Shivapurana 2.3.45: pañcacatvāriṃśo'dhyāyaḥ | divyasvarūpeṇa śivāvirbhāvasthitivarṇanam
Śivapurāṇa (complete text) 2.3.45
- Language
- Sanskrit
Contents
- 2.3.45.46 — 5 parts
pañcacatvāriṃśo'dhyāyaḥ | divyasvarūpeṇa śivāvirbhāvasthitivarṇanam
2.3.45.1
brahmovāca |
etasminnantare tvaṃ hi viṣṇunā prerito drutam |
anukūlayituṃ śambhumayāstannikaṭe mune ||
2.3.45.2
tatra gatvā sa vai rudro bhavatā suprabodhitaḥ |
stotrairnānāvidhaiḥ stutvā devakāryacikīrṣayā ||
2.3.45.3
śrutvā tvadvacanaṃ prītyā śambhunā dhṛtamadbhutam |
svarūpamuttamaṃ divyaṃ kṛpālutvaṃ ca darśitam ||
2.3.45.4
tad dṛṣṭvā sundaraṃ śambhuṃ svarūpaṃ manmathādhikam |
atyahṛṣyo mune tvaṃ hi lāvaṇyaparamāyanam ||
2.3.45.5
stotrairnānāvidhaiḥ stutvā paramānandasaṃyutaḥ |
āgacchastvaṃ mune tatra yatra menā sthitākhilaiḥ ||
2.3.45.6
tatrāgatya suprasanno mune'tipremasaṅkulaḥ |
harṣayaṃstāṃ śailapatnīṃ menāṃ tvaṃ vākyamabravīḥ ||
2.3.45.7
nārada uvāca |
mene paśya viśālākṣi śivarūpamanuttamam |
kṛtā śivena tenaiva sukṛpā karuṇātmanā ||
2.3.45.8
brahmovāca |
śrutvā sā tadvaco menā vismitā śailakāminī |
dadarśa śivarūpaṃ tatparamānandadāyakam ||
2.3.45.9
koṭisūryapratīkāśaṃ sarvāvayavasundaram |
vicitravasanaṃ cātra nānābhūṣaṇabhūṣitam ||
2.3.45.10
suprasannaṃ suhāsaṃ ca sulāvaṇyaṃ manoharam |
gaurābhaṃ dyutisaṃyuktaṃ candrarekhāvibhūṣitam ||
2.3.45.11
sarvairdevagaṇaiḥ prītyā viṣṇvādyaiḥ sevitaṃ tathā |
sūryeṇa cchatritaṃ mūrdhni candreṇa ca viśobhitam ||
2.3.45.12
sarvathā ramaṇīyaṃ ca bhūṣitasya vibhūṣaṇaiḥ |
vāhanasya mahāśobhā varṇituṃ naiva śakyate ||
2.3.45.13
gaṅgā ca yamunā caiva vidhattaḥ sma sucāmare |
siddhayo'ṣṭau purastasya kurvanti sma sunartanam ||
2.3.45.14
mayā caiva tadā viṣṇurindrādyā hyamarāstathā |
svaṃ svaṃ veṣaṃ susambhūṣya giriśenācaranyutāḥ ||
2.3.45.15
tathā jayeti bhāṣanto nānārūpā gaṇāstadā |
svalaṅkṛtamahāmodā girīśapurato'caran ||
2.3.45.16
siddhāścopasurāḥ sarve munayaśca mahāsukhāḥ |
yayuḥ śivena suprītāḥ sakalāścāpare tathā ||
2.3.45.17
evaṃ devādayaḥ sarve kutūhalasamanvitāḥ |
paraṃ brahma gṛṇantaste svapatnībhiralaṅkṛtāḥ ||
2.3.45.18
viśvāvasumukhāstatra hyapsarogaṇasaṃyutāḥ |
gāyanto'pyagratastasya paramaṃ śāṅkaraṃ yaśaḥ ||
2.3.45.19
itthaṃ mahotsavastatra babhūva munisattama |
nānāvidho maheśe hi śailadvāri ca gacchati ||
2.3.45.20
tasmiṃśca samaye tatra suṣamā yā parātmanaḥ |
varṇituṃ tāṃ viśeṣeṇa kaḥ śaknoti munīśvara ||
2.3.45.21
tathāvidhaṃ ca taṃ dṛṣṭvā menā citragatā iva |
kṣaṇamāsīttataḥ prītyā provāca vacanaṃ mune ||
2.3.45.22
menovāca |
dhanyā putrī madīyā ca yayā taptaṃ mahattapaḥ |
yatprabhāvānmaheśāna tvaṃ prāpta iha madgṛhe ||
2.3.45.23
mayā kṛtā purā yā vai śivanindā duratyayā |
tāṃ kṣamasva śivāsvāminsuprasanno bhavādhunā ||
2.3.45.24
brahmovāca |
itthaṃ sambhāṣya sā menā saṃstūyendulalāṭakam |
sāñjaliḥ praṇatā śailapriyā lajjāparābhavat ||
2.3.45.25
tāvatstriyaḥ samājagmurhitvā kāmānanekaśaḥ |
vahvyastāḥ puravāsinyaḥ śivadarśanalālasāḥ ||
2.3.45.26
majjanaṃ kurvatī kācittaccūrṇasahitā yayau |
draṣṭuṃ kutūhalāḍhyā ca śaṅkaraṃ girijāvaram ||
2.3.45.27
kācittu svāminaḥsevāṃ sakhīyuktā vihāya ca |
sucāmarakarā prītyāgācchambhordarśanāya vai ||
2.3.45.28
kācittu bālakaṃ hitvā pibantaṃ stanyamādarāt |
atṛptaṃ śaṅkaraṃ draṣṭuṃ yayau darśanalālasā ||
2.3.45.29
raśanāṃ badhnatī kācittayaiva sahitā yayau |
vasanaṃ viparītaṃ vai dhṛtvā kācidyayau tataḥ ||
2.3.45.30
bhojanārthaṃ sthitaṃ kāntaṃ hitvā kācidyayau priyā |
draṣṭuṃ śivāvaraṃ prītyā satṛṣṇā sakutūhalā ||
2.3.45.31
kāciddhaste śalākāṃ ca dhṛtvāñjanakarā priyā |
añjitvaikākṣi sandraṣṭuṃ yayau śailasutāvaram ||
2.3.45.32
kācittu kāminī pādau rañjayantī hyalaktakaiḥ |
śrutvā ghoṣaṃ ca taddhitvā darśanārthamupāgatā ||
2.3.45.33
ityādi vividhaṃ kāryaṃ hitvā vāsaṃ striyo yayuḥ |
dṛṣṭvā tu śāṅkaraṃ rūpaṃ mohaṃ prāptāstadābhavan ||
2.3.45.34
tatastāḥ premasaṃvignāḥ śivadarśanaharṣitāḥ |
nidhāya hṛdi tanmūrtiṃ vacanaṃ cedamabruvan ||
2.3.45.35
puravāsinya ūcuḥ |
netrāṇi saphalānyāsan himavatpuravāsinām |
yo yo'paśyadado rūpaṃ tasya vai sārthakaṃ januḥ ||
2.3.45.36
tasyaiva saphalaṃ janma tasyaiva saphalāḥ kriyāḥ |
yena dṛṣṭaḥ śivaḥ sākṣātsarvapāpapraṇāśakaḥ ||
2.3.45.37
pārvatyā sādhitaṃ sarvaṃ śivārthe yattapaḥ kṛtam |
dhanyeyaṃ kṛtakṛtyeyaṃ śivā prāpya śivaṃ patim ||
2.3.45.38
yadīdaṃ yugalaṃ brahmā na yuñjyācchivayormudā |
tadā ca sakalo'pyasya śramo niṣphalatāmiyāt ||
2.3.45.39
samyak kṛtaṃ tathā cātra yojitaṃ yugmamuttamam |
sarveṣāṃ sārthatā jātā sarvakāryasamudbhavā ||
2.3.45.40
vinā tu tapasā śambhordarśanaṃ durlabhaṃ nṛṇām |
darśanācchaṅkarasyaiva sarve yātāḥ kṛtārthatām ||
2.3.45.41
lakṣmīrnārāyaṇaṃ lebhe yathā vai svāminaṃ purā |
tathāsau pārvatī devī haraṃ prāpya subhūṣitā ||
2.3.45.42
brahmāṇaṃ ca yathā lebhe svāminaṃ vai sarasvatī |
tathāsau pārvatī devī haraṃ prāpya subhūṣitā ||
2.3.45.43
vayaṃ dhanyāḥ striyaḥ sarvāḥ puruṣāḥ sakalā varāḥ |
ye ye paśyanti sarveśaṃ śaṅkaraṃ girijāpatim ||
2.3.45.44
brahmovāca |
itthamuktvā tu vacanaṃ candanaiścākṣatairapi |
śivaṃ samarcayāmāsurlājānvavṛṣurādarāt ||
2.3.45.45
tasthustatra striyaḥ sarvā menayā saha sotsukāḥ |
varṇayantyo'dhikaṃ bhāgyaṃ menāyāśca girerapi ||
2.3.45.46
kathāstathāvidhāḥ śṛṇvaṃstadvāmāvarṇitāḥ śubhāḥ |
prahṛṣṭo'bhūtprabhuḥ sarvairmune viṣṇvādibhistadā ||
2.3.45.46.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivasundarasvarūpa-puravāsyutsavavarṇanaṃ nāma pañcacatvāriṃśo'dhyāyaḥ ||
2.3.45.46.p2
śrīgaṇeśāya namaḥ ||
2.3.45.46.p3
śrīgaurīśaṅkarābhyāṃ namaḥ ||
2.3.45.46.p4
śrīśivamahāpurāṇam ||
2.3.45.46.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe