[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 2.3.4 # Shivapurana 2.3.4: caturtho'dhyāyaḥ | śivena devānāṃ sāntvanam Śivapurāṇa (complete text) 2.3.4 - **Language:** Sanskrit ## Contents - [2.3.4.50](https://indike.org/pramana/in.purana.siva*complete-2.2.3.4.50) — 5 parts ### caturtho'dhyāyaḥ | śivena devānāṃ sāntvanam ### [2.3.4.1](https://indike.org/pramana/in.purana.siva*complete-2.2.3.4.1) brahmovāca | itthaṃ devaiḥ stutā devī durgā durgārtināśinī | āvirbabhūva devānāṃ purato jagadambikā || ### [2.3.4.2](https://indike.org/pramana/in.purana.siva*complete-2.2.3.4.2) rathe ratnamaye divye saṃsthitā paramādbhute | kiṅkiṇījālasaṃyukte mṛdusaṃstaraṇe vare || ### [2.3.4.3](https://indike.org/pramana/in.purana.siva*complete-2.2.3.4.3) koṭisūryādhikābhāsaramyāvayavabhāsinī | svatejorāśimadhyasthā vararūpāsamacchaviḥ || ### [2.3.4.4](https://indike.org/pramana/in.purana.siva*complete-2.2.3.4.4) anūpamā mahāmāyā sadāśivavilāsinī | triguṇā nirguṇā nityā śivalokanivāsinī || ### [2.3.4.5](https://indike.org/pramana/in.purana.siva*complete-2.2.3.4.5) tridevajananī caṇḍī śivā sarvārtināśinī | sarvamātā mahānidrā sarvasvajanatāriṇī || ### [2.3.4.6](https://indike.org/pramana/in.purana.siva*complete-2.2.3.4.6) tejorāśeḥ prabhāvāttu sā tu dṛṣṭā suraiśśivā | tuṣṭuvustāṃ punaste vai surā darśanakāṅkṣiṇaḥ || ### [2.3.4.7](https://indike.org/pramana/in.purana.siva*complete-2.2.3.4.7) atha devagaṇāḥ sarve viṣṇvādyā darśanepsavaḥ | dadṛśurjagadambāṃ tāṃ tatkṛpāṃ prāpya tatra hi || ### [2.3.4.8](https://indike.org/pramana/in.purana.siva*complete-2.2.3.4.8) babhūvānandasandohaḥ sarveṣāṃ tridivaukasām | punaḥ punaḥ praṇemustāṃ tuṣṭuvuśca viśeṣataḥ || ### [2.3.4.9](https://indike.org/pramana/in.purana.siva*complete-2.2.3.4.9) devā ūcuḥ | śive śarvāṇi kalyāṇi jagadamba maheśvari | tvāṃ natāḥ sarvathā devā vayaṃ sarvārtināśinīm || ### [2.3.4.10](https://indike.org/pramana/in.purana.siva*complete-2.2.3.4.10) na hi jānanti deveśi vedāḥ śāstrāṇi kṛtsnaśaḥ | atīto mahimā dhyānaṃ tava vāṅmanasoḥ śive || ### [2.3.4.11](https://indike.org/pramana/in.purana.siva*complete-2.2.3.4.11) atadvyāvṛttitastvāṃ vai cakitaṃ cakitaṃ sadā | abhidhatte śrutirapi pareṣāṃ kā kathā matā || ### [2.3.4.12](https://indike.org/pramana/in.purana.siva*complete-2.2.3.4.12) jānanti bahavo bhaktāstvatkṛpāṃ prāpya bhaktitaḥ | śaraṇāgatabhaktānāṃ na kutrāpi bhayādikam || ### [2.3.4.13](https://indike.org/pramana/in.purana.siva*complete-2.2.3.4.13) vijñaptiṃ śṛṇu suprītā yasyā dāsāḥ sadāmbike | tava devi mahādevi hīnato varṇayāmahe || ### [2.3.4.14](https://indike.org/pramana/in.purana.siva*complete-2.2.3.4.14) purā dakṣasutā bhūtvā sañjātā haravallabhā | brahmaṇaśca pareṣāṃ vānāśayattvamakaṃ mahat || ### [2.3.4.15](https://indike.org/pramana/in.purana.siva*complete-2.2.3.4.15) pitṛto'nādaraṃ prāpyātyajaḥ paṇavaśāttanum | svalokamagamastvaṃ vālabhaddukhaṃ haro'pi hi || ### [2.3.4.16](https://indike.org/pramana/in.purana.siva*complete-2.2.3.4.16) na hi jātaṃ prapūrṇaṃ taddevakāryaṃ maheśvari | vyākulā munayo devāḥ śaraṇaṃ tvāṃ gatā vayam || ### [2.3.4.17](https://indike.org/pramana/in.purana.siva*complete-2.2.3.4.17) pūrṇaṃ kuru maheśāni nirjarāṇāṃ manoratham | sanatkumāravacanaṃ saphalaṃ syādyathā śive || ### [2.3.4.18](https://indike.org/pramana/in.purana.siva*complete-2.2.3.4.18) avatīrya kṣitau devi rudrapatnī punarbhava | līlāṃ kuru yathāyogyaṃ prāpnuyurnirjarāḥ sukham || ### [2.3.4.19](https://indike.org/pramana/in.purana.siva*complete-2.2.3.4.19) sukhī syāddevi rudro'pi kailāsācalasaṃsthitaḥ | sarve bhavantu sukhino duḥkhaṃ naśyatu kṛtsnaśaḥ || ### [2.3.4.20](https://indike.org/pramana/in.purana.siva*complete-2.2.3.4.20) brahmovāca | iti procyāmarāḥ sarve viṣṇvādyāḥ premasaṅkulāḥ | maunamāsthāya santasthurbhaktinamrātmamūrtayaḥ || ### [2.3.4.21](https://indike.org/pramana/in.purana.siva*complete-2.2.3.4.21) śivāpi suprasannābhūdākarṇyāmarasaṃstutim | ākalayyātha taddhetuṃ saṃsmṛtya svaprabhuṃ śivam || ### [2.3.4.22](https://indike.org/pramana/in.purana.siva*complete-2.2.3.4.22) uvācomā tadā devī sambodhya vibudhāṃśca tān | vihasya māpatimukhān sadayā bhaktavatsalā || ### [2.3.4.23](https://indike.org/pramana/in.purana.siva*complete-2.2.3.4.23) umovāca he hare he vidhe devā munayaśca gatavyathāḥ | sarve śṛṇuta madvākyaṃ prasannāhaṃ na saṃśayaḥ || ### [2.3.4.24](https://indike.org/pramana/in.purana.siva*complete-2.2.3.4.24) caritaṃ mama sarvatra trailokyasya sukhāvaham | kṛtaṃ mayaivaṃ sakalaṃ dakṣamohādikaṃ ca tat || ### [2.3.4.25](https://indike.org/pramana/in.purana.siva*complete-2.2.3.4.25) avatāraṃ kariṣyāmi kṣitau pūrṇaṃ na saṃśayaḥ | bahavo hetavo'pyatra tadvadāmi mahādarāt || ### [2.3.4.26](https://indike.org/pramana/in.purana.siva*complete-2.2.3.4.26) purā himācalo devā menā cātisubhaktitaḥ | sevāṃ me cakratustātajananīvatsatītanoḥ || ### [2.3.4.27](https://indike.org/pramana/in.purana.siva*complete-2.2.3.4.27) idānīṃ kurutaḥ sevāṃ subhaktyā mama nityaśaḥ | menā viśeṣatastatra sutātve nātra saṃśayaḥ || ### [2.3.4.28](https://indike.org/pramana/in.purana.siva*complete-2.2.3.4.28) rudro gacchatu yūyaṃ cāvatāraṃ himavadgṛhe | ataścāvatariṣyāmi duḥkhanāśo bhaviṣyati || ### [2.3.4.29](https://indike.org/pramana/in.purana.siva*complete-2.2.3.4.29) sarve gacchata dhāma svaṃ svaṃ sukhaṃ labhatāṃ ciram | avatīrya sutā bhūtvā menāyā dāsya utsukham || ### [2.3.4.30](https://indike.org/pramana/in.purana.siva*complete-2.2.3.4.30) harapatnī bhaviṣyāmi suguptaṃ matamātmanaḥ | adbhutā śivalīlā hi jñānināmapi mohinī || ### [2.3.4.31](https://indike.org/pramana/in.purana.siva*complete-2.2.3.4.31) yāvatprabhṛti me tyaktā svatanurdakṣajā surāḥ | pitṛto'nādaraṃ dṛṣṭvā svāminastatkratau gatā || ### [2.3.4.32](https://indike.org/pramana/in.purana.siva*complete-2.2.3.4.32) tadāprabhṛti sa svāmī rudraḥ kālāgnisaṃjñakaḥ | digambaro babhūvāśu maccintanaparāyaṇaḥ || ### [2.3.4.33](https://indike.org/pramana/in.purana.siva*complete-2.2.3.4.33) mama roṣaṃ kratau dṛṣṭvā pitustatra gatā satī | atyajatsvatanuṃ prītyā dharmajñeti vicārataḥ || ### [2.3.4.34](https://indike.org/pramana/in.purana.siva*complete-2.2.3.4.34) yogyabhūtsadanaṃ tyaktvā kṛtvā veṣamalaukikam | na sehe virahaṃ satyā madrūpāyā maheśvaraḥ || ### [2.3.4.35](https://indike.org/pramana/in.purana.siva*complete-2.2.3.4.35) mama hetormahāduḥkhī sa babhūva kuveṣabhṛt | atyajatsa tadārabhya kāmajaṃ sukhamuttamam || ### [2.3.4.36](https://indike.org/pramana/in.purana.siva*complete-2.2.3.4.36) anyacchṛṇuta he viṣṇo he vidhe munayaḥ surāḥ | mahāprabhormaheśasya līlāṃ bhuvanapālinīm || ### [2.3.4.37](https://indike.org/pramana/in.purana.siva*complete-2.2.3.4.37) vidhāya mālāṃ suprītyā mamāsthnāṃ virahākulaḥ | na śāntiṃ prāpa kutrāpi prabuddho'pyeka eva saḥ || ### [2.3.4.38](https://indike.org/pramana/in.purana.siva*complete-2.2.3.4.38) itastato rurodoccairanīśa iva sa prabhuḥ | yogyāyogyaṃ na bubudhe bhramansarvatra sarvadā || ### [2.3.4.39](https://indike.org/pramana/in.purana.siva*complete-2.2.3.4.39) itthaṃ līlāṃ haro'kārṣīddarśayankāmināṃ prabhuḥ | ūce kāmukavadvāṇīṃ virahavyākulāmiva || ### [2.3.4.40](https://indike.org/pramana/in.purana.siva*complete-2.2.3.4.40) vastuto'vikṛto'dīno'styajitaḥ parameśvaraḥ | paripūrṇaḥ śivaḥ svāmī māyādhīśo'khileśvaraḥ || ### [2.3.4.41](https://indike.org/pramana/in.purana.siva*complete-2.2.3.4.41) anyathā mohatastasya kiṃ kāmācca prayojanam | vikāreṇāpi kenāśu māyālipto na sa prabhuḥ || ### [2.3.4.42](https://indike.org/pramana/in.purana.siva*complete-2.2.3.4.42) rudro'tīvecchati vibhuḥ sa me kartuṃ karagraham | avatāraṃ kṣitau menāhimācalagṛhe surāḥ || ### [2.3.4.43](https://indike.org/pramana/in.purana.siva*complete-2.2.3.4.43) ataścāvatariṣyāmi rudrasantoṣahetave | himāgapatnyāṃ menāyāṃ laukikīṃ gatimāśritā || ### [2.3.4.44](https://indike.org/pramana/in.purana.siva*complete-2.2.3.4.44) bhaktā rudrapriyā bhūtvā tapaḥ kṛtvā sudussaham | devakāryaṃ kariṣyāmi satyaṃ satyaṃ na saṃśayaḥ || ### [2.3.4.45](https://indike.org/pramana/in.purana.siva*complete-2.2.3.4.45) gacchata svagṛhaṃ sarve bhavaṃ bhajata nityaśaḥ | tatkṛpāto'khilaṃ duḥkhaṃ vinaśyati na saṃśayaḥ || ### [2.3.4.46](https://indike.org/pramana/in.purana.siva*complete-2.2.3.4.46) bhaviṣyati kṛpālostu kṛpayā maṅgalaṃ sadā | vandyā pūjyā triloke'haṃ tajjāyeti ca hetutaḥ || ### [2.3.4.47](https://indike.org/pramana/in.purana.siva*complete-2.2.3.4.47) brahmovāca | ityuktvā jagadambā sā devānāṃ paśyatāṃ tadā | antardadhe śivā tāta svaṃ lokaṃ prāpa vai drutam || ### [2.3.4.48](https://indike.org/pramana/in.purana.siva*complete-2.2.3.4.48) viṣṇvādayaḥ surāḥ sarve munayaśca mudānvitāḥ | kṛtvā taddiśi sannāmaṃ svasvadhāmāni saṃyayuḥ || ### [2.3.4.49](https://indike.org/pramana/in.purana.siva*complete-2.2.3.4.49) itthaṃ durgāsucaritaṃ varṇitaṃ te munīśvara | sarvadā sukhadaṃ nṝṇāṃ bhuktimuktipradāyakam || ### [2.3.4.50](https://indike.org/pramana/in.purana.siva*complete-2.2.3.4.50) ya idaṃ śṛṇuyānnityaṃ śrāvayedvā samāhitaḥ | paṭhedvā pāṭhayedvāpi sarvānkāmānavāpnuyāt || ### [2.3.4.50.c1](https://indike.org/pramana/in.purana.siva*complete-2.2.3.4.50.c1) iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe devasāntvanaṃ nāma caturtho'dhyāyaḥ || ### [2.3.4.50.p2](https://indike.org/pramana/in.purana.siva*complete-2.2.3.4.50.p2) śrīgaṇeśāya namaḥ || ### [2.3.4.50.p3](https://indike.org/pramana/in.purana.siva*complete-2.2.3.4.50.p3) śrīgaurīśaṅkarābhyāṃ namaḥ || ### [2.3.4.50.p4](https://indike.org/pramana/in.purana.siva*complete-2.2.3.4.50.p4) śrīśivamahāpurāṇam || ### [2.3.4.50.p5](https://indike.org/pramana/in.purana.siva*complete-2.2.3.4.50.p5) dvitīyāyāṃ rudrasaṃhitāyāṃ tṛtīyaḥ pārvatīkhaṇḍe --- Source: [https://indike.org/pramana/in.purana.siva*complete-2.2.3.4](https://indike.org/pramana/in.purana.siva*complete-2.2.3.4) · Pramāṇa