[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 2.3.7 # Shivapurana 2.3.7: saptamo'dhyāyaḥ | pārvatyā bālalīlā Śivapurāṇa (complete text) 2.3.7 - **Language:** Sanskrit ## Contents - [2.3.7.25](https://indike.org/pramana/in.purana.siva*complete-2.2.3.7.25) — 5 parts ### saptamo'dhyāyaḥ | pārvatyā bālalīlā ### [2.3.7.1](https://indike.org/pramana/in.purana.siva*complete-2.2.3.7.1) brahmovāca | tato menāpuraḥ sā vai sutā bhūtvā mahādyutiḥ | cakāra rodanaṃ tatra laukikīṃ gatimāśritā || ### [2.3.7.2](https://indike.org/pramana/in.purana.siva*complete-2.2.3.7.2) ariṣṭaśayyāṃ paritaḥ sadvisārisutejasā | niśīthadīpā vihatatviṣa āsannaraṃ mune || ### [2.3.7.3](https://indike.org/pramana/in.purana.siva*complete-2.2.3.7.3) śrutvā tad rodanaṃ ramyaṃ gṛhasthāḥ sarvayoṣitaḥ | jahṛṣuḥ sambhramāttatrāgatāḥ prītipurassarāḥ || ### [2.3.7.4](https://indike.org/pramana/in.purana.siva*complete-2.2.3.7.4) tacchuddhāntacaraḥ śīghraṃ śaśaṃsa bhūbhṛte tadā | pārvatījanma sukhadaṃ devakāryakaraṃ śubham || ### [2.3.7.5](https://indike.org/pramana/in.purana.siva*complete-2.2.3.7.5) tacchuddhāntaḥcarāyāśu putrījanma suśaṃsate | sitātapatraṃ nādeyamāsīttasya mahībhṛtaḥ || ### [2.3.7.6](https://indike.org/pramana/in.purana.siva*complete-2.2.3.7.6) gatastatra giriḥ prītyā sapurohitasadvijaḥ | dadarśa tanayāṃ tāṃ tu śobhamānāṃ subhāsasā || ### [2.3.7.7](https://indike.org/pramana/in.purana.siva*complete-2.2.3.7.7) nīlotpaladalaśyāmāṃ sudyutiṃ sumanoramām | dṛṣṭvā ca tādṛśīṃ kanyāṃ mumodāti girīśvaraḥ || ### [2.3.7.8](https://indike.org/pramana/in.purana.siva*complete-2.2.3.7.8) sarve ca mumudustatra paurāśca puruṣāḥ striyaḥ | tadotsavo mahānāsīnnedurvādyāni bhūriśaḥ || ### [2.3.7.9](https://indike.org/pramana/in.purana.siva*complete-2.2.3.7.9) babhūva maṅgalaṃ gānaṃ nanṛturvārayoṣitaḥ | dānaṃ dadau dvijātibhyo jātakarma vidhāya ca || ### [2.3.7.10](https://indike.org/pramana/in.purana.siva*complete-2.2.3.7.10) atha dvāraṃ samāgatya cakāra sumahotsavam | himācalaḥ prasannātmā bhikṣubhyo draviṇaṃ dadau || ### [2.3.7.11](https://indike.org/pramana/in.purana.siva*complete-2.2.3.7.11) atho śubhamuhūrte'smin himavānmunibhiḥ saha | nāmākarotsutāyāstu kālītyādi sukhapradam || ### [2.3.7.12](https://indike.org/pramana/in.purana.siva*complete-2.2.3.7.12) dānaṃ dadau tadā prītyā dvijebhyo bahu sādaram | utsavaṃ kārayāmāsa vividhaṃ gānapūrvakam || ### [2.3.7.13](https://indike.org/pramana/in.purana.siva*complete-2.2.3.7.13) itthaṃ kṛtvotsavaṃ bhūri kālīṃ paśyanmuhurmuhuḥ | lebhe mudaṃ sapatnīko bahuputro'pi bhūdharaḥ || ### [2.3.7.14](https://indike.org/pramana/in.purana.siva*complete-2.2.3.7.14) tatra sā vavṛdhe devī girirājagṛhe śivā | gaṅgeva varṣāsamaye śaradīvātha candrikā || ### [2.3.7.15](https://indike.org/pramana/in.purana.siva*complete-2.2.3.7.15) evaṃ sā kālikā devī cārvaṅgī cārudarśanā | dadhre cānudinaṃ ramyāṃ candrabimbakalāmiva || ### [2.3.7.16](https://indike.org/pramana/in.purana.siva*complete-2.2.3.7.16) kulocitena nāmnā tāṃ pārvatītyājuhāva ha | bandhupriyāṃ bandhujanaḥ sauśīlyaguṇasaṃyutām || ### [2.3.7.17](https://indike.org/pramana/in.purana.siva*complete-2.2.3.7.17) umeti mātrā tapase niṣiddhā kālikā ca sā | paścādumākhyāṃ sumukhī jagāma bhuvane mune || ### [2.3.7.18](https://indike.org/pramana/in.purana.siva*complete-2.2.3.7.18) dṛṣṭiḥ putravato'pyadrestasmiṃstṛptiṃ jagāma na | apatye pārvatītyākhye sarvasaubhāgyasaṃyute || ### [2.3.7.19](https://indike.org/pramana/in.purana.siva*complete-2.2.3.7.19) madhoranantapuṣpasya cūte hi bhramarāvaliḥ | viśeṣasaṅgā bhavati sahakāre munīśvara || ### [2.3.7.20](https://indike.org/pramana/in.purana.siva*complete-2.2.3.7.20) pūto vibhūṣitaścāpi sa babhūva tayā giriḥ | saṃskāravatyaiva girā manīṣīva himālayaḥ || ### [2.3.7.21](https://indike.org/pramana/in.purana.siva*complete-2.2.3.7.21) prabhāmahatyā śikhayeva dīpo bhavanasya ca | trimārgayeva sanmārgastadvad girijayā giriḥ || ### [2.3.7.22](https://indike.org/pramana/in.purana.siva*complete-2.2.3.7.22) kandukaiḥ kṛtrimaiḥ putraiḥ sakhīmadhyagatā ca sā | gaṅgāsaikatavedībhirbālye reme muhurmuhuḥ || ### [2.3.7.23](https://indike.org/pramana/in.purana.siva*complete-2.2.3.7.23) atha devī śivā sā copadeśasamaye mune | papāṭha vidyāḥ suprītyā yatacittā ca sadguroḥ || ### [2.3.7.24](https://indike.org/pramana/in.purana.siva*complete-2.2.3.7.24) prāktanā janmavidyāstāṃ śaradīva prapedire | haṃsāliḥ svarṇadīṃ naktamātmabhāso mahauṣadhim || ### [2.3.7.25](https://indike.org/pramana/in.purana.siva*complete-2.2.3.7.25) itthaṃ suvarṇitā līlā śivāyāḥ kācideva hi | anyalīlāṃ pravakṣye'haṃ śṛṇu tvaṃ premato mune || ### [2.3.7.25.c1](https://indike.org/pramana/in.purana.siva*complete-2.2.3.7.25.c1) iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe pārvatībālyalīlāvarṇanaṃ nāma saptamo'dhyāyaḥ || ### [2.3.7.25.p2](https://indike.org/pramana/in.purana.siva*complete-2.2.3.7.25.p2) śrīgaṇeśāya namaḥ || ### [2.3.7.25.p3](https://indike.org/pramana/in.purana.siva*complete-2.2.3.7.25.p3) śrīgaurīśaṅkarābhyāṃ namaḥ || ### [2.3.7.25.p4](https://indike.org/pramana/in.purana.siva*complete-2.2.3.7.25.p4) śrīśivamahāpurāṇam || ### [2.3.7.25.p5](https://indike.org/pramana/in.purana.siva*complete-2.2.3.7.25.p5) dvitīyāyāṃ rudrasaṃhitāyāṃ tṛtīyaḥ pārvatīkhaṇḍe ## Linked texts (1) - [Kālikāpurāṇa](https://indike.org/pramana/in.purana.upa.sakta.kalika.3.1578) — Sanskrit --- Source: [https://indike.org/pramana/in.purana.siva*complete-2.2.3.7](https://indike.org/pramana/in.purana.siva*complete-2.2.3.7) · Pramāṇa