Shivapurana 2.3.39: ekonacatvāriṃśo'dhyāyaḥ | śivavarayātrāvarṇanam
Śivapurāṇa (complete text) 2.3.39
- Language
- Sanskrit
Contents
- 2.3.39.62 — 5 parts
ekonacatvāriṃśo'dhyāyaḥ | śivavarayātrāvarṇanam
2.3.39.1
nārada uvāca |
vidhe tāta mahāprājña viṣṇuśiṣya namo'stu te |
adbhuteyaṃ kathāśrāvi tvatto'smābhiḥ kṛpānidhe ||
2.3.39.2
idānīṃ śrotumicchāmi caritaṃ śaśimaulinaḥ |
vaivāhikaṃ sumāṅgalyaṃ sarvāghaughavināśanam ||
2.3.39.3
kiṃ cakāra mahādevaḥ prāpya maṅgalapatrikām |
tāṃ śrāvaya kathāṃ divyāṃ śaṅkarasya parātmanaḥ ||
2.3.39.4
brahmovāca |
śṛṇu vatsa mahāprājña śāṅkaraṃ paramaṃ yaśaḥ |
yaccakāra mahādevaḥ prāpya maṅgalapatrikām ||
2.3.39.5
atha śambhurgṛhītvā tāṃ mudā maṅgalapatrikām |
vijahāsa prahṛṣṭātmā mānaṃ teṣāṃ vyadhādvibhuḥ ||
2.3.39.6
vācayitvā ca tāṃ samyagsvīcakāra vidhānataḥ |
tajjanānyāpayāmāsa bahusammānya cādṛtaḥ ||
2.3.39.7
uvāca munivargāṃstānkāryaṃ samyak kṛtaṃ śubham |
āgantavyaṃ vivāhe me vivāhaḥ svīkṛto mayā ||
2.3.39.8
ityākarṇya vacaḥ śambhoḥ prahṛṣṭāste praṇamya tam |
parikramya yayurdhāma śaṃsantaḥ svaṃ vidhiṃ param ||
2.3.39.9
atha deveśvaraḥ śambhuḥ sāmarastavāṃ mune drutam |
laukikācāramāśritya mahālīlākaraḥ prabhuḥ ||
2.3.39.10
tvamāgataḥ paraprītyā praśaṃsaṃstvaṃ vidhiṃ param |
praṇamaṃśca nataskandho vinītātmā kṛtāñjaliḥ ||
2.3.39.11
astaussujayaśabdāni samuccārya muhurmuhuḥ |
nideśaṃ prārthayaṃstasya praśaṃsaṃstvaṃ vidhimmune ||
2.3.39.12
tataḥ śambhuḥ prahṛṣṭātmā darśayam̐llaukikīṃ gatim |
uvāca munivarya tvāṃ prīṇayan śubhayā girā ||
2.3.39.13
śiva uvāca |
prītyā śṛṇu muniśreṣṭha hyasmatto'dya vadāmi te |
bruve tattvāṃ priyo me yadbhaktarājaśiromaṇiḥ ||
2.3.39.14
kṛtaṃ mahattapo devyā pārvatyā tava śāsanāt |
tasyai varo mayā dattaḥ patitve toṣitena vai ||
2.3.39.15
kariṣye'haṃ vivāhaṃ ca tasyā vaśyo hi bhaktitaḥ |
saptarṣibhiḥ sādhitaṃ ca tallagnaṃ śodhitaṃ ca taiḥ ||
2.3.39.16
adyataḥsaptame cāhni tadbhaviṣyati nārada |
mahotsavaṃ kariṣyāmi laukikīṃ gatimāśritaḥ ||
2.3.39.17
brahmovāca |
iti śrutvā vacastasya śaṅkarasya parātmanaḥ |
prasannadhīḥ prabhuṃ natvā tāta tvaṃ vākyamabravīḥ ||
2.3.39.18
nārada uvāca |
bhavatastu vratamidaṃ bhaktavaśyo bhavānmataḥ |
samyak kṛtaṃ ca bhavatā pārvatīmānasepsitam ||
2.3.39.19
kāryaṃ matsadṛśaṃ kiñcitkathanīyaṃ tvayā vibho |
matvā svasevakaṃ māṃ hi kṛpāṃ kuru namo'stu te ||
2.3.39.20
brahmovāca |
ityuktastu tvayā śambhuḥ śaṅkaro bhaktavatsalaḥ |
pratyuvāca prasannātmā sādaraṃ tvāṃ munīśvara ||
2.3.39.21
śiva uvāca |
viṣṇuprabhṛtidevāṃśca munīn siddhānapi dhruvam |
tvaṃ nimantraya madvāṇyā mune'nyānapi sarvataḥ ||
2.3.39.22
sarva āyāntu sotsāhāḥ sarvaśobhāsamanvitāḥ |
sastrīsutagaṇāḥ prītyā mama śāsanagauravāt ||
2.3.39.23
nāgamiṣyanti ye tvatra madvivāhotsave mune |
te svakīyā na mantavyā mayā devādayaḥ khalu ||
2.3.39.24
brahmovāca |
itīśājñāṃ tato dhṛtvā bhavān śaṅkaravallabhaḥ |
sarvānnimantrayāmāsa taṃ taṃ gatvā drutaṃ mune ||
2.3.39.25
śambhūpakaṇṭhamāgatya drutaṃ munivaro bhavān |
tad hūtyāttatra santasthau tadājñāṃ prāpya nārada ||
2.3.39.26
śivo'pi tasthau sotkaṇṭhastadāgamanalālasaḥ |
svagaṇaiḥsotsavaiḥ sarvairnṛtyadbhiḥ sarvato diśam ||
2.3.39.27
etasminneva kāle tu racayitvā svaveṣakam |
ājagāmācyutaḥ śīghraṃ kailāsaṃ saparicchadaḥ ||
2.3.39.28
śivaṃ praṇamya sadbhaktyā sadāraḥ sadalo mudā |
tadājñāṃ prāpya santasthau susthāne prītamānasaḥ ||
2.3.39.29
tathāhaṃ svagaṇairāśu kailāsamagamaṃ mudā |
prabhuṃ praṇamyātiṣṭhaṃ vai sānandaḥ svagaṇānvitaḥ ||
2.3.39.30
indrādayo lokapālā āyayuḥ saparicchadāḥ |
tathaivālaṅkṛtāssarve sotsavāssakalatrakāḥ ||
2.3.39.31
tathaivaṃ munayo nāgāssiddhā upasurāstathā |
āyayuścāpare'pīha sotsavāḥ sunimantritāḥ ||
2.3.39.32
maheśvarastadā tatrāgatānāṃ ca pṛthak pṛthak |
sarveṣāmamarādyānāṃ satkāraṃ vyadadhānmudā ||
2.3.39.33
athotsavo mahānāsītkailāse paramo'dbhutaḥ |
nṛtyādikaṃ tadā cakruryathāyogyaṃ surastriyaḥ ||
2.3.39.34
etasminsamaye devā viṣṇvādyā ye samāgatāḥ |
yātrāṃ kārayituṃ śambhostatroṣuste'khilā mune ||
2.3.39.35
śivājñaptāstadā sarve madīyamiti yantritāḥ |
śivakāryamidaṃ sarvaṃ cakrire śivasevanam ||
2.3.39.36
mātaraḥ sapta tāstatra śivabhūṣāvidhiṃ param |
cakrire ca mudā yuktā yathāyogyaṃ tathā punaḥ ||
2.3.39.37
tasya svābhāviko veṣo bhūṣāvidhirabhūttadā |
tasyecchayā muniśreṣṭha parameśasya suprabhoḥ ||
2.3.39.38
candraśca mukuṭasthāne sānnidhyamakarottadā |
locanaṃ sundaraṃ hyāsīttṛtīyaṃ tilakaṃ śubham ||
2.3.39.39
karṇābharaṇarūpau ca yau hi sarpau prakīrtitau |
kuṇḍale'bhavatāṃ tasya nānāratnānvite mune ||
2.3.39.40
anyāṅgasaṃsthitāḥ sarpāḥ tadaṅgābharaṇāni ca |
babhūvuratiramyāṇi nānāratnamayāni ca ||
2.3.39.41
vibhūtiraṅgarāgo'bhūccandanādisamudbhavaḥ |
taddukūlamabhūddivyaṃ gajacarmādi sundaram ||
2.3.39.42
īdṛśaṃ sundaraṃ rūpaṃ jātaṃ varṇātiduṣkaram |
īśvaro'pi svayaṃ sākṣādaiśvaryaṃ labdhavān svataḥ ||
2.3.39.43
tataśca sarve surapakṣadānavā nāgāḥ pataṅgāpsaraso maharṣayaḥ |
sametya sarve śivasannidhiṃ tadā mahotsavāḥ procuraho mudānvitāḥ ||
2.3.39.44
sarva ūcuḥ |
gaccha gaccha mahādeva vivāhārthaṃ maheśvara |
girijāyā mahādevyāḥ sahāsmābhiḥ kṛpāṃ kuru ||
2.3.39.45
tato viṣṇuruvācedaṃ prastāvasadṛśaṃ vacaḥ |
praṇamya śaṅkaraṃ bhaktyā vijñānaprītamānasaḥ ||
2.3.39.46
viṣṇuruvāca |
deva deva mahādeva śaraṇāgatavatsala |
kāryakartā svabhaktānāṃ vijñaptiṃ śṛṇu me prabho ||
2.3.39.47
gṛhyoktavidhinā śambho svavivāhasya śaṅkara |
girīśasutayā devyā karma kartumihārhasi ||
2.3.39.48
tvayā ca kriyamāṇe tu vivāhasya vidhau hara |
sa eva hi tathā loke sarvaḥ sukhyātimāpnuyāt ||
2.3.39.49
maṇḍapasthāpanaṃ nāndīmukhaṃ tatkuladharmataḥ |
kāraya prītito nātha loke svaṃ khyāpayan yaśaḥ ||
2.3.39.50
brahmovāca |
evamuktastadā śambhurviṣṇunā parameśvaraḥ |
laukikācāranirato vidhinā taccakāra saḥ ||
2.3.39.51
ahaṃ hyadhikṛtastena sarvamabhyudayocitam |
akurvaṃ munibhiḥ prītyā tatra tatkarma cādarāt ||
2.3.39.52
kaśyapo'trirvasiṣṭhaśca gautamo bhāgurirguruḥ |
kaṇvo bṛhaspatiḥ śaktirjamadagniḥ parāśaraḥ ||
2.3.39.53
mārkaṇḍeyaśśilāpāko'ruṇapālo'kṛtaśramaḥ |
agastyaścyavano gargaśśilādo'tha mahāmune ||
2.3.39.54
dadhīcirupamanyuśca bharadvājo'kṛtavraṇaḥ |
pippalādo'tha kuśikaḥ kautso vyāsaḥ saśiṣyakaḥ ||
2.3.39.55
ete cānye ca bahava āgatāśśivasannidhim |
mayā sunoditāstatra cakruste vidhivatkriyām ||
2.3.39.56
vedoktavidhinā sarve vedavedāṅgapāragāḥ |
rakṣāṃ cakrurmaheśasya kṛtvā kautukamaṅgalam ||
2.3.39.57
ṛgyajussāmasūktaistu tathā nānāvidhaiḥ paraiḥ |
maṅgalāni ca bhūrīṇi cakruḥ prītyarṣayo'khilāḥ ||
2.3.39.58
grahāṇāṃ pūjanaṃ prītyā cakruste śambhunā mayā |
maṇḍalasthasurāṇāṃ ca sarveṣāṃ vighnaśāntaye ||
2.3.39.59
tataśśivaḥ susantuṣṭaḥ kṛtvā sarvaṃ yathocitam |
laukikaṃ vaidikaṃ karma nanāma ca mudā dvijān ||
2.3.39.60
atha sarveśvaro viprāndevānkṛtvā purassarān |
nissasāra mudā tasmātkailāsātparvatottamāt ||
2.3.39.61
bahiḥ kailāsakudharācchambhustasthau mudānvitaḥ |
devaiḥ saha dvijaiścaiva nānāsvīkārakaḥ prabhuḥ ||
2.3.39.62
tadotsavo mahānāsīttatra devādibhiḥ kṛtaḥ |
santuṣṭyarthaṃ maheśasya gānavādyasunṛtyakaḥ ||
2.3.39.62.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe devanimantraṇadevāgamanaśivayātrāvarṇanaṃ nāmaikonacatvāriṃśo'dhyāyaḥ ||
2.3.39.62.p2
śrīgaṇeśāya namaḥ ||
2.3.39.62.p3
śrīgaurīśaṅkarābhyāṃ namaḥ ||
2.3.39.62.p4
śrīśivamahāpurāṇam ||
2.3.39.62.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (2)
- Skandapurāṇa (early; "Ambikākhaṇḍa") (ed. Bakker) — Sanskrit
- Bṛhatkathākośa — Hariṣeṇa, Sanskrit