Shivapurana 2.4.7: saptamo'dhyāyaḥ | tārakeṇa sahendrādidevānāṃ yuddhavarṇanam
Śivapurāṇa (complete text) 2.4.7
- Language
- Sanskrit
Contents
saptamo'dhyāyaḥ | tārakeṇa sahendrādidevānāṃ yuddhavarṇanam
2.4.7.1
brahmovāca haryyādayassurāste ca dṛṣṭvā taccaritaṃ vibhoḥ |
suprasannā babhūvurhi viśvāsāsaktamānasāḥ ||
2.4.7.2
valgantaḥ kurvato nādaṃ bhāvitāśśivatejasā |
kumārante puraskṛtya tārakaṃ hantumāyayuḥ ||
2.4.7.3
devānāmudyamaṃ śrutvā tārako'pi mahābalaḥ |
sainyena mahatā sadyo yayau yoddhuṃ surān prati ||
2.4.7.4
devā dṛṣṭvā samāyāntaṃ tārakasya mahābalam |
balena bahukurvantaḥ siṃhanādaṃ visismiyuḥ ||
2.4.7.5
tadā nabho'ṅganā vāṇīṃ jagādopari satvaram |
śaṅkarapreritā sadyo haryādīnakhilān surān ||
2.4.7.6
vyomavāṇyuvāca
kumāraṃ ca puraskṛtya surā yūyaṃ samudyatāḥ |
daityānvijitya saṅgrāme jayino'tha bhaviṣyatha ||
2.4.7.7
brahmovāca vācaṃ tu khecarīṃ śrutvā devāḥ sarve samutsukāḥ |
vīraśabdān prakurvanto nirbhayā hyabhavaṃstadā ||
2.4.7.8
kumāraṃ ca puraskṛtya sarve te gatasādhvasāḥ |
yoddhukāmāḥ surā jagmurmahīsāgarasaṅgamam ||
2.4.7.9
ājagāma drutaṃ tatra yatra devāḥ sa tārakaḥ |
sainyena mahatā sārddhaṃ asurairbahubhirvṛtaḥ ||
2.4.7.10
raṇadundubhayo neduḥ pralayāmbudaniḥsvanāḥ |
karkaśāni ca vādyāni parāṇi ca tadāgame ||
2.4.7.11
garjamānāstadā daityāstārakeṇāsureṇa ha |
kampayanto bhuvaṃ pādakramairvalgunakārakāḥ ||
2.4.7.12
tacchrutvā ravamatyugraṃ sarve devā vinirbhayāḥ |
aikapadyena cottasthuryoddhukāmāśca tārakam ||
2.4.7.13
gajamāropya devendraḥ kumāraṃ hyagrato'bhavat |
surasainyena mahatā lokapālaiḥ samāvṛtaḥ ||
2.4.7.14
tadā dundubhayo nedurbherītūryāṇyanekaśaḥ |
vīṇāveṇumṛdaṅgāni tathā gandharvanissvanāḥ ||
2.4.7.15
gajaṃ dattvā mahendrāya kumāro yānamāruhat |
anekāścaryasambhūtaṃ nānāratnasamanvitam ||
2.4.7.16
vimānamāruhya tadā mahāyaśāḥ sa śāṅkariḥsarvaguṇairupetaḥ |
śriyā sametaḥ parayā babhau mahān saṃvījyamānaścamarairmahāprabhaiḥ ||
2.4.7.17
prācetasaṃ chatramatīvasuprabhaṃ ratnairupetaṃ vividhairvirājitam |
dhṛtaṃ tadā tacca kumāramūrdhni vai hyanantacāndraiḥ kiraṇairmahāprabhaiḥ ||
2.4.7.18
militāste tadā sarve devāḥ śakrapurogamāḥ |
svaiḥ svairbalaiḥ parivṛtā yuddhakāmā mahābalāḥ ||
2.4.7.19
evaṃ devāśca daityāśca yoddhukāmāḥ sthitā bhuvi |
sainyena mahatā tena vyūhaṃ kṛtvā pṛthak pṛthak ||
2.4.7.20
te sene suradaityānāṃ śuśubhāte parasparam |
hantukāme tadānyonyaṃ stūyamāne ca bandibhiḥ ||
2.4.7.21
ubhe sene tadā teṣāmagarjetāṃ vanopame |
bhayaṅkare'tyavīrāṇāmitareṣāṃ sukhāvahe ||
2.4.7.22
etasminnantare tatra balonmattāḥ parasparam |
daityā devā mahāvīrā yuyudhuḥ krodhavihvalāḥ ||
2.4.7.23
āsītsutumulaṃ yuddhaṃ devadaityasamākulam |
ruṇḍamuṇḍāṅkitaṃ sarvaṃ kṣaṇena samapadyata ||
2.4.7.24
bhūmau nipatitāstatra śataśo'tha sahasraśaḥ |
nikṛttāṅgā mahāśastrairnihatā vīrasammatāḥ ||
2.4.7.25
keṣāñcidbāhavaśchinnāḥ khaḍgapātaiḥ sudāruṇaiḥ |
keṣāñcidūravaśchinnā vīrāṇāṃ mānināṃ mṛdhe ||
2.4.7.26
kecinmathitasarvāṅgā gadābhirmudgaraistathā |
kecinnirbhinnahṛdayāḥ pāśairbhallaiśca pātitāḥ ||
2.4.7.27
kecidvidāritāḥ pṛṣṭhe kuntairṛṣṭibhiraṅkuśaiḥ |
chinnānyapi śirāṃsyeva patitāni ca bhūtale ||
2.4.7.28
bahūni ca kabandhāni nṛtyamānāni tatra vai |
valgamānāni śataśo udyatāstrakarāṇi ca ||
2.4.7.29
nadyaḥ pravartitāstatra śataśo'sṛṅvahāstadā |
bhūtapretādayastatra śataśaśca samāgatāḥ ||
2.4.7.29.p1
gomāyavaśśivāḥ tatra bhakṣayantaḥ palaṃ bahu |
tathā gṛdhravaṭā śyenā vāyasā māṃsabhakṣakāḥ ||
2.4.7.29.p2
bubhujuḥ patitānāṃ ca palāni subahūni vai | 30 ||
2.4.7.31
etasminnantare tatra tārakākhyo mahābalaḥ |
sainyena mahatā sadyo yayau yoddhuṃ surān prati ||
2.4.7.32
devā dṛṣṭvā samāyāntaṃ tārakaṃ yuddhadurmadam |
yoddhukāmaṃ tadā sadyo yayuḥ śakrādayastadā |
babhūvātha mahonnādaḥsenayorubhayorapi ||
2.4.7.33
athābhūd dvandvayuddhaṃ hi surāsuravimardanam |
yaṃ dṛṣṭvā harṣitā vīrāḥ klībāśca bhayamāgatāḥ ||
2.4.7.34
tārako yuyudhe yuddhe śakreṇa ditijo balī |
agninā saha saṃhrādo jambhenaiva yamaḥ svayam ||
2.4.7.35
mahāprabhurnairṛtena pāśī saha balena ca |
suvīro vāyunā sārdhaṃ pavamānena guhyarāṭ ||
2.4.7.36
īśānena samaṃ śambhuryuyudhe raṇavittamaḥ |
śumbhaḥ śeṣeṇa yuyudhe kumbhaścandreṇa dānavaḥ ||
2.4.7.37
kuñjaro mihireṇājau mahābalaparākramaḥ |
yuyudhe paramāstraiśca nānāyuddhaviśāradaḥ ||
2.4.7.38
evaṃ dvandvena yuddhena mahatā ca surāsurāḥ |
saṅgare yuyudhuḥsarve balena kṛtaniścayāḥ ||
2.4.7.39
anyonyaṃ sparddhamānāste'marā daityā mahābalāḥ |
tasmindevāsure yuddhe durjayā abhavanmune ||
2.4.7.40
tadā ca teṣāṃ suradānavānāṃ babhūva yuddhaṃ tumulaṃ jayaiṣiṇām |
sukhāvahaṃ vīramanasvināṃ vai bhayāvahaṃ caiva tathetareṣām ||
2.4.7.41
mahī mahāraudratarā vinaṣṭakaiḥ surāsurairvai patitairanekaśaḥ |
tasminnagamyātibhayānakā tadā jātā mahāsaukhyavahā manasvinām ||
2.4.7.41.c1
iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe yuddhaprārambhavarṇanaṃ nāma saptamo'dhyāyaḥ ||
2.4.7.41.p2
śrīgaṇeśāya namaḥ ||
2.4.7.41.p3
śrīgaurīśaṅkarābhyāṃ namaḥ ||
2.4.7.41.p4
śrīśivamahāpurāṇam ||
2.4.7.41.p5
dvitīyāyāṃ rudrasaṃhitāyāṃ caturthaḥ kumārakhaṇḍe
Linked texts (2)
- Skandapurāṇa (early; "Ambikākhaṇḍa") (ed. Bakker) — Sanskrit
- Vaiṣṇavakhaṇḍa — Sanskrit