Shivapurana 2.3.48: aṣṭacatvāriṃśo'dhyāyaḥ | śivāśivayorvivāhavidhikathanam
Śivapurāṇa (complete text) 2.3.48
- Language
- Sanskrit
Contents
- 2.3.48.56 — 5 parts
aṣṭacatvāriṃśo'dhyāyaḥ | śivāśivayorvivāhavidhikathanam
2.3.48.1
brahmovāca |
etasminnantare tatra gargācāryapraṇoditaḥ |
himavānmenayā sārdhaṃ kanyāṃ dātuṃ pracakrame ||
2.3.48.2
haimaṃ kalaśamādāya menā cārdhāṅgamāśritā |
himādreśca mahābhāgā vastrābharaṇabhūṣitā ||
2.3.48.3
pādyādibhistataḥ śailaḥ prahṛṣṭaḥ svapurohitaḥ |
taṃ varaṃ varayāmāsa vastracandanabhūṣaṇaiḥ ||
2.3.48.4
tato himādriṇā proktā dvijāstithyādikīrtane |
prayogo bhaṇyatāṃ tāvadasminsamaya āgate ||
2.3.48.5
tatheti coktā te sarve kālajñā dvijasattamāḥ |
tithyādikīrtanaṃ cakruḥ prītyā paramanirvṛtāḥ ||
2.3.48.6
tato himācalaḥ prītyā śambhunā prerito hṛdā |
sūtīkṛtapareśena vihasan śambhumabravīt ||
2.3.48.7
svagotraṃ kathyatāṃ śambho pravaraśca kulaṃ tathā |
nāma vedaṃ tathā śākhāṃ mākārṣīḥ samayātyayam ||
2.3.48.8
brahmovāca |
ityākarṇya vacastasya himādreḥ śaṅkarastadā |
sumukho vimukhaḥ sadyo'pyaśocyaḥ śocyatāṃ gataḥ ||
2.3.48.9
evaṃvidhaḥ suravarairmunibhistadānīṃ gandharvayakṣagaṇasiddhagaṇaistathaiva |
dṛṣṭo niruttaramukho bhagavānmaheśo'-kārṣīssuhāsyamatha tatra sa nārada tvam ||
2.3.48.10
vīṇāmavādayaṃstvaṃ hi brahmavijño'tha nārada |
śivena preritastatra manasā śambhumānasaḥ ||
2.3.48.11
tadā nivārito dhīmān parvatendreṇa vai haṭhāt |
viṣṇunā ca mayā devairmunibhiścākhilaistathā ||
2.3.48.12
na nivṛtto'bhavastvaṃ hi sa yadā śaṅkarecchayā |
iti prokto'driṇā tarhi vīṇāṃ mā vādayādhunā ||
2.3.48.13
suniṣiddho haṭhāttena devarṣe tvaṃ yadā budha |
pratyavoco girīśaṃ taṃ susaṃsmṛtya maheśvaram ||
2.3.48.14
nārada uvāca |
tvaṃ hi mūḍhatvamāpanno na jānāsi ca kiñcana |
vācye maheśaviṣaye'tīvāsi tvaṃ bahirmukhaḥ ||
2.3.48.15
tvayā pṛṣṭho haraḥ sākṣātsvagotrakathanaṃ prati |
samaye'smiṃstadatyantamupahāsakaraṃ vacaḥ ||
2.3.48.16
asya gotraṃ kulaṃ nāma naiva jānanti parvata |
viṣṇubrahmādayo'pīha pareṣāṃ kā kathā smṛtā ||
2.3.48.17
yasyaikadivase śaila brahmakoṭirlayaṃ gatā |
sa eva śaṅkarastedya dṛṣṭaḥ kālītapobalāt ||
2.3.48.18
arūpo'yaṃ parabrahma nirguṇaḥ prakṛteḥ paraḥ |
nirākāro nirvikārī māyādhīśaḥ parātparaḥ ||
2.3.48.19
agotrakulanāmā hi svatantro bhaktavatsalaḥ |
tadicchayā hi saguṇaḥ sutanurbahunāmabhṛt ||
2.3.48.20
sugotrī gotrahīnaśca kulahīnaḥ kulīnakaḥ |
pārvatītapasā so'dya jāmātā te na saṃśayaḥ ||
2.3.48.21
līlāvihāriṇā tena mohitaṃ sacarācaram |
no jānāti śivaṃ ko'pi prājño'pi girisattama ||
2.3.48.22
liṅgākṛtermaheśasya kena dṛṣṭaṃ na mastakam |
viṣṇurgatvā hi pātālaṃ tadainaṃ nāpa vismitaḥ ||
2.3.48.23
kiṃ bahūktyā nagaśreṣṭha śivamāyā duratyayā |
tadadhīnāstrayo lokā haribrahmādayo'pi ca ||
2.3.48.24
tasmāttvayā śivātāta suvicārya prayatnataḥ |
na kartavyo vimarśo'tra tvevaṃvidhavare manāk ||
2.3.48.25
brahmovāca |
ityuktvā tvaṃ mune jñānī śivecchākāryakārakaḥ |
pratyavocaḥ punastaṃ vai śailedraṃ harṣayan girā ||
2.3.48.26
nārada uvāca |
śṛṇu tāta mahāśaila śivājanaka madvacaḥ |
tacchrutvā tanayāṃ devīṃ dehi tvaṃ śaṅkarāya hi ||
2.3.48.27
saguṇasya maheśasya līlayā rūpadhāriṇaḥ |
gotraṃ kulaṃ vijānīhi nādameva hi kevalam ||
2.3.48.28
śivo nādamayaḥ satyaṃ nādaḥ śivamayastathā |
ubhayorantaraṃ nāsti nādasya ca śivasya ca ||
2.3.48.29
sṛṣṭau prathamajatvāddhi līlāsaguṇarūpiṇaḥ |
śivānnādasya śailendra sarvotkṛṣṭastataḥ sa hi ||
2.3.48.30
ato hi vāditā vīṇā preritena mayādya vai |
sarveśvareṇa manasā śaṅkareṇa himālaya ||
2.3.48.31
brahmovāca |
etacchrutvā tava mune vacastattu giriśvaraḥ |
himādristoṣamāpanno gatavismayamānasaḥ ||
2.3.48.32
atha viṣṇuprabhṛtayaḥ surāśca munayastathā |
sādhu sādhviti te sarve procurvigatavismayāḥ ||
2.3.48.33
maheśvarasya gāmbhīryaṃ jñātvā sarve vicakṣaṇāḥ |
savismayā mahāmodānvitāḥ procuḥ parasparam ||
2.3.48.34
yasyājñayā jagadidaṃ ca viśālameva jātaṃ parātparataro nijabodharūpaḥ |
śarvaḥ svatantragatikṛtparabhāvagamyaḥ so'sau trilokapatiradya ca naḥ sudṛṣṭaḥ ||
2.3.48.35
atha te parvataśreṣṭhā mervādyā jātasambhramāḥ |
ūcuste caikapadyena himavantaṃ nageśvaram ||
2.3.48.36
parvatā ūcuḥ |
kanyādāne sthīyatāṃ cādya śaila-nāthoktyā kiṃ kāryanāśastavaiva |
satyaṃ brūmo nātra kāryo vimarśaḥ tasmātkanyā dīyatāmīśvarāya ||
2.3.48.37
brahmovāca |
tacchrutvā vacanaṃ teṣāṃ suhṛdāṃ sa himālayaḥ |
svakanyādānamakarocchivāya vidhinoditaḥ ||
2.3.48.38
imāṃ kanyāṃ tubhyamahaṃ dadāmi parameśvara |
bhāryārthaṃ parigṛhṇīṣva prasīda sakaleśvara ||
2.3.48.39
tasmai rudrāya mahate mantreṇānena dattavān |
himācalo nijāṃ kanyāṃ pārvatīṃ trijagatprasūm ||
2.3.48.40
itthaṃ śivākaraṃ śailaṃ śivahaste nidhāya ca |
mumodātīva manasi tīrṇakāmamahārṇavaḥ ||
2.3.48.41
vedamantreṇa giriśo girijākarapaṅkajam |
jagrāha svakareṇāśu prasannaḥ parameśvaraḥ ||
2.3.48.42
kṣitiṃ saṃspṛśya kāmasya ko'dāditi manuṃ mune |
papāṭha śaṅkaraḥ prītyā darśayam̐llaukikīṃ gatim ||
2.3.48.43
mahotsavo mahānāsītsarvatra pramudāvahaḥ |
babhūva jayasaṃrāvo divi bhūmyantarikṣake ||
2.3.48.44
sādhuśabdaṃ namaḥ śabdaṃ cakruḥ sarve'tiharṣitāḥ |
gandharvāḥ sujaguḥ prītyā nanṛtuścāpsarogaṇāḥ ||
2.3.48.45
himācalasya paurā hi mumuduścāti cetasi |
maṅgalaṃ mahadāsīdvai mahotsavapurassaram ||
2.3.48.46
ahaṃ viṣṇuśca śakraśca nirjarā munayo'khilāḥ |
harṣitā hyabhavaṃścāti praphullavadanāmbujāḥ ||
2.3.48.47
atha śailavaraḥ so'dātsuprasanno himācalaḥ |
śivāya kanyādānasya sāṅgatāṃ suyathocitām ||
2.3.48.48
tato bandhujanāstasya śivāṃ sampūjya bhaktitaḥ |
daduḥ śivāya saddravyaṃ nānāvidhividhānataḥ ||
2.3.48.49
himālayastuṣṭamanāḥ pārvatīśivaprītaye |
nānāvidhāni dravyāṇi dadau tatra munīśvara ||
2.3.48.50
yautukāni dadau tasmai ratnāni vividhāni ca |
cāruratnavikārāṇi pātrāṇi vividhāni ca ||
2.3.48.51
gavāṃ lakṣaṃ hayānāṃ ca sajjitānāṃ śataṃ tathā |
dāsīnāmanuraktānāṃ lakṣaṃ saddravyabhūṣitam ||
2.3.48.52
nāgānāṃ śatalakṣaṃ hi rathānāṃ ca tathā mune |
suvarṇajaṭitānāṃ ca ratnasāravinirmitam ||
2.3.48.53
itthaṃ himālayo dattvā svasutāṃ girijāṃ śivām |
śivāya parameśāya vidhināpa kṛtārthatām ||
2.3.48.54
atha śailavaro mādhyandinoktastotrato mudā |
tuṣṭāva parameśānaṃ sadgirā sukṛtāñjaliḥ ||
2.3.48.55
tato vedavidā tenājñaptā munigaṇāstadā |
śiro'bhiṣekaṃ cakruste śivāyāḥ paramotsavāḥ ||
2.3.48.56
devābhidhānamuccārya paryukṣaṇavidhiṃ vyadhuḥ |
mahotsavastadā cāsīnmahānandakaro mune ||
2.3.48.56.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe kanyādānavarṇanaṃ nāmāṣṭacatvāriṃśo'dhyāyaḥ ||
2.3.48.56.p2
śrīgaṇeśāya namaḥ ||
2.3.48.56.p3
śrīgaurīśaṅkarābhyāṃ namaḥ ||
2.3.48.56.p4
śrīśivamahāpurāṇam ||
2.3.48.56.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (2)
- Brahmavaivartapurāṇa — Vyāsa, Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit