Shivapurana 2.3.4: caturtho'dhyāyaḥ | śivena devānāṃ sāntvanam
Śivapurāṇa (complete text) 2.3.4
- Language
- Sanskrit
Contents
- 2.3.4.50 — 5 parts
caturtho'dhyāyaḥ | śivena devānāṃ sāntvanam
2.3.4.1
brahmovāca |
itthaṃ devaiḥ stutā devī durgā durgārtināśinī |
āvirbabhūva devānāṃ purato jagadambikā ||
2.3.4.2
rathe ratnamaye divye saṃsthitā paramādbhute |
kiṅkiṇījālasaṃyukte mṛdusaṃstaraṇe vare ||
2.3.4.3
koṭisūryādhikābhāsaramyāvayavabhāsinī |
svatejorāśimadhyasthā vararūpāsamacchaviḥ ||
2.3.4.4
anūpamā mahāmāyā sadāśivavilāsinī |
triguṇā nirguṇā nityā śivalokanivāsinī ||
2.3.4.5
tridevajananī caṇḍī śivā sarvārtināśinī |
sarvamātā mahānidrā sarvasvajanatāriṇī ||
2.3.4.6
tejorāśeḥ prabhāvāttu sā tu dṛṣṭā suraiśśivā |
tuṣṭuvustāṃ punaste vai surā darśanakāṅkṣiṇaḥ ||
2.3.4.7
atha devagaṇāḥ sarve viṣṇvādyā darśanepsavaḥ |
dadṛśurjagadambāṃ tāṃ tatkṛpāṃ prāpya tatra hi ||
2.3.4.8
babhūvānandasandohaḥ sarveṣāṃ tridivaukasām |
punaḥ punaḥ praṇemustāṃ tuṣṭuvuśca viśeṣataḥ ||
2.3.4.9
devā ūcuḥ |
śive śarvāṇi kalyāṇi jagadamba maheśvari |
tvāṃ natāḥ sarvathā devā vayaṃ sarvārtināśinīm ||
2.3.4.10
na hi jānanti deveśi vedāḥ śāstrāṇi kṛtsnaśaḥ |
atīto mahimā dhyānaṃ tava vāṅmanasoḥ śive ||
2.3.4.11
atadvyāvṛttitastvāṃ vai cakitaṃ cakitaṃ sadā |
abhidhatte śrutirapi pareṣāṃ kā kathā matā ||
2.3.4.12
jānanti bahavo bhaktāstvatkṛpāṃ prāpya bhaktitaḥ |
śaraṇāgatabhaktānāṃ na kutrāpi bhayādikam ||
2.3.4.13
vijñaptiṃ śṛṇu suprītā yasyā dāsāḥ sadāmbike |
tava devi mahādevi hīnato varṇayāmahe ||
2.3.4.14
purā dakṣasutā bhūtvā sañjātā haravallabhā |
brahmaṇaśca pareṣāṃ vānāśayattvamakaṃ mahat ||
2.3.4.15
pitṛto'nādaraṃ prāpyātyajaḥ paṇavaśāttanum |
svalokamagamastvaṃ vālabhaddukhaṃ haro'pi hi ||
2.3.4.16
na hi jātaṃ prapūrṇaṃ taddevakāryaṃ maheśvari |
vyākulā munayo devāḥ śaraṇaṃ tvāṃ gatā vayam ||
2.3.4.17
pūrṇaṃ kuru maheśāni nirjarāṇāṃ manoratham |
sanatkumāravacanaṃ saphalaṃ syādyathā śive ||
2.3.4.18
avatīrya kṣitau devi rudrapatnī punarbhava |
līlāṃ kuru yathāyogyaṃ prāpnuyurnirjarāḥ sukham ||
2.3.4.19
sukhī syāddevi rudro'pi kailāsācalasaṃsthitaḥ |
sarve bhavantu sukhino duḥkhaṃ naśyatu kṛtsnaśaḥ ||
2.3.4.20
brahmovāca |
iti procyāmarāḥ sarve viṣṇvādyāḥ premasaṅkulāḥ |
maunamāsthāya santasthurbhaktinamrātmamūrtayaḥ ||
2.3.4.21
śivāpi suprasannābhūdākarṇyāmarasaṃstutim |
ākalayyātha taddhetuṃ saṃsmṛtya svaprabhuṃ śivam ||
2.3.4.22
uvācomā tadā devī sambodhya vibudhāṃśca tān |
vihasya māpatimukhān sadayā bhaktavatsalā ||
2.3.4.23
umovāca he hare he vidhe devā munayaśca gatavyathāḥ |
sarve śṛṇuta madvākyaṃ prasannāhaṃ na saṃśayaḥ ||
2.3.4.24
caritaṃ mama sarvatra trailokyasya sukhāvaham |
kṛtaṃ mayaivaṃ sakalaṃ dakṣamohādikaṃ ca tat ||
2.3.4.25
avatāraṃ kariṣyāmi kṣitau pūrṇaṃ na saṃśayaḥ |
bahavo hetavo'pyatra tadvadāmi mahādarāt ||
2.3.4.26
purā himācalo devā menā cātisubhaktitaḥ |
sevāṃ me cakratustātajananīvatsatītanoḥ ||
2.3.4.27
idānīṃ kurutaḥ sevāṃ subhaktyā mama nityaśaḥ |
menā viśeṣatastatra sutātve nātra saṃśayaḥ ||
2.3.4.28
rudro gacchatu yūyaṃ cāvatāraṃ himavadgṛhe |
ataścāvatariṣyāmi duḥkhanāśo bhaviṣyati ||
2.3.4.29
sarve gacchata dhāma svaṃ svaṃ sukhaṃ labhatāṃ ciram |
avatīrya sutā bhūtvā menāyā dāsya utsukham ||
2.3.4.30
harapatnī bhaviṣyāmi suguptaṃ matamātmanaḥ |
adbhutā śivalīlā hi jñānināmapi mohinī ||
2.3.4.31
yāvatprabhṛti me tyaktā svatanurdakṣajā surāḥ |
pitṛto'nādaraṃ dṛṣṭvā svāminastatkratau gatā ||
2.3.4.32
tadāprabhṛti sa svāmī rudraḥ kālāgnisaṃjñakaḥ |
digambaro babhūvāśu maccintanaparāyaṇaḥ ||
2.3.4.33
mama roṣaṃ kratau dṛṣṭvā pitustatra gatā satī |
atyajatsvatanuṃ prītyā dharmajñeti vicārataḥ ||
2.3.4.34
yogyabhūtsadanaṃ tyaktvā kṛtvā veṣamalaukikam |
na sehe virahaṃ satyā madrūpāyā maheśvaraḥ ||
2.3.4.35
mama hetormahāduḥkhī sa babhūva kuveṣabhṛt |
atyajatsa tadārabhya kāmajaṃ sukhamuttamam ||
2.3.4.36
anyacchṛṇuta he viṣṇo he vidhe munayaḥ surāḥ |
mahāprabhormaheśasya līlāṃ bhuvanapālinīm ||
2.3.4.37
vidhāya mālāṃ suprītyā mamāsthnāṃ virahākulaḥ |
na śāntiṃ prāpa kutrāpi prabuddho'pyeka eva saḥ ||
2.3.4.38
itastato rurodoccairanīśa iva sa prabhuḥ |
yogyāyogyaṃ na bubudhe bhramansarvatra sarvadā ||
2.3.4.39
itthaṃ līlāṃ haro'kārṣīddarśayankāmināṃ prabhuḥ |
ūce kāmukavadvāṇīṃ virahavyākulāmiva ||
2.3.4.40
vastuto'vikṛto'dīno'styajitaḥ parameśvaraḥ |
paripūrṇaḥ śivaḥ svāmī māyādhīśo'khileśvaraḥ ||
2.3.4.41
anyathā mohatastasya kiṃ kāmācca prayojanam |
vikāreṇāpi kenāśu māyālipto na sa prabhuḥ ||
2.3.4.42
rudro'tīvecchati vibhuḥ sa me kartuṃ karagraham |
avatāraṃ kṣitau menāhimācalagṛhe surāḥ ||
2.3.4.43
ataścāvatariṣyāmi rudrasantoṣahetave |
himāgapatnyāṃ menāyāṃ laukikīṃ gatimāśritā ||
2.3.4.44
bhaktā rudrapriyā bhūtvā tapaḥ kṛtvā sudussaham |
devakāryaṃ kariṣyāmi satyaṃ satyaṃ na saṃśayaḥ ||
2.3.4.45
gacchata svagṛhaṃ sarve bhavaṃ bhajata nityaśaḥ |
tatkṛpāto'khilaṃ duḥkhaṃ vinaśyati na saṃśayaḥ ||
2.3.4.46
bhaviṣyati kṛpālostu kṛpayā maṅgalaṃ sadā |
vandyā pūjyā triloke'haṃ tajjāyeti ca hetutaḥ ||
2.3.4.47
brahmovāca |
ityuktvā jagadambā sā devānāṃ paśyatāṃ tadā |
antardadhe śivā tāta svaṃ lokaṃ prāpa vai drutam ||
2.3.4.48
viṣṇvādayaḥ surāḥ sarve munayaśca mudānvitāḥ |
kṛtvā taddiśi sannāmaṃ svasvadhāmāni saṃyayuḥ ||
2.3.4.49
itthaṃ durgāsucaritaṃ varṇitaṃ te munīśvara |
sarvadā sukhadaṃ nṝṇāṃ bhuktimuktipradāyakam ||
2.3.4.50
ya idaṃ śṛṇuyānnityaṃ śrāvayedvā samāhitaḥ |
paṭhedvā pāṭhayedvāpi sarvānkāmānavāpnuyāt ||
2.3.4.50.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe devasāntvanaṃ nāma caturtho'dhyāyaḥ ||
2.3.4.50.p2
śrīgaṇeśāya namaḥ ||
2.3.4.50.p3
śrīgaurīśaṅkarābhyāṃ namaḥ ||
2.3.4.50.p4
śrīśivamahāpurāṇam ||
2.3.4.50.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe