Shivapurana 2.4.20: viṃśo'dhyāyaḥ | gaṇeśavivāhavarṇanam
Śivapurāṇa (complete text) 2.4.20
- Language
- Sanskrit
Contents
- 2.4.20.45 — 2 parts
viṃśo'dhyāyaḥ | gaṇeśavivāhavarṇanam
2.4.20.1
brahmovāca etasminnantare tatra viśvarūpaḥ prajāpatiḥ |
tadudyogaṃ saṃvicārya sukhamāpa prasannadhīḥ ||
2.4.20.2
viśvarūpaprajeśasya divyarūpe sute ubhe |
siddhibuddhiriti khyāte śubhe sarvāṅgaśobhane ||
2.4.20.3
tābhyāṃ caiva gaṇeśasya girijā śaṅkaraḥ prabhū |
mahotsavaṃ vivāhaṃ ca kārayāmāsaturmudā ||
2.4.20.4
santuṣṭā devatāḥ sarvāstadvivāhe samāgaman |
yathā caiva śivasyaiva girijāyā manorathaḥ ||
2.4.20.5
tathā ca viśvakarmā'sau vivāhaṃ kṛtavāṃstathā |
tathā ca ṛṣayo devā lebhire paramāṃ mudam ||
2.4.20.6
gaṇeśo'pi tadā tābhyāṃ sukhaṃ paramadurlabham |
prāptavāṃśca mune tattu varṇituṃ naiva śakyate ||
2.4.20.7
kiyatā caiva kālena gaṇeśasya mahātmanaḥ |
dvayoḥ patnyośca dvau divyau tasya putrau babhūvatuḥ ||
2.4.20.8
siddhergaṇeśapatnyāstu kṣemanāmā suto'bhavat |
buddherlābhābhidhaḥ putro hyāsītparamaśobhanaḥ ||
2.4.20.9
evaṃ sukhamacintyaṃ vai bhuñjāne hi gaṇeśvare |
ājagāma dvitīyaśca krāntvā pṛthvīṃ sutastadā ||
2.4.20.10
tāvaśca nāradenaiva prāpto gehe mahātmanā |
yathārthaṃ vacmi no'satyaṃ na chalena na matsarāt ||
2.4.20.11
pitṛbhyāṃ tu kṛtaṃ yacca śivayā śaṅkareṇa te |
tanna kuryātparo loke satyaṃ satyaṃ bravīmyaham ||
2.4.20.12
niṣkāsya tvāṃ kukramaṇaṃ miṣamutpādya yatnataḥ |
gaṇeśasya varo'kāri vivāhaḥ paraśobhanaḥ ||
2.4.20.13
gaṇeśasya kṛtodvāho labdhavāṃstrīdvayaṃ mudā |
viśvarūpaprajeśasya kanyāratnaṃ mahottamam ||
2.4.20.14
putradvayaṃ lalābhāsau dvayoḥ patnyoḥ śubhāṅgayoḥ |
siddheḥ kṣemaṃ tathā buddherlābhaṃ sarvasukhapradam ||
2.4.20.15
patnyordvayorgaṇeśo'sau labdhvāputradvayaṃ śubham |
mātāpitrormatenaiva sukhaṃ bhuṅkte nirantaram ||
2.4.20.16
bhavatā pṛthivī krāntā sasamudrā sakānanā |
tacchalājñāvaśāttāta tasya jātaṃ phalaṃ tvidam ||
2.4.20.17
pitṛbhyāṃ hi kṛtaṃ yattu chalaṃ tāta vicāryatām |
svasvāmibhyāṃ viśeṣeṇa hyanyaḥ kinna karoti vai ||
2.4.20.18
asamyakca kṛtaṃ tābhyāṃ tvatpitṛbhyāṃ hi karma ha |
vicāryatāṃ tvayā'pīha maccitte na śubhaṃ matam ||
2.4.20.19
dadyādyadi garaṃ mātā vikrīṇīyātpitā yadi |
rājā harati sarvasvaṃ kasmai kiṃ ca bravītu vai ||
2.4.20.20
yenaivedaṃ kṛtaṃ syādvai karmānarthakaraṃ param |
śāntikāmassudhīstāta tanmukhaṃ na vilokayet ||
2.4.20.21
iti nītiḥ śrutau proktā smṛtau śāstreṣu sarvataḥ |
niveditā ca sā te'dya yathecchasi tathā kuru ||
2.4.20.22
brahmovāca ityuktvā nārada tvaṃ tu maheśvaramanogatiḥ |
tasmai tathā kumārāya vākyaṃ maunamupāgataḥ ||
2.4.20.23
skando'pi pitaraṃ natvā kopāgnijvalitastadā |
jagāma parvataṃ krauñcaṃ pitṛbhyāṃ vārito'pi san ||
2.4.20.24
vāraṇe ca kṛte tvadya gamyate ca kathaṃ tvayā |
ityevaṃ ca niṣiddho'pi procya neti jagāma saḥ ||
2.4.20.25
na sthātavyaṃ mayā tātau kṣaṇamapyatra kiñcana |
yadyevaṃ kapaṭaṃ prītimapahāya kṛtaṃ mayi ||
2.4.20.26
evamuktvā gatastatra mune so'dyāpi vartate |
darśanenaiva sarveṣāṃ lokānāṃ pāpahārakaḥ ||
2.4.20.27
taddinaṃ hi samārabhya kārtikeyasya tasya vai |
śivaputrasya devarṣe kumāratvaṃ pratiṣṭhitam ||
2.4.20.28
tannāma śubhadaṃ loke prasiddhaṃ bhuvanatraye |
sarvapāpaharaṃ puṇyaṃ brahmacaryapradaṃ param ||
2.4.20.29
kārtikyāṃ ca sadā devā ṛṣayaśca satīrthakāḥ |
darśanārthaṃ kumārasya gacchanti ca munīśvarāḥ ||
2.4.20.30
kārtikyāṃ kṛttikāsaṅge kuryādyaḥ svāmidarśanam |
tasya pāpaṃ dahetsarvaṃ cittepsitaphalaṃ labhet ||
2.4.20.31
umā'pi duḥkhamāpannā skandasya virahe sati |
uvāca svāminaṃ dīnā tatra gaccha mayā prabho ||
2.4.20.32
tatsukhārthaṃ svayaṃ śambhurgataḥ svāṃśena parvate |
mallikārjunanāmāsījjyotirliṅgaṃ sukhāvaham ||
2.4.20.33
adyāpi dṛśyate tatra śivayā sahitaśśivaḥ |
sarveṣāṃ nijabhaktānāṃ kāmapūraḥ satāṃ gatiḥ ||
2.4.20.34
tamāgataṃ sa vijñāya kumāraḥ saśivāṃ śivam |
sa virajya tato'nyatra gantumāsītsamutsukaḥ ||
2.4.20.35
devaiśca munibhiścaiva prārthitaḥ so'pi dūrataḥ |
yojanatrayamutsṛjya sthitaḥ sthāne ca kārtikaḥ ||
2.4.20.36
putrasnehāturau tau vai śivau parvaṇi parvaṇi |
darśanārthaṃ kumārasya tasya nārada gacchataḥ ||
2.4.20.37
amāvāsyādine śambhuḥ svayaṃ gacchati tatra ha |
pūrṇamāsīdine tatra pārvatī gacchati dhruvam ||
2.4.20.38
yadyattasya ca vṛttāntaṃ bhavatpṛṣṭaṃ munīśvara |
kārtikasya gaṇeśasya paramaṃ kathitaṃ mayā ||
2.4.20.39
etacchrutvā naro dhīmān sarvapāpaiḥ pramucyate |
śobhanāṃ labhate kāmānīpsitānsakalānsadā ||
2.4.20.40
yaḥ paṭhetpāṭhayedvāpi śṛṇuyācchrāvayettathā |
sarvānkāmānavāpnoti nātra kāryā vicāraṇā ||
2.4.20.41
brāhmaṇo brahmavarcasvī kṣatriyo vijayī bhavet |
vaiśyo dhanasamṛddhassyācchūdrassattamatāmiyāt ||
2.4.20.42
rogī rogātpramucyeta bhayānmucyeta bhītiyuk |
bhūtapretādibādhābhyaḥ pīḍito na bhavennaraḥ ||
2.4.20.43
etadākhyānamanaghaṃ yaśasyaṃ sukhavarddhanam |
āyuṣyaṃ svargyamatulaṃ putrapautrādikārakam ||
2.4.20.44
apavargapradaṃ cāpi śivajñānapradaṃ param |
śivāśivaprītikaraṃ śivabhaktivivarddhanam ||
2.4.20.45
śravaṇīyaṃ sadā bhaktairniṣkāmaiśca mumukṣubhiḥ |
śivādvaitapradaṃ caitatsadāśivamayaṃ śivam ||
2.4.20.45.c1
iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe gaṇeśavivāhavarṇanaṃ nāma viṃśo'dhyāyaḥ ||
2.4.20.45.c2
iti śrīśivamahāpurāṇe dvitīyarudrasaṃhitāyāṃ caturthaḥ kumārakhaṇḍaḥ samāptaḥ ||