[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 2.3.40 # Shivapurana 2.3.40: catvāriṃśo'dhyāyaḥ | himagirigṛheśivasyāgamanavarṇanam Śivapurāṇa (complete text) 2.3.40 - **Language:** Sanskrit ## Contents - [2.3.40.57](https://indike.org/pramana/in.purana.siva*complete-2.2.3.40.57) — 5 parts ### catvāriṃśo'dhyāyaḥ | himagirigṛheśivasyāgamanavarṇanam ### [2.3.40.1](https://indike.org/pramana/in.purana.siva*complete-2.2.3.40.1) brahmovāca | atha śambhuḥ samāhūya nandyādīn sakalāngaṇān | ājñāpayāmāsa mudā gantuṃ svena ca tatra vai || ### [2.3.40.2](https://indike.org/pramana/in.purana.siva*complete-2.2.3.40.2) śiva uvāca | api yūyaṃ saha mayā saṅgacchadhvaṃ gireḥ puram | kiyadgaṇānihāsthāpya mahotsavapurassaram || ### [2.3.40.3](https://indike.org/pramana/in.purana.siva*complete-2.2.3.40.3) brahmovāca | atha te samanujñaptā gaṇeśā niryayurmudā | svaṃ svaṃ balamupādāya tān kathañcidvadāmyaham || ### [2.3.40.4](https://indike.org/pramana/in.purana.siva*complete-2.2.3.40.4) abhyagācchaṅkhakarṇaśca gaṇakoṭyā gaṇeśvaraḥ | śivena sārdhaṃ saṅgantuṃ himācalapuraṃ prati || ### [2.3.40.5](https://indike.org/pramana/in.purana.siva*complete-2.2.3.40.5) daśakoṭyā kekarākṣo gaṇānāṃ sa mahotsavaḥ | aṣṭakoṭyā ca vikṛto gaṇānāṃ gaṇanāyakaḥ || ### [2.3.40.6](https://indike.org/pramana/in.purana.siva*complete-2.2.3.40.6) catuṣkoṭyā viśākhaśca gaṇānāṃ gaṇanāyakaḥ | pārijātaśca navabhiḥ koṭibhirgaṇapuṅgavaḥ || ### [2.3.40.7](https://indike.org/pramana/in.purana.siva*complete-2.2.3.40.7) ṣaṣṭiḥ sarvāntakaḥ śrīmān tathaiva vikṛtānanaḥ | gaṇānāṃ dundubho'ṣṭābhiḥ koṭibhirgaṇanāyakaḥ || ### [2.3.40.8](https://indike.org/pramana/in.purana.siva*complete-2.2.3.40.8) pañcabhiśca kapālākhyo gaṇeśaḥ koṭibhistathā | ṣaḍbhissandārako vīro gaṇānāṃ koṭibhirmune || ### [2.3.40.9](https://indike.org/pramana/in.purana.siva*complete-2.2.3.40.9) koṭikoṭibhireveha kandukaḥ kuṇḍakastathā | viṣṭambho gaṇapo'ṣṭābhirgaṇānāṃ koṭibhistathā || ### [2.3.40.10](https://indike.org/pramana/in.purana.siva*complete-2.2.3.40.10) sahasrakoṭyā gaṇapaḥ pippalo mudito yayau | tathā sanādako vīro gaṇeśo munisattama || ### [2.3.40.11](https://indike.org/pramana/in.purana.siva*complete-2.2.3.40.11) āveśanastathāṣṭābhiḥ koṭibhirgaṇanāyakaḥ | mahākeśaḥ sahasreṇa koṭīnāṃ gaṇapo yayau || ### [2.3.40.12](https://indike.org/pramana/in.purana.siva*complete-2.2.3.40.12) kuṇḍo dvādaśakoṭyā hi tathā parvatako mune | aṣṭābhiḥ koṭibhirvīraḥ samagāccandratāpanaḥ || ### [2.3.40.13](https://indike.org/pramana/in.purana.siva*complete-2.2.3.40.13) kālaśca kālakaścaiva mahākālaḥ śatena vai | koṭīnāṃ gaṇanātho hi tathaivāgnikanāmakaḥ || ### [2.3.40.14](https://indike.org/pramana/in.purana.siva*complete-2.2.3.40.14) koṭyagnimukha evāgād gaṇānāṃ gaṇanāyakaḥ | ādityamūrdhā koṭyā ca tathā caiva ghanāvahaḥ || ### [2.3.40.15](https://indike.org/pramana/in.purana.siva*complete-2.2.3.40.15) sannāhaḥ śatakoṭyā hi kumudo gaṇapastathā | amoghaḥ kokilaścaiva śatakoṭyā gaṇādhipaḥ || ### [2.3.40.16](https://indike.org/pramana/in.purana.siva*complete-2.2.3.40.16) sumantraḥ koṭikoṭyā ca gaṇānāṃ gaṇānāyakaḥ | kākapādodaraḥ koṭiṣaṣṭyā santānakastathā || ### [2.3.40.17](https://indike.org/pramana/in.purana.siva*complete-2.2.3.40.17) mahābalaśca navabhirmadhupiṅgaśca kokilaḥ | nīlo navatyā koṭīnāṃ pūrṇabhadrastathaiva ca || ### [2.3.40.18](https://indike.org/pramana/in.purana.siva*complete-2.2.3.40.18) saptakoṭyā caturvaktraḥ karaṇo viṃśakoṭibhiḥ | yayau navatikoṭyā tu gaṇeśāno'hiromakaḥ || ### [2.3.40.19](https://indike.org/pramana/in.purana.siva*complete-2.2.3.40.19) yajvākṣaḥ śatamanyuśca meghamanyuśca nārada | tāvatkoṭyā yayuḥ sarve gaṇeśā hi pṛthak pṛthak || ### [2.3.40.20](https://indike.org/pramana/in.purana.siva*complete-2.2.3.40.20) kāṣṭhāṅguṣṭhaścatuḥ ṣaṣṭyā koṭīnāṃ gaṇanāyakaḥ | virūpākṣaḥ sukeśaśca vṛṣabhaśca sanātanaḥ || ### [2.3.40.21](https://indike.org/pramana/in.purana.siva*complete-2.2.3.40.21) tālaketuḥ ṣaḍāsyaśca cañcvāsyaśca sanātanaḥ | saṃvartakastathā caitro lakulīśaḥ svayamprabhuḥ || ### [2.3.40.22](https://indike.org/pramana/in.purana.siva*complete-2.2.3.40.22) lokāntakaśca dīptātmā tathā daityāntako mune | devo bhṛṅgiriṭiḥ śrīmāndevadevapriyastathā || ### [2.3.40.23](https://indike.org/pramana/in.purana.siva*complete-2.2.3.40.23) aśanirbhānukaścaiva catuḥṣaṣṭyā sahasraśaḥ | yayuḥ śivavivāhārthaṃ śivena sahasotsavāḥ || ### [2.3.40.24](https://indike.org/pramana/in.purana.siva*complete-2.2.3.40.24) bhūtakoṭisahasreṇa pramathāḥ koṭibhistribhiḥ | vīrabhadraścatuḥṣaṣṭyā romajānāntrikoṭibhiḥ || ### [2.3.40.25](https://indike.org/pramana/in.purana.siva*complete-2.2.3.40.25) koṭikoṭisahasrāṇāṃ śatairviṃśatibhirvṛtāḥ | tatra jagmuśca nandyādyā gaṇapāḥ śaṅkarotsave || ### [2.3.40.26](https://indike.org/pramana/in.purana.siva*complete-2.2.3.40.26) kṣetrapālo bhairavaśca koṭikoṭigaṇairyutaḥ | udvāhaḥ śaṅkarasyetyāyayau prītyā mahotsavaḥ || ### [2.3.40.27](https://indike.org/pramana/in.purana.siva*complete-2.2.3.40.27) ete cānye ca gaṇapā asaṅkhyātā mahābalāḥ | tatra jagmurmahāprītyā sotsāhāḥ śaṅkarotsave || ### [2.3.40.28](https://indike.org/pramana/in.purana.siva*complete-2.2.3.40.28) sarve sahasrahastāśca jaṭāmukuṭadhāriṇaḥ | candrarekhāvataṃsāśca nīlakaṇṭhāstrilocanāḥ || ### [2.3.40.29](https://indike.org/pramana/in.purana.siva*complete-2.2.3.40.29) rudrākṣābharaṇāḥ sarve tathā sadbhasmadhāriṇaḥ | hārakuṇḍalakeyūramukuṭādyairalaṅkṛtāḥ || ### [2.3.40.30](https://indike.org/pramana/in.purana.siva*complete-2.2.3.40.30) brahmaviṣṇvindrasaṅkāśā aṇimādiguṇairyutāḥ | sūryakoṭipratīkāśāstatra rejurgaṇeśvarāḥ || ### [2.3.40.31](https://indike.org/pramana/in.purana.siva*complete-2.2.3.40.31) pṛthivīcāriṇaḥ kecit kecitpātālacāriṇaḥ | kecidvyomacarāḥ kecitsaptasvargacarā mune || ### [2.3.40.32](https://indike.org/pramana/in.purana.siva*complete-2.2.3.40.32) kiṃ bahūktena devarṣe sarvalokanivāsinaḥ | āyayuḥ svagaṇāḥ śambhoḥ prītyā vai śaṅkarotsave || ### [2.3.40.33](https://indike.org/pramana/in.purana.siva*complete-2.2.3.40.33) itthaṃ devairgaṇaiścānyaiḥ sahitaḥ śaṅkaraḥ prabhuḥ | yayau himagiripuraṃ vivāhārthaṃ nijasya vai || ### [2.3.40.34](https://indike.org/pramana/in.purana.siva*complete-2.2.3.40.34) yadā jagāma sarveśo vivāhārthaṃ surādibhiḥ | tadā tatra hyabhūdvṛttaṃ tacchṛṇu tvaṃ munīśvara || ### [2.3.40.35](https://indike.org/pramana/in.purana.siva*complete-2.2.3.40.35) rudrasya bhaginī bhūtvā caṇḍī sūtsavasaṃyutā | tatrājagāma suprītyā pareṣāṃ subhayāvahā || ### [2.3.40.36](https://indike.org/pramana/in.purana.siva*complete-2.2.3.40.36) pretāsanasamārūḍhā sarpābharaṇabhūṣitā | pūrṇaṃ kalaśamādāya haimaṃ mūrdhni mahāprabham || ### [2.3.40.37](https://indike.org/pramana/in.purana.siva*complete-2.2.3.40.37) svaparīvārasaṃyuktā dīptāsyā dīptalocanā | kutūhalaṃ prakurvantī jātaharṣā mahābalā || ### [2.3.40.38](https://indike.org/pramana/in.purana.siva*complete-2.2.3.40.38) tatra bhūtagaṇā divyā virūpāḥ koṭiśo mune | virājante sma bahuśaḥ tathā nānāvidhāstadā || ### [2.3.40.39](https://indike.org/pramana/in.purana.siva*complete-2.2.3.40.39) taiḥ sametāgrataścaṇḍī jagāma vikṛtānanā | kutūhalānvitā prītā prītyupadravakāriṇī || ### [2.3.40.40](https://indike.org/pramana/in.purana.siva*complete-2.2.3.40.40) caṇḍyā sarve rudragaṇāḥ pṛṣṭhataśca kṛtāstadā | koṭyekādaśasaṅkhyākā raudrarudrapriyāśca te || ### [2.3.40.41](https://indike.org/pramana/in.purana.siva*complete-2.2.3.40.41) tadā ḍamarunirghoṣairvyāptamāsījjagattrayam | bherījhaṅkāraśabdena śaṅkhānāṃ ninadena ca || ### [2.3.40.42](https://indike.org/pramana/in.purana.siva*complete-2.2.3.40.42) tathā dundubhinirghoṣaiḥ śabdaḥ kolāhalo'bhavat | kurvañjaganmaṅgalaṃ ca nāśayenmaṅgaletarat || ### [2.3.40.43](https://indike.org/pramana/in.purana.siva*complete-2.2.3.40.43) gaṇānāṃ pṛṣṭhato bhūtvā sarve devāḥ samutsukāḥ | anvayuḥ sarvasiddhāśca lokapālādikā mune || ### [2.3.40.44](https://indike.org/pramana/in.purana.siva*complete-2.2.3.40.44) madhye vrajan rameśo'tha garuḍāsanamāśritaḥ | śuśubhe dhriyamāṇena chatreṇa mahatā mune || ### [2.3.40.45](https://indike.org/pramana/in.purana.siva*complete-2.2.3.40.45) cāmarairvījyamāno'sau svagaṇaiḥ parivāritaḥ | pārṣadairvilasadbhiśca svabhūṣāvidhibhūṣitaḥ || ### [2.3.40.46](https://indike.org/pramana/in.purana.siva*complete-2.2.3.40.46) tathāhamapyaśobhaṃ vai vrajanmārge virājitaḥ | vedairmūrtidharaiḥ śāstraiḥ purāṇairāgamaistathā || ### [2.3.40.47](https://indike.org/pramana/in.purana.siva*complete-2.2.3.40.47) sanakādimahāsiddhaiḥ saprajāpatibhiḥ sutaiḥ | parivāraiḥ saṃyuto hi śivasevanatatparaḥ || ### [2.3.40.48](https://indike.org/pramana/in.purana.siva*complete-2.2.3.40.48) svasainyamadhyagaḥ śakra airāvatagajasthitaḥ | nānāvibhūṣito'tyantaṃ vrajan reje sureśvaraḥ || ### [2.3.40.49](https://indike.org/pramana/in.purana.siva*complete-2.2.3.40.49) tadā tu vrajamānāste ṛṣayo bahavaśca te | virejuratisotkaṇṭhāḥ śivasyodvāhanaṃ prati || ### [2.3.40.50](https://indike.org/pramana/in.purana.siva*complete-2.2.3.40.50) śākinyo yātudhānāśca vetālābrahmarākṣasāḥ | bhūtapretapiśācāśca tathānye pramathādayaḥ || ### [2.3.40.51](https://indike.org/pramana/in.purana.siva*complete-2.2.3.40.51) tumbururnārado hāhahūhūścetyādayo varāḥ | gandharvāḥ kinnarā jagmurvādyānādhmāya harṣitāḥ || ### [2.3.40.52](https://indike.org/pramana/in.purana.siva*complete-2.2.3.40.52) jagato mātaraḥ sarvā devakanyāśca sarvaśaḥ | gāyatrī caiva sāvitrī lakṣmīranyāḥ surastriyaḥ || ### [2.3.40.53](https://indike.org/pramana/in.purana.siva*complete-2.2.3.40.53) etāścānyāśca devānāṃ patnayo bhavamātaraḥ | udvāhaḥ śaṅkarasyeti jagmuḥ sarvā mudānvitāḥ || ### [2.3.40.54](https://indike.org/pramana/in.purana.siva*complete-2.2.3.40.54) śuddhasphaṭikasaṅkāśo vṛṣabhaḥ sarvasundaraḥ | yo dharma ucyate vedaiḥ śāstraiḥ siddhairmaharṣibhiḥ || ### [2.3.40.55](https://indike.org/pramana/in.purana.siva*complete-2.2.3.40.55) tamārūḍho mahādevo vṛṣabhaṃ dharmavatsalaḥ | śuśubhe'tīva devarṣisevitaḥ sakalairvrajan || ### [2.3.40.56](https://indike.org/pramana/in.purana.siva*complete-2.2.3.40.56) ebhiḥ sametaiḥ saphalairmaharṣibhi-rbabhau maheśo bahuśo'tyalaṅkṛtaḥ | himālayāhvasya dharasya saṃvrajan pāṇigrahārthaṃ sadanaṃ śivāyāḥ || ### [2.3.40.57](https://indike.org/pramana/in.purana.siva*complete-2.2.3.40.57) ityuktaṃ śambhucaritaṃ gamanaṃ paramotsavam | himālayapurodbhūtaṃ sadvṛttaṃ śṛṇu nārada || ### [2.3.40.57.c1](https://indike.org/pramana/in.purana.siva*complete-2.2.3.40.57.c1) iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivayātrāvarṇanaṃ nāma catvāriṃśo'dhyāyaḥ || ### [2.3.40.57.p2](https://indike.org/pramana/in.purana.siva*complete-2.2.3.40.57.p2) śrīgaṇeśāya namaḥ || ### [2.3.40.57.p3](https://indike.org/pramana/in.purana.siva*complete-2.2.3.40.57.p3) śrīgaurīśaṅkarābhyāṃ namaḥ || ### [2.3.40.57.p4](https://indike.org/pramana/in.purana.siva*complete-2.2.3.40.57.p4) śrīśivamahāpurāṇam || ### [2.3.40.57.p5](https://indike.org/pramana/in.purana.siva*complete-2.2.3.40.57.p5) dvitīyāyāṃ rudrasaṃhitāyāṃ tṛtīyaḥ pārvatīkhaṇḍe ## Linked texts (1) - [Vaiṣṇavakhaṇḍa](https://indike.org/pramana/in.purana.vaisnavakhanda.27.64) — Sanskrit --- Source: [https://indike.org/pramana/in.purana.siva*complete-2.2.3.40](https://indike.org/pramana/in.purana.siva*complete-2.2.3.40) · Pramāṇa