Shivapurana 2.3.38: aṣṭatriṃśo'dhyāyaḥ | vivāhamaṇḍapādiracanāvarṇanam
Śivapurāṇa (complete text) 2.3.38
- Language
- Sanskrit
Contents
- 2.3.38.40 — 5 parts
aṣṭatriṃśo'dhyāyaḥ | vivāhamaṇḍapādiracanāvarṇanam
2.3.38.1
brahmovāca |
atha śaileśvaraḥ prīto himavānmunisattama |
svapuraṃ racayāmāsa vicitraṃ paramotsavam ||
2.3.38.2
siktamārgaṃ saṃskṛtaṃ ca śobhitaṃ paramarddhibhiḥ |
dvāri dvāri ca rambhādi maṅgalaṃ dravyasaṃyutam ||
2.3.38.3
prāṅgaṇaṃ racayāmāsa rambhāstambhasamanvitam |
paṭṭasūtraiḥ sannibaddhaṃ rasālapallavānvitam ||
2.3.38.4
mālatīmālyasaṃyuktaṃ lasattoraṇasuprabham |
śobhitaṃ maṅgaladravyaiścaturdikṣu sthitaiḥ śubhaiḥ ||
2.3.38.5
tathaiva sarvaṃ parayā mudānvita-ścakre girīndraḥ svasutārthameva |
gargaṃ puraskṛtya mahāprabhāvaṃ prastāvayogyaṃ ca sumaṅgalaṃ hi ||
2.3.38.6
āhūya viśvakarmāṇaṃ kārayāmāsa sādaram |
maṇḍapaṃ ca suvistīrṇaṃ vedikādimanoharam ||
2.3.38.7
ayutena surarṣe tadyojanānāṃ ca vistṛtam |
anekalakṣaṇopetaṃ nānāścaryasamanvitam ||
2.3.38.8
sthāvaraṃ jaṅgamaṃ sarvaṃ sadṛśaṃ tairmanoharam |
sarvato'dbhutasarvasvaṃ nānāvastucamatkṛtam ||
2.3.38.9
jaṅgamaṃ vijitaṃ tatra sthāvareṇa viśeṣataḥ |
jaṅgamena ca tatrāsījjitaṃ sthāvarameva hi ||
2.3.38.10
payasā ca jitā tatra sthalabhūmirna cānyathā |
jalaṃ kiṃ hi sthalaṃ kiṃ hi na viduḥ ke'pi kovidāḥ ||
2.3.38.11
kvacitsiṃhāḥ kṛtrimāśca kvacitsārasapaṅktayaḥ |
kvacicchikhaṇḍinastatra kṛtrimāśca manoharāḥ ||
2.3.38.12
kvacitstriyaḥ kṛtrimāśca nṛtyantyaḥ puruṣaissaha |
mohayantyo janānsarvānpaśyantyaḥ kṛtrimāstathā ||
2.3.38.13
tathā tenaiva vidhinā dvārapālā manoharāḥ |
hastairdhanūṃṣi coddhṛtya sthāvarā jaṅgamopamāḥ ||
2.3.38.14
dvāri sthitā mahālakṣmīḥ kṛtrimā racitādbhutā |
sarvalakṣaṇasaṃyuktāgatā sākṣātpayorṇavāt ||
2.3.38.15
gajāścālaṅkṛtā hyāsankṛtrimā akṛtopamāḥ |
tathāśvāḥ sādibhiścaiva gajāśca gajasādibhiḥ ||
2.3.38.16
rathā rathibhirākṛṣṭā mahāścaryasamanvitāḥ |
vāhanāni tathānyāni pattayaḥ kṛtrimāstathā ||
2.3.38.17
evaṃ vimohanārthaṃ tu kṛtaṃ vai viśvakarmaṇā |
devānāṃ ca munīnāṃ ca tena prītātmanā mune ||
2.3.38.18
mahādvāri sthito nandī kṛtrimaśca kṛto mune |
śuddhasphaṭikasaṅkāśo yathā nandī tathaiva saḥ ||
2.3.38.19
tasyopari mahādivyaṃ puṣpakaṃ ratnabhūṣitam |
rājitaṃ pallavaiḥ śubhraiścāmaraiśca suśobhitam ||
2.3.38.20
vāmapārśve gajau dvau ca śuddhakāśmīrasannibhau |
caturdantau ṣaṣṭivarṣau bhedamānau mahāprabhau ||
2.3.38.21
tathaivārkanibhau tena kṛtau cāśvau mahāprabhau |
cāmarālaṅkṛtau divyau divyālaṅkārabhūṣitau ||
2.3.38.22
daṃśitā vararatnāḍhyā lokapālāstathaiva ca |
sarve devā yathārthaṃ vai kṛtā vai viśvakarmaṇā ||
2.3.38.23
tathā hi ṛṣayaḥsarve bhṛgvādyāśca tapodhanāḥ |
anye hyupasurāstadvatsiddhāścānye'pi vai kṛtāḥ ||
2.3.38.24
viṣṇuśca pārṣadaiḥ sarvairgaruḍākhyaiḥ samanvitaḥ |
kṛtrimo nirmitastadvatparamāścaryarūpavān ||
2.3.38.25
tathaivāhaṃ sutairvedaissiddhaiśca parivāritaḥ |
kṛtrimo nirmitastadvatpaṭhansūktāni nārada ||
2.3.38.26
airāvatagajārūḍhaḥ śakraḥ svadalasaṃyutaḥ |
kṛtrimo nirmitastadvatparipūrṇendusannibhaḥ ||
2.3.38.27
kiṃ bahūktena devarṣe sarvo vai viśvakarmaṇā |
himāgapreritenāśu klṛptaḥsurasamājakaḥ ||
2.3.38.28
evambhūtaḥ kṛtastena maṇḍapo divyarūpavān |
anekāścaryasambhūto mahāndevavimohanaḥ ||
2.3.38.29
athājñapto girīśena viśvakarmā mahāmatiḥ |
nivāsārthaṃ surādīnāṃ tattallokān hi yatnataḥ ||
2.3.38.30
tatraiva ca mahāmañcāḥ suprabhāḥ paramādbhutāḥ |
racitāḥsukhadā divyāsteṣāṃ vai viśvakarmaṇā ||
2.3.38.31
tathā sa satyalokaṃ vai virece kṣaṇato'dbhutam |
dīptyā paramayā yuktaṃ nivāsārthaṃ svayambhuvaḥ ||
2.3.38.32
tathaiva viṣṇostvaparaṃ vaikuṇṭhākhyaṃ mahojjvalam |
virece kṣaṇato divyaṃ nānāścaryasamanvitam ||
2.3.38.33
amareśagṛhaṃ divyaṃ tathaivādbhutamuttamam |
virece viśvakarmāsau sarvaiśvaryasamanvitam ||
2.3.38.34
gṛhāṇi lokapālānāṃ virece sundarāṇi ca |
tadvatsa prītito divyānyadbhutāni mahānti ca ||
2.3.38.35
anyeṣāmamarāṇāṃ ca sarveṣāṃ kramaśastathā |
sadanāni vicitrāṇi racitāni ca tena vai ||
2.3.38.36
viśvakarmā mahābuddhiḥ prāptaśambhumahāvaraḥ |
virece kṣaṇataḥ sarvaṃ śivatuṣṭyarthameva ca ||
2.3.38.37
tathaiva citraṃ paramaṃ mahojjvalaṃ mahāprabhaṃ devavaraiḥ supūjitam |
girīśacihnaṃ śivalokasaṃsthitaṃ suśobhitaṃ śambhugṛhaṃ cakāra ||
2.3.38.38
evambhūtā kṛtā tena racanā viśvakarmaṇā |
vicitrā śivatuṣṭyarthaṃ parāścaryā mahojjvalā ||
2.3.38.39
evaṃ kṛtvākhilaṃ cedaṃ vyavahāraṃ ca laukikam |
paryaikṣiṣṭa mudā śambhvāgamanaṃ sa himācalaḥ ||
2.3.38.40
iti proktamaśeṣeṇa vṛttāntaṃ pramudāvaham |
himālayasya devarṣe kiṃ bhūyaḥ śrotumicchasi ||
2.3.38.40.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe maṇḍapādiracanāvarṇanaṃ nāmāṣṭatriṃśo'dhyāyaḥ ||
2.3.38.40.p2
śrīgaṇeśāya namaḥ ||
2.3.38.40.p3
śrīgaurīśaṅkarābhyāṃ namaḥ ||
2.3.38.40.p4
śrīśivamahāpurāṇam ||
2.3.38.40.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Sāmbapurāṇa — Sanskrit