Shivapurana 2.3.7: saptamo'dhyāyaḥ | pārvatyā bālalīlā
Śivapurāṇa (complete text) 2.3.7
- Language
- Sanskrit
Contents
- 2.3.7.25 — 5 parts
saptamo'dhyāyaḥ | pārvatyā bālalīlā
2.3.7.1
brahmovāca |
tato menāpuraḥ sā vai sutā bhūtvā mahādyutiḥ |
cakāra rodanaṃ tatra laukikīṃ gatimāśritā ||
2.3.7.2
ariṣṭaśayyāṃ paritaḥ sadvisārisutejasā |
niśīthadīpā vihatatviṣa āsannaraṃ mune ||
2.3.7.3
śrutvā tad rodanaṃ ramyaṃ gṛhasthāḥ sarvayoṣitaḥ |
jahṛṣuḥ sambhramāttatrāgatāḥ prītipurassarāḥ ||
2.3.7.4
tacchuddhāntacaraḥ śīghraṃ śaśaṃsa bhūbhṛte tadā |
pārvatījanma sukhadaṃ devakāryakaraṃ śubham ||
2.3.7.5
tacchuddhāntaḥcarāyāśu putrījanma suśaṃsate |
sitātapatraṃ nādeyamāsīttasya mahībhṛtaḥ ||
2.3.7.6
gatastatra giriḥ prītyā sapurohitasadvijaḥ |
dadarśa tanayāṃ tāṃ tu śobhamānāṃ subhāsasā ||
2.3.7.7
nīlotpaladalaśyāmāṃ sudyutiṃ sumanoramām |
dṛṣṭvā ca tādṛśīṃ kanyāṃ mumodāti girīśvaraḥ ||
2.3.7.8
sarve ca mumudustatra paurāśca puruṣāḥ striyaḥ |
tadotsavo mahānāsīnnedurvādyāni bhūriśaḥ ||
2.3.7.9
babhūva maṅgalaṃ gānaṃ nanṛturvārayoṣitaḥ |
dānaṃ dadau dvijātibhyo jātakarma vidhāya ca ||
2.3.7.10
atha dvāraṃ samāgatya cakāra sumahotsavam |
himācalaḥ prasannātmā bhikṣubhyo draviṇaṃ dadau ||
2.3.7.11
atho śubhamuhūrte'smin himavānmunibhiḥ saha |
nāmākarotsutāyāstu kālītyādi sukhapradam ||
2.3.7.12
dānaṃ dadau tadā prītyā dvijebhyo bahu sādaram |
utsavaṃ kārayāmāsa vividhaṃ gānapūrvakam ||
2.3.7.13
itthaṃ kṛtvotsavaṃ bhūri kālīṃ paśyanmuhurmuhuḥ |
lebhe mudaṃ sapatnīko bahuputro'pi bhūdharaḥ ||
2.3.7.14
tatra sā vavṛdhe devī girirājagṛhe śivā |
gaṅgeva varṣāsamaye śaradīvātha candrikā ||
2.3.7.15
evaṃ sā kālikā devī cārvaṅgī cārudarśanā |
dadhre cānudinaṃ ramyāṃ candrabimbakalāmiva ||
2.3.7.16
kulocitena nāmnā tāṃ pārvatītyājuhāva ha |
bandhupriyāṃ bandhujanaḥ sauśīlyaguṇasaṃyutām ||
2.3.7.17
umeti mātrā tapase niṣiddhā kālikā ca sā |
paścādumākhyāṃ sumukhī jagāma bhuvane mune ||
2.3.7.18
dṛṣṭiḥ putravato'pyadrestasmiṃstṛptiṃ jagāma na |
apatye pārvatītyākhye sarvasaubhāgyasaṃyute ||
2.3.7.19
madhoranantapuṣpasya cūte hi bhramarāvaliḥ |
viśeṣasaṅgā bhavati sahakāre munīśvara ||
2.3.7.20
pūto vibhūṣitaścāpi sa babhūva tayā giriḥ |
saṃskāravatyaiva girā manīṣīva himālayaḥ ||
2.3.7.21
prabhāmahatyā śikhayeva dīpo bhavanasya ca |
trimārgayeva sanmārgastadvad girijayā giriḥ ||
2.3.7.22
kandukaiḥ kṛtrimaiḥ putraiḥ sakhīmadhyagatā ca sā |
gaṅgāsaikatavedībhirbālye reme muhurmuhuḥ ||
2.3.7.23
atha devī śivā sā copadeśasamaye mune |
papāṭha vidyāḥ suprītyā yatacittā ca sadguroḥ ||
2.3.7.24
prāktanā janmavidyāstāṃ śaradīva prapedire |
haṃsāliḥ svarṇadīṃ naktamātmabhāso mahauṣadhim ||
2.3.7.25
itthaṃ suvarṇitā līlā śivāyāḥ kācideva hi |
anyalīlāṃ pravakṣye'haṃ śṛṇu tvaṃ premato mune ||
2.3.7.25.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe pārvatībālyalīlāvarṇanaṃ nāma saptamo'dhyāyaḥ ||
2.3.7.25.p2
śrīgaṇeśāya namaḥ ||
2.3.7.25.p3
śrīgaurīśaṅkarābhyāṃ namaḥ ||
2.3.7.25.p4
śrīśivamahāpurāṇam ||
2.3.7.25.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe
Linked texts (1)
- Kālikāpurāṇa — Sanskrit