Shivapurana 2.3.41: ekacatvāriṃśo'dhyāyaḥ | vivāhamaṇḍapaṃ dṛṣṭvādevānāṃ mohavarṇanam
Śivapurāṇa (complete text) 2.3.41
- Language
- Sanskrit
Contents
- 2.3.41.54 — 5 parts
ekacatvāriṃśo'dhyāyaḥ | vivāhamaṇḍapaṃ dṛṣṭvādevānāṃ mohavarṇanam
2.3.41.1
brahmovāca |
tataḥ sammantrya ca mithaḥ prāpyājñāṃ śāṅkarīṃ hariḥ |
mune tvāṃ preṣayāmāsa prathamaṃ kudharālayam ||
2.3.41.2
atha praṇamya sarveśaṃ gatastvaṃ nāradāgrataḥ |
hariṇā noditaḥ prītyā himācalagṛhaṃ prati ||
2.3.41.3
tvaṃ mune'paśya ātmānaṃ gatvā tadvrīḍayānvitam |
kṛtrimaṃ racitaṃ tatra vismito viśvakarmaṇā ||
2.3.41.4
śrāntastvamātmanā tena kṛtrimeṇa mahāmune |
avalokaparaḥ so'bhūccaritaṃ viśvakarmaṇaḥ ||
2.3.41.5
praviṣṭo maṇḍapaṃ tasya himādre ratnacitritam |
suvarṇakalaśairjuṣṭaṃ rambhādibahuśobhitam ||
2.3.41.6
sahasrastambhasaṃyuktaṃ vicitraṃ paramādbhutam |
vedikāṃ ca tathā dṛṣṭvā vismayaṃ tvaṃ mune hyayāḥ ||
2.3.41.7
tadāvocaśca sa mune nārada tvaṃ nageśvaram |
vismito'tīva manasi naṣṭajñāno vimūḍhadhīḥ ||
2.3.41.8
āgatāste kimadhunā devā viṣṇupurogamāḥ |
tathā maharṣayaḥ sarve siddhā upasurāstathā ||
2.3.41.9
mahādevo vṛṣārūḍho gaṇaiśca parivāritaḥ |
āgataḥ kiṃ vivāhārthaṃ vada tathyaṃ nageśvara ||
2.3.41.10
brahmovāca |
ityevaṃ vacanaṃ śrutvā tava vismitacetasaḥ |
uvāca tvāṃ mune tathyaṃ vākyaṃ sa himavān giriḥ ||
2.3.41.11
himavānuvāca |
he nārada mahāprājñāgato naivādhunā śivaḥ |
vivāhārthaṃ ca pārvatyāḥ sagaṇaḥ savarātakaḥ ||
2.3.41.12
viśvakarmakṛtaṃ citraṃ viddhi nārada saddhiyā |
vismayaṃ tyaja devarṣe svastho bhava śivaṃ smara ||
2.3.41.13
bhuktvā viśramya suprītaḥ kṛpāṃ kṛtvā mamopari |
mainākādidharaiḥ sārdhaṃ gaccha tvaṃ śaṅkarāntikam ||
2.3.41.14
ebhissameto giribhirmahāmate samprārthya śīghraṃ śivamatra cānaya |
devaiḥ sametaṃ ca maharṣisaṅghaiḥ surāsurairarcitapādapallavam ||
2.3.41.15
brahmovāca |
tatheti coktvāgama āśu hi tvaṃ tadaiva taiḥ śailasutādibhiśca |
tatratyakṛtyaṃ suvidhāya bhuktvā mahāmanāstvaṃ śivasannidhānam ||
2.3.41.16
tatra dṛṣṭo mahādevo devādiparivāritaḥ |
namaskṛtastvayā dīptaḥ śailaistairbhaktitaśca vai ||
2.3.41.17
tadā mayā viṣṇunā ca sarve devāḥ savāsavāḥ |
papracchustvāṃ mune sarve rudrasyānucarāstathā ||
2.3.41.18
vismitāḥ parvatāndṛṣṭvā sandehākulamānasāḥ |
mainākasahyamervādyānnānālaṅkārasaṃyutān ||
2.3.41.19
devā ūcuḥ |
he nārada mahāprājña vismitastvaṃ hi dṛśyase |
satkṛto'si himāgena kiṃ na vā vada vistarāt ||
2.3.41.20
ete kasmātsamāyātāḥ parvatā iha sattamāḥ |
mainākasahyamervādyāḥ supratāpāḥ svalaṅkṛtāḥ ||
2.3.41.21
kanyāṃ dāsyati śailo'sau śambhave vā na nārada |
himālayagṛhe tāta kiṃ bhavatyadya tadvada ||
2.3.41.22
iti sandigdhamanasāmasmākaṃ ca divaukasām |
vada tvaṃ pṛcchamānānāṃ sandehaṃ hara suvrata ||
2.3.41.23
brahmovāca |
ityākarṇya vacasteṣāṃ viṣṇvādīnāndivaukasām |
avocastānmune tvaṃ hi vismitastvāṣṭramāyayā ||
2.3.41.24
ekāntamāśritya ca māṃ hi viṣṇu-mabhāṣathā vākyamidaṃ mune tvam |
śacīpatiṃ sarvasureśvaraṃ vai pakṣacchidaṃ pūrvaripuṃ dharāṇām ||
2.3.41.25
nārada uvāca |
tvaṣṭrā kṛtaṃ tadvikṛtaṃ vicitraṃ vimohanaṃ sarvadivaukasāṃ hi |
yenaiva sarvānsa vimohituṃ surān samicchati premata eva yuktyā ||
2.3.41.26
purā kṛtaṃ tasya vimohanaṃ tvayā suvismṛtaṃ tat sakalaṃ śacīpate |
tasmādasau tvāṃ vijigīṣureva gṛhe dhruvaṃ tasya girermahātmanaḥ ||
2.3.41.27
ahaṃ vimohitastena pratirūpeṇa bhāsvatā |
tathā viṣṇuḥ kṛtastena brahmā śakro'pi tādṛśaḥ ||
2.3.41.28
kiṃ bahūktena deveśa sarvadevagaṇāḥ kṛtāḥ |
kṛtrimāścitrarūpeṇa na kiñcidavaśeṣitam ||
2.3.41.29
vimohanārthaṃ sarveṣāṃ devānāṃ ca viśeṣataḥ |
kṛtā māyā citramayī parihāsavikāriṇī ||
2.3.41.30
brahmovāca |
tacchrutvā vacanaṃ tasya devendro vākyamabravīt |
viṣṇumprati tadā śīghraṃ bhayākulatanurharim ||
2.3.41.31
devendra uvāca |
devadeva ramānātha tvaṣṭā māṃ nihaniṣyati |
putraśokena tapto'sau vyājenānena nānyathā ||
2.3.41.32
brahmovāca |
tasya tadvacanaṃ śrutvā devadevo janārdanaḥ |
uvāca prahasan vākyaṃ śakramāśvāsayaṃstadā ||
2.3.41.33
viṣṇuruvāca |
nivātakavacaiḥ pūrvaṃ mohito'si śacīpate |
mahāvidyābalenaiva dānavaiḥ pūrvavairibhiḥ ||
2.3.41.34
parvato himavāneṣa tathānye'khilaparvatāḥ |
vipakṣā hi kṛtāḥ sarve mama vākyācca vāsava ||
2.3.41.35
te'nusmṛtyā tu vai dṛṣṭvā māyayā girayo hyamī |
jetumicchanti ye mūḍhā na bhetavyamarāvapi ||
2.3.41.36
īśvaro no hi sarveṣāṃ śaṅkaro bhaktavatsalaḥ |
sarvathā kuśalaṃ śakra kariṣyati na saṃśayaḥ ||
2.3.41.37
brahmovāca |
evaṃ saṃvadamānaṃ taṃ śakraṃ vikṛtamānasam |
hariṇoktaśca giriśo laukikīṃ gatimāśritaḥ ||
2.3.41.38
īśvara uvāca |
he hare he sureśāna kiṃ brūtho'dya parasparam |
ityuktvā tau maheśāno mune tvāṃ pratyuvāca saḥ ||
2.3.41.39
kiṃ nu vakti mahāśailo yathārthaṃ vada nārada |
vṛttāntaṃ sakalaṃ brūhi na gopyaṃ kartumarhasi ||
2.3.41.40
dadāti vā naiva dadāti śailaḥ sutāṃ svakīyāṃ vada tacca śīghram |
kiṃ te dṛṣṭaṃ kiṃ kṛtantatra gatvā prītyā sarvaṃ tadvadāśvadya tāta ||
2.3.41.41
brahmovāca |
hatyuktaḥ śambhunā tatra mune tvaṃ devadarśanaḥ |
sarvaṃ rahasyavoco vai yad dṛṣṭaṃ tatra maṇḍape ||
2.3.41.42
nārada uvāca |
devadeva mahādeva śṛṇu madvacanaṃ śubham |
nāsti vighnabhayaṃ nātha vivāhe kiñcideva hi ||
2.3.41.43
avaśyameva śaileśastubhyaṃ dāsyati kanyakām |
tvāmānayitumāyātā ime śailā na saṃśayaḥ ||
2.3.41.44
kintu hyamaramohārthaṃ māyā viracitādbhutā |
kutūhalārthaṃ sarvajña na kaścidvighnasambhavaḥ ||
2.3.41.45
vicitraṃ maṇḍapaṃ gehe'kārṣīttasya tadājñayā |
viśvakarmā mahāmāyī nānāścaryamayaṃ vibho ||
2.3.41.46
sarvadevasamājaśca kṛtastatra vimohanaḥ |
taṃ dṛṣṭvā vismayaṃ prāpto'haṃ tanmāyāvimohitaḥ ||
2.3.41.47
brahmovāca |
tacchrutvā tadvacastāta lokācārakaraḥ prabhuḥ |
haryādīnprahasan śambhuruvāca sakalānsurān ||
2.3.41.48
īśvara uvāca |
kanyāṃ dāsyati cenmahyaṃ parvato hi himācalaḥ |
māyayā mama kiṃ kāryaṃ vada viṣṇo yathātatham ||
2.3.41.49
he brahman śakra munayaḥ surā brūta yathārthataḥ |
māyayā mama kiṃ kāryaṃ kanyāṃ dāsyati cedgiriḥ ||
2.3.41.50
kenāpyupāyena phalaṃ hi sādhya-mityucyate paṇḍitairnyāyavidbhiḥ |
tasmātsarvairgamyatāṃ śīghrameva kāryārthibhirviṣṇupurogamaiśca ||
2.3.41.51
brahmovāca |
evaṃ saṃvadamāno'sau devaiḥ śambhurabhūttadā |
kṛtaḥ smareṇeva vaśī vaśaṃ vā prākṛto naraḥ ||
2.3.41.52
atha śambhvājñayā sarve viṣṇvādyā nirjarāstadā |
ṛṣayaśca mahātmāno yayurmohabhramāvaham ||
2.3.41.53
puraskṛtya mune tvāṃ ca parvatāṃstānsavismayāḥ |
himādreśca tadā jagmurmandiraṃ paramādbhutam ||
2.3.41.54
atha viṣṇvādisaṃyukto muditaiḥsvabalairyutaḥ |
ājagāmopahaimāgapuraṃ pramudito haraḥ ||
2.3.41.54.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe maṇḍaparacanāvarṇanaṃ nāmaikacatvāriṃśo'dhyāyaḥ ||
2.3.41.54.p2
śrīgaṇeśāya namaḥ ||
2.3.41.54.p3
śrīgaurīśaṅkarābhyāṃ namaḥ ||
2.3.41.54.p4
śrīśivamahāpurāṇam ||
2.3.41.54.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe