[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 2.3.3 # Shivapurana 2.3.3: tṛtīyo'dhyāyaḥ | viṣṇvādidevaiḥ kṛtā śivastutiḥ Śivapurāṇa (complete text) 2.3.3 - **Language:** Sanskrit ## Contents - [2.3.3.21](https://indike.org/pramana/in.purana.siva*complete-2.2.3.3.21) — 1 part - [2.3.3.39](https://indike.org/pramana/in.purana.siva*complete-2.2.3.3.39) — 5 parts ### tṛtīyo'dhyāyaḥ | viṣṇvādidevaiḥ kṛtā śivastutiḥ ### [2.3.3.1](https://indike.org/pramana/in.purana.siva*complete-2.2.3.3.1) nārada uvāca | vidhe prājña mahādhīmanvada me vadatāṃ vara | tataḥ paraṃ kimabhavaccaritaṃ viṣṇusadguroḥ || ### [2.3.3.2](https://indike.org/pramana/in.purana.siva*complete-2.2.3.3.2) adbhuteyaṃ kathā proktā menāpūrvagatiḥ śubhā | vivāhaśca śrutaḥ samyak paramaṃ caritaṃ vada || ### [2.3.3.3](https://indike.org/pramana/in.purana.siva*complete-2.2.3.3.3) menāṃ vivāhya sa giriḥ kṛtavān kiṃ tataḥ param | pārvatī kathamutpannā tasyāṃ vai jagadambikā || ### [2.3.3.4](https://indike.org/pramana/in.purana.siva*complete-2.2.3.3.4) tapaḥ sudussahaṃ kṛtvā kathaṃ prāpa patiṃ haram | etatsarvaṃ samācakṣva vistarācchāṅkaraṃ yaśaḥ || ### [2.3.3.5](https://indike.org/pramana/in.purana.siva*complete-2.2.3.3.5) brahmovāca | mune tvaṃ śṛṇu suprītyā śāṅkaraṃ suyaśaḥ śubham | yacchrutvā brahmahā śuddhyetsarvānkāmānavāpnuyāt || ### [2.3.3.6](https://indike.org/pramana/in.purana.siva*complete-2.2.3.3.6) yadā menāvivāhaṃ tu kṛtvāgacchadgirirgṛham | tadā samutsavo jātastriṣu lokeṣu nārada || ### [2.3.3.7](https://indike.org/pramana/in.purana.siva*complete-2.2.3.3.7) himācalo'pi suprītaścakāra paramotsavam | bhūsurān bandhuvargāṃśca parānānarca saddhiyā || ### [2.3.3.8](https://indike.org/pramana/in.purana.siva*complete-2.2.3.3.8) sarve dvijāśca santuṣṭā dattvāśīrvacanaṃ varam | yayustasmai svasvadhāma bandhuvargāstathāpare || ### [2.3.3.9](https://indike.org/pramana/in.purana.siva*complete-2.2.3.3.9) himācalo'pi suprīto menayā sukhade gṛhe | reme'nyatra ca susthāne nandanādivaneṣvapi || ### [2.3.3.10](https://indike.org/pramana/in.purana.siva*complete-2.2.3.3.10) tasminnavasare devā mune viṣṇvādayo'khilāḥ | munayaśca mahātmānaḥ prajagmurbhūdharāntike || ### [2.3.3.11](https://indike.org/pramana/in.purana.siva*complete-2.2.3.3.11) dṛṣṭvā tānāgatāndevānpraṇanāma mudā giriḥ | sammānaṃ kṛtavān bhaktyā praśaṃsan svavidhiṃ mahān || ### [2.3.3.12](https://indike.org/pramana/in.purana.siva*complete-2.2.3.3.12) sāñjalirnataśīrṣo hi sa tuṣṭāva subhaktitaḥ | romodgamo mahānāsīdgireḥ premāśravo'patan || ### [2.3.3.13](https://indike.org/pramana/in.purana.siva*complete-2.2.3.3.13) tataḥ praṇamya suprīto himaśailaḥ prasannadhīḥ | uvāca praṇato bhūtvā mune viṣṇvādikānsurān || ### [2.3.3.14](https://indike.org/pramana/in.purana.siva*complete-2.2.3.3.14) himācala uvāca | adya me saphalaṃ janma saphalaṃ sumahattapaḥ | adya me saphalaṃ jñānamadya me saphalāḥ kriyāḥ || ### [2.3.3.15](https://indike.org/pramana/in.purana.siva*complete-2.2.3.3.15) dhanyo'hamadya sañjāto dhanyā me sakalā kṣitiḥ | dhanyaṃ kulaṃ tathā dārāḥ sarvaṃ dhanyaṃ na saṃśayaḥ || ### [2.3.3.16](https://indike.org/pramana/in.purana.siva*complete-2.2.3.3.16) yataḥ samāgatā yūyaṃ militvā sarva ekadā | māṃ nideśayata prītyocitaṃ matvā svasevakam || ### [2.3.3.17](https://indike.org/pramana/in.purana.siva*complete-2.2.3.3.17) brahmovāca | iti śrutvā mahīdhrasya vacanaṃ te surāstadā | ūcurharyādayaḥ prītāḥ siddhiṃ matvā svakāryataḥ || ### [2.3.3.18](https://indike.org/pramana/in.purana.siva*complete-2.2.3.3.18) devā ūcuḥ | himācala mahāprājña śṛṇvasmadvacanaṃ hitam | yadarthamāgatāḥ sarve tad brūmaḥ prītito vayam || ### [2.3.3.19](https://indike.org/pramana/in.purana.siva*complete-2.2.3.3.19) yā purā jagadambomā dakṣakanyābhavadgire | rudrapatnī hi sā bhūtvā cikrīḍe suciraṃ bhuvi || ### [2.3.3.20](https://indike.org/pramana/in.purana.siva*complete-2.2.3.3.20) pitṛto'nādaraṃ prāpya saṃsmṛtya svapaṇaṃ satī | jagāma svapadaṃ tyaktvā taccharīraṃ tadāmbikā || ### [2.3.3.21](https://indike.org/pramana/in.purana.siva*complete-2.2.3.3.21) sā kathā viditā loke tavāpi himabhūdhara | evaṃ sati mahālābho bhaveddevagaṇasya hi || ### [2.3.3.21.p1](https://indike.org/pramana/in.purana.siva*complete-2.2.3.3.21.p1) sarvasya bhavataścāpi syuḥ sarve te vaśāḥ surāḥ | 22 || ### [2.3.3.23](https://indike.org/pramana/in.purana.siva*complete-2.2.3.3.23) brahmovāca | ityākarṇya vacasteṣāṃ haryādīnāṃ girīśvaraḥ | tathāstviti prasannātmā provāca na ca ādarāt || ### [2.3.3.24](https://indike.org/pramana/in.purana.siva*complete-2.2.3.3.24) atha te ca samādiśya tadvidhiṃ paramādarāt | svayaṃ jagmuśca śaraṇamumāyāḥ śaṅkarastriyaḥ || ### [2.3.3.25](https://indike.org/pramana/in.purana.siva*complete-2.2.3.3.25) susthale manasā sthitvā sasmarurjagadambikām | praṇamya bahuśastatra tuṣṭuvuḥ śraddhayā surāḥ || ### [2.3.3.26](https://indike.org/pramana/in.purana.siva*complete-2.2.3.3.26) devā ūcuḥ | devyume jagatāmamba śivalokanivāsini | sadāśivapriye durge tvāṃ namāmo maheśvari || ### [2.3.3.27](https://indike.org/pramana/in.purana.siva*complete-2.2.3.3.27) śrīśaktiṃ pāvanāṃ śāntāṃ puṣṭiṃ paramapāvanīm | vayaṃ namāmahe bhaktyā mahadavyaktarūpiṇīm || ### [2.3.3.28](https://indike.org/pramana/in.purana.siva*complete-2.2.3.3.28) śivāṃ śivakarāṃ śuddhāṃ sthūlāṃ sūkṣmāṃ parāyaṇām | antarvidyāsuvidyābhyāṃ suprītāṃ tvāṃ namāmahe || ### [2.3.3.29](https://indike.org/pramana/in.purana.siva*complete-2.2.3.3.29) tvaṃ śraddhā tvaṃ dhṛtistvaṃ śrīstvameva sarvagocarā | tvaṃ dīdhitissūryagatā svaprapañcaprakāśinī || ### [2.3.3.30](https://indike.org/pramana/in.purana.siva*complete-2.2.3.3.30) yā ca brahmāṇḍasaṃsthāne jagajjīveṣu yā jagat | āpyāyayati brahmāditṛṇāntaṃ tāṃ namāmahe || ### [2.3.3.31](https://indike.org/pramana/in.purana.siva*complete-2.2.3.3.31) gāyatrī tvaṃ vedamātā tvaṃ sāvitrī sarasvatī | tvaṃ vārtā sarvajagatāṃ tvaṃ trayī dharmarūpiṇī || ### [2.3.3.32](https://indike.org/pramana/in.purana.siva*complete-2.2.3.3.32) nidrā tvaṃ sarvabhūteṣu kṣudhā tṛptistvameva hi | tṛṣṇā kāntiśchavistuṣṭiḥ sarvānandakarī sadā || ### [2.3.3.33](https://indike.org/pramana/in.purana.siva*complete-2.2.3.3.33) tvaṃ lakṣmīḥ puṇyakartṝṇāṃ tvaṃ jyeṣṭhā pāpināṃ sadā | tvaṃ śāntiḥ sarvajagatāṃ tvaṃ dhātrī prāṇapoṣiṇī || ### [2.3.3.34](https://indike.org/pramana/in.purana.siva*complete-2.2.3.3.34) tvaṃ tattvarūpā bhūtānāṃ pañcānāmapi sārakṛt | tvaṃ hi nītibhṛtāṃ nītirvyavasāyasvarūpiṇī || ### [2.3.3.35](https://indike.org/pramana/in.purana.siva*complete-2.2.3.3.35) gītistvaṃ sāmavedasya granthistvaṃ yajuṣāṃ hutiḥ | ṛgvedasya tathā mātrātharvaṇasya parā gatiḥ || ### [2.3.3.36](https://indike.org/pramana/in.purana.siva*complete-2.2.3.3.36) samastagīrvāṇagaṇasya śakti-stamomayī dhātṛguṇaikadṛśyā | rajaḥ prapañcāttu bhavaikarūpā yā naḥ śrutā bhavyakarī stuteha || ### [2.3.3.37](https://indike.org/pramana/in.purana.siva*complete-2.2.3.3.37) saṃsārasāgarakarālabhavāṅgaduḥkha-nistārakāritaraṇiṃ ca nivītahīnām | aṣṭāṅgayogaparipālanakelidakṣāṃ vindhyāgavāsaniratāṃ praṇamāma tāṃ vai || ### [2.3.3.38](https://indike.org/pramana/in.purana.siva*complete-2.2.3.3.38) nāsākṣivaktrabhujavakṣasi mānase ca dhṛtyā sukhāni vitanoti sadaiva jantoḥ | nidreti yāti subhagā jagatī bhavānāṃ sā naḥ prasīdatu bhavasthitipālanāya || ### [2.3.3.39](https://indike.org/pramana/in.purana.siva*complete-2.2.3.3.39) brahmovāca | iti stutvā maheśānīṃ jagadambāmumāṃ satīm | supremamanasaḥ sarve tasthuste darśanepsavaḥ || ### [2.3.3.39.c1](https://indike.org/pramana/in.purana.siva*complete-2.2.3.3.39.c1) iti śrīśivamahāpurāṇe ditīyāyāṃ rudrasaṃhitāyāṃ tṛtīye pārvatīkhaṇḍe devastutirnāma tṛtīyo'dhyāyaḥ || ### [2.3.3.39.p2](https://indike.org/pramana/in.purana.siva*complete-2.2.3.3.39.p2) śrīgaṇeśāya namaḥ || ### [2.3.3.39.p3](https://indike.org/pramana/in.purana.siva*complete-2.2.3.3.39.p3) śrīgaurīśaṅkarābhyāṃ namaḥ || ### [2.3.3.39.p4](https://indike.org/pramana/in.purana.siva*complete-2.2.3.3.39.p4) śrīśivamahāpurāṇam || ### [2.3.3.39.p5](https://indike.org/pramana/in.purana.siva*complete-2.2.3.3.39.p5) dvitīyāyāṃ rudrasaṃhitāyāṃ tṛtīyaḥ pārvatīkhaṇḍe ## Linked texts (1) - [Kālikāpurāṇa](https://indike.org/pramana/in.purana.upa.sakta.kalika.3.81) — Sanskrit --- Source: [https://indike.org/pramana/in.purana.siva*complete-2.2.3.3](https://indike.org/pramana/in.purana.siva*complete-2.2.3.3) · Pramāṇa