Shivapurana 2.3.42: dvicatvāriṃśo'dhyāyaḥ | devagirimilāpavarṇanam
Śivapurāṇa (complete text) 2.3.42
- Language
- Sanskrit
Contents
- 2.3.42.31 — 5 parts
dvicatvāriṃśo'dhyāyaḥ | devagirimilāpavarṇanam
2.3.42.1
brahmovāca |
athākarṇya girīśaśca nijapuryupakaṇṭhataḥ |
prāptamīśaṃ sarvagaṃ vai mumude'ti himālayaḥ ||
2.3.42.2
atha sambhṛtasambhāraḥ sambhāṣāṃ kartumīśvaram |
śailānprasthāpayāmāsa brāhmaṇānapi sarvaśaḥ ||
2.3.42.3
svayaṃ jagāma sadbhaktyā prāṇepsuṃ draṣṭumīśvaram |
bhaktyudrutamanāḥ śailaḥ praśaṃsan svavidhiṃ mudā ||
2.3.42.4
devasenāṃ tadā dṛṣṭvā himavānvismayaṃ gataḥ |
jagāma sammukhastatra dhanyo'hamiti cintayan ||
2.3.42.5
devā hi tadbalaṃ dṛṣṭvā vismayaṃ paramaṃ gatāḥ |
ānandaṃ paramaṃ prāpurdevāśca girayastathā ||
2.3.42.6
parvatānāṃ mahāsenā devānāṃ ca tathā mune |
militvā virarājeva pūrvapaścimasāgarau ||
2.3.42.7
parasparaṃ militvā te devāśca parvatāstathā |
kṛtakṛtyaṃ tathātmānaṃ menire parayā mudā ||
2.3.42.8
atheśvaraṃ puro dṛṣṭvā praṇanāma himālayaḥ |
sarve praṇemurgirayo brāhmaṇāśca sadāśivam ||
2.3.42.9
vṛṣabhasthaṃ prasannāsyaṃ nānābharaṇabhūṣitam |
divyāvayavalāvaṇyaprakāśitadigantaram ||
2.3.42.10
susūkṣmāhatasatpaṭṭavastraśobhitavigraham |
sadratnavilasanmauliṃ vihasantaṃ śuciprabham ||
2.3.42.11
bhūṣābhūtāhiyuktāṅgamadbhutāvayavaprabham |
divyadyutiṃ sureśaiśca sevitaṃ karacāmaraiḥ ||
2.3.42.12
vāmasthitācyutaṃ dakṣabhāgasthitavidhiṃ prabhum |
pṛṣṭhasthitahariṃ pṛṣṭhapārśvasthitasurādikam ||
2.3.42.13
nānāvidhasurādyaiśca saṃstutaṃ lokaśaṅkaram |
svahetvāttatanuṃ brahma sarveśaṃ varadāyakam ||
2.3.42.14
saguṇaṃ nirguṇaṃ cāpi bhaktādhīnaṃ kṛpākaram |
prakṛteḥ puruṣasyāpi paraṃ saccitsukhātmakam ||
2.3.42.15
prabhordakṣiṇabhāge tu dadarśa harimacyutam |
vinatātanayārūḍhaṃ nānābhūṣaṇabhūṣitam ||
2.3.42.16
prabhośca vāmabhāge tu mune māṃ sandadarśa ha |
caturmukhaṃ mahāśobhaṃ svaparīvārasaṃyutam ||
2.3.42.17
etau sureśvarau dṛṣṭvā śivasyātipriyau sadā |
praṇanāma girīśaśca saparīvāra ādarāt ||
2.3.42.18
tathā śivasya pṛṣṭhe ca pārśvayoḥ suvirājitān |
devādīnpraṇanāmāsau dṛṣṭvā girivareśvaraḥ ||
2.3.42.19
śivājñayā puro bhūtvā jagāma svapuraṃ giriḥ |
śeṣaharyātmabhūḥ śīghraṃ munibhirnirjarādibhiḥ ||
2.3.42.20
sarve munisurādyāśca gacchantaḥ prabhuṇā saha |
gireḥ puraṃ samuditāḥ śaśaṃsurbahu nārada ||
2.3.42.21
racite śikhare ramye saṃsthāpya devatādikam |
jagāma himavām̐statra yatrāsti vidhivedikā ||
2.3.42.22
kārayitvā viśeṣeṇa catuṣkaṃ toraṇairyutam |
snānadānādikaṃ kṛtvā parīkṣāmakarottadā ||
2.3.42.23
svaputrānpreṣayāmāsa śivasya nikaṭe tathā |
himo viṣṇvādisampūrṇavargayuktasya śailarāṭ ||
2.3.42.24
kartumaicchadvarācāraṃ mahotsavapurassaram |
mahāharṣayutaḥ sarvabandhuyugghimaśailarāṭ ||
2.3.42.25
atha te giriputrāśca tatra gatvā praṇamya tam |
sasvavargaṃ prārthanāntāmūcuḥ śaileśvarasya vai ||
2.3.42.26
tataste svālayaṃ jagmuḥ śailaputrāstadājñayā |
śailarājāya sañcakhyuḥ te cāyāntīti harṣitāḥ ||
2.3.42.27
atha devāḥ prārthanāntāṃ gireḥ śrutvātiharṣitāḥ |
mune viṣṇvādayaḥ sarve seśvarā mumudurbhṛśam ||
2.3.42.28
kṛtvā suveṣaṃ sarve'pi nirjarā munayo gaṇāḥ |
gamanaṃ cakruranye'pi prabhuṇā girirāḍgṛham ||
2.3.42.29
tasminnavasare menā draṣṭukāmābhavacchivam |
prabhorāhvāyayāmāsa mune tvāṃ munisattamam ||
2.3.42.30
agamastvaṃ mune tatra prabhuṇā preritastadā |
manasā śivahṛddhetuṃ pūrṇaṃ kartuṃ tamicchatā ||
2.3.42.31
tvāṃ praṇamya mune menā prāha vismitamānasā |
draṣṭukāmā prabho rūpaṃ śaṅkarasya madāpaham ||
2.3.42.31.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe devagirimilāpavarṇanaṃ nāma dvicatvāriṃśo'dhyāyaḥ ||
2.3.42.31.p2
śrīgaṇeśāya namaḥ ||
2.3.42.31.p3
śrīgaurīśaṅkarābhyāṃ namaḥ ||
2.3.42.31.p4
śrīśivamahāpurāṇam ||
2.3.42.31.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Brahmavaivartapurāṇa — Vyāsa, Sanskrit