[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 2.3.45 # Shivapurana 2.3.45: pañcacatvāriṃśo'dhyāyaḥ | divyasvarūpeṇa śivāvirbhāvasthitivarṇanam Śivapurāṇa (complete text) 2.3.45 - **Language:** Sanskrit ## Contents - [2.3.45.46](https://indike.org/pramana/in.purana.siva*complete-2.2.3.45.46) — 5 parts ### pañcacatvāriṃśo'dhyāyaḥ | divyasvarūpeṇa śivāvirbhāvasthitivarṇanam ### [2.3.45.1](https://indike.org/pramana/in.purana.siva*complete-2.2.3.45.1) brahmovāca | etasminnantare tvaṃ hi viṣṇunā prerito drutam | anukūlayituṃ śambhumayāstannikaṭe mune || ### [2.3.45.2](https://indike.org/pramana/in.purana.siva*complete-2.2.3.45.2) tatra gatvā sa vai rudro bhavatā suprabodhitaḥ | stotrairnānāvidhaiḥ stutvā devakāryacikīrṣayā || ### [2.3.45.3](https://indike.org/pramana/in.purana.siva*complete-2.2.3.45.3) śrutvā tvadvacanaṃ prītyā śambhunā dhṛtamadbhutam | svarūpamuttamaṃ divyaṃ kṛpālutvaṃ ca darśitam || ### [2.3.45.4](https://indike.org/pramana/in.purana.siva*complete-2.2.3.45.4) tad dṛṣṭvā sundaraṃ śambhuṃ svarūpaṃ manmathādhikam | atyahṛṣyo mune tvaṃ hi lāvaṇyaparamāyanam || ### [2.3.45.5](https://indike.org/pramana/in.purana.siva*complete-2.2.3.45.5) stotrairnānāvidhaiḥ stutvā paramānandasaṃyutaḥ | āgacchastvaṃ mune tatra yatra menā sthitākhilaiḥ || ### [2.3.45.6](https://indike.org/pramana/in.purana.siva*complete-2.2.3.45.6) tatrāgatya suprasanno mune'tipremasaṅkulaḥ | harṣayaṃstāṃ śailapatnīṃ menāṃ tvaṃ vākyamabravīḥ || ### [2.3.45.7](https://indike.org/pramana/in.purana.siva*complete-2.2.3.45.7) nārada uvāca | mene paśya viśālākṣi śivarūpamanuttamam | kṛtā śivena tenaiva sukṛpā karuṇātmanā || ### [2.3.45.8](https://indike.org/pramana/in.purana.siva*complete-2.2.3.45.8) brahmovāca | śrutvā sā tadvaco menā vismitā śailakāminī | dadarśa śivarūpaṃ tatparamānandadāyakam || ### [2.3.45.9](https://indike.org/pramana/in.purana.siva*complete-2.2.3.45.9) koṭisūryapratīkāśaṃ sarvāvayavasundaram | vicitravasanaṃ cātra nānābhūṣaṇabhūṣitam || ### [2.3.45.10](https://indike.org/pramana/in.purana.siva*complete-2.2.3.45.10) suprasannaṃ suhāsaṃ ca sulāvaṇyaṃ manoharam | gaurābhaṃ dyutisaṃyuktaṃ candrarekhāvibhūṣitam || ### [2.3.45.11](https://indike.org/pramana/in.purana.siva*complete-2.2.3.45.11) sarvairdevagaṇaiḥ prītyā viṣṇvādyaiḥ sevitaṃ tathā | sūryeṇa cchatritaṃ mūrdhni candreṇa ca viśobhitam || ### [2.3.45.12](https://indike.org/pramana/in.purana.siva*complete-2.2.3.45.12) sarvathā ramaṇīyaṃ ca bhūṣitasya vibhūṣaṇaiḥ | vāhanasya mahāśobhā varṇituṃ naiva śakyate || ### [2.3.45.13](https://indike.org/pramana/in.purana.siva*complete-2.2.3.45.13) gaṅgā ca yamunā caiva vidhattaḥ sma sucāmare | siddhayo'ṣṭau purastasya kurvanti sma sunartanam || ### [2.3.45.14](https://indike.org/pramana/in.purana.siva*complete-2.2.3.45.14) mayā caiva tadā viṣṇurindrādyā hyamarāstathā | svaṃ svaṃ veṣaṃ susambhūṣya giriśenācaranyutāḥ || ### [2.3.45.15](https://indike.org/pramana/in.purana.siva*complete-2.2.3.45.15) tathā jayeti bhāṣanto nānārūpā gaṇāstadā | svalaṅkṛtamahāmodā girīśapurato'caran || ### [2.3.45.16](https://indike.org/pramana/in.purana.siva*complete-2.2.3.45.16) siddhāścopasurāḥ sarve munayaśca mahāsukhāḥ | yayuḥ śivena suprītāḥ sakalāścāpare tathā || ### [2.3.45.17](https://indike.org/pramana/in.purana.siva*complete-2.2.3.45.17) evaṃ devādayaḥ sarve kutūhalasamanvitāḥ | paraṃ brahma gṛṇantaste svapatnībhiralaṅkṛtāḥ || ### [2.3.45.18](https://indike.org/pramana/in.purana.siva*complete-2.2.3.45.18) viśvāvasumukhāstatra hyapsarogaṇasaṃyutāḥ | gāyanto'pyagratastasya paramaṃ śāṅkaraṃ yaśaḥ || ### [2.3.45.19](https://indike.org/pramana/in.purana.siva*complete-2.2.3.45.19) itthaṃ mahotsavastatra babhūva munisattama | nānāvidho maheśe hi śailadvāri ca gacchati || ### [2.3.45.20](https://indike.org/pramana/in.purana.siva*complete-2.2.3.45.20) tasmiṃśca samaye tatra suṣamā yā parātmanaḥ | varṇituṃ tāṃ viśeṣeṇa kaḥ śaknoti munīśvara || ### [2.3.45.21](https://indike.org/pramana/in.purana.siva*complete-2.2.3.45.21) tathāvidhaṃ ca taṃ dṛṣṭvā menā citragatā iva | kṣaṇamāsīttataḥ prītyā provāca vacanaṃ mune || ### [2.3.45.22](https://indike.org/pramana/in.purana.siva*complete-2.2.3.45.22) menovāca | dhanyā putrī madīyā ca yayā taptaṃ mahattapaḥ | yatprabhāvānmaheśāna tvaṃ prāpta iha madgṛhe || ### [2.3.45.23](https://indike.org/pramana/in.purana.siva*complete-2.2.3.45.23) mayā kṛtā purā yā vai śivanindā duratyayā | tāṃ kṣamasva śivāsvāminsuprasanno bhavādhunā || ### [2.3.45.24](https://indike.org/pramana/in.purana.siva*complete-2.2.3.45.24) brahmovāca | itthaṃ sambhāṣya sā menā saṃstūyendulalāṭakam | sāñjaliḥ praṇatā śailapriyā lajjāparābhavat || ### [2.3.45.25](https://indike.org/pramana/in.purana.siva*complete-2.2.3.45.25) tāvatstriyaḥ samājagmurhitvā kāmānanekaśaḥ | vahvyastāḥ puravāsinyaḥ śivadarśanalālasāḥ || ### [2.3.45.26](https://indike.org/pramana/in.purana.siva*complete-2.2.3.45.26) majjanaṃ kurvatī kācittaccūrṇasahitā yayau | draṣṭuṃ kutūhalāḍhyā ca śaṅkaraṃ girijāvaram || ### [2.3.45.27](https://indike.org/pramana/in.purana.siva*complete-2.2.3.45.27) kācittu svāminaḥsevāṃ sakhīyuktā vihāya ca | sucāmarakarā prītyāgācchambhordarśanāya vai || ### [2.3.45.28](https://indike.org/pramana/in.purana.siva*complete-2.2.3.45.28) kācittu bālakaṃ hitvā pibantaṃ stanyamādarāt | atṛptaṃ śaṅkaraṃ draṣṭuṃ yayau darśanalālasā || ### [2.3.45.29](https://indike.org/pramana/in.purana.siva*complete-2.2.3.45.29) raśanāṃ badhnatī kācittayaiva sahitā yayau | vasanaṃ viparītaṃ vai dhṛtvā kācidyayau tataḥ || ### [2.3.45.30](https://indike.org/pramana/in.purana.siva*complete-2.2.3.45.30) bhojanārthaṃ sthitaṃ kāntaṃ hitvā kācidyayau priyā | draṣṭuṃ śivāvaraṃ prītyā satṛṣṇā sakutūhalā || ### [2.3.45.31](https://indike.org/pramana/in.purana.siva*complete-2.2.3.45.31) kāciddhaste śalākāṃ ca dhṛtvāñjanakarā priyā | añjitvaikākṣi sandraṣṭuṃ yayau śailasutāvaram || ### [2.3.45.32](https://indike.org/pramana/in.purana.siva*complete-2.2.3.45.32) kācittu kāminī pādau rañjayantī hyalaktakaiḥ | śrutvā ghoṣaṃ ca taddhitvā darśanārthamupāgatā || ### [2.3.45.33](https://indike.org/pramana/in.purana.siva*complete-2.2.3.45.33) ityādi vividhaṃ kāryaṃ hitvā vāsaṃ striyo yayuḥ | dṛṣṭvā tu śāṅkaraṃ rūpaṃ mohaṃ prāptāstadābhavan || ### [2.3.45.34](https://indike.org/pramana/in.purana.siva*complete-2.2.3.45.34) tatastāḥ premasaṃvignāḥ śivadarśanaharṣitāḥ | nidhāya hṛdi tanmūrtiṃ vacanaṃ cedamabruvan || ### [2.3.45.35](https://indike.org/pramana/in.purana.siva*complete-2.2.3.45.35) puravāsinya ūcuḥ | netrāṇi saphalānyāsan himavatpuravāsinām | yo yo'paśyadado rūpaṃ tasya vai sārthakaṃ januḥ || ### [2.3.45.36](https://indike.org/pramana/in.purana.siva*complete-2.2.3.45.36) tasyaiva saphalaṃ janma tasyaiva saphalāḥ kriyāḥ | yena dṛṣṭaḥ śivaḥ sākṣātsarvapāpapraṇāśakaḥ || ### [2.3.45.37](https://indike.org/pramana/in.purana.siva*complete-2.2.3.45.37) pārvatyā sādhitaṃ sarvaṃ śivārthe yattapaḥ kṛtam | dhanyeyaṃ kṛtakṛtyeyaṃ śivā prāpya śivaṃ patim || ### [2.3.45.38](https://indike.org/pramana/in.purana.siva*complete-2.2.3.45.38) yadīdaṃ yugalaṃ brahmā na yuñjyācchivayormudā | tadā ca sakalo'pyasya śramo niṣphalatāmiyāt || ### [2.3.45.39](https://indike.org/pramana/in.purana.siva*complete-2.2.3.45.39) samyak kṛtaṃ tathā cātra yojitaṃ yugmamuttamam | sarveṣāṃ sārthatā jātā sarvakāryasamudbhavā || ### [2.3.45.40](https://indike.org/pramana/in.purana.siva*complete-2.2.3.45.40) vinā tu tapasā śambhordarśanaṃ durlabhaṃ nṛṇām | darśanācchaṅkarasyaiva sarve yātāḥ kṛtārthatām || ### [2.3.45.41](https://indike.org/pramana/in.purana.siva*complete-2.2.3.45.41) lakṣmīrnārāyaṇaṃ lebhe yathā vai svāminaṃ purā | tathāsau pārvatī devī haraṃ prāpya subhūṣitā || ### [2.3.45.42](https://indike.org/pramana/in.purana.siva*complete-2.2.3.45.42) brahmāṇaṃ ca yathā lebhe svāminaṃ vai sarasvatī | tathāsau pārvatī devī haraṃ prāpya subhūṣitā || ### [2.3.45.43](https://indike.org/pramana/in.purana.siva*complete-2.2.3.45.43) vayaṃ dhanyāḥ striyaḥ sarvāḥ puruṣāḥ sakalā varāḥ | ye ye paśyanti sarveśaṃ śaṅkaraṃ girijāpatim || ### [2.3.45.44](https://indike.org/pramana/in.purana.siva*complete-2.2.3.45.44) brahmovāca | itthamuktvā tu vacanaṃ candanaiścākṣatairapi | śivaṃ samarcayāmāsurlājānvavṛṣurādarāt || ### [2.3.45.45](https://indike.org/pramana/in.purana.siva*complete-2.2.3.45.45) tasthustatra striyaḥ sarvā menayā saha sotsukāḥ | varṇayantyo'dhikaṃ bhāgyaṃ menāyāśca girerapi || ### [2.3.45.46](https://indike.org/pramana/in.purana.siva*complete-2.2.3.45.46) kathāstathāvidhāḥ śṛṇvaṃstadvāmāvarṇitāḥ śubhāḥ | prahṛṣṭo'bhūtprabhuḥ sarvairmune viṣṇvādibhistadā || ### [2.3.45.46.c1](https://indike.org/pramana/in.purana.siva*complete-2.2.3.45.46.c1) iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivasundarasvarūpa-puravāsyutsavavarṇanaṃ nāma pañcacatvāriṃśo'dhyāyaḥ || ### [2.3.45.46.p2](https://indike.org/pramana/in.purana.siva*complete-2.2.3.45.46.p2) śrīgaṇeśāya namaḥ || ### [2.3.45.46.p3](https://indike.org/pramana/in.purana.siva*complete-2.2.3.45.46.p3) śrīgaurīśaṅkarābhyāṃ namaḥ || ### [2.3.45.46.p4](https://indike.org/pramana/in.purana.siva*complete-2.2.3.45.46.p4) śrīśivamahāpurāṇam || ### [2.3.45.46.p5](https://indike.org/pramana/in.purana.siva*complete-2.2.3.45.46.p5) dvitīyāyāṃ rudrasaṃhitāyāṃ tṛtīyaḥ pārvatīkhaṇḍe --- Source: [https://indike.org/pramana/in.purana.siva*complete-2.2.3.45](https://indike.org/pramana/in.purana.siva*complete-2.2.3.45) · Pramāṇa