[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 2.3.6 # Shivapurana 2.3.6: ṣaṣṭho'dhyāyaḥ | pārvatijanmavarṇanam Śivapurāṇa (complete text) 2.3.6 - **Language:** Sanskrit ## Contents - [2.3.6.54](https://indike.org/pramana/in.purana.siva*complete-2.2.3.6.54) — 5 parts ### ṣaṣṭho'dhyāyaḥ | pārvatijanmavarṇanam ### [2.3.6.1](https://indike.org/pramana/in.purana.siva*complete-2.2.3.6.1) brahmovāca atha sasmaraturbhaktyā dampatī tau bhavāmbikām | prasūtihetave tatra devakāryārthamādarāt || ### [2.3.6.2](https://indike.org/pramana/in.purana.siva*complete-2.2.3.6.2) tataḥ sā caṇḍikā yogāttyaktadehā purā pituḥ | īhayā bhavituṃ bhūyaḥ samaicchad giridārataḥ || ### [2.3.6.3](https://indike.org/pramana/in.purana.siva*complete-2.2.3.6.3) satyaṃ vidhātuṃ svavacaḥ prasannākhilakāmadā | pūrṇāṃśācchailacitte sā viveśātha maheśvarī || ### [2.3.6.4](https://indike.org/pramana/in.purana.siva*complete-2.2.3.6.4) virarāja tataḥ so'ti pramado'pūrvasudyutiḥ | hutāśana ivādhṛṣyastejorāśirmahāmanāḥ || ### [2.3.6.5](https://indike.org/pramana/in.purana.siva*complete-2.2.3.6.5) tato giriḥ svapriyāyāṃ paripūrṇaṃ śivāṃśakam | samādhimatvātsamaye samadhatta suśaṅkare || ### [2.3.6.6](https://indike.org/pramana/in.purana.siva*complete-2.2.3.6.6) samadhatta gireḥ patnī garbhaṃ devyāḥ prasādataḥ | citte sthitāyāḥ karuṇākarāyāḥ sukhadaṃ gireḥ || ### [2.3.6.7](https://indike.org/pramana/in.purana.siva*complete-2.2.3.6.7) giripriyā sarvajagannivāsāsaṃśrayādhikam | vireje sutarāṃ menā tejomaṇḍalagā sadā || ### [2.3.6.8](https://indike.org/pramana/in.purana.siva*complete-2.2.3.6.8) sukhodayaṃ svabhartuśca menā daurhṛdalakṣaṇam | dadhau nidānaṃ devānāmānandasyepsitaṃ śubham || ### [2.3.6.9](https://indike.org/pramana/in.purana.siva*complete-2.2.3.6.9) dehasādādasampūrṇabhūṣaṇā lodhrasammukhā | svalpabhendukṣayekāsau viceṣyarkṣā vibhāvarī || ### [2.3.6.10](https://indike.org/pramana/in.purana.siva*complete-2.2.3.6.10) tadānanaṃ mṛtsurabhi nāyaṃ tṛptiṃ girīśvaraḥ | mune rahasyupāghrāya premādhikyaṃ babhūva tat || ### [2.3.6.11](https://indike.org/pramana/in.purana.siva*complete-2.2.3.6.11) menā spṛhāvatī keṣu na me śaṃsati vastuṣu | kiñcidiṣṭaṃ hriyāpṛcchadanuvelaṃ sakhīrgiriḥ || ### [2.3.6.12](https://indike.org/pramana/in.purana.siva*complete-2.2.3.6.12) upetya daurhṛdaṃ śailyaṃ yadvavre'paśyadāśu tat | ānītaṃ neṣṭamasyāddhā nāsādhyaṃ tridive'pi hi || ### [2.3.6.13](https://indike.org/pramana/in.purana.siva*complete-2.2.3.6.13) pracīyamānāvayavā nistīrya daurhṛdavyathām | reje menā bālalatā naddhapatrādhikā yathā || ### [2.3.6.14](https://indike.org/pramana/in.purana.siva*complete-2.2.3.6.14) giriḥ sagarbhāṃ mahiṣīmamaṃsta dharaṇīmiva | nidhānagarbhāmabhyantarlīnavahniśamīmiva || ### [2.3.6.15](https://indike.org/pramana/in.purana.siva*complete-2.2.3.6.15) priyāprīteśca manasaḥ svārjitadraviṇasya ca | samunnateḥ śruteḥ prājñaḥ kriyāścakre yathocitāḥ || ### [2.3.6.16](https://indike.org/pramana/in.purana.siva*complete-2.2.3.6.16) dadarśa kāle menāṃ sa pratītaḥ prasavonmukhīm | abhritāṃ ca divaṃ garbhagṛhe bhiṣagadhiṣṭhite || ### [2.3.6.17](https://indike.org/pramana/in.purana.siva*complete-2.2.3.6.17) dṛṣṭvā priyāṃ śubhāṅgīṃ vai mumodāti girīśvaraḥ | garbhasthajagadambāṃ hi mahātejovatīṃ tadā || ### [2.3.6.18](https://indike.org/pramana/in.purana.siva*complete-2.2.3.6.18) tasminnavasare devā mune viṣṇvādayastathā | munayaśca samāgamya garbhasthāṃ tuṣṭuvuḥ śivām || ### [2.3.6.19](https://indike.org/pramana/in.purana.siva*complete-2.2.3.6.19) devā ūcuḥ durge jaya jaya prājñe jagadamba maheśvari | satyavrate satyapare trisatye satyarūpiṇī || ### [2.3.6.20](https://indike.org/pramana/in.purana.siva*complete-2.2.3.6.20) satyasthe satyasuprīte satyayone ca satyataḥ | satyavaktre satyanetre prapannāḥ śaraṇaṃ ca te || ### [2.3.6.21](https://indike.org/pramana/in.purana.siva*complete-2.2.3.6.21) śivapriye maheśāni devaduḥkhakṣayaṅkari | trailokyamātā śarvāṇī vyāpinī bhaktavatsalā || ### [2.3.6.22](https://indike.org/pramana/in.purana.siva*complete-2.2.3.6.22) āvirbhūya trilokeśi devakāryaṃ kuruṣva ha | sanāthāḥ kṛpayā te hi vayaṃ sarve maheśvari || ### [2.3.6.23](https://indike.org/pramana/in.purana.siva*complete-2.2.3.6.23) tvattaḥ sarve ca sukhino labhante sukhamuttamam | tvāṃ vinā na hi kiñcidvai śobhate tribhaveṣvapi || ### [2.3.6.24](https://indike.org/pramana/in.purana.siva*complete-2.2.3.6.24) brahmovāca itthaṃ kṛtvā maheśānyā garbhasthāyā bahustutim | prasannamanaso devāḥ svaṃ svaṃ dhāma yayustadā || ### [2.3.6.25](https://indike.org/pramana/in.purana.siva*complete-2.2.3.6.25) vyatīte navame māse daśame māsi pūrṇataḥ | garbhasthā sā gatiṃ dadhre kālikā jagadambikā || ### [2.3.6.26](https://indike.org/pramana/in.purana.siva*complete-2.2.3.6.26) tadā susamayaścāsīcchāntabhagrahatārakaḥ | nabhaḥ prasannatāṃ yātaṃ prakāśaḥ sarvadikṣu hi || ### [2.3.6.27](https://indike.org/pramana/in.purana.siva*complete-2.2.3.6.27) mahī maṅgalabhūyiṣṭhā savanagrāmasāgarā | saraḥsravantīvāpīṣu puphulluḥ paṅkajāni vai || ### [2.3.6.28](https://indike.org/pramana/in.purana.siva*complete-2.2.3.6.28) vavuśca vividhā vātāḥ sukhasparśā munīśvara | mumuduḥ sādhavaḥ sarve'satāṃ duḥkhamabhūd drutam || ### [2.3.6.29](https://indike.org/pramana/in.purana.siva*complete-2.2.3.6.29) dundubhīnvādayāmāsurnabhasyāgatya nirjarāḥ | puṣpavṛṣṭirabhūttatra jagurgandharvasattamāḥ || ### [2.3.6.30](https://indike.org/pramana/in.purana.siva*complete-2.2.3.6.30) vidyādharastriyo vyomni nanṛtuścāpsarāstathā | tadotsavo mahānāsīddevādīnāṃ nabhaḥsthale || ### [2.3.6.31](https://indike.org/pramana/in.purana.siva*complete-2.2.3.6.31) tasminnavasare devī pūrvaśaktiḥ śivā satī | āvirbabhūva purato menāyā nijarūpataḥ || ### [2.3.6.32](https://indike.org/pramana/in.purana.siva*complete-2.2.3.6.32) vasantartau madhau māse navamyāṃ mṛgadhiṣṇyake | ardharātre samutpannā gaṅgeva śaśimaṇḍalāt || ### [2.3.6.33](https://indike.org/pramana/in.purana.siva*complete-2.2.3.6.33) samaye tatsvarūpeṇa menakājaṭharācchivā | samuddhūya samutpannā sā lakṣmīriva sāgarāt || ### [2.3.6.34](https://indike.org/pramana/in.purana.siva*complete-2.2.3.6.34) tatastasyāṃ tu jātāyāṃ prasanno'bhūttadā bhavaḥ | anukūlo vavau vāyurgambhīro gandhayuk śubhaḥ || ### [2.3.6.35](https://indike.org/pramana/in.purana.siva*complete-2.2.3.6.35) babhūva puṣpavṛṣṭiśca toyavṛṣṭipurassaram | jajvaluścāgnayaḥ śāntā jagarjuśca tadā ghanāḥ || ### [2.3.6.36](https://indike.org/pramana/in.purana.siva*complete-2.2.3.6.36) tasyāṃ tu jāyamānāyāṃ sarvasvaṃ samapadyata | himavannagare tatra sarvaṃ duḥkhaṃ kṣayaṃ gatam || ### [2.3.6.37](https://indike.org/pramana/in.purana.siva*complete-2.2.3.6.37) tasminnavasare tatra viṣṇvādyāḥ sakalāḥ surāḥ | ājagmuḥ sukhinaḥ prītyā dadṛśurjagadambikām || ### [2.3.6.38](https://indike.org/pramana/in.purana.siva*complete-2.2.3.6.38) tuṣṭuvustāṃ śivāmambāṃ kālikāṃ śivakāminīm | divyarūpāṃ mahāmāyāṃ śivalokanivāsinīm || ### [2.3.6.39](https://indike.org/pramana/in.purana.siva*complete-2.2.3.6.39) devā ūcuḥ jagadamba mahādevi sarvasiddhividhāyini | devakāryakarī tvaṃ hi sadātastvāṃ namāmahe || ### [2.3.6.40](https://indike.org/pramana/in.purana.siva*complete-2.2.3.6.40) sarvathā kuru kalyāṇaṃ devānāṃ bhaktavatsale | menāmanorathaḥ pūrṇaḥ kṛtaḥ kuru harasya ca || ### [2.3.6.41](https://indike.org/pramana/in.purana.siva*complete-2.2.3.6.41) brahmovāca itthaṃ stutvā śivāṃ devā viṣṇvādyāḥ supraṇamya tām | svaṃ svaṃ dhāma yayuḥ prītāḥ śaṃsantastadgatiṃ parām || ### [2.3.6.42](https://indike.org/pramana/in.purana.siva*complete-2.2.3.6.42) tāṃ tu dṛṣṭvā tathā jātāṃ nīlotpaladalaprabhāma | śyāmāṃ sā menakā devīṃ mudamāyāti nārada || ### [2.3.6.43](https://indike.org/pramana/in.purana.siva*complete-2.2.3.6.43) divyarūpaṃ vilokyānu jñānamāpa giripriyā | vijñāya parameśānīṃ tuṣṭāvātipraharṣitā || ### [2.3.6.44](https://indike.org/pramana/in.purana.siva*complete-2.2.3.6.44) menovāca jagadamba maheśāni kṛtātikaruṇā tvayā | āvirbhūtā mama puro vilasantī yadambike || ### [2.3.6.45](https://indike.org/pramana/in.purana.siva*complete-2.2.3.6.45) tvamādyā sarvaśaktīnāṃ trilokajananī śive | śivapriyā sadā devi sarvadevastutā parā || ### [2.3.6.46](https://indike.org/pramana/in.purana.siva*complete-2.2.3.6.46) kṛpāṃ kuru maheśāni mama dhyānasthitā bhava | etadrūpeṇa pratyakṣaṃ rūpaṃ dhehi sutāsamam || ### [2.3.6.47](https://indike.org/pramana/in.purana.siva*complete-2.2.3.6.47) brahmovāca ityākarṇya vacastasyā menāyā bhūdharastriyāḥ | pratyuvāca śivā devī suprasannā giripriyām || ### [2.3.6.48](https://indike.org/pramana/in.purana.siva*complete-2.2.3.6.48) devyuvāca he mene tvaṃ purā māṃ ca susevitavatī ratā | tvadbhaktyā suprasannāhaṃ varaṃ dātuṃ gatāntikam || ### [2.3.6.49](https://indike.org/pramana/in.purana.siva*complete-2.2.3.6.49) varaṃ brūhīti madvāṇīṃ śrutvā te tadvaro vṛtaḥ | sutā bhava mahādevi sā me devahitaṃ kuru || ### [2.3.6.50](https://indike.org/pramana/in.purana.siva*complete-2.2.3.6.50) tathā dattvā varaṃ te'haṃ gatā svaṃ padamādarāt | samayaṃ prāpya tanayābhavaṃ te girikāmini || ### [2.3.6.51](https://indike.org/pramana/in.purana.siva*complete-2.2.3.6.51) divyarūpaṃ dhṛtaṃ me'dya yatte matsmaraṇaṃ bhavet | anyathā martyabhāvena tavājñānaṃ bhavenmayi || ### [2.3.6.52](https://indike.org/pramana/in.purana.siva*complete-2.2.3.6.52) yuvāṃ māṃ putribhāvena divyabhāvena vāsakṛt | cintayantau kṛtasnehau yātāstho madgatiṃ parām || ### [2.3.6.53](https://indike.org/pramana/in.purana.siva*complete-2.2.3.6.53) devakāryaṃ kariṣyāmi līlāṃ kṛtvādbhutāṃ kṣitau | śambhupatnī bhaviṣyāmi tārayiṣyāmi sajjanān || ### [2.3.6.54](https://indike.org/pramana/in.purana.siva*complete-2.2.3.6.54) brahmovāca | ityuktvāsīcchivā tūṣṇīmambikā svātmamāyayā | paśyantyāṃ mātari prītyā sadyo'bhūttanayātanuḥ || ### [2.3.6.54.c1](https://indike.org/pramana/in.purana.siva*complete-2.2.3.6.54.c1) iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe pārvatījanmavarṇanaṃ nāma ṣaṣṭho'dhyāyaḥ || ### [2.3.6.54.p2](https://indike.org/pramana/in.purana.siva*complete-2.2.3.6.54.p2) śrīgaṇeśāya namaḥ || ### [2.3.6.54.p3](https://indike.org/pramana/in.purana.siva*complete-2.2.3.6.54.p3) śrīgaurīśaṅkarābhyāṃ namaḥ || ### [2.3.6.54.p4](https://indike.org/pramana/in.purana.siva*complete-2.2.3.6.54.p4) śrīśivamahāpurāṇam || ### [2.3.6.54.p5](https://indike.org/pramana/in.purana.siva*complete-2.2.3.6.54.p5) dvitīyāyāṃ rudrasaṃhitāyāṃ tṛtīyaḥ pārvatīkhaṇḍe ## Linked texts (3) - [Kālikāpurāṇa](https://indike.org/pramana/in.purana.upa.sakta.kalika.3.1570) — Sanskrit - [Gaṇeśapurāṇa](https://indike.org/pramana/in.purana.upa.surya.ganesa.2.82.19) — Sanskrit - [Ṣaṭsandarbha](https://indike.org/pramana/in.sampradaya.vaisnava.gaudiya.siddhanta.satsandarbha.1.19.40) — Jīva Gosvāmin 1555, Sanskrit --- Source: [https://indike.org/pramana/in.purana.siva*complete-2.2.3.6](https://indike.org/pramana/in.purana.siva*complete-2.2.3.6) · Pramāṇa