[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Śivapurāṇa](https://indike.org/pramana/in.purana.siva) › [Shivapurana (complete text)](https://indike.org/pramana/in.purana.siva*complete-2) › 2.3.8 # Shivapurana 2.3.8: aṣṭamo'dhyāyaḥ | nāradahimālayasaṃvādaḥ Śivapurāṇa (complete text) 2.3.8 - **Language:** Sanskrit ## Contents - [2.3.8.56](https://indike.org/pramana/in.purana.siva*complete-2.2.3.8.56) — 5 parts ### aṣṭamo'dhyāyaḥ | nāradahimālayasaṃvādaḥ ### [2.3.8.1](https://indike.org/pramana/in.purana.siva*complete-2.2.3.8.1) brahmovāca | ekadā tvaṃ śivajñānī śivalīlāvidāṃ varaḥ | himācalagṛhaṃ prītyāgamastvaṃ śivapreritaḥ || ### [2.3.8.2](https://indike.org/pramana/in.purana.siva*complete-2.2.3.8.2) dṛṣṭvā mune girīśastvāṃ natvānarca sa nārada | āhūya ca svatanayāṃ tvadaṅghryostāmapātayat || ### [2.3.8.3](https://indike.org/pramana/in.purana.siva*complete-2.2.3.8.3) punarnatvā munīśa tvāmuvāca himabhūdharaḥ | sāñjaliḥ svavidhiṃ matvā bahusannatamastakaḥ || ### [2.3.8.4](https://indike.org/pramana/in.purana.siva*complete-2.2.3.8.4) himālaya uvāca | he mune nārada jñāninbrahmaputravara prabho | sarvajñastvaṃ sakaruṇaḥ paropakaraṇe rataḥ || ### [2.3.8.5](https://indike.org/pramana/in.purana.siva*complete-2.2.3.8.5) matsutājātakaṃ brūhi guṇadoṣasamudbhavam | kasya priyā bhāgyavatī bhaviṣyati sutā mama || ### [2.3.8.6](https://indike.org/pramana/in.purana.siva*complete-2.2.3.8.6) brahmovāca | ityukto munivarya tvaṃ girīśena himādriṇā | vilokya kālikāhastaṃ sarvāṅgaṃ ca viśeṣataḥ || ### [2.3.8.7](https://indike.org/pramana/in.purana.siva*complete-2.2.3.8.7) avocastvaṃ giriṃ tāta kautukī vāgviśāradaḥ | jñānī viditavṛttānto nāradaḥ prītamānasaḥ || ### [2.3.8.8](https://indike.org/pramana/in.purana.siva*complete-2.2.3.8.8) nārada uvāca | eṣā te tanayā mene sudhāṃśoriva vardhitā | ādyā kalā śailarāja sarvalakṣaṇaśālinī || ### [2.3.8.9](https://indike.org/pramana/in.purana.siva*complete-2.2.3.8.9) svapateḥ sukhadātyantaṃ pitroḥ kīrtivivardhinī | mahāsādhvī ca sarvāsu mahānandakarī sadā || ### [2.3.8.10](https://indike.org/pramana/in.purana.siva*complete-2.2.3.8.10) sulakṣaṇāni sarvāṇi tvatsutāyāḥ kare gire | ekā vilakṣaṇā rekhā tatphalaṃ śṛṇu tattvataḥ || ### [2.3.8.11](https://indike.org/pramana/in.purana.siva*complete-2.2.3.8.11) yogī nagno'guṇo'kāmī mātṛtātavivarjitaḥ | amāno'śivaveṣaśca patirasyāḥ kiledṛśaḥ || ### [2.3.8.12](https://indike.org/pramana/in.purana.siva*complete-2.2.3.8.12) brahmovāca | ityākarṇya vacaste hi satyaṃ matvā ca dampatī | menā himācalaścāpi duḥkhitau tau babhūvatuḥ || ### [2.3.8.13](https://indike.org/pramana/in.purana.siva*complete-2.2.3.8.13) śivākarṇyavacaste hi tādṛśaṃ jagadambikā | lakṣaṇaistaṃ śivaṃ matvā jaharṣāti mune hṛdi || ### [2.3.8.14](https://indike.org/pramana/in.purana.siva*complete-2.2.3.8.14) na mṛṣā nāradavacastviti sañcintya sā śivā | snehaṃ śivapadadvandve cakārāti hṛdā tadā || ### [2.3.8.15](https://indike.org/pramana/in.purana.siva*complete-2.2.3.8.15) uvāca dukhitaḥ śailastvāṃ tadā hṛdi nārada | kamupāyaṃ mune kuryāmatiduḥkhamabhūditi || ### [2.3.8.16](https://indike.org/pramana/in.purana.siva*complete-2.2.3.8.16) tacchrutvā tvaṃ mune prāttha mahākautukakārakaḥ | himācalaṃ śubhairvākyairharṣayanvāgviśāradaḥ || ### [2.3.8.17](https://indike.org/pramana/in.purana.siva*complete-2.2.3.8.17) nārada uvāca | snehācchṛṇu gire vākyaṃ mama satyaṃ mṛṣā na hi | kararekhā brahmalipirna mṛṣā bhavati dhruvam || ### [2.3.8.18](https://indike.org/pramana/in.purana.siva*complete-2.2.3.8.18) tādṛśo'syāḥ patiḥ śaila bhaviṣyati na saṃśayaḥ | tatropāyaṃ śṛṇu prītyā yaṃ kṛtvā lapsyase sukham || ### [2.3.8.19](https://indike.org/pramana/in.purana.siva*complete-2.2.3.8.19) tādṛśo'sti varaḥ śambhuḥ līlārūpadharaḥ prabhuḥ | kulakṣaṇāni sarvāṇi tatra tulyāni sadguṇaiḥ || ### [2.3.8.20](https://indike.org/pramana/in.purana.siva*complete-2.2.3.8.20) prabhau doṣo na duḥkhāya duḥkhado'tyaprabhau hi saḥ | ravipāvakagaṅgānāṃ tatra jñeyā nidarśanā || ### [2.3.8.21](https://indike.org/pramana/in.purana.siva*complete-2.2.3.8.21) tasmācchivāya kanyāṃ svāṃ śivāṃ dehi vivekataḥ | śivaḥ sarveśvaraḥ sevyo'vikārī prabhuravyayaḥ || ### [2.3.8.22](https://indike.org/pramana/in.purana.siva*complete-2.2.3.8.22) śīghraprasādaḥ sa śivaḥ tāṃ grahīṣyatyasaṃśayam | tapaḥsādhyo viśeṣeṇa yadi kuryācchivā tapaḥ || ### [2.3.8.23](https://indike.org/pramana/in.purana.siva*complete-2.2.3.8.23) sarvathā susamartho hi sa śivaḥ sakaleśvaraḥ | kuliśasyāpi vidhvaṃsī brahmādhīnaḥ sukhapradaḥ || ### [2.3.8.24](https://indike.org/pramana/in.purana.siva*complete-2.2.3.8.24) brahmovāca ityuktvā tvaṃ punastāta kautukī brahmavinmune | śailarājamavoco hi harṣayanvacanaiḥ śubhaiḥ || ### [2.3.8.25](https://indike.org/pramana/in.purana.siva*complete-2.2.3.8.25) bhāvinī dayitā śambhoḥ sānukūlā sadā hare | mahāsādhvī suvratā ca pitroḥ sukhavivardhinī || ### [2.3.8.26](https://indike.org/pramana/in.purana.siva*complete-2.2.3.8.26) śambhościttaṃ vaśe caiṣā kariṣyati tapasvinī | sa cāpyenāmṛte yoṣāṃ na hyanyāmudvahiṣyati || ### [2.3.8.27](https://indike.org/pramana/in.purana.siva*complete-2.2.3.8.27) etayoḥ sadṛśaṃ prema na kasyāpyeva tādṛśam | bhūtaṃ vā bhavitā vāpi nādhunā ca pravartate || ### [2.3.8.28](https://indike.org/pramana/in.purana.siva*complete-2.2.3.8.28) anayoḥ surakāryāṇi kartavyāni mṛtāni ca | yāni yāni nagaśreṣṭha jīvitāni punaḥ punaḥ || ### [2.3.8.29](https://indike.org/pramana/in.purana.siva*complete-2.2.3.8.29) anayā kanyayā te'dre ardhanārīśvaro haraḥ | bhaviṣyati tathā harṣadinayormilitaṃ punaḥ || ### [2.3.8.30](https://indike.org/pramana/in.purana.siva*complete-2.2.3.8.30) śarīrārdhaṃ harasyaiṣā hariṣyati sutā tava | tapaḥ prabhāvātsantoṣya maheśaṃ sakaleśvaram || ### [2.3.8.31](https://indike.org/pramana/in.purana.siva*complete-2.2.3.8.31) svarṇagaurī suvarṇābhā tapasā toṣya taṃ haram | vidyudgauratamā ceyaṃ tava putrī bhaviṣyati || ### [2.3.8.32](https://indike.org/pramana/in.purana.siva*complete-2.2.3.8.32) gaurīti nāmnā kanyā tu khyātimeṣā gamiṣyati | sarvadevagaṇaiḥ pūjyā haribrahmādibhistathā || ### [2.3.8.33](https://indike.org/pramana/in.purana.siva*complete-2.2.3.8.33) nānyasmai tvamimāṃ dātumihārhasi nagottama | idaṃ copāṃśu devānāṃ na prakāśyaṃ kadācana || ### [2.3.8.34](https://indike.org/pramana/in.purana.siva*complete-2.2.3.8.34) brahmovāca iti tasya vacaḥ śrutvā devarṣe tava nārada | uvāca himavānvākyaṃ mune tvāṃ vāgviśāradaḥ || ### [2.3.8.35](https://indike.org/pramana/in.purana.siva*complete-2.2.3.8.35) himālaya uvāca he mune nārada prājña vijñaptiṃ kāñcideva hi | karomi tāṃ śṛṇu prītyātastvaṃ pramudamāvaha || ### [2.3.8.36](https://indike.org/pramana/in.purana.siva*complete-2.2.3.8.36) śrūyate tyaktasaṅgaḥ sa mahādevo yatātmavān | tapaścarati sannityaṃ devānāmapyagocaraḥ || ### [2.3.8.37](https://indike.org/pramana/in.purana.siva*complete-2.2.3.8.37) sa kathaṃ dhyānamārgasthaḥ parabrahmārpitaṃ manaḥ | bhraṃśayiṣyati devarṣe tatra me saṃśayo mahān || ### [2.3.8.38](https://indike.org/pramana/in.purana.siva*complete-2.2.3.8.38) akṣaraṃ paramaṃ brahma pradīpakalikopamam | sadāśivākhyaṃ svaṃ rūpaṃ nirvikāramajātparam || ### [2.3.8.39](https://indike.org/pramana/in.purana.siva*complete-2.2.3.8.39) nirguṇaṃ saguṇaṃ tacca nirviśeṣaṃ nirīhakam | ataḥ paśyati sarvatra na tu bāhyaṃ nirīkṣate || ### [2.3.8.40](https://indike.org/pramana/in.purana.siva*complete-2.2.3.8.40) iti sa śrūyate nityaṃ kinnarāṇāṃ mukhānmune | ihāgatānāṃ suprītyā kiṃ tanmithyāvaco dhruvam || ### [2.3.8.41](https://indike.org/pramana/in.purana.siva*complete-2.2.3.8.41) viśeṣataḥ śrūyate sa sākṣānnāmnā tathā haraḥ | samayaṃ kṛtavānpūrvaṃ tanmayā gaditaṃ śṛṇu || ### [2.3.8.42](https://indike.org/pramana/in.purana.siva*complete-2.2.3.8.42) na tvāmṛte'nyāṃ varaye dākṣāyaṇi satī priye | bhāryārthaṃ na grahīṣyāmi satyametadbravīmi te || ### [2.3.8.43](https://indike.org/pramana/in.purana.siva*complete-2.2.3.8.43) iti satyā samaṃ tena puraiva samayaḥ kṛtaḥ | tasyāṃ mṛtāyāṃ sa kathaṃ svayamanyāṃ grahīṣyati || ### [2.3.8.44](https://indike.org/pramana/in.purana.siva*complete-2.2.3.8.44) brahmovāca ityuktvā sa giristūṣṇīmāsa tasya purastava | tadākarṇyātha devarṣe tvaṃ prāvocaḥ sutattvataḥ || ### [2.3.8.45](https://indike.org/pramana/in.purana.siva*complete-2.2.3.8.45) nārada uvāca na vai kāryā tvayā cintā girirāja mahāmate | eṣā tava sutā kālī dakṣajā hyabhavatpurā || ### [2.3.8.46](https://indike.org/pramana/in.purana.siva*complete-2.2.3.8.46) satīnāmābhavattasyāḥ sarvamaṅgaladaṃ sadā | satī sā vai dakṣakanyā bhūtvā rudrapriyābhavat || ### [2.3.8.47](https://indike.org/pramana/in.purana.siva*complete-2.2.3.8.47) pituryajñe tathā prāpyānādaraṃ śaṅkarasya ca | taṃ dṛṣṭvā kopamādhāyātyākṣīddehaṃ ca sā satī || ### [2.3.8.48](https://indike.org/pramana/in.purana.siva*complete-2.2.3.8.48) punaḥsaiva samutpannā tava gehe'mbikā śivā | pārvatī harapatnīyaṃ bhaviṣyati na saṃśayaḥ || ### [2.3.8.49](https://indike.org/pramana/in.purana.siva*complete-2.2.3.8.49) etatsarvaṃ vistarāttvaṃ proktavānbhūbhṛte mune | pūrvarūpaṃ caritraṃ ca pārvatyāḥ prītivardhanam || ### [2.3.8.50](https://indike.org/pramana/in.purana.siva*complete-2.2.3.8.50) taṃ sarvaṃ pūrvavṛttāntaṃ kālyā munimukhādgiriḥ | śrutvā saputradāraḥ sa tadā niḥsaṃśayo'bhavat || ### [2.3.8.51](https://indike.org/pramana/in.purana.siva*complete-2.2.3.8.51) tataḥ kālī kathāṃ śrutvā nāradasya mukhāttadā | lajjayādhomukhī bhūtvā smitavistāritānanā || ### [2.3.8.52](https://indike.org/pramana/in.purana.siva*complete-2.2.3.8.52) kareṇa tāṃ tu saṃspṛśya śrutvā taccaritaṃ giriḥ | mūrdhni śaśvattathāghrāya svāsanānte nyaveśayat || ### [2.3.8.53](https://indike.org/pramana/in.purana.siva*complete-2.2.3.8.53) tatastvaṃ tāṃ punardṛṣṭvā'vocastatra sthitāṃ mune | harṣayan girirājaṃ ca menakāṃ tanayaiḥ saha || ### [2.3.8.54](https://indike.org/pramana/in.purana.siva*complete-2.2.3.8.54) siṃhāsanaṃ tu kintvasyāḥ śailarāja bhavedataḥ | śambhorūrau sadaitasyā āsanaṃ tu bhaviṣyati || ### [2.3.8.55](https://indike.org/pramana/in.purana.siva*complete-2.2.3.8.55) harerūrvāsanaṃ prāpya tanayā tava santatam | na yatra kasyacid dṛṣṭirmānasaṃ vā gamiṣyati || ### [2.3.8.56](https://indike.org/pramana/in.purana.siva*complete-2.2.3.8.56) brahmovāca iti vacanamudāraṃ nārada tvaṃ girīśaṃ tridivamagama uktvā tatkṣaṇādeva prītyā | giripatirapi citte cārusammodayuktaḥ svagṛhamagamadevaṃ sarvasampatsamṛddham || ### [2.3.8.56.c1](https://indike.org/pramana/in.purana.siva*complete-2.2.3.8.56.c1) iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe nāradahimālayasaṃvādavarṇanaṃ nāmāṣṭamo'dhyāyaḥ || ### [2.3.8.56.p2](https://indike.org/pramana/in.purana.siva*complete-2.2.3.8.56.p2) śrīgaṇeśāya namaḥ || ### [2.3.8.56.p3](https://indike.org/pramana/in.purana.siva*complete-2.2.3.8.56.p3) śrīgaurīśaṅkarābhyāṃ namaḥ || ### [2.3.8.56.p4](https://indike.org/pramana/in.purana.siva*complete-2.2.3.8.56.p4) śrīśivamahāpurāṇam || ### [2.3.8.56.p5](https://indike.org/pramana/in.purana.siva*complete-2.2.3.8.56.p5) dvitīyāyāṃ rudrasaṃhitāyāṃ tṛtīyaḥ pārvatīkhaṇḍe ## Linked texts (1) - [Kālikāpurāṇa](https://indike.org/pramana/in.purana.upa.sakta.kalika.3.1592) — Sanskrit --- Source: [https://indike.org/pramana/in.purana.siva*complete-2.2.3.8](https://indike.org/pramana/in.purana.siva*complete-2.2.3.8) · Pramāṇa