Shivapurana 2.3.47: saptacatvāriṃśo'dhyāyaḥ | śivasyahimagirigṛhābhyantaragamanotsavavarṇanam
Śivapurāṇa (complete text) 2.3.47
- Language
- Sanskrit
Contents
- 2.3.47.55 — 5 parts
saptacatvāriṃśo'dhyāyaḥ | śivasyahimagirigṛhābhyantaragamanotsavavarṇanam
2.3.47.1
brahmovāca |
tataḥ śailavaraḥ so'pi prītyā durgopavītakam |
kārayāmāsa sotsāhaṃ vedamantraiśśivasya ca ||
2.3.47.2
atha viṣṇvādayo devā munayaḥ sakutūhalam |
himācalaprārthanayā viveśāntargṛhaṃ gireḥ ||
2.3.47.3
śrutyācāraṃ bhavācāraṃ vidhāya ca yathārthataḥ |
śivāmalaṅkṛtāṃ cakruḥ śivadattavibhūṣaṇaiḥ ||
2.3.47.4
prathamaṃ snāpayitvā tāṃ bhūṣayitvātha sarvaśaḥ |
nīrājitā sakhībhiśca viprapatnībhireva ca ||
2.3.47.5
ahatāmbarayugmena śobhitā varavarṇinī |
virarāja mahāśailaduhitā śaṅkarapriyā ||
2.3.47.6
kañcukī paramā divyā nānāratnānvitādbhutā |
vidhṛtā ca tayā devyā vilasantyadhikaṃ mune ||
2.3.47.7
sā babhāra tathā hāraṃ divyaratnasamanvitam |
valayāni mahārhāṇi śuddhacāmīkarāṇi ca ||
2.3.47.8
sthitā tatraiva subhagā dhyāyantī manasā śivam |
śuśubhe'ti mahāśailakanyakā trijagatprasūḥ ||
2.3.47.9
tadotsavo mahānāsīdubhayatra mudāvahaḥ |
dānaṃ babhūva vividhaṃ brāhmaṇebhyo vivarṇitam ||
2.3.47.10
anyeṣāṃ dravyadānaṃ ca babhūva vividhaṃ mahat |
gītavādyavinodaśca tatrotsavapurassaram ||
2.3.47.11
atha viṣṇurahaṃ dhātā śakrādyā amarāstathā |
munayaśca mahāprītyā nikhilāḥ sotsavā mudā ||
2.3.47.12
supraṇamya śivāṃ bhaktyā smṛtvā śivapadāmbujam |
samprāpya himagiryājñāṃ svaṃ svaṃ sthānaṃ samāśritāḥ ||
2.3.47.13
etasminnantare tatra jyotiḥ śāstraviśāradaḥ |
himavantaṃ girīndraṃ taṃ gargo vākyamabhāṣata ||
2.3.47.14
garga uvāca |
himācala dharādhīśa svāmin kālīpatiḥ prabho |
pāṇigrahārthaṃ śambhuṃ cānaya tvaṃ nijamandiram ||
2.3.47.15
brahmovāca |
atha taṃ samayaṃ jñātvā kanyādānocitaṃ giriḥ |
niveditaṃ ca gargeṇa mumude'tīva cetasi ||
2.3.47.16
mahīdharāndvijāṃścaiva parānapi mudā giriḥ |
preṣayāmāsa suprītyā śivānayanakāmyayā ||
2.3.47.17
te parvatā dvijāścaiva sarvamaṅgalapāṇayaḥ |
sañjagmuḥ sotsavāḥ prītyā yatra devo maheśvaraḥ ||
2.3.47.18
tadā vāditraghoṣeṇa brahmaghoṣeṇa bhūyasā |
mahotsāho'bhavattatra gītanṛtyānvitena hi ||
2.3.47.19
śrutvā vāditranirghoṣaṃ sarve śaṅkarasevakāḥ |
utthitāstvaikapadyena sadevarṣigaṇā mudā ||
2.3.47.20
parasparaṃ samūcuste harṣanirbharamānasāḥ |
atrāgacchanti girayaḥ śivānayanakāmyayā ||
2.3.47.21
pāṇigrahaṇakālo hi nūnaṃ sadyaḥ samāgataḥ |
mahadbhāgyaṃ hi sarveṣāṃ samprāptamiha manmahe ||
2.3.47.22
dhanyā vayaṃ viśeṣeṇa vivāhaṃ śivayordhruvam |
drakṣyāmaḥ paramaprītyā jagatāṃ maṅgalālayam ||
2.3.47.23
brahmovāca |
evaṃ yāvadabhūtteṣāṃ saṃvādastatra cādarāt |
tāvatsarve samāyātāḥ parvatendrasya mantriṇaḥ ||
2.3.47.24
te gatvā prārthayāñcakruḥ śivaṃ viṣṇvādikānapi |
kanyādānocitaḥ kālo vartate gamyatāmiti ||
2.3.47.25
te tacchrutvā surāḥ sarve mune viṣṇvādayo'khilāḥ |
mumuduścetasātīva jayetyūcurgiriṃ drutam ||
2.3.47.26
śivo'pi mumude'tīva kālīprāpaṇalālasaḥ |
guptaṃ cakāra taccihnaṃ manasyevādbhutākṛtiḥ ||
2.3.47.27
atha snānaṃ kṛtaṃ tena maṅgaladravyasaṃyutam |
śūlinā suprasannena lokānugrahakāriṇā ||
2.3.47.28
snātaḥ suvāsasā yuktaḥ sarvaistaiḥ parivāritaḥ |
āropito vṛṣaskandhe lokapālaiḥ susevitaḥ ||
2.3.47.29
puraskṛtya prabhuṃ sarve jagmurhimagirergṛham |
vādyāni vādayantaśca kṛtavantaḥ kutūhalam ||
2.3.47.30
himāgapreṣitā viprāstathā te parvatottamāḥ |
śambhoragracarā hyāsankutūhalasamanvitāḥ ||
2.3.47.31
babhau chatreṇa mahatā dhriyamāṇo hi mūrdhani |
cāmarairvījyamāno'sau savitāno maheśvaraḥ ||
2.3.47.32
ahaṃ viṣṇustathā cendro lokapālāstathaiva ca |
agragāḥ smātiśobhante śriyā paramayā śritāḥ ||
2.3.47.33
tataḥ śaṅkhāśca bheryaśca paṭahānakagomukhāḥ |
punaḥ punaravādyanta vāditrāṇi mahotsave ||
2.3.47.34
tathaiva gāyakāḥ sarve jaguḥ paramamaṅgalam |
nartakyo nanṛtuḥ sarvā nānātālasamanvitāḥ ||
2.3.47.35
ebhissameto jagadekabandhu-ryayau tadānīṃ parameśavarcasā |
susevyamānaḥ sakalaiḥ sureśvarai-rvikīryamāṇaḥ kusumaiśca harṣitaiḥ ||
2.3.47.36
sampūjitastadā śambhuḥ praviṣṭo yajñamaṇḍapam |
saṃstūyamāno bahvībhiḥ stutibhiḥ parameśvaraḥ ||
2.3.47.37
vṛṣāduttārayāmāsurmaheśaṃ parvatottamāḥ |
ninyurgṛhāntaraṃ prītyā mahotsavapurassaram ||
2.3.47.38
himālayo'pi samprāptaṃ sadevagaṇamīśvaram |
praṇamya vidhivadbhaktyā nīrājanamathākarot ||
2.3.47.39
sarvānsurānmunīnanyān praṇamya samahotsavaḥ |
sammānamakarotteṣāṃ praśaṃsansvavidhiṃ mudā ||
2.3.47.40
so'gaḥsācyutamīśānaṃ supādyārghyapurassaram |
sadevamukhyavargaṃ ca nināya svālayāntaram ||
2.3.47.41
prāṅgaṇe sthāpayāmāsa ratnasiṃhāsaneṣu tān |
sarvānviṣṇuṃ ca māmīśaṃ viśiṣṭāṃśca viśeṣataḥ ||
2.3.47.42
sakhībhirmenayā prītyā brāhmaṇastrībhireva ca |
anyābhiśca purandhrībhiścakre nīrājanaṃ mudā ||
2.3.47.43
purodhasā kṛtyavidā śaṅkarāya mahātmane |
madhuparkādikaṃ yadyatkṛtyaṃ tattatkṛtaṃ mudā ||
2.3.47.44
mayā sa noditastatra purodhāḥ kṛtavāṃstadā |
sumaṅgalaṃ ca yatkarma prastāvasadṛśaṃ mune ||
2.3.47.45
antarvedyāṃ mahāprītyā sampraviśya himādriṇā |
yatra sā pārvatī kanyā sarvābharaṇabhūṣitā ||
2.3.47.46
vedikopari tanvaṅgī saṃsthitā suvirājitā |
tatra nīto mahādevo viṣṇunā ca mayā saha ||
2.3.47.47
lagnaṃ nirīkṣamāṇāste vācaspatipurogamāḥ |
kanyādānocitaṃ tatra babhūvuḥ paramotsavāḥ ||
2.3.47.48
tatropaviṣṭo gargaśca yatrāsti ghaṭikālayam |
yāvaccheṣā ghaṭī tāvatkṛtaṃ praṇavabhāṣaṇam ||
2.3.47.49
puṇyāhaṃ pravadan gargaḥ samādadhre'ñjaliṃ mudā |
pārvatyakṣatapūrṇaṃ ca vavṛṣe ca śivopari ||
2.3.47.50
tayā sampūjito rudro dadhyakṣatakuśāmbubhiḥ |
paramodārayā tatra pārvatyā rucirāsyayā ||
2.3.47.51
vilokayantī taṃ śambhuṃ yasyārthe paramaṃ tapaḥ |
kṛtaṃ purā mahāprītyā virarāja śivāti sā ||
2.3.47.52
mayā mune tadoktastu gargādimunibhiśca saḥ |
samānarca śivāṃ śambhuḥ laukikācārasaṃrataḥ ||
2.3.47.53
evaṃ parasparaṃ tau vai pārvatīparameśvarau |
arcayantau tadānīṃ ca śuśubhāte jaganmayau ||
2.3.47.54
trailokyalakṣmyā saṃvītau nirīkṣantau parasparam |
tadā nīrājitau lakṣmyādibhiḥ strībhirviśeṣataḥ ||
2.3.47.55
tathāparā vai dvijayoṣitaśca nīrājayāmāsuratho purastriyaḥ |
śivāṃ ca śambhuñca vilokayantyo'-vāpurmudaṃ tāḥ sakalā mahotsavam ||
2.3.47.55.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivahimagirigṛhābhyantaragamanotsavavarṇanaṃ nāma saptacatvāriṃśo'dhyāyaḥ ||
2.3.47.55.p2
śrīgaṇeśāya namaḥ ||
2.3.47.55.p3
śrīgaurīśaṅkarābhyāṃ namaḥ ||
2.3.47.55.p4
śrīśivamahāpurāṇam ||
2.3.47.55.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe