Shivapurana 2.3.51: ekapañcāśattamo'dhyāyaḥ | śivājñayākāmasañjīvanaprakārakathanam
Śivapurāṇa (complete text) 2.3.51
- Language
- Sanskrit
Contents
ekapañcāśattamo'dhyāyaḥ | śivājñayākāmasañjīvanaprakārakathanam
2.3.51.1
brahmovāca |
tasminnavasare jñātvānukūlaṃ samayaṃ ratiḥ |
suprasannā ca taṃ prāha śaṅkaraṃ dīnavatsalam ||
2.3.51.2
ratiruvāca |
gṛhītvā pārvatīṃ prāptaṃ saubhāgyamatidurlabham |
kimarthaṃ prāṇanātho me nissvārthaṃ bhasmasātkṛtaḥ ||
2.3.51.3
jīvayātra patiṃ me hi kāmavyāpāramātmani |
kuru dūraṃ ca santāpaṃ samaviśleṣahetukam ||
2.3.51.4
vivāhotsava etasmin sukhino nikhilā janāḥ |
ahamekā maheśāna duḥkhinī svapatiṃ vinā ||
2.3.51.5
sanāthāṃ kuru māṃ deva prasanno bhava śaṅkara |
svoktaṃ satyaṃ vidhehi tvaṃ dīnabandho para prabho ||
2.3.51.6
tvāṃ vinā kaḥ samartho'tra trailokye sacarācare |
nāśane mama duḥkhasya jñātveti karuṇāṃ kuru ||
2.3.51.7
sotsave svavivāhe'sminsarvānandapradāyinī |
sotsavāmapi māṃ nātha kuru dīnakṛpākara ||
2.3.51.8
jīvite mama nāthe hi pārvatyā priyayā saha |
suvihāraḥ prapūrṇaśca bhaviṣyati na saṃśayaḥ ||
2.3.51.9
sarvaṃ kartuṃ samartho'si yatastvaṃ parameśvaraḥ |
kiṃ bahūktyātra sarveśa jīvayāśu patiṃ mama ||
2.3.51.10
brahmovāca |
tadityuktvā kāmabhasma dadau sagranthibandhanam |
rudoda purataḥ śambhornātha nāthetyudīrya ca ||
2.3.51.11
ratirodanamākarṇya sarasvatyādayaḥ striyaḥ |
ruruduḥ sakalā devyaḥ procurdīnataraṃ vacaḥ ||
2.3.51.11.p1
devya ūcuḥ |
bhaktavatsalanāmā tvaṃ dīnabandhurdayānidhiḥ ||
2.3.51.12
kāmaṃ jīvaya sotsāhāṃ ratiṃ kuru namo'stu te ||
2.3.51.13
brahmovāca |
iti tadvacanaṃ śrutvā prasanno'bhūnmaheśvaraḥ |
kṛpādṛṣṭiṃ cakārāśu karuṇāsāgaraḥ prabhuḥ ||
2.3.51.14
sudhādṛṣṭyā śūlabhṛto bhasmato nirgataḥ smaraḥ |
tadrūpaveṣacihnātmā sundaro'dbhutamūrtimān ||
2.3.51.15
tadrūpaśca tadākāraṃ sasmitaṃ sadhanuśaram |
dṛṣṭvā patiṃ ratistaṃ ca praṇanāma maheśvaram ||
2.3.51.16
kṛtārthābhūcchivaṃ devaṃ tuṣṭāva ca kṛtāñjaliḥ |
prāṇanāthapradaṃ patyā jīvitena punaḥ punaḥ ||
2.3.51.17
kāmasya stutimākarṇya sanārīkasya śaṅkaraḥ |
prasanno'bhavadatyantamuvāca karuṇārdradhīḥ ||
2.3.51.18
śaṅkara uvāca |
prasanno'haṃ tava stutyā sanārīkasya cittaja |
svayambhava varaṃ brūhi vāñchitaṃ tad dadāmi te ||
2.3.51.19
brahmovāca |
iti śambhuvacaḥ śrutvā mahānandaḥ smarastataḥ |
uvāca sāñjalirnamro gadgadākṣarayā girā ||
2.3.51.20
kāma uvāca |
devadeva mahādeva karuṇāsāgara prabho |
yadi prasannaḥ sarveśa mamānandakaro bhava ||
2.3.51.21
kṣamasva me'parādhaṃ hi yatkṛtaśca purā prabho |
svajaneṣu parāṃ prītiṃ bhaktiṃ dehi svapādayoḥ ||
2.3.51.22
brahmovāca |
ityākarṇya smaravacaḥ prasannaḥ parameśvaraḥ |
omityuktvābravīttaṃ vai vihasankaruṇānidhiḥ ||
2.3.51.23
īśvara uvāca |
he kāmāhaṃ prasanno'smi bhayaṃ tyaja mahāmate |
gaccha viṣṇusamīpaṃ ca bahiḥsthāne sthito bhava ||
2.3.51.24
brahmovāca |
tacchrutvā śirasā natvā parikramya stuvanvibhum |
bahirgatvā harindevān praṇamya samupāsta saḥ ||
2.3.51.25
kāmaṃ sambhāṣya devāśca dadustasmai śubhāśiṣam |
viṣṇvādayaḥ prasannāste procuḥ smṛtvā śivaṃ hṛdi ||
2.3.51.26
devā ūcuḥ |
dhanyastvaṃ smara sandagdhaḥ śivenānugrahīkṛtaḥ |
jīvayāmāsa sattvāṃśakṛpādṛṣṭyākhileśvaraḥ ||
2.3.51.27
sukhaduḥkhado na cānyo'sti yataḥ svakṛtabhuk pumān |
kāle rakṣā vivāhaśca niṣekaḥ kena vāryate ||
2.3.51.28
brahmovāca |
ityuktvā te ca sammānya taṃ sukhenāmarāstadā |
santasthustatra viṣṇvādyāḥ sarve labdhamanorathāḥ ||
2.3.51.29
so'pi pramuditastatra samuvāsa śivājñayā |
jayaśabdo namaḥ śabdaḥ sādhuśabdo babhūva ha ||
2.3.51.30
tataḥ śambhurvāsagehe vāme saṃsthāpya pārvatīm |
miṣṭānnaṃ bhojayāmāsa taṃ ca sā ca mudānvitā ||
2.3.51.31
atha śambhurbhavācārī tatra kṛtyaṃ vidhāya tat |
menāmāmantrya śailaṃ ca janavāsaṃ jagāma saḥ ||
2.3.51.32
mahotsavastadā cāsīd vedadhvanirabhūnmune |
vādyāni vādayāmāsurjanāścaturvidhāni ca ||
2.3.51.33
śambhurāgatya svasthānaṃ vavande ca munīṃstadā |
hariṃ ca māṃ bhavācārādvandito'bhūtsurādibhiḥ ||
2.3.51.34
jayaśabdo babhūvātha namaśśabdastathaiva ca |
vedadhvaniśca śubhadaḥ sarvavighnavidāraṇaḥ ||
2.3.51.35
atha viṣṇurahaṃ śakraḥ sarve devāśca sarṣayaḥ |
siddhā upasurā nāgāstuṣṭuvuste pṛthakpṛthak ||
2.3.51.36
devā ūcuḥ |
jaya śambho'khilādhāra jaya nāma maheśvara |
jaya rudra mahādeva jaya viśvambhara prabho ||
2.3.51.37
jaya kālīpate svāmin jayānandapravardhaka |
jaya tryambaka sarveśa jaya māyāpate vibho ||
2.3.51.38
jaya nirguṇa niṣkāma kāraṇātīta sarvaga |
jaya līlākhilādhāra dhṛtarūpa namo'stu te ||
2.3.51.39
jaya svabhaktasatkāmapradeśa karuṇākara |
jaya sānandasadrūpa jaya māyāguṇākṛte ||
2.3.51.40
jayogra mṛḍa sarvātman dīnabandho dayānidhe |
jayāvikāra māyeśa vāṅmano'tītavigraha ||
2.3.51.41
brahmovāca |
iti stutvā maheśānaṃ girijānāyakaṃ prabhum |
siṣevire paraprītyā viṣṇvādyāste yathocitam ||
2.3.51.42
atha śambhurmaheśāno līlāttatanurīśvaraḥ |
dadau mānavaraṃ teṣāṃ sarveṣāṃ tatra nārada ||
2.3.51.43
viṣṇvādyāste'khilāstāta prāpyājñāṃ parameśituḥ |
atihṛṣṭāḥ prasannāsyāḥ svasthānaṃ jagmurādṛtāḥ ||
2.3.51.43.c1
iti śrīśivamahāpurāṇe brahmanāradasaṃvāde dvitīyāyāṃ rudrasaṃhitāyāṃ tṛtīye pārvatīkhaṇḍe kāmasañjīvanavarṇanaṃ nāmaikapañcāśattamo'dhyāyaḥ ||
2.3.51.43.p2
śrīgaṇeśāya namaḥ ||
2.3.51.43.p3
śrīgaurīśaṅkarābhyāṃ namaḥ ||
2.3.51.43.p4
śrīśivamahāpurāṇam ||
2.3.51.43.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Kūrmapurāṇa — Ativīrarāma Pāṇṭiyar, Sanskrit