Shivapurana 2.3.46: ṣaṭcatśariṃśo'dhyāyaḥ | maṇḍapadvāre varāgamanavarṇanam
Śivapurāṇa (complete text) 2.3.46
- Language
- Sanskrit
Contents
- 2.3.46.36 — 5 parts
ṣaṭcatśariṃśo'dhyāyaḥ | maṇḍapadvāre varāgamanavarṇanam
2.3.46.1
brahmovāca |
atha śambhuḥ prasannātmā sadūtaṃ svagaṇaiḥsuraiḥ |
sarvairanyairgirerdhāma jagāma sakutūhalam ||
2.3.46.2
menāpi strīgaṇaistaiśca himācalavarapriyā |
tata utthāya svagṛhābhyantaraṃ sā jagāma ha ||
2.3.46.3
nīrājanārthaṃ śambhośca dīpapātrakarā satī |
sarvarṣistrīgaṇaissākamagacchad dvāramādarāt ||
2.3.46.4
tatrāgataṃ maheśānaṃ śaṅkaraṃ girijāvaram |
dadarśa prītito menā sevitaṃ sakalaiḥ suraiḥ ||
2.3.46.5
cārucampakavarṇābhaṃ pañcavaktraṃ trilocanam |
īṣaddhāsyaprasannāsyaṃ ratnasvarṇādibhūṣitam ||
2.3.46.6
mālatīmālayā yuktaṃ sadratnamukuṭojjvalam |
satkaṇṭhābharaṇaṃ cāruvalayāṅgadabhūṣitam ||
2.3.46.7
vahniśaucenātulena tvatisūkṣmeṇa cāruṇā |
amūlyavastrayugmena vicitreṇātirājitam ||
2.3.46.8
candanāgarukastūrīcārukuṅkumabhūṣitam |
ratnadarpaṇahastaṃ ca kajjalojjvalalocanam ||
2.3.46.9
sarvasvaprabhayācchannamatīva sumanoharam |
atīva taruṇaṃ ramyaṃ bhūṣitāṅgaiśca bhūṣitam ||
2.3.46.10
kāminīkāntamavyagraṃ koṭicandrānanāmbujam |
koṭismarādhikatanucchaviṃ sarvāṅgasundaram ||
2.3.46.11
īdṛgvidhaṃ sudevaṃ taṃ sthitaṃ svapurataḥ prabhum |
dṛṣṭvā jāmātaraṃ menā jahau śokaṃ mudānvitā ||
2.3.46.12
praśaśaṃsa svabhāgyaṃ sā girijāṃ bhūdharaṃ kulam |
mene kṛtārthamātmānaṃ jaharṣa ca punaḥ punaḥ ||
2.3.46.13
nīrājanaṃ cakārāsau praphullavadanā satī |
avalokaparā tatra menā jāmātaraṃ mudā ||
2.3.46.14
girijoktamanusmṛtya menā vismayamāgatā |
manasaiva hyuvācedaṃ harṣaphullānanāmbujā ||
2.3.46.15
yadvai puroktaṃ ca tayā pārvatyā mama tatra ca |
tato'dhikaṃ prapaśyāmi saundaryaṃ parameśituḥ ||
2.3.46.16
maheśasya sulāvaṇyamanirvācyaṃ ca samprati |
evaṃ vismayamāpannā menā svagṛhamāyayau ||
2.3.46.17
praśaśaṃsuryuvatayo dhanyā dhanyā gireḥ sutā |
durgā bhagavatītyevamūcuḥ kāścana kanyakāḥ ||
2.3.46.18
na dṛṣṭo vara ityevamasmābhirdānagocaraḥ |
dhanyā hi girijādevīmūcuḥ kāścana kanyakāḥ ||
2.3.46.19
jagurgandharvapravarā nanṛtuścāpsarogaṇāḥ |
dṛṣṭvā śaṅkararūpaṃ ca prahṛṣṭāḥ sarvadevatāḥ ||
2.3.46.20
nānāprakāravādyāni vādakā madhurākṣaram |
nānāprakāraśilpena vādayāmāsurādarāt ||
2.3.46.21
himācalo'pi mudito dvārācāramathākarot |
menāpi sarvanārībhirmahotsavapurassaram ||
2.3.46.22
parapṛcchāṃ cakārāsau muditā svagṛhaṃ yayau |
śivo niveditaṃ sthānaṃ jagāma gaṇanirjaraiḥ ||
2.3.46.23
etasminnantare durgāṃ śailāntaḥ puracārikāḥ |
bahirjagmuḥ samādāya pūjituṃ kuladevatām ||
2.3.46.24
tatra tāṃ dadṛśurdevā nimeṣarahitā mudā |
sunīlāñjanavarṇābhāṃ svāṅgaiśca pratibhūṣitām ||
2.3.46.25
trinetrādṛtanetrāṃ tāmanyavāritalocanām |
īṣaddhāsyaprasannāsyāṃ sakaṭākṣāṃ manoharām ||
2.3.46.26
sucārukabarībhārāṃ cārupatrakaśobhitām |
kastūrībindubhissārdhaṃ sindūrabinduśobhitām ||
2.3.46.27
ratnendrasārahāreṇa vakṣasā suvirājitām |
ratnakeyūravalayāṃ ratnakaṅkaṇamaṇḍitām ||
2.3.46.28
sadratnakuṇḍalābhyāṃ ca cārugaṇḍasthalojjvalām |
maṇiratnaprabhāmuṣṭidantarājivirājitām ||
2.3.46.29
madhubimbādharoṣṭhāṃ ca ratnayāvakasaṃyutām |
ratnadarpaṇahastāṃ ca krīḍāpadmavibhūṣitām ||
2.3.46.30
candanāgurukastūrīkuṅkumenāticarcitām |
kvaṇanmañjīrapādāṃ ca raktāṅghritalarājitām ||
2.3.46.31
praṇemuḥ śirasā devīṃ bhaktiyuktāḥ samenakām |
sarve surādayo dṛṣṭvā jagadādyāṃ jagatprasūm ||
2.3.46.32
trinetro netrakoṇena tāṃ dadarśa mudānvitaḥ |
śivaḥ satyākṛtiṃ dṛṣṭvā vijahau virahajvaram ||
2.3.46.33
śivaḥ sarvaṃ visasmāra śivāsaṃnyastalocanaḥ |
pulakāñcitasarvāṅgo harṣādgaurīvilocanaḥ ||
2.3.46.34
atha kālī bahiḥ puryā gatvā pūjya kulāmbikām |
viveśa bhavanaṃ ramyaṃ svapitussadvijāṅganā ||
2.3.46.35
śaṅkaro'pi suraiḥ sārdhaṃ hariṇā brahmaṇā tathā |
himācalasamuddiṣṭaṃ svasthānamagamanmudā ||
2.3.46.36
tatra sarve sukhaṃ tasthuḥ sevantaḥ śaṅkaraṃ yathā |
sammānitā girīśena nānāvidhasusampadā ||
2.3.46.36.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe varāgamādivarṇanaṃ nāma ṣaṭcatśariṃśo'dhyāyaḥ ||
2.3.46.36.p2
śrīgaṇeśāya namaḥ ||
2.3.46.36.p3
śrīgaurīśaṅkarābhyāṃ namaḥ ||
2.3.46.36.p4
śrīśivamahāpurāṇam ||
2.3.46.36.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (2)
- Brahmavaivartapurāṇa — Vyāsa, Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit