Pramāṇa · Search · About · API

Shivapurana 2.4.12: dvādaśo'dhyāyaḥ | tārakavadhānantaraṃ devaiḥ kṛtāstutiḥ

Śivapurāṇa (complete text) 2.4.12

Language
Sanskrit

Contents

dvādaśo'dhyāyaḥ | tārakavadhānantaraṃ devaiḥ kṛtāstutiḥ

2.4.12.1

brahmovāca nihataṃ tārakaṃ dṛṣṭvā devā viṣṇupurogamāḥ |
tuṣṭuvuḥ śāṅkariṃ bhaktyā sarve'nye muditānanāḥ ||

2.4.12.2

devā ūcuḥ |
namaḥ kalyāṇarūpāya namaste viśvamaṅgala |
viśvabandho namaste'stu namaste viśvabhāvana ||

2.4.12.3

namostu te dānavavaryahantre bāṇāsuraprāṇaharāya deva |
pralambanāśāya pavitrarūpiṇe namonamaḥ śaṅkaratāta tubhyam ||

2.4.12.4

tvameva karttā jagatāṃ ca bharttā tvameva harttā śucija prasīda |
prapañcabhūtastava lokabimbaḥ prasīda śambhvātmaja dīnabandho ||

2.4.12.5

devarakṣākara svāmin rakṣa naḥ sarvadā prabho |
devaprāṇāvanakara prasīda karuṇākara ||

2.4.12.6

hatvā tvaṃ tārakaṃ daityaṃ parivārayutaṃ vibho |
mocitāḥ sakalā devā vipadbhyaḥ parameśvara ||

2.4.12.7

brahmovāca evaṃ stutaḥ kumāro'sau devairviṣṇumukhaiḥ prabhuḥ |
varāndadāvabhinavānsarvebhyaḥ kramaśo mune ||

2.4.12.8

śailānnirīkṣya stuvatastataḥsa giriśātmajaḥ |
suprasannataro bhūtvā provāca pradadadvarān ||

2.4.12.9

skanda uvāca
yūyaṃ sarve parvatā hi pūjanīyāstapasvibhiḥ |
karmibhirjñānibhiścaiva sevyamānā bhaviṣyatha ||

2.4.12.10

śambhorviśiṣṭarūpāṇi liṅgarūpāṇi caiva hi |
bhaviṣyatha na sandehaḥ parvatā vacanānmama ||

2.4.12.11

yo'yaṃ mātāmaho me'dya himavānparvatottamaḥ |
tapasvināṃ mahābhāgaḥ phalado hi bhaviṣyati ||

2.4.12.12

devā ūcuḥ |
evaṃ dattvā varān hatvā tārakaṃ cāsurādhipam |
tvayā kṛtāśca sukhino vayaṃ sarve carācarāḥ ||

2.4.12.13

idānīṃ khalu suprītyā kailāsaṃ giriśālayam |
jananī janakau draṣṭuṃ śivāśambhū tvamarhasi ||

2.4.12.14

brahmovāca ityuktvā nikhilā devā viṣṇvādyāḥ prāptaśāsanāḥ |
kṛtvā mahotsavaṃ bhūri sakumārā yayurgirim ||

2.4.12.15

kumāre gacchati vibhau kailāsaṃ śaṅkarālayam |
mahāmaṅgalamuttasthau jayaśabdo babhūva ha ||

2.4.12.16

āruroha kumāro'sau vimānaṃ paramarddhimat |
sarvatolaṅkṛtaṃ ramyaṃ sarvopari virājitam ||

2.4.12.17

ahaṃ viṣṇuśca samudau tadā cāmaradhāriṇau |
guha mūrdhni mahāprītyā mune'bhūvaṃ hyatandritau ||

2.4.12.18

indrādyā amarāḥ sarve kurvanto guhasevanam |
yathocitaṃ caturdikṣu jagmuśca pramudāstadā ||

2.4.12.19

śambhorjayaṃ prabhāṣantaḥ prāpuste śambhuparvatam |
sānandā viviśustatroccarito maṅgaladhvaniḥ ||

2.4.12.20

dṛṣṭvā śivaṃ śivāṃ caiva sarve viṣṇvādayo drutam |
praṇamya śaṅkaraṃ bhaktyā karau baddhvā vinamrakāḥ ||

2.4.12.21

kumāro'pi vinītātmā vimānādavatīrya ca |
praṇanāma mudā śambhuṃ śivāṃ siṃhāsanasthitām ||

2.4.12.22

atha dṛṣṭvā kumāraṃ taṃ tanayaṃ prāṇavallabham |
tau dampatī śivau devau mumudāte'ti nārada ||

2.4.12.23

mahāprabhuḥsamutthāpya tamutsaṅge nyaveśayat |
mūrdhni jaghrau mudā snehāttaṃ pasparśa kareṇa ha ||

2.4.12.24

mahānandabharaḥ śambhuścakāra mukhacumbanam |
kumārasya mahāsnehāt tārakārermahāprabhoḥ ||

2.4.12.25

śivāpi taṃ samutthāpya svotsaṅge saṃnyaveśayat |
kṛtvā mūrdhni mahāsnehāt tanmukhābjaṃ cucumba hi ||

2.4.12.26

tayostadā mahāmodo vavṛdhe'tīva nārada |
dampatyoḥ śivayostāta bhavācāraṃ prakurvatoḥ ||

2.4.12.27

tadotsavo mahānāsīnnānāścaryaḥ śivālaye |
jayaśabdo namaśśabdo babhūvātīva sarvataḥ ||

2.4.12.28

tataḥsuragaṇāḥ sarve viṣṇvādyā munayastathā |
supraṇamya mudā śambhuṃ tuṣṭuvuḥ saśivaṃ mune ||

2.4.12.29

devā ūcuḥ |
devadeva mahādeva bhaktānāmabhayaprada |
namo namaste bahuśaḥ kṛpākara maheśvara ||

2.4.12.30

adbhutā te mahādeva mahālīlā sukhapradā |
sarveṣāṃ śaṅkara satāṃ dīnabandho mahāprabho ||

2.4.12.31

evaṃ mūḍhadhiyaścājñāḥ pūjāyāṃ te sanātanam |
āvāhanaṃ na jānīmo gatiṃ naiva prabhodbhutām ||

2.4.12.32

gaṅgāsaliladhārāya hyādhārāya guṇātmane |
namaste tridaśeśāya śaṅkarāya namonamaḥ ||

2.4.12.33

vṛṣāṅkāya maheśāya gaṇānāṃ pataye namaḥ |
sarveśvarāya devāya trilokapataye namaḥ ||

2.4.12.34

saṃhartre jagatāṃ nātha sarveṣāṃ te namo namaḥ |
bhartre kartre ca deveśa triguṇeśāya śāśvate ||

2.4.12.35

visaṅgāya pareśāya śivāya paramātmane |
niṣprapañcāya śuddhāya paramāyāvyayāya ca ||

2.4.12.36

daṇḍahastāya kālāya pāśahastāya te namaḥ |
vedamantrapradhānāya śatajihvāya te namaḥ ||

2.4.12.37

bhūtaṃ bhavyaṃ bhaviṣyaṃ ca sthāvaraṃ jaṅgamaṃ ca yat |
tava dehātsamutpannaṃ sarvathā parameśvara ||

2.4.12.38

pāhi naḥ sarvadā svāminprasīda bhagavanprabho |
vayaṃ te śaraṇāpannāḥ sarvathā parameśvara ||

2.4.12.39

śitikaṇṭhāya rudrāya svāhākārāya te namaḥ |
arūpāya sarūpāya viśvarūpāya te namaḥ ||

2.4.12.40

śivāya nīlakaṇṭhāya citābhasmāṅgadhāriṇe |
nityaṃ nīlaśikhaṇḍāya śrīkaṇṭhāya namonamaḥ ||

2.4.12.41

sarvapraṇatadehāya saṃyamapraṇatāya ca |
mahādevāya śarvāya sarvārcitapadāya ca ||

2.4.12.42

tvaṃ brahmā sarvadevānāṃ rudrāṇāṃ nīlalohitaḥ |
ātmā ca sarvabhūtānāṃ sāṅkhyaiḥ puruṣa ucyase ||

2.4.12.43

parvatānāṃ sumerustvaṃ nakṣatrāṇāṃ ca candramāḥ |
ṛṣīṇāṃ ca vasiṣṭhastvaṃ devānāṃ vāsavastathā ||

2.4.12.44

oṃṅkārassarvavedānāṃ trātā bhava maheśvara |
tvaṃ ca lokahitārthāya bhūtāni pariṣiñcasi ||

2.4.12.45

maheśvara mahābhāga śubhāśubhanirīkṣaka |
āpyāyāsmānhi deveśa kartṝnvai vacanaṃ tava ||

2.4.12.46

rūpakoṭisahasreṣu rūpakoṭiśateṣu te |
antaṃ gantuṃ na śaktāḥ sma devadeva namo'stu te ||

2.4.12.47

brahmovāca iti stutvā'khilā devā viṣṇvādyāḥpramukhasthitāḥ |
muhurmuhussupraṇamya skandaṃ kṛtvā purassaram ||

2.4.12.48

devastutiṃ samākarṇya śivaḥsarveśvaraḥ svarāṭ |
suprasanno babhūvātha vijahāsa dayāparaḥ ||

2.4.12.49

uvāca suprasannātmā viṣṇvādīnsurasattamān |
śaṅkaraḥ parameśāno dīnabandhuḥsatāṃ gatiḥ ||

2.4.12.50

śiva uvāca
he hare he vidhe devā vākyaṃ me śṛṇutādarāt |
sarvathā'haṃ satāṃ trātā devānāṃ vaḥ kṛpānidhiḥ ||

2.4.12.51

duṣṭahantā trilokeśaḥ śaṅkaro bhaktavatsalaḥ |
kartā bhartā ca hartā ca sarveṣāṃ nirvikāravān ||

2.4.12.52

yadā yadā bhavedduḥkhaṃ yuṣmākaṃ devasattamāḥ |
tadā tadā māṃ yūyaṃ vai bhajantu sukhahetave ||

2.4.12.53

brahmovāca ityājñaptāstadā devā viṣṇvādyāḥ samunīśvarāḥ |
śivāṃ praṇamya saśivaṃ kumāraṃ ca mudānvitāḥ ||

2.4.12.54

kathayanto yaśo ramyaṃ śivayoḥ śāṅkareśca tat |
ānandaṃ paramaṃ prāpya svadhāmāni yayurmune ||

2.4.12.55

śivo'pi śivayā sārddhaṃ sagaṇaḥ parameśvaraḥ |
kumāreṇayutaḥ prītyovāsa tasmingirau mudā ||

2.4.12.56

ityevaṃ kathitaṃ sarvaṃ kaumāraṃ caritaṃ mune |
śaivaṃ ca sukhadaṃ divyaṃ kimanyacchrotumicchasi ||

2.4.12.56.c1

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe svāmikārtikacaritagarbhitaśivāśivacaritavarṇanaṃ nāma dvādaśo'dhyāyaḥ ||

2.4.12.56.p2

śrīgaṇeśāya namaḥ ||

2.4.12.56.p3

śrīgaurīśaṅkarābhyāṃ namaḥ ||

2.4.12.56.p4

śrīśivamahāpurāṇam ||

2.4.12.56.p5

dvitīyāyāṃ rudrasaṃhitāyāṃ caturthaḥ kumārakhaṇḍe

Linked texts (4)