Shivapurana 2.3.6: ṣaṣṭho'dhyāyaḥ | pārvatijanmavarṇanam
Śivapurāṇa (complete text) 2.3.6
- Language
- Sanskrit
Contents
- 2.3.6.54 — 5 parts
ṣaṣṭho'dhyāyaḥ | pārvatijanmavarṇanam
2.3.6.1
brahmovāca atha sasmaraturbhaktyā dampatī tau bhavāmbikām |
prasūtihetave tatra devakāryārthamādarāt ||
2.3.6.2
tataḥ sā caṇḍikā yogāttyaktadehā purā pituḥ |
īhayā bhavituṃ bhūyaḥ samaicchad giridārataḥ ||
2.3.6.3
satyaṃ vidhātuṃ svavacaḥ prasannākhilakāmadā |
pūrṇāṃśācchailacitte sā viveśātha maheśvarī ||
2.3.6.4
virarāja tataḥ so'ti pramado'pūrvasudyutiḥ |
hutāśana ivādhṛṣyastejorāśirmahāmanāḥ ||
2.3.6.5
tato giriḥ svapriyāyāṃ paripūrṇaṃ śivāṃśakam |
samādhimatvātsamaye samadhatta suśaṅkare ||
2.3.6.6
samadhatta gireḥ patnī garbhaṃ devyāḥ prasādataḥ |
citte sthitāyāḥ karuṇākarāyāḥ sukhadaṃ gireḥ ||
2.3.6.7
giripriyā sarvajagannivāsāsaṃśrayādhikam |
vireje sutarāṃ menā tejomaṇḍalagā sadā ||
2.3.6.8
sukhodayaṃ svabhartuśca menā daurhṛdalakṣaṇam |
dadhau nidānaṃ devānāmānandasyepsitaṃ śubham ||
2.3.6.9
dehasādādasampūrṇabhūṣaṇā lodhrasammukhā |
svalpabhendukṣayekāsau viceṣyarkṣā vibhāvarī ||
2.3.6.10
tadānanaṃ mṛtsurabhi nāyaṃ tṛptiṃ girīśvaraḥ |
mune rahasyupāghrāya premādhikyaṃ babhūva tat ||
2.3.6.11
menā spṛhāvatī keṣu na me śaṃsati vastuṣu |
kiñcidiṣṭaṃ hriyāpṛcchadanuvelaṃ sakhīrgiriḥ ||
2.3.6.12
upetya daurhṛdaṃ śailyaṃ yadvavre'paśyadāśu tat |
ānītaṃ neṣṭamasyāddhā nāsādhyaṃ tridive'pi hi ||
2.3.6.13
pracīyamānāvayavā nistīrya daurhṛdavyathām |
reje menā bālalatā naddhapatrādhikā yathā ||
2.3.6.14
giriḥ sagarbhāṃ mahiṣīmamaṃsta dharaṇīmiva |
nidhānagarbhāmabhyantarlīnavahniśamīmiva ||
2.3.6.15
priyāprīteśca manasaḥ svārjitadraviṇasya ca |
samunnateḥ śruteḥ prājñaḥ kriyāścakre yathocitāḥ ||
2.3.6.16
dadarśa kāle menāṃ sa pratītaḥ prasavonmukhīm |
abhritāṃ ca divaṃ garbhagṛhe bhiṣagadhiṣṭhite ||
2.3.6.17
dṛṣṭvā priyāṃ śubhāṅgīṃ vai mumodāti girīśvaraḥ |
garbhasthajagadambāṃ hi mahātejovatīṃ tadā ||
2.3.6.18
tasminnavasare devā mune viṣṇvādayastathā |
munayaśca samāgamya garbhasthāṃ tuṣṭuvuḥ śivām ||
2.3.6.19
devā ūcuḥ
durge jaya jaya prājñe jagadamba maheśvari |
satyavrate satyapare trisatye satyarūpiṇī ||
2.3.6.20
satyasthe satyasuprīte satyayone ca satyataḥ |
satyavaktre satyanetre prapannāḥ śaraṇaṃ ca te ||
2.3.6.21
śivapriye maheśāni devaduḥkhakṣayaṅkari |
trailokyamātā śarvāṇī vyāpinī bhaktavatsalā ||
2.3.6.22
āvirbhūya trilokeśi devakāryaṃ kuruṣva ha |
sanāthāḥ kṛpayā te hi vayaṃ sarve maheśvari ||
2.3.6.23
tvattaḥ sarve ca sukhino labhante sukhamuttamam |
tvāṃ vinā na hi kiñcidvai śobhate tribhaveṣvapi ||
2.3.6.24
brahmovāca itthaṃ kṛtvā maheśānyā garbhasthāyā bahustutim |
prasannamanaso devāḥ svaṃ svaṃ dhāma yayustadā ||
2.3.6.25
vyatīte navame māse daśame māsi pūrṇataḥ |
garbhasthā sā gatiṃ dadhre kālikā jagadambikā ||
2.3.6.26
tadā susamayaścāsīcchāntabhagrahatārakaḥ |
nabhaḥ prasannatāṃ yātaṃ prakāśaḥ sarvadikṣu hi ||
2.3.6.27
mahī maṅgalabhūyiṣṭhā savanagrāmasāgarā |
saraḥsravantīvāpīṣu puphulluḥ paṅkajāni vai ||
2.3.6.28
vavuśca vividhā vātāḥ sukhasparśā munīśvara |
mumuduḥ sādhavaḥ sarve'satāṃ duḥkhamabhūd drutam ||
2.3.6.29
dundubhīnvādayāmāsurnabhasyāgatya nirjarāḥ |
puṣpavṛṣṭirabhūttatra jagurgandharvasattamāḥ ||
2.3.6.30
vidyādharastriyo vyomni nanṛtuścāpsarāstathā |
tadotsavo mahānāsīddevādīnāṃ nabhaḥsthale ||
2.3.6.31
tasminnavasare devī pūrvaśaktiḥ śivā satī |
āvirbabhūva purato menāyā nijarūpataḥ ||
2.3.6.32
vasantartau madhau māse navamyāṃ mṛgadhiṣṇyake |
ardharātre samutpannā gaṅgeva śaśimaṇḍalāt ||
2.3.6.33
samaye tatsvarūpeṇa menakājaṭharācchivā |
samuddhūya samutpannā sā lakṣmīriva sāgarāt ||
2.3.6.34
tatastasyāṃ tu jātāyāṃ prasanno'bhūttadā bhavaḥ |
anukūlo vavau vāyurgambhīro gandhayuk śubhaḥ ||
2.3.6.35
babhūva puṣpavṛṣṭiśca toyavṛṣṭipurassaram |
jajvaluścāgnayaḥ śāntā jagarjuśca tadā ghanāḥ ||
2.3.6.36
tasyāṃ tu jāyamānāyāṃ sarvasvaṃ samapadyata |
himavannagare tatra sarvaṃ duḥkhaṃ kṣayaṃ gatam ||
2.3.6.37
tasminnavasare tatra viṣṇvādyāḥ sakalāḥ surāḥ |
ājagmuḥ sukhinaḥ prītyā dadṛśurjagadambikām ||
2.3.6.38
tuṣṭuvustāṃ śivāmambāṃ kālikāṃ śivakāminīm |
divyarūpāṃ mahāmāyāṃ śivalokanivāsinīm ||
2.3.6.39
devā ūcuḥ
jagadamba mahādevi sarvasiddhividhāyini |
devakāryakarī tvaṃ hi sadātastvāṃ namāmahe ||
2.3.6.40
sarvathā kuru kalyāṇaṃ devānāṃ bhaktavatsale |
menāmanorathaḥ pūrṇaḥ kṛtaḥ kuru harasya ca ||
2.3.6.41
brahmovāca itthaṃ stutvā śivāṃ devā viṣṇvādyāḥ supraṇamya tām |
svaṃ svaṃ dhāma yayuḥ prītāḥ śaṃsantastadgatiṃ parām ||
2.3.6.42
tāṃ tu dṛṣṭvā tathā jātāṃ nīlotpaladalaprabhāma |
śyāmāṃ sā menakā devīṃ mudamāyāti nārada ||
2.3.6.43
divyarūpaṃ vilokyānu jñānamāpa giripriyā |
vijñāya parameśānīṃ tuṣṭāvātipraharṣitā ||
2.3.6.44
menovāca jagadamba maheśāni kṛtātikaruṇā tvayā |
āvirbhūtā mama puro vilasantī yadambike ||
2.3.6.45
tvamādyā sarvaśaktīnāṃ trilokajananī śive |
śivapriyā sadā devi sarvadevastutā parā ||
2.3.6.46
kṛpāṃ kuru maheśāni mama dhyānasthitā bhava |
etadrūpeṇa pratyakṣaṃ rūpaṃ dhehi sutāsamam ||
2.3.6.47
brahmovāca ityākarṇya vacastasyā menāyā bhūdharastriyāḥ |
pratyuvāca śivā devī suprasannā giripriyām ||
2.3.6.48
devyuvāca
he mene tvaṃ purā māṃ ca susevitavatī ratā |
tvadbhaktyā suprasannāhaṃ varaṃ dātuṃ gatāntikam ||
2.3.6.49
varaṃ brūhīti madvāṇīṃ śrutvā te tadvaro vṛtaḥ |
sutā bhava mahādevi sā me devahitaṃ kuru ||
2.3.6.50
tathā dattvā varaṃ te'haṃ gatā svaṃ padamādarāt |
samayaṃ prāpya tanayābhavaṃ te girikāmini ||
2.3.6.51
divyarūpaṃ dhṛtaṃ me'dya yatte matsmaraṇaṃ bhavet |
anyathā martyabhāvena tavājñānaṃ bhavenmayi ||
2.3.6.52
yuvāṃ māṃ putribhāvena divyabhāvena vāsakṛt |
cintayantau kṛtasnehau yātāstho madgatiṃ parām ||
2.3.6.53
devakāryaṃ kariṣyāmi līlāṃ kṛtvādbhutāṃ kṣitau |
śambhupatnī bhaviṣyāmi tārayiṣyāmi sajjanān ||
2.3.6.54
brahmovāca |
ityuktvāsīcchivā tūṣṇīmambikā svātmamāyayā |
paśyantyāṃ mātari prītyā sadyo'bhūttanayātanuḥ ||
2.3.6.54.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe pārvatījanmavarṇanaṃ nāma ṣaṣṭho'dhyāyaḥ ||
2.3.6.54.p2
śrīgaṇeśāya namaḥ ||
2.3.6.54.p3
śrīgaurīśaṅkarābhyāṃ namaḥ ||
2.3.6.54.p4
śrīśivamahāpurāṇam ||
2.3.6.54.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (3)
- Kālikāpurāṇa — Sanskrit
- Gaṇeśapurāṇa — Sanskrit
- Ṣaṭsandarbha — Jīva Gosvāmin 1555, Sanskrit