā nānālaṅkārasaṃyutā |
divyarūpāyayau prītyā vivāhaśśivayoriti ||
2.3.37.46
narmadā tu mahāmodā rudrakanyā saridvarā |
mahāprītyājagāmāśu vivāhaśśivayoriti ||
2.3.37.47
āgataistaistataḥ sarvaiḥ sarvato himabhūdharam |
saṅkulāsītpurī divyā sarvaśobhāsamanvitā ||
2.3.37.48
mahotsavā lasatketudhvajātoraṇakādhikā |
vitānavinivṛttārkā tathā nānālasatprabhā ||
2.3.37.49
himālayo'pi suprītyādareṇa vividhena ca |
teṣāṃ cakāra sammānaṃ tāsāṃ caiva yathāyatham ||
2.3.37.50
sarvānnivāsayāmāsa susthāneṣu pṛthak pṛthak |
sāmagrībhiranekābhistoṣayāmāsa kṛtsnaśaḥ ||
2.3.37.50.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe lagnapatrasampreṣaṇasāmagrīsaṅgrahaśailāgamanavarṇanaṃ nāma saptatriṃśo'dhyāyaḥ ||
2.3.37.50.p2
śrīgaṇeśāya namaḥ ||
2.3.37.50.p3
śrīgaurīśaṅkarābhyāṃ namaḥ ||
2.3.37.50.p4
śrīśivamahāpurāṇam ||
2.3.37.50.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Brahmavaivartapurāṇa — Vyāsa, Sanskrit