Shivapurana 2.3.49: ekonapañcāśattamo'dhyāyaḥ | vivāhasaṃskārakathanaṃ vidhimohavarṇanañca
Śivapurāṇa (complete text) 2.3.49
- Language
- Sanskrit
Contents
ekonapañcāśattamo'dhyāyaḥ | vivāhasaṃskārakathanaṃ vidhimohavarṇanañca
2.3.49.1
brahmovāca |
atho mamājñayā vipraiḥ saṃsthāpyānalamīśvaraḥ |
homaṃ cakāra tatraivamaṅke saṃsthāpya pārvatīm ||
2.3.49.2
ṛgyajussāmamantraiścāhutiṃ vahnau dadau śivaḥ |
lājāñjaliṃ dadau kālībhrātā mainākasaṃjñakaḥ ||
2.3.49.3
atha kālī śivaścobhau cakraturvidhivanmudā |
vahnipradakṣiṇāṃ tāta lokācāraṃ vidhāya ca ||
2.3.49.4
tatrādbhutamalañcakre caritaṃ girijāpatiḥ |
tadeva śṛṇu devarṣe tavasnehād bravīmyaham ||
2.3.49.5
tasminnavasare cāhaṃ śivamāyāvimohitaḥ |
apaśyaṃ caraṇe devyā nakhenduṃ ca manoharam ||
2.3.49.6
darśanāttasya ca tadābhūvaṃ devamune hyaham |
madanena samāviṣṭo'tīva kṣubhitamānasaḥ ||
2.3.49.7
muhurmuhurapaśyaṃ vai tadaṅgaṃ smaramohitaḥ |
tatastaddarśanātsadyo vīryaṃ me prācyutadbhuvi ||
2.3.49.8
retasā kṣaratā tena lajjito'haṃ pitāmahaḥ |
mune vyamardaṃ tacchinnaṃ caraṇābhyāṃ hi gopayan ||
2.3.49.9
tajjñātvā ca mahādevaścukopātīva nārada |
hantumaicchattadā śīghraṃ māṃ vidhiṃ kāmamohitam ||
2.3.49.10
hāhākāro mahānāsīttatra sarvatra nārada |
janāścakampire sarve bhayamāyāti viśvabhṛt ||
2.3.49.11
tatastaṃ tuṣṭuvuḥ śambhuṃ viṣṇvādyā nirjarā mune |
sakopamprajvalantaṃ ca tejasā hantumudyatam ||
2.3.49.12
devā ūcuḥ |
devadeva jagadvyāpin parameśa sadāśiva |
jagadīśa jagannātha samprasīda jaganmaya ||
2.3.49.13
sarveṣāmapi bhāvānāṃ tvamātmā heturīśvaraḥ |
nirvikāro'vyayo nityo nirvikalpo'kṣaraḥ paraḥ ||
2.3.49.13.p1
ādyantāvasya yanmadhyamidamanyadahaṃ bahiḥ |
yato'vyayaḥ sa naitāni tatsatyambrahma cidbhavān | 14 ||
2.3.49.15
tavaiva caraṇāmbhojaṃ muktikāmā dṛḍhavratāḥ |
visṛjyobhayataḥ saṅgaṃ munayaḥ samupāsate ||
2.3.49.16
tvaṃ brahma pūrṇamamṛtaṃ viśokaṃ nirguṇamparam |
ānandamātramavyagramavikāramanātmakam ||
2.3.49.17
viśvasya heturudayasthitisaṃyamanasya hi |
tadapekṣatayātmeśo'napekṣaḥ sarvadā vibhuḥ ||
2.3.49.18
ekastvameva sadasad dvayamadvayameva ca |
svarṇaṃ kṛtākṛtamiva vastubhedo na caiva hi ||
2.3.49.19
ajñānatastvayi janairvikalpo vidito yataḥ |
tasmād bhramapratīkāro nirupādherna hi svataḥ ||
2.3.49.20
dhanyā vayaṃ maheśāna tava darśanamātrataḥ |
dṛḍhabhaktajanānandapradaḥ śambho dayāṃ kuru ||
2.3.49.21
tvamādistvamanādiśca prakṛtestvaṃ paraḥ pumān |
viśveśvaro jagannātho nirvikāraḥ parātparaḥ ||
2.3.49.22
yo'yaṃ brahmāsti rajasā viśvamūrtiḥ pitāmahaḥ |
tvatprasādātprabho viṣṇuḥ sattvena puruṣottamaḥ ||
2.3.49.23
kālāgnirudrastamasā paramātmā guṇaiḥ paraḥ |
sadā śivo maheśānaḥsarvavyāpī maheśvaraḥ ||
2.3.49.24
vyaktaṃ mahacca bhūtādistanmātrāṇīndriyāṇi ca |
tvayaivādhiṣṭhitānyeva viśvamūrte maheśvara ||
2.3.49.24.p1
mahādeva pareśāna karuṇākara śaṅkara |
prasīda devadeveśa prasīda puruṣottama | 25 ||
2.3.49.26
vāsāṃsi sāgarāḥ sapta diśaścaiva mahābhujāḥ |
dyaurmūrdhā te vibhornābhiḥ khaṃ vāyurnāsikā tataḥ ||
2.3.49.27
cakṣūṃṣyagnī ravissomaḥ keśā meghāstava prabho |
nakṣatratārakādyāśca grahāścaiva vibhūṣaṇam ||
2.3.49.28
kathaṃ stoṣyāmi deveśa tvāṃ vibho parameśvara |
vācāmagocaro'si tvaṃ manasā cāpi śaṅkara ||
2.3.49.29
pañcāsyāya ca rudrāya pañcāśatkoṭimūrtaye |
tryadhipāya variṣṭhāya vidyātattvāya te namaḥ ||
2.3.49.30
anirdeśyāya nityāya vidyujjvālāya rūpiṇe |
agnivarṇāya devāya śaṅkarāya namo namaḥ ||
2.3.49.31
vidyutkoṭipratīkāśamaṣṭakoṇaṃ suśobhanam |
rūpamāsthāya loke'smin saṃsthitāya namo namaḥ ||
2.3.49.32
brahmovāca |
ityākarṇya vacasteṣāṃ prasannaḥ parameśvaraḥ |
brahmaṇe me dadau śīghramabhayaṃ bhaktavatsalaḥ ||
2.3.49.33
atha sarve surāstatra viṣṇvādyā munayastathā |
abhavansusmitāstāta cakruśca paramotsavam ||
2.3.49.34
mama tadretasā tāta marditena muhurmuhuḥ |
abhavankaṇakāstatra bhūriśaḥ paramojjvalāḥ ||
2.3.49.35
ṛṣayo bahavo jātā bālakhilyāḥ sahasraśaḥ |
kaṇakaistaiśca vīryasya prajvaladbhiḥ svatejasā ||
2.3.49.36
atha te ṛṣayaḥ sarve upatasthustadā mune |
mamāntikaṃ paraprītyā tāta tāteti cābruvan ||
2.3.49.37
īśvarecchāprayuktena proktāste nāradena hi |
bālakhilyāstu te tatra kopayuktena cetasā ||
2.3.49.38
nārada uvāca |
gacchadhvaṃ saṅgatā yūyaṃ parvataṃ gandhamādanam |
na sthātavyaṃ bhavadbhiśca na hi vo'tra prayojanam ||
2.3.49.39
tatra taptvā tapaścāti bhavitāro munīśvarāḥ |
sūryaśiṣyāḥ śivasyaivājñayā me kathitaṃ tvidam ||
2.3.49.40
brahmovāca |
ityuktāste tadā sarve bālakhilyāśca parvatam |
satvaraṃ prayayurnatvā śaṅkaraṃ gandhamādanam ||
2.3.49.41
viṣṇvādibhistadābhūvaṃ śvāsito'haṃ munīśvara |
nirbhayaḥ parameśānapreritaistairmahātmabhiḥ ||
2.3.49.42
astavaṃ cāpi sarveśaṃ śaṅkaraṃ bhaktavatsalam |
sarvakāryakaraṃ jñātvā duṣṭagarvāpahārakam ||
2.3.49.43
devadeva mahādeva karuṇāsāgara prabho |
tvameva kartā sarvasya bhartā hartā ca sarvathā ||
2.3.49.44
tvadicchayā hi sakalaṃ sthitaṃ hi sacarācaram |
tantyāṃ yathā balīvardā mayā jñātaṃ viśeṣataḥ ||
2.3.49.45
ityevamuktvā so'haṃ vai praṇāmaṃ ca kṛtāñjaliḥ |
anye'pi tuṣṭuvuḥ sarve viṣṇvādyāstaṃ maheśvaram ||
2.3.49.46
athākarṇya nutiṃ śuddhāṃ mama dīnatayā tadā |
viṣṇvādīnāñca sarveṣāṃ prasanno'bhūnmaheśvaraḥ ||
2.3.49.47
dadau so'tivaraṃ mahyamabhayaṃ prītamānasaḥ |
sarve sukhamatīvāpuratyāmodamahaṃ mune ||
2.3.49.47.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe vidhimohavarṇanaṃ nāmaikonapañcāśattamo'dhyāyaḥ ||
2.3.49.47.p2
śrīgaṇeśāya namaḥ ||
2.3.49.47.p3
śrīgaurīśaṅkarābhyāṃ namaḥ ||
2.3.49.47.p4
śrīśivamahāpurāṇam ||
2.3.49.47.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe