Shivapurana 2.3.50: pañcāśattamo'dhyāyaḥ | vivāhamahotsave strīvinodavarṇanam
Śivapurāṇa (complete text) 2.3.50
- Language
- Sanskrit
Contents
- 2.3.50.45 — 5 parts
pañcāśattamo'dhyāyaḥ | vivāhamahotsave strīvinodavarṇanam
2.3.50.1
brahmovāca |
tataścāhaṃ munigaṇaiḥ śeṣakṛtyaṃ śivājñayā |
akārṣaṃ nārada prītyā śivāśivavivāhataḥ ||
2.3.50.2
tayoḥ śiro'bhiṣekaśca babhūvādaratastataḥ |
dhruvasya darśanaṃ viprāḥ kārayāmāsurādarāta ||
2.3.50.3
hṛdayālambhanaṃ karma babhūva tadanantaram |
svastipāṭhaśca viprendra mahotsavapurassaraḥ ||
2.3.50.4
śivāśirasi sindūraṃ dadau śambhurdvijājñayā |
tadānīṃ girijābhikhyādbhutāvarṇyā babhūva ha ||
2.3.50.5
tato viprājñayā tau dvāvekāsanasamāsthitau |
lebhāte paramāṃ śobhāṃ bhaktacittamudāvahām ||
2.3.50.6
tataḥ svasthānamāgatya saṃsravaprāśanaṃ mudā |
cakratustau nideśānme'dbhutalīlākarau mune ||
2.3.50.7
itthaṃ nivṛtte vidhivadyajñe vaivāhike śivaḥ |
brahmaṇe pūrṇapātraṃ me dadau lokakṛte prabhuḥ ||
2.3.50.8
godānaṃ vidhivacchambhurācāryāya dadau tataḥ |
mahādānāni ca prītyā yāni maṅgaladāni vai ||
2.3.50.9
tataḥ śatasuvarṇaṃ ca viprebhyaḥ sa dadau pṛthak |
bahubhyo ratnakoṭīśca nānādravyāṇyanekaśaḥ ||
2.3.50.10
tadānīmamarāḥ sarve pare jīvāścarācarāḥ |
mumuduścetasātīva babhūvāti jayadhvaniḥ ||
2.3.50.11
maṅgaladhvanigānaṃ ca babhūva bahu sarvataḥ |
vādyadhvanirabhūdramyo sarvānandapravardhanaḥ ||
2.3.50.12
harirmayātha devāśca munayaścāpare'khilāḥ |
girimāmantrya suprītyā svasthānaṃ prayayurdrutam ||
2.3.50.13
tadānīṃ śailanagare striyaśca muditā varam |
śivāśivau samānīya yayuḥ kuhavarālayam ||
2.3.50.14
laukikācāramājahrustāḥ striyastatra cādṛtāḥ |
mahotsāho babhūvātha sarvataḥ pramudāvahaḥ ||
2.3.50.15
atha tāstau samānīya dampatī janaśaṅkarau |
vāsālayaṃ mahādivyaṃ bhavācāraṃ vyadhurmudā ||
2.3.50.16
atho samīpamāgatya śailendranagarastriyaḥ |
nirvṛtya maṅgalaṃ karma prāpayandampatī gṛham ||
2.3.50.17
kṛtvā jayadhvaniṃ cakrurgranthinirmocanādikam |
sasmitāssakaṭākṣāśca pulakāñcitavigrahāḥ ||
2.3.50.18
vāsagehaṃ sampraviśya mumuhuḥ kāminīvarāḥ |
praśaṃsantyaḥ svabhāgyāni paśyantyaḥ parameśvaram ||
2.3.50.19
mahāsurūpaveṣaṃ ca sarvalāvaṇyasaṃyutam |
navīnayauvanasthaṃ ca kāmanīcittamohanam ||
2.3.50.20
īṣaddhāsyaprasannāsyaṃ sakaṭākṣaṃ susundaram |
susūkṣmavāso bibhrāṇaṃ nānāratnavibhūṣitam ||
2.3.50.21
tadānīṃ divyanāryaśca ṣoḍaśāraṃ samāyayuḥ |
tau dampatī ca sandraṣṭuṃ mahādarapurassaram ||
2.3.50.22
sarasvatī ca lakṣmīśca sāvitrī jāhnavī tathā |
aditiśca śacī caiva lopāmudrāpyarundhatī ||
2.3.50.23
ahalyā tulasī svāhā rohiṇī ca vasundharā |
śatarūpā ca saṃjñā ca ratiretāḥ surastriyaḥ ||
2.3.50.24
devakanyā nāgakanyā munikanyā manoharāḥ |
tatra yā yāḥ sthitāstāsāṃ saṅkhyāṃ kartuṃ ca kaḥ kṣamaḥ ||
2.3.50.25
tābhī ratnāsane datte tatrovāsa śivo mudā |
tamūcuḥ kramato devyaḥ suhāsaṃ madhuraṃ vacaḥ ||
2.3.50.26
sarasvatyuvāca |
prāptā satī mahādevādhunā prāṇādhikā mudā |
dṛṣṭvā priyāsyaṃ candrābhaṃ santāpaṃ tyaja kāmuka ||
2.3.50.27
kālaṃ gamaya kāleśa satīsaṃśleṣapūrvakam |
viśleṣaste na bhavitā sarvakālaṃ samāśritā ||
2.3.50.28
lakṣmīruvāca |
lajjāṃ vihāya deveśa satīṃ kṛtvā svavakṣasi |
tiṣṭha tāṃ prati kā lajjā prāṇā yānti yayā vinā ||
2.3.50.29
sāvitryuvāca |
bhojayitvā satīṃ śambho śīghraṃ tvaṃ bhuṅkṣva mā khidaḥ |
tadācamya sakarpūraṃ tāmbūlaṃ dehi sādaram ||
2.3.50.30
jāhnavyuvāca |
svarṇakāntikarāṃ dhṛtvā keśānmārjaya yoṣitaḥ |
kāminyāḥ svāmisaubhāgyasukhaṃ nātaḥ paraṃ bhavet ||
2.3.50.31
aditiruvāca |
bhojanānte śive śambhuṃ mukhaśuddhyarthamādarāt |
jalaṃ dehi mahāprītyā dampatiprema durlabham ||
2.3.50.32
śacyuvāca |
kṛtvā vilāpaṃ yaddhetoḥ śivāṃ kṛtvā ca vakṣasi |
yo babhrāmāniśaṃ mohāt kā lajjā te priyāṃ prati ||
2.3.50.33
lopāmudrovāca |
vyavahāro'sti ca strīṇāṃ bhuktvā vāsagṛhe śiva |
dattvā śivāyai tāmbūlaṃ śayanaṃ kartumarhasi ||
2.3.50.34
arundhatyuvāca |
mayā dattāṃ satīmmenāṃ tubhyaṃ dātumanīpsitā |
vividhaṃ bodhayitvemāṃ suratiṃ kartumarhasi ||
2.3.50.35
ahalyovāca |
vṛddhāvasthāṃ parityajya hyatīva taruṇo bhava |
yena menānumanyeta tvāṃ sutārpitamānasā ||
2.3.50.36
tulasyuvāca |
satī tvayā parityaktā kāmo dagdhaḥ purā kṛtaḥ |
kathaṃ tadā vasiṣṭhaśca prabho prasthāpito'dhunā ||
2.3.50.37
svāhovāca |
sthiro bhava mahādeva strīṇāṃ vacasi sāmpratam |
vivāhe vyavahāro'sti purandhrīṇāṃ pragalbhatā ||
2.3.50.38
rohiṇyuvāca |
kāmaṃ pūraya pārvatyāḥ kāmaśāstraviśārada |
kuru pāraṃ svayaṃ kāmī kāminīkāmasāgaram ||
2.3.50.39
vasundharovāca |
jānāsi bhāvaṃ bhāvajña kāmārtānāṃ ca yoṣitām |
na ca svaṃ svāminaṃ śambho īśvaraṃ pāti santatam ||
2.3.50.40
śatarūpovāca |
bhogaṃ divyaṃ vinā bhuktvā na hi tuṣyetkṣudhāturaḥ |
yena tuṣṭirbhavecchambho tatkartumucitaṃ striyāḥ ||
2.3.50.41
saṃjñovāca |
tūrṇaṃ prasthāpaya prītyā pārvatyā saha śaṅkaram |
ratnapradīpaṃ tāmbūlaṃ talpaṃ nirmāya nirjane ||
2.3.50.42
brahmovāca |
strīṇāṃ tadvacanaṃ śrutvā tā uvāca śivaḥ svayam |
nirvikāraśca bhagavānyogīndrāṇāṃ gurorguruḥ ||
2.3.50.43
śaṅkara uvāca |
devyo na brūta vacanamevambhūtaṃ mamāntikam |
jagatāṃ mātaraḥ sādhvyaḥ putre capalatā katham ||
2.3.50.44
brahmovāca |
śaṅkarasya vacaḥ śrutvā lajjitāḥ surayoṣitaḥ |
babhūvuḥ sambhramāttūṣṇīṃ citraputtalikā yathā ||
2.3.50.45
bhuktvā miṣṭānnamācamya maheśo hṛṣṭamānasaḥ |
sakarpūraṃ ca tāmbūlaṃ bubhuje bhāryayā saha ||
2.3.50.45.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīya pārvatīkhaṇḍe parihāsavarṇanaṃ nāma pañcāśattamo'dhyāyaḥ ||
2.3.50.45.p2
śrīgaṇeśāya namaḥ ||
2.3.50.45.p3
śrīgaurīśaṅkarābhyāṃ namaḥ ||
2.3.50.45.p4
śrīśivamahāpurāṇam ||
2.3.50.45.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Brahmavaivartapurāṇa — Vyāsa, Sanskrit