Shivapurana 2.3.52: dvipañcāśattamo'dhyāyaḥ | himālayagṛhevarapakṣīyabhojanavarṇanam
Śivapurāṇa (complete text) 2.3.52
- Language
- Sanskrit
Contents
- 2.3.52.40 — 5 parts
dvipañcāśattamo'dhyāyaḥ | himālayagṛhevarapakṣīyabhojanavarṇanam
2.3.52.1
brahmovāca |
atha śailavarastāta himavānbhāgyasattamaḥ |
prāṅgaṇaṃ racayāmāsa bhojanārthaṃ vicakṣaṇaḥ ||
2.3.52.2
mārjanaṃ lepanaṃ samyakkārayāmāsa tasya saḥ |
sa sugandhairalañcakre nānāvastubhirādarāt ||
2.3.52.3
atha śailaḥ surān sarvānanyānapi ca seśvarān |
bhojanāyāhvayāmāsa putraiḥ śailaiḥ parairapi ||
2.3.52.4
śailāhvānamathākarṇya sa prabhuḥ sācyuto mune |
sarvaiḥsurādibhistatra bhojanāya yayau mudā ||
2.3.52.5
giriḥ prabhuṃ ca sarvāṃstān susatkṛtya yathāvidhi |
mudopaveśayāmāsa satpīṭheṣu gṛhāntare ||
2.3.52.6
nānāsubhojyavastūni pariveṣya ca tatpunaḥ |
sāñcalirbhojanāyājñāṃ cakre vijñaptimānataḥ ||
2.3.52.7
atha sammānitāstatra devā viṣṇupurogamāḥ |
sadāśivaṃ puraskṛtya bubhujuḥ sakalāśca te ||
2.3.52.8
tadā sarve hi militā aikapadyena sarvaśaḥ |
paṅktibhūtāśca bubhujurvihasantaḥ pṛthakpṛthak ||
2.3.52.9
nandibhṛṅgivīrabhadravīrabhadragaṇāḥ pṛthak |
bubhujuste mahābhāgāḥ kutūhalasamanvitāḥ ||
2.3.52.10
devāḥ sendrā lokapālā nānāśobhāsamanvitāḥ |
bubhujuste mahābhāgā nānāhāsyarasaissaha ||
2.3.52.11
sarve ca munayo viprā bhṛgvādyā ṛṣayastathā |
bubhujuḥ prītitaḥ sarve pṛthak paṅktigatāstadā ||
2.3.52.12
tathā caṇḍīgaṇāḥ sarve bubhujuḥ kṛtabhojanāḥ |
kutūhalaṃ prakurvanto nānāhāsyakarā mudā ||
2.3.52.13
evaṃ te bhuktavantaścācamya sarve mudānvitāḥ |
viśrāmārthaṃ gatāḥ prītyā viṣṇvādyāḥ svaṃ svamāśramam ||
2.3.52.14
menājñayā striyaḥ sādhvyaḥ śivaṃ samprārthya bhaktitaḥ |
gehe nivāsayāmāsurvāsākhye paramotsave ||
2.3.52.15
ratnasiṃhāsane śambhuḥ menādatte manohare |
sannidhāya mudā yukto dadṛśe vāsamandiram ||
2.3.52.16
ratnapradīpaśatakairjvaladbhirjvalitaṃ śriyā |
ratnapātraghaṭākīrṇaṃ muktāmaṇivirājitam ||
2.3.52.17
ratnadarpaṇaśobhāḍhyaṃ maṇḍitaṃ śvetacāmaraiḥ |
muktāmaṇisumālābhirveṣṭitaṃ paramarddhimat ||
2.3.52.18
anaupamyaṃ mahādivyaṃ vicitraṃ sumanoharam |
cittāhlādakaraṃ nānāracanāracitasthalam ||
2.3.52.19
śivadattavarasyaiva prabhāvamatulaṃ param |
darśayantaṃ samullāsi śivalokābhidhānakam ||
2.3.52.20
nānāsugandhasaddravyairvāsitaṃ suprakāśakam |
candanāgarusaṃyuktaṃ puṣpaśayyāsamanvitam ||
2.3.52.21
nānācitravicitrāḍhyaṃ nirmitaṃ viśvakarmaṇā |
ratnendrasāraracitairācitaṃ hārakairvaraiḥ ||
2.3.52.22
kutracitsuranirmāṇaṃ vaikuṇṭhaṃ sumanoharam |
kutracicca brahmalokaṃ lokapālapuraṃ kvacit ||
2.3.52.23
kailāsaṃ kutracidramyaṃ kutracicchakramandiram |
kutracicchivalokaṃ ca sarvopari virājitam ||
2.3.52.24
etādṛśaṃ gṛhaṃ sarvaṃ dṛṣṭvāścaryaṃ maheśvaraḥ |
praśaṃsan himaśaileśaṃ parituṣṭo babhūva ha ||
2.3.52.25
tatrātiramaṇīye ca ratnaparyaṅka uttame |
aśayiṣṭa mudā yukto līlayā parameśvaraḥ ||
2.3.52.26
himācalaśca svabhrātṝnbhojayāmāsa kṛtsnaśaḥ |
sarvānanyāṃśca suprītyā śeṣakṛtyaṃ cakāra ha ||
2.3.52.27
evaṃ kurvati śaileśe svapiti preṣṭha īśvare |
vyatītā rajanī sarvā prātaḥkālo babhūva ha ||
2.3.52.28
atha prabhātakāle ca dhṛtyutsāhaparāyaṇāḥ |
nānāprakāravādyāni vādayāñcakrire janāḥ ||
2.3.52.29
sarve surāḥsamuttasthurviṣṇvādyāḥ sumudānvitāḥ |
sveṣṭaṃ saṃsmṛtya deveśaṃ sajjībhūtāḥ sasambhramāḥ ||
2.3.52.30
svavāhanāni sajjāni kailāsaṃ gantumutsukāḥ |
kṛtvā sampreṣayāmāsurdharmaṃ śivasamīpataḥ ||
2.3.52.31
vāsagehamathāgatya dharmo nārāyaṇājñayā |
uvāca śaṅkaraṃ yogī yogīśaṃ samayocitam ||
2.3.52.32
dharma uvāca |
uttiṣṭhottiṣṭha bhadraṃ te bhava naḥ pramathādhipa |
janāvāsaṃ samāgaccha kṛtārthaṃ kuru tatra tān ||
2.3.52.33
brahmovāca |
iti dharmavacaḥ śrutvā vijahāsa maheśvaraḥ |
dadarśa kṛpayā dṛṣṭyā talpamujjhāñcakāra ha ||
2.3.52.34
uvāca vihasan dharmaṃ tvamagre gaccha tatra ha |
ahamapyāgamiṣyāmi drutameva na saṃśayaḥ ||
2.3.52.35
brahmovāca |
ityuktaḥ śaṅkareṇātha janāvāsaṃ jagāma saḥ |
svayaṃ gantumanā āsīttatra śambhurapi prabhuḥ ||
2.3.52.36
tajjñātvā strīgaṇaḥ so'sau tatrāgacchanmahotsavaḥ |
cakre maṅgalagānaṃ hi paśyan śambhupadadvayam ||
2.3.52.37
atha śambhurbhavācārī prātaḥkṛtyaṃ vidhāya ca |
menāmāmantrya kudhraṃ ca janāvāsaṃ jagāma saḥ ||
2.3.52.38
mahotsavastadā cāsīdvedadhvanirabhūnmune |
vādyāni vādayāmāsurjanāścāturvidhāni ca ||
2.3.52.39
śambhurāgatya svasthānaṃ vavande ca munīṃstadā |
hariṃ ca māṃ bhavācārāt vandito'bhūtsurādibhiḥ ||
2.3.52.40
jayaśabdo babhūvātha namaḥ śabdastathaiva ca |
vedadhvaniśca śubhado mahākolāhalo'bhavat ||
2.3.52.40.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe varavargabhojanaśivaśayanavarṇanaṃ nāma dvipañcāśattamo'dhyāyaḥ ||
2.3.52.40.p2
śrīgaṇeśāya namaḥ ||
2.3.52.40.p3
śrīgaurīśaṅkarābhyāṃ namaḥ ||
2.3.52.40.p4
śrīśivamahāpurāṇam ||
2.3.52.40.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe