Shivapurana 2.3.53: tripañcāśattamo'dhyāyaḥ | vadhūvarayoḥ yātrāprasthānavarṇanam
Śivapurāṇa (complete text) 2.3.53
- Language
- Sanskrit
Contents
- 2.3.53.37 — 5 parts
tripañcāśattamo'dhyāyaḥ | vadhūvarayoḥ yātrāprasthānavarṇanam
2.3.53.1
brahmovāca |
atha viṣṇvādayo devā munayaśca tapodhanāḥ |
kṛtvāvaśyakakarmāṇi yātrāṃ santenire gireḥ ||
2.3.53.2
tato girivaraḥ snātvā sveṣṭaṃ sampūjya yatnataḥ |
paurabandhūnsamāhūya janavāsaṃ yayau mudā ||
2.3.53.3
tatra prabhuṃ prapūjyātha cakre samprārthanāṃ mudā |
kiyaddināni santiṣṭha madgehe sakalaiḥ saha ||
2.3.53.4
vilokanena te śambho kṛtārtho'haṃ na saṃśayaḥ |
dhanyaśca yasya madgehe āyāto'si suraiḥ saha ||
2.3.53.5
brahmovāca |
ityuktvā bahu śaileśaḥ karau baddhvā praṇamya ca |
prabhuṃ nimantrayāmāsa saha viṣṇusurādibhiḥ ||
2.3.53.6
atha te manasā gatvā śiva saṃyutamādarāt |
pratyūcurmunayo devā hṛṣṭā viṣṇusurādibhiḥ ||
2.3.53.7
devā ūcuḥ |
dhanyastvaṃ giriśārdūla tava kīrtirmahīyasī |
tvatsamo na trilokeṣu ko'pi puṇyatamo janaḥ ||
2.3.53.8
yasya dvāri maheśānaḥ parabrahma satāṃ gatiḥ |
samāgataḥ sadāsaiśca kṛpayā bhaktavatsalaḥ ||
2.3.53.9
janāvāso'tiramyaśca sammāno vividhaḥ kṛtaḥ |
bhojanāni tvapūrvāṇi na varṇyāni girīśvara ||
2.3.53.10
citraṃ na khalu tatrāsti yatra devī śivāmbikā |
paripūrṇamaśeṣaṃ ca vayaṃ dhanyā yadāgatāḥ ||
2.3.53.11
brahmovāca |
itthaṃ parasparaṃ tatra praśaṃsābhavaduttamā |
utsavo vividho jāto vedasādhujayadhvaniḥ ||
2.3.53.12
abhūnmaṅgalagānaṃ ca nanartāpsarasāṅgaṇaḥ |
nutiṃ cakrurmāgadhādyā dravyadānamabhūd bahu ||
2.3.53.13
tata āmantraya deveśaṃ svagehamagamadgiriḥ |
bhojanotsavamārebhe nānāvidhividhānataḥ ||
2.3.53.14
bhojanārthaṃ prabhuṃ prītyānayāmāsa yathocitam |
parivārasametaṃ ca sakutūhalamīśvaram ||
2.3.53.15
prakṣālya caraṇau śambhorviṣṇormama varādarāt |
sarveṣāmamarāṇāṃ ca munīnāṃ ca yathārthataḥ ||
2.3.53.16
pareṣāṃ ca gatānāṃ ca girīśo maṇḍapāntare |
āsayāmāsa suprītyā tāṃstānbandhubhiranvitaḥ ||
2.3.53.17
surasairvividhānnaiśca tarpayāmāsa tān giriḥ |
bubhujurnikhilāste vai śambhunā viṣṇunā mayā ||
2.3.53.18
tadānīṃ puranāryaśca gālīdānaṃ vyadhurmudā |
mṛduvāṇyā hasantyaśca paśyantyo yatnataśca tān ||
2.3.53.19
te bhuktvācamya vidhivadgirimāmantrya nārada |
svasthānaṃ prayayuḥ sarve muditāstṛptimāgatāḥ ||
2.3.53.20
itthaṃ tṛtīye ghastre'pi mānitāste'bhavanmune |
girīśvareṇa vidhivaddānamānādarādibhiḥ ||
2.3.53.21
caturthe divase prāpte caturthīkarma śuddhitaḥ |
babhūva vidhivadyena vinā khaṇḍita eva saḥ ||
2.3.53.22
utsavo vividhaścāsītsādhuvādajayadhvaniḥ |
bahudānaṃ sugānaṃ ca nartanaṃ vividhaṃ tathā ||
2.3.53.23
pañcame divase prāpte sarve devā mudānvitāḥ |
vijñaptiṃ cakrire śailaṃ yātrārthamatipremataḥ ||
2.3.53.24
tadākarṇya girīśaścovāca devān kṛtāñjaliḥ |
kiyaddināni tiṣṭhantu kṛpāṃ kurvantu māṃ surāḥ ||
2.3.53.25
ityuktvā snehatastām̐śca prabhuṃ viṣṇuṃ ca māṃ parān |
vāsayāmāsa divasān bahūnnityaṃ samādarāt ||
2.3.53.26
itthaṃ vyatīyurdivasā bahavo vasatāṃ ca tat |
saptarṣīnpreṣayāmāsurgirīśānte tataḥ surāḥ ||
2.3.53.27
te taṃ sambodhayāmāsurmenāṃ ca samayocitam |
śivatattvaṃ paraṃ procuḥ praśaṃsanvidhivanmudā ||
2.3.53.28
aṅgīkṛtaṃ girīśena tattadbodhanato mune |
yātrārthamagamacchambhuḥ śaileśaṃ sāmarādikaḥ ||
2.3.53.29
yātrāṃ kurvati deveśe svaśailaṃ sāmare śive |
uccaiḥ rudoda sā menā tamuvāca kṛpānidhim ||
2.3.53.30
menovāca |
kṛpānidhe kṛpāṃ kṛtvā śivāṃ sampālayiṣyasi |
sahasradoṣaṃ pārvatyā āśutoṣaḥ kṣamiṣyasi ||
2.3.53.31
tvatpādāmbujabhaktā ca madvatsā janmajanmani |
svapne jñāne smṛtirnāsti mahādevaṃ prabhuṃ vinā ||
2.3.53.32
tvadbhaktiśrutimātreṇa harṣāśrupulakānvitā |
tvannindayā bhavenmaunā mṛtyuñjaya mṛtā iva ||
2.3.53.33
brahmovāca |
ityuktvā menakā tasmai samarpya svasutāṃ tadā |
atyuccai rodanaṃ kṛtvā mūrcchāmāpa tayoḥ puraḥ ||
2.3.53.34
atha menāṃ bodhayitvā tāmāmantrya giriṃ tathā |
cakāra yātrāṃ devaiśca mahotsavapurassaram ||
2.3.53.35
atha te nirjarāḥ sarve prabhuṇā svagaṇaiḥ saha |
yātrāṃ pracakrire tūṣṇīṃ girimprati śivaṃ dadhuḥ ||
2.3.53.36
himācalapurībāhyopavane harṣitāḥ surāḥ |
seśvarāḥ sotsavāstasthuḥ paryaiṣanta śivāgamam ||
2.3.53.37
ityuktā śivasadyātrā devaissaha munīśvara |
ākarṇaya śivayātrāṃ virahotsavasaṃyutām ||
2.3.53.37.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivayātrāvarṇanaṃ nāma tripañcāśattamo'dhyāyaḥ ||
2.3.53.37.p2
śrīgaṇeśāya namaḥ ||
2.3.53.37.p3
śrīgaurīśaṅkarābhyāṃ namaḥ ||
2.3.53.37.p4
śrīśivamahāpurāṇam ||
2.3.53.37.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (2)
- Brahmavaivartapurāṇa — Vyāsa, Sanskrit
- Mahābhāgavatapurāṇa — Sanskrit