Shivapurana 2.3.55: pañcapañcāśattamo'dhyāyaḥ | śivayoḥ kailāsagamanavarṇanam
Śivapurāṇa (complete text) 2.3.55
- Language
- Sanskrit
Contents
- 2.3.55.38 — 2 parts
pañcapañcāśattamo'dhyāyaḥ | śivayoḥ kailāsagamanavarṇanam
2.3.55.1
brahmovāca |
atha sā brāhmaṇī devyai śikṣayitvā vrataṃ ca tat |
provāca menāmāmantrya yātrāmasyāśca kāraya ||
2.3.55.2
tathāstviti ca samprocya premavaśyā babhūva sā |
dhṛtiṃ dhṛtvāhūya kālīṃ viśleṣavirahākulā ||
2.3.55.3
atyuccai rodanaṃ cakre saṃśliṣya ca punaḥ punaḥ |
pārvatyapi rurodoccairuccarantī kṛpāvacaḥ ||
2.3.55.4
śailapriyā śivā cāpi mūrcchāmāpa śucārditā |
mūrcchāmprāpurdevapatnyaḥ pārvatyā rodanena ca ||
2.3.55.5
sarvāśca rurudurnāryaḥ sarvamāsīdacetanam |
svayaṃ ruroda yogīśo gacchanko'nya paraḥ prabhuḥ ||
2.3.55.6
etasminnantare śīghramājagāma himālayaḥ |
sa sarvatanayaistatra sacivaiśca dvijaiḥ paraiḥ ||
2.3.55.7
svayaṃ ruroda mohena vatsāṃ kṛtvā svavakṣasi |
kva yāsītyevamuccārya śūnyaṃ kṛtvā muhurmuhuḥ ||
2.3.55.8
tataḥ purohito viprairadhyātmavidyayā sukham |
sarvānprabodhayāmāsa kṛpayā jñānavattaraḥ ||
2.3.55.9
nanāma pārvatī bhaktyā mātaraṃ pitaraṃ gurum |
mahāmāyā bhavācārādrurodoccairmuhurmuhuḥ ||
2.3.55.10
pārvatyā rodanenaiva ruruduḥ sarvayoṣitaḥ |
nitarāṃ jananī menā yāmayo bhrātarastathā ||
2.3.55.11
punaḥ punaḥ śivāmātā yāmayo'nyāśca yoṣitaḥ |
bhrātaro janakaḥ premṇā rurudurbaddhasauhṛdāḥ ||
2.3.55.12
tadā viprāḥ samāgatya bodhayāmāsurādarāt |
lagnaṃ nivedayāmāsuryātrāyāḥ sukhadaṃ param ||
2.3.55.13
tato himālayo menāṃ dhṛtvā dhairyaṃ vivekataḥ |
śibikāmānayāmāsa śivārohaṇahetave ||
2.3.55.14
śivāmārohayāmāsustatra viprāṅganāśca tām |
āśiṣaṃ pradaduḥ sarvāḥ pitā mātā dvijāstathā ||
2.3.55.15
mahārājñyupacārām̐śca dadau menā giristathā |
nānādravyasamūhaṃ ca pareṣāṃ durlabhaṃ śubham ||
2.3.55.16
śivā natvā gurūnsarvān janakaṃ jananīṃ tathā |
dvijānpurohitaṃ yāmīstrīstathānyā yayau mune ||
2.3.55.17
himācalo'pi sasuto'gacchatsnehavaśī budhaḥ |
prāptastatra prabhuryatra sāmaraḥ prītimāvahan ||
2.3.55.18
prītyābhirebhire sarve mahotsavapurassaram |
prabhuṃ praṇemuste bhaktyā praśaṃsanto'viśanpurīm ||
2.3.55.19
jātismarāṃ smārayāmi nityaṃ smarasi cedvada |
līlayā tvāṃ ca deveśi sadā prāṇapriyā mama ||
2.3.55.20
brahmovāca |
ityākarṇya maheśasya svanāthasyātha pārvatī |
śaṅkarasya priyā nityaṃ sasmitovāca sā satī ||
2.3.55.21
pārvatyuvāca |
sarvaṃ smarāmi prāṇeśa maunībhūto bhaveti ca |
prastāvocitamadyāśu kāryaṃ kuru namo'stu te ||
2.3.55.22
brahmovāca |
ityākarṇya priyāvākyaṃ sudhādhārāśatopamam |
mumude'tīva viśveśo laukikācāratatparaḥ ||
2.3.55.23
śivaḥ sambhṛtasambhāro nānāvastumanoharam |
bhojayāmāsa devāṃśca nārāyaṇapurogamān ||
2.3.55.24
tathānyānnikhilānprītyā svavivāhasamāgatān |
bhojayāmāsa surasamannaṃ bahuvidhaṃ prabhuḥ ||
2.3.55.25
tato bhuktvā ca te devā nānāratnavibhūṣitāḥ |
sastrīkāḥ sagaṇāḥ sarve praṇemuścandraśekharam ||
2.3.55.26
saṃstutya vāgbhiriṣṭābhiḥ parikramya mudānvitāḥ |
praśaṃsanto vivāhaṃ ca svadhāmāni yayustataḥ ||
2.3.55.27
nārāyaṇaṃ mune māṃ ca praṇanāma śivaḥsvayam |
laukikācāramāśritya yathā viṣṇuśca kaśyapam ||
2.3.55.28
mayāśliṣyāśiṣaṃ dattvā śivasya punaragrataḥ |
matvā vai taṃ paraṃ brahma cakre ca stutiruttamā ||
2.3.55.29
tamāmantrya mayā viṣṇuḥ sāñjaliḥ śivayormudā |
praśaṃsaṃstadvivāhaṃ ca jagāma svālayaṃ param ||
2.3.55.30
śivo'pi svagirau tasthau pārvatyā viharan mudā |
sarve gaṇāḥ sukhaṃ prāpuratīva svabhajan śivau ||
2.3.55.31
ityevaṃ kathitastāta śivodvāhaḥ sumaṅgalaḥ |
śokaghno harṣajanaka āyuṣyo dhanavarddhanaḥ ||
2.3.55.32
ya imaṃ śṛṇuyānnityaṃ śucistadgatamānasaḥ |
śrāvayedvātha niyamācchivalokamavāpnuyāt ||
2.3.55.33
idamākhyānamākhyātamadbhutaṃ maṅgalāyanam |
sarvavighnapraśamanaṃ sarvavyādhivināśanam ||
2.3.55.34
yaśasyaṃ svargyamāyuṣyaṃ putrapautrakaraṃ param |
sarvakāmapradaṃ ceha bhuktidaṃ muktidaṃ sadā ||
2.3.55.35
apamṛtyupraśamanaṃ mahāśāntikaraṃ śubham |
sarvaduḥsvapnaśamanaṃ buddhiprajñādisādhanam ||
2.3.55.36
śivotsaveṣu sarveṣu paṭhitavyaṃ prayatnataḥ |
śubhepsubhirjanaiḥ prītyā śivasantoṣakāraṇam ||
2.3.55.37
paṭhetpratiṣṭhākāle tu devādīnāṃ viśeṣataḥ |
śivasya sarvakāryasya prārambhe ca suprītitaḥ ||
2.3.55.38
śṛṇuyādvā śucirbhūtvā caritaṃ śivayośśivam |
sidhyanti sarvakāryāṇi satyaṃ satyaṃ na saṃśayaḥ ||
2.3.55.38.c1
iti śrīśivamahāpurāṇe brahmanāradasaṃvāde dvitīyāyāṃ rudrasaṃhitāyāṃ tṛtīye pārvatīkhaṇḍe śivakailāsagamanavarṇanaṃ nāma pañcapañcāśattamo'dhyāyaḥ ||
2.3.55.38.c2
iti śrīśivamahāpurāṇe dvitīyarudrasaṃhitāyāṃ tṛtīyaḥ pārvatīkhaṇḍaḥ samāptaḥ ||
Linked texts (1)
- Brahmavaivartapurāṇa — Vyāsa, Sanskrit