Shivapurana 2.3.43: tricatvāriṃśo'dhyāyaḥ | menāmohanāya śivakṛtādbhutalīlāvarṇanam
Śivapurāṇa (complete text) 2.3.43
- Language
- Sanskrit
Contents
- 2.3.43.65 — 5 parts
tricatvāriṃśo'dhyāyaḥ | menāmohanāya śivakṛtādbhutalīlāvarṇanam
2.3.43.1
menovāca |
nirīkṣiṣyāmi prathamaṃ mune taṃ girijāpatim |
kīdṛśaṃ śivarūpaṃ hi yadarthe tapa uttamam ||
2.3.43.2
brahmovāca |
ityajñānaparā sā ca darśanārthaṃ śivasya ca |
tvayā mune samaṃ sadyaścandraśālāṃ samāgatā ||
2.3.43.3
śivo'pi ca tadā tasyāṃ jñātvāhaṅkāramātmanaḥ |
prāha viṣṇuṃ ca māṃ tāta līlāṃ kṛtvādbhutāṃ prabhuḥ ||
2.3.43.4
śiva uvāca |
madājñayā yuvāṃ tātau sadevau ca pṛthakpṛthak |
gacchataṃ hi giridvāraṃ vayaṃ paścād vrajemahi ||
2.3.43.5
brahmovāca |
ityākarṇya hariḥ sarvānāhūyovāca tanmayāḥ |
surāḥ sarve tathaivāśu gamanaṃ cakrurutsukāḥ ||
2.3.43.6
sthitāṃ śirogṛhe menāṃ mune viśveśvarastvayā |
tathaiva darśayāmāsa hṛdvibhraṃśo yathā bhavet ||
2.3.43.7
etasmin samaye menā senāṃ ca paramāṃ śubhām |
nirīkṣantī mune dṛṣṭvā sāmānyaṃ harṣitābhavat ||
2.3.43.8
prathamaṃ caiva gandharvāḥ sundarāḥ subhagāstadā |
āyātāḥ śubhavastrāḍhyā nānālaṅkārabhūṣitāḥ ||
2.3.43.9
nānāvāhanasaṃyuktā nānāvādyaparāyaṇāḥ |
patākābhirvicitrābhirapsarogaṇasaṃyutāḥ ||
2.3.43.10
atha dṛṣṭvā vasuṃ tatra tatpatiṃ paramaprabhum |
menā praharṣitā hyāsīcchivo'yamiti cābravīt ||
2.3.43.11
śivasya gaṇakā ete na śivo'yaṃ śivāpatiḥ |
ityevaṃ tvaṃ tatastāṃ vai avoca ṛṣisattama ||
2.3.43.12
evaṃ śrutvā tadā menā vicāre tatparābhavat |
itaścābhyadhiko yo vai sa ca kīdṛgbhaviṣyati ||
2.3.43.13
etasminnantare yakṣā maṇigrīvādayaśca ye |
teṣāṃ senā tayā dṛṣṭā śobhādi dviguṇīkṛtā ||
2.3.43.14
tatpatiṃ ca maṇigrīvaṃ dṛṣṭvā śobhānvitaṃ hi sā |
ayaṃ rudraḥ śivāsvāmī menā prāheti harṣitā ||
2.3.43.15
nāyaṃ rudraḥ śivāsvāmī sevako'yaṃ śivasya vai |
ityavoco'gapatnyai tvaṃ tāvadvahniḥ sa āgataḥ ||
2.3.43.16
tato'pi dviguṇāṃ śobhāṃ dṛṣṭvā tasya ca sābravīt |
rudro'yaṃ girijāsvāmī tadā neti tvamabravīḥ ||
2.3.43.17
tāvadyamaḥ samāyātaḥ tato'pi dviguṇaprabhaḥ |
taṃ dṛṣṭvā prāha sā menā rudro'yamiti harṣitā ||
2.3.43.18
neti tvamabravīstāṃ vai tāvannirṛtirāgataḥ |
bibhrāṇo dviguṇāṃ śobhāṃ śubhaḥ puṇyajanaprabhuḥ ||
2.3.43.19
taṃ dṛṣṭvā prāha sā menā rudro'yamiti harṣitā |
neti tvamabravīstāṃ vai tāvadvaruṇa āgataḥ ||
2.3.43.20
tato'pi dviguṇāṃ śobhāṃ dṛṣṭvā tasya ca sābravīt |
rudro'yaṃ girijāsvāmī tadā neti tvamabravīḥ ||
2.3.43.21
tāvadvāyuḥ samāyātaḥ tato'pi dviguṇaprabhaḥ |
taṃ dṛṣṭvā prāha sā menā rudro'yamiti harṣitā ||
2.3.43.22
neti tvamabravīstāṃ vai tāvaddhanada āgataḥ |
tato'pi dviguṇāṃ śobhāṃ bibhrāṇo guhyakādhipaḥ ||
2.3.43.23
taṃ dṛṣṭvā prāha sā menā rudro'yamiti harṣitā |
neti tvamabravīstāṃ vai tāvadīśāna āgataḥ ||
2.3.43.24
tato'pi dviguṇāṃ śobhāṃ dṛṣṭvā tasya ca sābravīt |
rudro'yaṃ girijāsvāmī tadā neti tvamabravīḥ ||
2.3.43.25
tāvadindraḥ samāyātaḥ tato'pi dviguṇaprabhaḥ |
sarvāmaravaro nānādivyabhāstridiveśvaraḥ ||
2.3.43.26
taṃ dṛṣṭvā śaṅkaraḥ so'yamiti sā prāha menakā |
śakraḥ surapatiścāyaṃ sa neti tvaṃ tadābravīḥ ||
2.3.43.27
tāvaccandraḥ samāyātaḥ śobhāṃ taddviguṇāṃ dadhat |
dṛṣṭvā taṃ prāha rudro'yaṃ tāṃ tu neti tvamabravīḥ ||
2.3.43.28
tāvatsūryaḥ samāyātaḥ śobhāṃ taddviguṇāṃ dadhat |
dṛṣṭvā taṃ prāha sā so'yaṃ tāṃ tu neti tvamabravīḥ ||
2.3.43.29
tāvatsamāgatāstatra bhṛgvādyāśca munīśvarāḥ |
tejaso rāśayaḥ sarve svaśiṣyagaṇasaṃyutāḥ ||
2.3.43.30
tanmadhye caiva vāgīśaṃ dṛṣṭvā sā prāha menakā |
rudro'yaṃ girijāsvāmī tadā neti tvamabravīḥ ||
2.3.43.31
tāvadbrahmā samāyātaḥ tejasāṃ rāśiruttamaḥ |
sarṣivaryasutaḥ sākṣāddharmapuñja iva stutaḥ ||
2.3.43.32
dṛṣṭvā māṃ taṃ tadā menā mahāharṣavatī mune |
so'yaṃ śivāpatiḥ prāha tāṃ tu neti tvamabravīḥ ||
2.3.43.33
etasminnantare tatra viṣṇurdevaḥ samāgataḥ |
sarvaśobhānvitaḥ śrīmānmeghaśyāmaścaturbhujaḥ ||
2.3.43.34
koṭikandarpalāvaṇyaḥ pītāmbaradharaḥ svarāṭ |
rājīvalocanaḥ śāntaḥ pakṣīndravaravāhanaḥ ||
2.3.43.35
śaṅkhādilakṣaṇairyukto mukuṭādivibhūṣitaḥ |
śrīvatsavakṣā lakṣmīśo hyaprameyaprabhānvitaḥ ||
2.3.43.36
taṃ dṛṣṭvā cakitākṣyāsīnmahāharṣeṇa sābravīt |
so'yaṃ śivāpatiḥ sākṣācchivo vai nātra saṃśayaḥ ||
2.3.43.37
atha tvaṃ menakāvākyamākarṇyovāca ūtikṛt |
nāyaṃ śivāpatirayaṃ kintvayaṃ keśavo hariḥ ||
2.3.43.38
śaṅkarākhilakāryasya hyadhikārī ca tatpriyaḥ |
ato'dhiko varo jñeyaḥ sa śivaḥ pārvatīpatiḥ ||
2.3.43.39
tacchobhāṃ varṇituṃ mene mayā naiva hi śakyate |
sa evākhilabrahmāṇḍapatiḥ sarveśvaraḥ svarāṭ ||
2.3.43.40
brahmovāca |
ityākarṇya vacastasya menā mene ca tāṃ śubhām |
mahādhanāṃ bhāgyavatīṃ kulatrayasukhāvahām ||
2.3.43.41
uvāca ca prasannāsyā prītiyuktena cetasā |
svabhāgyamadhikaṃ cāpi varṇayantī muhurmuhuḥ ||
2.3.43.42
menovāca |
dhanyāhaṃ sarvathā jātā pārvatyā janmanādhunā |
dhanyo girīśvaro'pyadya sarvaṃ dhanyatamaṃ mama ||
2.3.43.43
ye ye dṛṣṭvā mayā devā nāyakāḥ suprabhānvitāḥ |
eteṣāṃ yaḥ patiḥ so'tra patirasyā bhaviṣyati ||
2.3.43.44
asyāḥ kiṃ varṇyate bhāgyamapi varṣaśatairapi |
varṇituṃ śakyate naiva tatprabhuprāptidarśanāt ||
2.3.43.45
brahmovāca |
ityavādīcca sā menā premanirbharamānasā |
tāvatsamāgato rudro'dbhutotikārakaḥ prabhuḥ ||
2.3.43.46
adbhutātmāgaṇāstāta menāgarvāpahārakāḥ |
ātmānaṃ darśayan māyānirliptaṃ nirvikārakam ||
2.3.43.47
tamāgatamabhipretya nārada tvaṃ mune tadā |
menāmavocaḥ suprītyā darśayaṃstaṃ śivāpatim ||
2.3.43.48
nārada uvāca |
ayaṃ sa śaṅkaraḥ sākṣād dṛśyatāṃ sundari tvayā |
yadarthe śivayā taptaṃ tapo'ti vipine mahat ||
2.3.43.49
brahmovāca |
ityuktvā harṣitā menā taṃ dadarśa mudā prabhum |
adbhutākṛtimīśānamadbhutānugamadbhutam ||
2.3.43.50
tāvadevaṃ samāyātā rudrasenā mahādbhutā |
bhūtapretādisaṃyuktā nānāgaṇasamanvitā ||
2.3.43.51
vātyārūpadharāḥ kecitpatākāmarmarasvanāḥ |
vakratuṇḍāstatra kecidvirūpāścāpare tathā ||
2.3.43.52
karālāḥ śmaśrulāḥ kecitkecitkhañjā hyalocanāḥ |
daṇḍapāśadharāḥ kecitkecinmudgarapāṇayaḥ ||
2.3.43.53
viruddhavāhanāḥ kecicchṛṅganādaninādinaḥ |
ḍamarorvādinaḥ kecitkecidgomukhavādinaḥ ||
2.3.43.54
amukhāḥ vimukhāḥ kecitkecid bahumukhā gaṇāḥ |
akarā vikarāḥ kecitkecid bahukarā gaṇāḥ ||
2.3.43.55
anetrā bahunetrāśca viśirāḥ kuśirāstathā |
akarṇā bahukarṇāśca nānāveṣadharā gaṇāḥ ||
2.3.43.56
ityādivikṛtākārā aneke prabalā gaṇāḥ |
asaṅkhyātāstathā tāta mahāvīrā bhayaṅkarāḥ ||
2.3.43.57
aṅgulyā darśayaṃstvaṃ tāṃ mune rudragaṇāṃstataḥ |
harasya sevakānpaśya haraṃ cāpi varānane ||
2.3.43.58
asaṅkhyātān gaṇān dṛṣṭvā bhūtapretādikān mune |
tatkṣaṇādabhavatsā vai menakā trāsasaṅkulā ||
2.3.43.59
tanmadhye śaṅkaraṃ caiva nirguṇaṃ guṇavattaram |
vṛṣabhasthaṃ pañcavaktraṃ trinetraṃ bhūtibhūṣitam ||
2.3.43.60
kapardinaṃ candramauliṃ daśahastaṃ kapālinam |
vyāghracarmottarīyaṃ ca pinākavarapāṇinam ||
2.3.43.61
śūlayuktaṃ virūpākṣaṃ vikṛtākāramākulam |
gajacarma vasānaṃ hi vīkṣya trese śivāprasūḥ ||
2.3.43.62
cakitāṃ kampasaṃyuktāṃ vihvalāṃ vibhramaddhiyam |
śivo'yamiti cāṅgulyā darśayaṃstāṃ tvamabravīḥ ||
2.3.43.63
tvadīyaṃ tadvacaḥ śrutvā vātāhatalatā iva |
sā papāta drutaṃ bhūmau menā duḥkhabharā satī ||
2.3.43.64
kimidaṃ vikṛtaṃ dṛṣṭvā vañcitāhaṃ durāgrahe |
ityuktvā mūrcchitā tatra menakā sābhavatkṣaṇāt ||
2.3.43.65
atha prayatnairvividhaiḥ sakhībhirupasevitā |
lebhe saṃjñāṃ śanairmenā girīśvarapriyā tadā ||
2.3.43.65.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivādbhutalīlāvarṇanaṃ nāma tricatvāriṃśo'dhyāyaḥ ||
2.3.43.65.p2
śrīgaṇeśāya namaḥ ||
2.3.43.65.p3
śrīgaurīśaṅkarābhyāṃ namaḥ ||
2.3.43.65.p4
śrīśivamahāpurāṇam ||
2.3.43.65.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe