Shivapurana 2.4.8: aṣṭamo'dhyāyaḥ | devadaityayuddhavarṇanam
Śivapurāṇa (complete text) 2.4.8
- Language
- Sanskrit
Contents
- 2.4.8.52 — 5 parts
aṣṭamo'dhyāyaḥ | devadaityayuddhavarṇanam
2.4.8.1
brahmovāca iti te varṇitastāta devadānava senayoḥ |
saṅgrāmastumulo'tīva tatprabhvoḥ śṛṇu nārada ||
2.4.8.2
evaṃ yuddhe'titumule devadānavasaṅkṣaye |
tārakeṇaiva devendraḥ śaktyā paramayā saha ||
2.4.8.3
sadyaḥ papāta nāgāśca dharaṇyāṃ mūrcchito'bhavat |
paraṃ kaśmalamāpede vajradhārī sureśvaraḥ ||
2.4.8.4
tathaiva lokapāḥ sarve'suraiśca balavattaraiḥ |
parājitā raṇe tāta mahāraṇaviśāradaiḥ ||
2.4.8.5
anye'pi nirjarā daityairyuddhyamānāḥ parājitāḥ |
asahanto hi tattejaḥ palāyanaparāyaṇāḥ ||
2.4.8.6
jagarjurasurāstatra jayinaḥ sukṛtodyamāḥ |
siṃhanādaṃ prakurvantaḥ kolāhalaparāyaṇāḥ ||
2.4.8.7
etasminnantare tatra vīrabhadro ruṣānvitaḥ |
āsasāda gaṇairvīraistārakaṃ vīramāninam ||
2.4.8.8
nirjarān pṛṣṭhataḥ kṛtvā śivakopodbhavo balī |
tatsammukho babhūvātha yoddhukāmo gaṇāgraṇīḥ ||
2.4.8.9
tadā te pramathāḥ sarve daityāśca paramotsavāḥ |
yuyudhuḥ saṃyuge'nyonyaṃ prasaktāśca mahāraṇe ||
2.4.8.10
triśūlairṛṣṭibhiḥ pāśaiḥ khaḍgaiḥ paraśupaṭṭiśaiḥ |
nijaghnuḥsamare'nyo'nyaṃ raṇe raṇaviśāradāḥ ||
2.4.8.11
tārako vīrabhadreṇa sa triśūlāhato bhṛśam |
papāta sahasā bhūmau kṣaṇaṃ mūrchāpariplutaḥ ||
2.4.8.12
utthāya sa drutaṃ vīrastārako daityasattamaḥ |
labdhasaṃjño balācchaktyā vīrabhadraṃ jaghāna ha ||
2.4.8.13
vīrabhadrastathā vīro mahātejā hi tārakam |
jaghāna triśikhenāśu ghoreṇa niśitena tam ||
2.4.8.14
so'pi śaktyā vīrabhadraṃ jaghāna samare tataḥ |
tārako ditijādhīśaḥ prabalo vīrasammataḥ ||
2.4.8.15
evaṃ saṃyuddhyamānau tau jaghnatuścetaretaram |
nānāstraśastraiḥ samare raṇavidyāviśāradau ||
2.4.8.16
tayormahātmanostatra dvandvayuddhamabhūttadā |
sarveṣāṃ paśyatāmeva tumulaṃ romaharṣaṇam ||
2.4.8.17
tato bherīmṛdaṅgāśca paṭahānakagomukhāḥ |
vinedurvihatā vīraiḥ śṛṇvatāṃ subhayānakāḥ ||
2.4.8.18
yuyudhātetisannaddhau prahārairjarjarīkṛtau |
anyo'nyamatisaṃrabdhau tau budhāṅgārakāviva ||
2.4.8.19
evaṃ dṛṣṭvā tadā yuddhaṃ vīrabhadrasya tena ca |
tatra gatvā vīrabhadramavocastvaṃ śivapriyaḥ ||
2.4.8.20
nārada uvāca
vīrabhadra mahāvīra gaṇānāmagraṇīrbhavān |
nivartasva raṇādasmādrocate na vadhastvayā ||
2.4.8.21
evaṃ niśamya tvadvākyaṃ vīrabhadro gaṇāgraṇīḥ |
avadatsa ruṣāviṣṭastvāṃ tadā tu kṛtāñjaliḥ ||
2.4.8.22
vīrabhadra uvāca
munivarya mahāprājña śṛṇu me paramaṃ vacaḥ |
tārakaṃ ca vadhiṣyāmi paśya me'dya parākramam ||
2.4.8.23
ānayanti ca ye vīrāḥsvāminaṃ raṇasaṃsadi |
te pāpino mahāklībā vinaśyanti raṇaṃ gatāḥ ||
2.4.8.24
asadgatiṃ prāpnuvanti teṣāṃ ca nirayo dhruvam |
vīrabhadro hi vijñeyo na vācyaste kadācana ||
2.4.8.25
śastrāstrairbhinnagātrā ye raṇaṃ kurvanti nirbhayāḥ |
ihāmutra praśaṃsyāste labhante sukhamadbhutam ||
2.4.8.26
śṛṇvantu mama vākyāni devā haripurogamāḥ |
atārakāṃ mahīmadya kariṣye svāmivarjitaḥ ||
2.4.8.27
ityuktvā pramarthaissārddhaṃ vīrabhadro hi śūladhṛk |
vicintya manasā śambhuṃ yuyudhe tārakeṇa hi ||
2.4.8.28
vṛṣārūḍhairanekaiśca triśūlavaradhāribhiḥ |
mahāvīraiḥ trinetraiśca sa reje raṇasaṅgataḥ ||
2.4.8.29
kolāhalaṃ prakurvanto nirbhayāḥ śataśo gaṇāḥ |
vīrabhadraṃ puraskṛtya yuyudhurdānavaiḥ saha ||
2.4.8.30
asurāste'pi yuyudhuḥ tārakāsurajīvinaḥ |
balotkaṭā mahāvīrā mardayanto gaṇān ruṣā ||
2.4.8.31
punaḥ punaścaiva babhūva saṅgaro mahotkaṭo daityavarairgaṇānām |
praharṣamāṇāḥ paramāstrakovidāḥ tadā gaṇāste jayino babhūvuḥ ||
2.4.8.32
gaṇairjitāste prabalairasurā vimukhā raṇe |
palāyanaparā jātā vyathitā vyagramānasāḥ ||
2.4.8.33
evaṃ bhraṣṭaṃ svasainyaṃ tad dṛṣṭvā tatpālako'suraḥ |
tārako hi ruṣāviṣṭo hantuṃ devagaṇān yayau ||
2.4.8.34
bhujānāmayutaṃ kṛtvā siṃhamāruhya vegataḥ |
pātayāmāsa tāndevān gaṇāṃśca raṇamūrddhani ||
2.4.8.358
sa dṛṣṭvā tasya tatkarma vīrabhadro gaṇāgraṇīḥ |
cakāra sumahatkopaṃ tadvadhāya mahābalī ||
2.4.8.36
smṛtvā śivapadāmbhojaṃ jagrāha triśikhaṃ param |
jajvalustejasā tasya diśaḥ sarvā nabhastathā ||
2.4.8.37
etasminnantare svāmī vārayāmāsa taṃ raṇāt |
vīrabāhumukhānsadyo mahākautukadarśakaḥ ||
2.4.8.38
tadājñayā vīrabhadro nivṛtto'bhūdraṇāttadā |
kopaṃ cakre mahāvīrastārako'suranāyakaḥ ||
2.4.8.39
cakāra bāṇavṛṣṭiṃ ca suropari tadā'suraḥ |
tapto''hvāsītsurānsadyo nānāstraraṇakovidaḥ ||
2.4.8.40
evaṃ kṛtvā mahatkarma tārako'surapālakaḥ |
sarveṣāmapi devānāmaśakyo balināṃ varaḥ ||
2.4.8.41
evaṃ nihanyamānāṃstān dṛṣṭvā devān bhayākulān |
kopaṃ kṛtvā raṇāyāśu sannaddho'bhavadacyutaḥ ||
2.4.8.42
cakraṃ sudarśanaṃ śārṅgaṃ dhanurādāya sāyudhaḥ |
abhyudyayau mahādaityaṃ raṇāya bhagavān hariḥ ||
2.4.8.43
tataḥsamabhavadyuddhaṃ haritārakayormahat |
lomaharṣaṇamatyugraṃ sarveṣāṃ paśyatāṃ mune ||
2.4.8.44
gadāmudyamya sa harirjaghānāsuramojasā |
dvidhā cakāra tāṃ daityastriśikhena mahābalī ||
2.4.8.46
tataḥ sa kruddho bhagavāndevānāmabhayaṅkaraḥ |
śārṅgacyutaiḥ śaravyūhairjaghānāsuranāyakam ||
2.4.8.46_2
so'pi daityo mahāvīrastārakaḥ paravīrahā |
ciccheda sakalānbāṇānsvaśarairniśitairdrutam ||
2.4.8.47
atha śaktyā jaghānāśu murāriṃ tārakāsuraḥ |
bhūmau papāta sa haristatprahāreṇa mūrcchitaḥ ||
2.4.8.48
jagrāha sa ruṣā cakramutthitaḥ kṣaṇato'cyutaḥ |
siṃhanādaṃ mahatkṛtvā jvalajjvālāsamākulam ||
2.4.8.49
tena taṃ ca jaghānāsau daityānāmadhipaṃ hariḥ |
tatprahāreṇa mahatā vyathito nyapatadbhuvi ||
2.4.8.50
punaścotthāya daityendrastārako'suranāyakaḥ |
ciccheda tvaritaṃ cakraṃ svaśaktyātibalānvitaḥ ||
2.4.8.51
punastayā mahāśaktyā jaghānāmaravallabham |
acyuto'pi mahāvīro nandakena jaghāna tam ||
2.4.8.52
evamanyo'nyamasuro viṣṇuśca balavānubhau |
yuyudhāte raṇe bhūri tatrākṣatabalau mune ||
2.4.8.52.c1
iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe deva daityasāmānyayuddhavarṇanaṃ nāmāṣṭamo'dhyāyaḥ ||
2.4.8.52.p2
śrīgaṇeśāya namaḥ ||
2.4.8.52.p3
śrīgaurīśaṅkarābhyāṃ namaḥ ||
2.4.8.52.p4
śrīśivamahāpurāṇam ||
2.4.8.52.p5
dvitīyāyāṃ rudrasaṃhitāyāṃ caturthaḥ kumārakhaṇḍe
Linked texts (3)
- Skandapurāṇa (early; "Ambikākhaṇḍa") (ed. Bakker) — Sanskrit
- Vaiṣṇavakhaṇḍa — Sanskrit
- Rāmāśvamedha — Sanskrit