Shivapurana 2.3.9: navamo'dhyāyaḥ | pitroḥ pārvatyai śivārādhānopadeśaḥ tasyāḥ svapne śivasyāvirbhāvaśca
Śivapurāṇa (complete text) 2.3.9
- Language
- Sanskrit
Contents
- 2.3.9.36 — 5 parts
navamo'dhyāyaḥ | pitroḥ pārvatyai śivārādhānopadeśaḥ tasyāḥ svapne śivasyāvirbhāvaśca
2.3.9.1
nārada uvāca |
vidhe tāta tvayā śaivavara prājñādbhutā kathā |
varṇitā karuṇāṃ kṛtvā prītirme vardhitādhikā ||
2.3.9.2
vidhe gate svakaṃ dhāma mayi vai divyadarśane |
tataḥ kimabhavattāta kṛpayā tadvadādhunā ||
2.3.9.3
brahmovāca gate tvayi mune svarge kiyatkāle gate sati |
menā prāpyaikadā śailanikaṭaṃ praṇanāma sā ||
2.3.9.4
sthitvā savinayaṃ prāha svanāthaṃ girikāminī |
tatra śailādhināthaṃ sā prāṇapriyasutā satī ||
2.3.9.5
menovāca munivākyaṃ na buddhaṃ me samyaṅnārīsvabhāvataḥ |
vivāhaṃ kuru kanyāyāḥsundareṇa vareṇa ha ||
2.3.9.6
sarvathā hi bhavettatrodvāho'pūrvasukhāvahaḥ |
varaśca girijāyāstu sulakṣaṇakulodbhavaḥ ||
2.3.9.7
prāṇapriyā sutā me hi sukhitā syādyathā priyā |
sadvaraṃ prāpya suprītā tathā kuru namo'stu te ||
2.3.9.8
brahmovāca ityuktvāśrumukhī menā patyaṅghryoḥ patitā tadā |
tāmutthāpya giriḥ prāha yathāvatprājñasattamaḥ ||
2.3.9.9
himālaya uvāca |
śṛṇu tvaṃ menake devi yathārthaṃ vacmi tattvataḥ |
bhramaṃ tyaja munervākyaṃ vitathaṃ na kadācana ||
2.3.9.10
yadi snehaḥ sutāyāste sutāṃ śikṣaya sādaram |
tapaḥ kuryācchaṅkarasya sā bhaktyā sthiracetasā ||
2.3.9.11
cetprasannaḥ śivaḥ kālyāḥ pāṇiṃ gṛhṇāti menake |
sarvaṃ bhūyācchubhaṃ naśyennāradoktamamaṅgalam ||
2.3.9.12
amaṅgalāni sarvāṇi maṅgalāni sadā śive |
tasmātsutāṃ śivaprāptyai tapase śikṣaya drutam ||
2.3.9.13
brahmovāca |
ityākarṇya girervākyaṃ menā prītatarābhavat |
sutopakaṇṭhamagamadupadeṣṭuṃ taporucim ||
2.3.9.14
sutāṅgaṃ sukumāraṃ hi dṛṣṭvātīvātha menakā |
vivyathe netrayugme cāśrupūrṇe'bhavatāṃ drutam ||
2.3.9.15
sutāṃ samupadeṣṭuṃ tanna śaśāka giripriyā |
bubudhe pārvatī tadvai jananīṅgitamāśu sā ||
2.3.9.16
atha sā kālikā devī sarvajñā parameśvarī |
uvāca jananīṃ sadyaḥ samāśvāsya punaḥ punaḥ ||
2.3.9.17
pārvatyuvāca |
mātaḥ śṛṇu mahāprājñe'dyatane'jamuhūrtake |
rātrau dṛṣṭo mayā svapnastaṃ vadāmi kṛpāṃ kuru ||
2.3.9.18
vipraścaiva tapasvī māṃ sadayaḥ prītipūrvakam |
upādideśa sutapaḥ kartuṃ mātaḥ śivasya vai ||
2.3.9.19
brahmovāca |
tacchrutvā menakā śīghraṃ patimāhūya tatra ca |
tatsvapnaṃ kathayāmāsa sutādṛṣṭamaśeṣataḥ ||
2.3.9.20
sutāsvapnamathākarṇya menakāto girīśvaraḥ |
uvāca paramaprītaḥ priyāṃ sambodhayangirā ||
2.3.9.21
girīśvara uvāca
he priye'pararātrānte svapno dṛṣṭo mayāpi hi |
taṃ śṛṇu tvaṃ mahāprītyā vacmyahaṃ taṃ samādarāt ||
2.3.9.22
ekastapasvī paramo nāradoktavarāṅgadhṛk |
puropakaṇṭhaṃ suprītyā tapaḥ kartuṃ samāgataḥ ||
2.3.9.23
gṛhītvā svasutāṃ tatrāgamaṃ prītataro'pyaham |
mayā jñātaḥ sa vai śambhurnāradoktavaraḥ prabhuḥ ||
2.3.9.24
sevārthaṃ tasya tanayāmupadiśya tapasvinaḥ |
taṃ vai prārthitavāṃstasyāṃ na tadāṅgīcakāra saḥ ||
2.3.9.25
abhūdvivādaḥ sumahānsāṅkhyavedāntasammataḥ |
tatastadājñayā tatra saṃsthitāsītsutā mama ||
2.3.9.26
nidhāya hṛdi taṃ kāmaṃ siṣeve bhaktitaśca sā |
iti dṛṣṭaṃ mayā svapnaṃ proktavāṃste varānane ||
2.3.9.27
tato mene kiyatkālaṃ parīkṣyaṃ tatphalaṃ priye |
yogyamastīdameveha budhyasva tvaṃ mama dhruvam ||
2.3.9.28
brahmovāca ityuktvā girirājaśca menakā vai munīśvara |
santasthatuḥ parīkṣantau tatphalaṃ śuddhacetasau ||
2.3.9.29
itthaṃ vyatīte'lpadine parameśaḥ satāṃ gatiḥ |
satīvirahasuvyagro bhramansarvatra sūtikṛt ||
2.3.9.30
tatrājagāma suprītyā kiyadgaṇayutaḥ prabhuḥ |
tapaḥ kartuṃ satīpremavirahākulamānasaḥ ||
2.3.9.31
tapaścakāra svaṃ tatra pārvatī sevane ratā |
sakhībhyāṃ sahitā nityaṃ prasannārthamabhūttadā ||
2.3.9.32
viddho'pi mārgaṇaiḥ śambhurvikṛtiṃ nāpa sa prabhuḥ |
preṣitena suraiḥ svātmamohanārthaṃ smareṇa vai ||
2.3.9.33
dagdhvā smaraṃ ca tatraiva svavahninayanena saḥ |
smṛtvā mama vacaḥ kruddho mahyamantardadhe tataḥ ||
2.3.9.34
tataḥ kālena kiyatā vināśya girijāmadam |
prasāditaḥ sutapasā prasanno'bhūnmaheśvaraḥ ||
2.3.9.35
laukikācāramāśritya rudro viṣṇuprasāditaḥ |
kālīṃ vivāhayāmāsa tato'bhūdbahumaṅgalam ||
2.3.9.36
ityetatkathitaṃ tāta samāsāccaritaṃ vibhoḥ |
śaṅkarasya paraṃ divyaṃ kiṃ bhūyaḥ śrotumicchasi ||
2.3.9.36.c1
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe svapnavarṇanapūrvakaṃ saṅkṣepaśivacaritavarṇanaṃ nāma navamo'dhyāyaḥ ||
2.3.9.36.p2
śrīgaṇeśāya namaḥ ||
2.3.9.36.p3
śrīgaurīśaṅkarābhyāṃ namaḥ ||
2.3.9.36.p4
śrīśivamahāpurāṇam ||
2.3.9.36.p5
dvitīyāyāṃ rudrasaṃhitāyāṃ tṛtīyaḥ pārvatīkhaṇḍe