Shivapurana 2.3.5: pañcamo'dhyāyaḥ | menakayā varaprāptiḥ
Śivapurāṇa (complete text) 2.3.5
- Language
- Sanskrit
Contents
- 2.3.5.50 — 5 parts
pañcamo'dhyāyaḥ | menakayā varaprāptiḥ
2.3.5.1
nārada uvāca |
antarhitāyāṃ devyāṃ tu durgāyāṃ svagṛheṣu ca |
gateṣvamaravṛndeṣu kimabhūttadanantaram ||
2.3.5.2
kathaṃ menāgirīśau ca tepāte paramaṃ tapaḥ |
kathaṃ sutābhavattasya menāyāṃ tāta tadvada ||
2.3.5.3
brahmovāca vipravarya sutaśreṣṭha śṛṇu taccaritaṃ mahat |
praṇamya śaṅkaraṃ bhaktyā vacmi bhaktivivardhanam ||
2.3.5.4
upadiśya gate tāta suravṛnde girīśvaraḥ |
haryādau menakā cāpi tepāte paramaṃ tapaḥ ||
2.3.5.5
aharniśaṃ śivāṃ śambhuṃ cintayantau ca dampatī |
samyagāredhaturnityaṃ bhaktiyuktena cetasā ||
2.3.5.6
giripriyātīva mudānarca devīṃ śivena sā |
dānaṃ dadau dvijebhyaśca sadā tattoṣahetave ||
2.3.5.7
caitramāsaṃ samārabhya saptaviṃśativatsarān |
śivāṃ sampūjayāmāsāpatyārthinyanvahaṃ ratā ||
2.3.5.8
aṣṭamyāmupavāsaṃ tu kṛtvādānnavamītithau |
modakairbalipiṣṭaiśca pāyasairgandhapuṣpakaiḥ ||
2.3.5.9
gaṅgāyāmauṣadhiprasthe kṛtvā mūrtiṃ mahīmayīm |
umāyāḥ pūjayāmāsa nānāvastusamarpaṇaiḥ ||
2.3.5.10
kadācitsā nirāhārā kadācitsā dhṛtavratā |
kadācitpavanāhārā kadācijjalabhughyabhūt ||
2.3.5.11
śivāvinyastacetaskā saptaviṃśativatsarān |
nināya menakā prītyā paraṃ sā mṛṣṭavarcasā ||
2.3.5.12
saptaviṃśativarṣānte jaganmātā jaganmayī |
suprītābhavadatyarthamumā śaṅkarakāminī ||
2.3.5.13
anugrahāya menāyāḥ purataḥ parameśvarī |
āvirbabhūva sā devī santuṣṭā tatsubhaktitaḥ ||
2.3.5.14
divyāvayavasaṃyuktā tejomaṇḍalamadhyagā |
uvāca vihasantī sā menāṃ pratyakṣatāṃ gatā ||
2.3.5.15
devyuvāca |
varaṃ brūhi mahāsādhvi yatte manasi vartate |
suprasannā ca tapasā tavāhaṃ girikāmini ||
2.3.5.16
yatprārthitaṃ tvayā mene tapovratasamādhinā |
dāsye te'haṃ ca tatsarvaṃ vāñchitaṃ yadyadā bhavet ||
2.3.5.17
tataḥsā menakā devīṃ pratyakṣāṃ kālikāṃ tadā |
dṛṣṭvā ca praṇanāmātha vacanaṃ cedamabravīt ||
2.3.5.18
menovāca devi pratyakṣato rūpaṃ dṛṣṭaṃ tava mayādhunā |
tvāmahaṃ stotumicchāmi prasannā bhava kālike ||
2.3.5.19
brahmovāca atha sā menayetyuktā kālikā sarvamohinī |
bāhubhyāṃ suprasannātmā menakāṃ pariṣasvaje ||
2.3.5.20
tataḥ prāptamahājñānā menakā kālikāṃ śivam |
tuṣṭāva vāgbhiriṣṭābhirbhaktyā pratyakṣatāṃ gatām ||
2.3.5.21
menovāca |
mahāmāyāṃ jagaddhātrīṃ caṇḍikāṃ lokadhāriṇīm |
praṇamāmi mahādevīṃ sarvakāmārthadāyinīm ||
2.3.5.22
nityānandakarīṃ māyāṃ yoganidrāṃ jagatprasūm |
praṇamāmi sadā siddhāṃ śubhasārasamālinīm ||
2.3.5.23
mātāmahīṃ sadānandāṃ bhaktaśokavināśinīm |
ākalpaṃ vanitānāṃ ca prāṇināṃ buddhirūpiṇīm ||
2.3.5.24
sā tvaṃ bandhacchedaheturyatīnāṃ kaste geyo mādṛśībhiḥ prabhāvaḥ |
hiṃsāṃ yā vātharvavedasya sā tvaṃ nityaṃ kāmaṃ tvaṃ mameṣṭaṃ vidhehi ||
2.3.5.25
nityānityairbhāvahīnaiḥ parāstai-stattanmātrairyojyate bhūtavargaḥ |
teṣāṃ śaktistvaṃ sadā nityarūpā kāle yoṣā yogayuktā samarthā ||
2.3.5.26
yonirdharitrī jagatāṃ tvameva tvameva nityā prakṛtiḥ parastāt |
yayā vaśaṃ kriyate brahmarūpaṃ sā tvaṃ nityā me prasīdādya mātaḥ ||
2.3.5.27
tvaṃ jātavedogataśaktirugrā tvaṃ dāhikā sūryakarasya śaktiḥ |
āhlādikā tvaṃ bahucandrikā yā tāṃ tvāmahaṃ staumi namāmi caṇḍīm ||
2.3.5.28
yoṣāṇāṃ satpriyā ca tvaṃ nityā tvaṃ cordhvaretasām |
vāñchā tvaṃ sarvajagatāṃ māyā ca tvaṃ yathā hareḥ ||
2.3.5.29
yā ceṣṭarūpāṇi vidhāya devī sṛṣṭisthitirnāśamayī ca kartrī |
brahmācyutasthāṇuśarīrahetuḥ sā tvaṃ prasīdādya punarnamaste ||
2.3.5.30
brahmovāca tata itthaṃ stutā durgā kālikā punareva hi |
uvāca menakāṃ devīṃ vāñchitaṃ varayetyuta ||
2.3.5.31
umovāca prāṇapriyā mama tvaṃ hi himācalavilāsini |
yadicchasi dhruvaṃ dāsye nādeyaṃ vidyate mama ||
2.3.5.32
iti śrutvā maheśānyāḥ pīyūṣasadṛśaṃ vacaḥ |
uvāca parituṣṭā sā menakā girikāminī ||
2.3.5.33
menovāca śive jaya jaya prājñe maheśvari bhavāmbike |
varayogyāsmyahaṃ cette vṛṇe bhūyo varaṃ varam ||
2.3.5.34
prathamaṃ śataputrā me bhavantu jagadambike |
bahvāyuṣo vīryavanta ṛddhisiddhisamanvitāḥ ||
2.3.5.35
paścāttathaikā tanayā svarūpaguṇaśālinī |
kuladvayānandakarī bhuvanatrayapūjitā ||
2.3.5.36
sutā bhava mama śive devakāryārthameva hi |
rudrapatnī bhava tathā līlāṃ kuru bhavāmbike ||
2.3.5.37
brahmovāca tacchrutvā menakoktaṃ hi prāha devī prasannadhīḥ |
smitapūrvaṃ vacastasyāḥ pūrayantī manoratham ||
2.3.5.38
devyuvāca |
śataputrāḥ sambhavantu bhavatyā vīryasaṃyutāḥ |
tatraiko balavānmukhyaḥ prathamaṃ sambhaviṣyati ||
2.3.5.39
sutāhaṃ sambhaviṣyāmi santuṣṭā tava bhaktitaḥ |
devakāryaṃ kariṣyāmi sevitā nikhilaiḥ suraiḥ ||
2.3.5.40
brahmovāca evamuktvā jagaddhātrī kālikā parameśvarī |
paśyantyā menakāyāstu tatraivāntardadhe śivā ||
2.3.5.41
menakāpi varaṃ labdhvā maheśānyā abhīpsitam |
mudaṃ prāpāmitāṃ tāta tapaḥkleśo'pyanaśyata ||
2.3.5.42
diśi tasyāṃ namaskṛtya suprahṛṣṭamanāḥ satī |
jayaśabdaṃ proccarantī svasthānaṃ praviveśa ha ||
2.3.5.43
atha tasmai svapataye śaśaṃsa suvaraṃ ca tam |
svacihnabuddhamiva vai suvācā punaruktayā ||
2.3.5.44
śrutvā śailapatirhṛṣṭo'bhavanmenāvaco hi tat |
praśaśaṃsa priyāṃ prītyā śivābhaktiratāṃ ca tām ||
2.3.5.45
kālakrameṇātha tayoḥ pravṛtte surate mune |
garbho babhūva menāyā vavṛdhe pratyahaṃ ca saḥ ||
2.3.5.46
asūta sā nāgavadhūpabhogyaṃ sutamuttamam |
samudrabaddhasatsakhyaṃ mainākābhidhamadbhutam ||
2.3.5.47
vṛtraśatrāvapi kruddhe vedanājñaṃ sapakṣakam |
pavikṣatānāṃ devarṣe pakṣacchidi varāṅgakam ||
2.3.5.48
pravaraṃ śataputrāṇāṃ mahābalaparākramam |
svodbhavānāṃ mahīdhrāṇāṃ parvatendraikadhiṣṭhitam ||
2.3.5.49
āsīnmahotsavastatra himācalapure'dbhutaḥ |
dampatyoḥ pramudādhikyaṃ babhūva kleśasaṅkṣayaḥ ||
2.3.5.50
dānaṃ dadau dvijātibhyo'nyebhyaśca pradadau dhanam |
śivāśivapadadvandve sneho'bhūdadhikastayoḥ ||
2.3.5.50.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe menāvaralābhavarṇanaṃ nāma pañcamo'dhyāyaḥ ||
2.3.5.50.p2
śrīgaṇeśāya namaḥ ||
2.3.5.50.p3
śrīgaurīśaṅkarābhyāṃ namaḥ ||
2.3.5.50.p4
śrīśivamahāpurāṇam ||
2.3.5.50.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Kālikāpurāṇa — Sanskrit