Shivapurana 2.3.40: catvāriṃśo'dhyāyaḥ | himagirigṛheśivasyāgamanavarṇanam
Śivapurāṇa (complete text) 2.3.40
- Language
- Sanskrit
Contents
- 2.3.40.57 — 5 parts
catvāriṃśo'dhyāyaḥ | himagirigṛheśivasyāgamanavarṇanam
2.3.40.1
brahmovāca |
atha śambhuḥ samāhūya nandyādīn sakalāngaṇān |
ājñāpayāmāsa mudā gantuṃ svena ca tatra vai ||
2.3.40.2
śiva uvāca |
api yūyaṃ saha mayā saṅgacchadhvaṃ gireḥ puram |
kiyadgaṇānihāsthāpya mahotsavapurassaram ||
2.3.40.3
brahmovāca |
atha te samanujñaptā gaṇeśā niryayurmudā |
svaṃ svaṃ balamupādāya tān kathañcidvadāmyaham ||
2.3.40.4
abhyagācchaṅkhakarṇaśca gaṇakoṭyā gaṇeśvaraḥ |
śivena sārdhaṃ saṅgantuṃ himācalapuraṃ prati ||
2.3.40.5
daśakoṭyā kekarākṣo gaṇānāṃ sa mahotsavaḥ |
aṣṭakoṭyā ca vikṛto gaṇānāṃ gaṇanāyakaḥ ||
2.3.40.6
catuṣkoṭyā viśākhaśca gaṇānāṃ gaṇanāyakaḥ |
pārijātaśca navabhiḥ koṭibhirgaṇapuṅgavaḥ ||
2.3.40.7
ṣaṣṭiḥ sarvāntakaḥ śrīmān tathaiva vikṛtānanaḥ |
gaṇānāṃ dundubho'ṣṭābhiḥ koṭibhirgaṇanāyakaḥ ||
2.3.40.8
pañcabhiśca kapālākhyo gaṇeśaḥ koṭibhistathā |
ṣaḍbhissandārako vīro gaṇānāṃ koṭibhirmune ||
2.3.40.9
koṭikoṭibhireveha kandukaḥ kuṇḍakastathā |
viṣṭambho gaṇapo'ṣṭābhirgaṇānāṃ koṭibhistathā ||
2.3.40.10
sahasrakoṭyā gaṇapaḥ pippalo mudito yayau |
tathā sanādako vīro gaṇeśo munisattama ||
2.3.40.11
āveśanastathāṣṭābhiḥ koṭibhirgaṇanāyakaḥ |
mahākeśaḥ sahasreṇa koṭīnāṃ gaṇapo yayau ||
2.3.40.12
kuṇḍo dvādaśakoṭyā hi tathā parvatako mune |
aṣṭābhiḥ koṭibhirvīraḥ samagāccandratāpanaḥ ||
2.3.40.13
kālaśca kālakaścaiva mahākālaḥ śatena vai |
koṭīnāṃ gaṇanātho hi tathaivāgnikanāmakaḥ ||
2.3.40.14
koṭyagnimukha evāgād gaṇānāṃ gaṇanāyakaḥ |
ādityamūrdhā koṭyā ca tathā caiva ghanāvahaḥ ||
2.3.40.15
sannāhaḥ śatakoṭyā hi kumudo gaṇapastathā |
amoghaḥ kokilaścaiva śatakoṭyā gaṇādhipaḥ ||
2.3.40.16
sumantraḥ koṭikoṭyā ca gaṇānāṃ gaṇānāyakaḥ |
kākapādodaraḥ koṭiṣaṣṭyā santānakastathā ||
2.3.40.17
mahābalaśca navabhirmadhupiṅgaśca kokilaḥ |
nīlo navatyā koṭīnāṃ pūrṇabhadrastathaiva ca ||
2.3.40.18
saptakoṭyā caturvaktraḥ karaṇo viṃśakoṭibhiḥ |
yayau navatikoṭyā tu gaṇeśāno'hiromakaḥ ||
2.3.40.19
yajvākṣaḥ śatamanyuśca meghamanyuśca nārada |
tāvatkoṭyā yayuḥ sarve gaṇeśā hi pṛthak pṛthak ||
2.3.40.20
kāṣṭhāṅguṣṭhaścatuḥ ṣaṣṭyā koṭīnāṃ gaṇanāyakaḥ |
virūpākṣaḥ sukeśaśca vṛṣabhaśca sanātanaḥ ||
2.3.40.21
tālaketuḥ ṣaḍāsyaśca cañcvāsyaśca sanātanaḥ |
saṃvartakastathā caitro lakulīśaḥ svayamprabhuḥ ||
2.3.40.22
lokāntakaśca dīptātmā tathā daityāntako mune |
devo bhṛṅgiriṭiḥ śrīmāndevadevapriyastathā ||
2.3.40.23
aśanirbhānukaścaiva catuḥṣaṣṭyā sahasraśaḥ |
yayuḥ śivavivāhārthaṃ śivena sahasotsavāḥ ||
2.3.40.24
bhūtakoṭisahasreṇa pramathāḥ koṭibhistribhiḥ |
vīrabhadraścatuḥṣaṣṭyā romajānāntrikoṭibhiḥ ||
2.3.40.25
koṭikoṭisahasrāṇāṃ śatairviṃśatibhirvṛtāḥ |
tatra jagmuśca nandyādyā gaṇapāḥ śaṅkarotsave ||
2.3.40.26
kṣetrapālo bhairavaśca koṭikoṭigaṇairyutaḥ |
udvāhaḥ śaṅkarasyetyāyayau prītyā mahotsavaḥ ||
2.3.40.27
ete cānye ca gaṇapā asaṅkhyātā mahābalāḥ |
tatra jagmurmahāprītyā sotsāhāḥ śaṅkarotsave ||
2.3.40.28
sarve sahasrahastāśca jaṭāmukuṭadhāriṇaḥ |
candrarekhāvataṃsāśca nīlakaṇṭhāstrilocanāḥ ||
2.3.40.29
rudrākṣābharaṇāḥ sarve tathā sadbhasmadhāriṇaḥ |
hārakuṇḍalakeyūramukuṭādyairalaṅkṛtāḥ ||
2.3.40.30
brahmaviṣṇvindrasaṅkāśā aṇimādiguṇairyutāḥ |
sūryakoṭipratīkāśāstatra rejurgaṇeśvarāḥ ||
2.3.40.31
pṛthivīcāriṇaḥ kecit kecitpātālacāriṇaḥ |
kecidvyomacarāḥ kecitsaptasvargacarā mune ||
2.3.40.32
kiṃ bahūktena devarṣe sarvalokanivāsinaḥ |
āyayuḥ svagaṇāḥ śambhoḥ prītyā vai śaṅkarotsave ||
2.3.40.33
itthaṃ devairgaṇaiścānyaiḥ sahitaḥ śaṅkaraḥ prabhuḥ |
yayau himagiripuraṃ vivāhārthaṃ nijasya vai ||
2.3.40.34
yadā jagāma sarveśo vivāhārthaṃ surādibhiḥ |
tadā tatra hyabhūdvṛttaṃ tacchṛṇu tvaṃ munīśvara ||
2.3.40.35
rudrasya bhaginī bhūtvā caṇḍī sūtsavasaṃyutā |
tatrājagāma suprītyā pareṣāṃ subhayāvahā ||
2.3.40.36
pretāsanasamārūḍhā sarpābharaṇabhūṣitā |
pūrṇaṃ kalaśamādāya haimaṃ mūrdhni mahāprabham ||
2.3.40.37
svaparīvārasaṃyuktā dīptāsyā dīptalocanā |
kutūhalaṃ prakurvantī jātaharṣā mahābalā ||
2.3.40.38
tatra bhūtagaṇā divyā virūpāḥ koṭiśo mune |
virājante sma bahuśaḥ tathā nānāvidhāstadā ||
2.3.40.39
taiḥ sametāgrataścaṇḍī jagāma vikṛtānanā |
kutūhalānvitā prītā prītyupadravakāriṇī ||
2.3.40.40
caṇḍyā sarve rudragaṇāḥ pṛṣṭhataśca kṛtāstadā |
koṭyekādaśasaṅkhyākā raudrarudrapriyāśca te ||
2.3.40.41
tadā ḍamarunirghoṣairvyāptamāsījjagattrayam |
bherījhaṅkāraśabdena śaṅkhānāṃ ninadena ca ||
2.3.40.42
tathā dundubhinirghoṣaiḥ śabdaḥ kolāhalo'bhavat |
kurvañjaganmaṅgalaṃ ca nāśayenmaṅgaletarat ||
2.3.40.43
gaṇānāṃ pṛṣṭhato bhūtvā sarve devāḥ samutsukāḥ |
anvayuḥ sarvasiddhāśca lokapālādikā mune ||
2.3.40.44
madhye vrajan rameśo'tha garuḍāsanamāśritaḥ |
śuśubhe dhriyamāṇena chatreṇa mahatā mune ||
2.3.40.45
cāmarairvījyamāno'sau svagaṇaiḥ parivāritaḥ |
pārṣadairvilasadbhiśca svabhūṣāvidhibhūṣitaḥ ||
2.3.40.46
tathāhamapyaśobhaṃ vai vrajanmārge virājitaḥ |
vedairmūrtidharaiḥ śāstraiḥ purāṇairāgamaistathā ||
2.3.40.47
sanakādimahāsiddhaiḥ saprajāpatibhiḥ sutaiḥ |
parivāraiḥ saṃyuto hi śivasevanatatparaḥ ||
2.3.40.48
svasainyamadhyagaḥ śakra airāvatagajasthitaḥ |
nānāvibhūṣito'tyantaṃ vrajan reje sureśvaraḥ ||
2.3.40.49
tadā tu vrajamānāste ṛṣayo bahavaśca te |
virejuratisotkaṇṭhāḥ śivasyodvāhanaṃ prati ||
2.3.40.50
śākinyo yātudhānāśca vetālābrahmarākṣasāḥ |
bhūtapretapiśācāśca tathānye pramathādayaḥ ||
2.3.40.51
tumbururnārado hāhahūhūścetyādayo varāḥ |
gandharvāḥ kinnarā jagmurvādyānādhmāya harṣitāḥ ||
2.3.40.52
jagato mātaraḥ sarvā devakanyāśca sarvaśaḥ |
gāyatrī caiva sāvitrī lakṣmīranyāḥ surastriyaḥ ||
2.3.40.53
etāścānyāśca devānāṃ patnayo bhavamātaraḥ |
udvāhaḥ śaṅkarasyeti jagmuḥ sarvā mudānvitāḥ ||
2.3.40.54
śuddhasphaṭikasaṅkāśo vṛṣabhaḥ sarvasundaraḥ |
yo dharma ucyate vedaiḥ śāstraiḥ siddhairmaharṣibhiḥ ||
2.3.40.55
tamārūḍho mahādevo vṛṣabhaṃ dharmavatsalaḥ |
śuśubhe'tīva devarṣisevitaḥ sakalairvrajan ||
2.3.40.56
ebhiḥ sametaiḥ saphalairmaharṣibhi-rbabhau maheśo bahuśo'tyalaṅkṛtaḥ |
himālayāhvasya dharasya saṃvrajan pāṇigrahārthaṃ sadanaṃ śivāyāḥ ||
2.3.40.57
ityuktaṃ śambhucaritaṃ gamanaṃ paramotsavam |
himālayapurodbhūtaṃ sadvṛttaṃ śṛṇu nārada ||
2.3.40.57.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivayātrāvarṇanaṃ nāma catvāriṃśo'dhyāyaḥ ||
2.3.40.57.p2
śrīgaṇeśāya namaḥ ||
2.3.40.57.p3
śrīgaurīśaṅkarābhyāṃ namaḥ ||
2.3.40.57.p4
śrīśivamahāpurāṇam ||
2.3.40.57.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe