Pramāṇa · Search · About · API

Shivapurana 2.4.9: navamo'dhyāyaḥ | tārakeṇa saha vīrabhadraviṣṇorghorayuddhavarṇanam

Śivapurāṇa (complete text) 2.4.9

Language
Sanskrit

Contents

navamo'dhyāyaḥ | tārakeṇa saha vīrabhadraviṣṇorghorayuddhavarṇanam

2.4.9.1

brahmovāca devadeva guha svāmin śāṅkare pārvatīsuta |
na śobhate raṇo viṣṇutārakāsurayorvṛthā ||

2.4.9.2

viṣṇunā na hi vadhyo'sau tārako balavānati |
mayā dattavarastasmātsatyaṃ satyaṃ vadāmyaham ||

2.4.9.3

nānyo hantāsya pāpasya tvāṃ vinā pārvatīsuta |
tasmāttvayā hi kartavyaṃ vacanaṃ me mahāprabho ||

2.4.9.4

sannaddho bhava daityasya vadhāyāśu parantapa |
tadvadhārthaṃ samutpannaḥ śaṅkarāttvaṃ śivāsuta ||

2.4.9.5

rakṣa rakṣa mahāvīra tridaśān vyathitān raṇe |
na bālastvaṃ yuvā naiva kiṃ tu sarveśvaraḥ prabhuḥ ||

2.4.9.6

śakraṃ paśya tathā viṣṇuṃ vyākulaṃ ca surān gaṇān |
enaṃ jahi mahādaityaṃ trailokyaṃ sukhitaṃ kuru ||

2.4.9.7

anena vijitaścendro lokapālaiḥ purā saha |
viṣṇuścāpi mahāvīro tarjitastapaso balāt ||

2.4.9.8

trailokyaṃ nirjitaṃ sarvamasureṇa durātmanā |
idānīṃ tava sānnidhyātpunaryuddhaṃ kṛtaṃ ca taiḥ ||

2.4.9.9

tasmāttvayā nihantavyastārakaḥ pāpapūruṣaḥ |
anyavadhyo na caivāyaṃ madvarācchaṅkarātmaja ||

2.4.9.10

iti śrutvā mama vacaḥ kumāraḥ śaṅkarātmajaḥ |
vijahāsa prasannātmā tathāstviti vaco'bravīt ||

2.4.9.11

viniścityāsuravadhaṃ śāṅkariḥsa mahāprabhuḥ |
vimānādavatīryātha padātirabhavattadā ||

2.4.9.12

padbhyāṃ tadāsau paridhāvamāno reje'tivīraḥ śivajaḥ kumāraḥ |
kare samādāya mahāprabhāṃ tāṃ śaktiṃ maholkāmiva dīptidīptām ||

2.4.9.13

dṛṣṭvā tamāyāntamatipracaṇḍa-mavyākulaṃ ṣaṇmukhamaprameyam |
daityo babhāṣe surasattamānsa kumāra eṣa dviṣatāṃ prahantā ||

2.4.9.14

anena sākaṃ hyahamekavīro yotsye ca sarvānahameva vīrān |
gaṇāṃśca sarvānapi ghātayāmi salokapālān harināyakāṃśca ||

2.4.9.15

ityevamuktvā sa tadā mahābalaḥ kumāramuddiśya yayau ca yoddhum |
jagrāha śaktiṃ paramādbhutāṃ ca sa tārako devavarān babhāṣe ||

2.4.9.16

tāraka uvāca
kumāro me'grataścādya bhavadbhiśca kathaṃ kṛtaḥ |
yūyaṃ gatatrapā devā viśeṣācchakrakeśavau ||

2.4.9.17

puraitābhyāṃ kṛtaṃ karma viruddhaṃ vedamārgataḥ |
tacchṛṇudhvaṃ mayā proktaṃ varṇayāmi viśeṣataḥ ||

2.4.9.18

tatra viṣṇuśchalī doṣī hyavivekī viśeṣataḥ |
baliryena purā baddhaśchalamāśritya pāpataḥ ||

2.4.9.19

tenaiva yatnataḥ pūrvamasurau madhukaiṭabhau |
śirohīnau kṛtau dhaurtyādvedamārgo vivarjitaḥ ||

2.4.9.20

mohinīrūpato'nena paṅktibhedaḥ kṛto hi vai |
devāsurasudhāpāne vedamārgo vigarhitaḥ ||

2.4.9.21

rāmo bhūtvā hatā nārī vālī vidhvaṃsito hi saḥ |
punarvaiśravaṇo vipro hato nītirhatā śruteḥ ||

2.4.9.22

pāpaṃ vinā svakīyā strī tyaktā pāparatena yat |
tatrāpi śrutimārgaśca dhvaṃsitaḥ svārthahetave ||

2.4.9.23

svajananyāḥ śiraśchinnamavatāre rasākhyake |
guruputrāpamānaśca kṛto'nena durātmanā ||

2.4.9.24

kṛṣṇo bhūtvānyanāryaśca dūṣitāḥ kuladharmataḥ |
śrutimārgaṃ parityajya svavivāhāḥ kṛtāstathā ||

2.4.9.25

punaśca vedamārgo hi nindito navame bhave |
sthāpitaṃ nāstikamataṃ vedamārgavirodhakṛt ||

2.4.9.26

evaṃ yena kṛtaṃ pāpaṃ vedamārgaṃ visṛjya vai |
sa kathaṃ vijayedyuddhe bhaveddharmavatāṃ varaḥ ||

2.4.9.27

bhrātā jyeṣṭhaśca yastasya śakraḥ pāpī mahānmataḥ |
tena pāpānyanekāni kṛtāni nijahetutaḥ ||

2.4.9.28

nikṛtto hi ditergarbhaḥ svārtha hetorviśeṣataḥ |
dharṣitā gautamastrī vai hato vṛtraśca viprajaḥ ||

2.4.9.29

viśvarūpadvijātervai bhāgineyasya yadguroḥ |
nikṛttāni ca śīrṣāṇi tadadhvādhvaṃsitaḥ śruteḥ ||

2.4.9.30

kṛtvā bahūni pāpāni hariḥ śakraḥ punaḥpunaḥ |
tejobhirvihatāveva naṣṭavīryau viśeṣataḥ ||

2.4.9.31

tayorbalena no yūyaṃ saṅgrāme jayamāpsyatha |
kimarthaṃ mūḍhatāṃ prāpya prāṇāṃstyaktumihāgatāḥ ||

2.4.9.32

jānantau dharmametau na svārthalampaṭamānasau |
dharmaṃ vinā'marāḥ kṛtyaṃ niṣphalaṃ sakalaṃ bhavet ||

2.4.9.33

mahādhṛṣṭāvimau me'dya kṛtavantau puraśśiśum |
ahaṃ bālaṃ vadhiṣyāmi tayoḥ so'pi bhaviṣyati ||

2.4.9.34

kiṃ tu bāla ito yāyād dūraṃ prāṇaparīpsayā |
ityuktvoddiśya ca harī vīrabhadramuvāca saḥ ||

2.4.9.35

purā hatāstvayā viprā dakṣayajñe hyanekaśaḥ |
tatkarmaṇaḥ phalaṃ cādya darśayiṣyāmi te'nagha ||

2.4.9.36

brahmovāca ityevamuktvā tu vidhūya puṇyaṃ nijaṃ sa tannindanakarmaṇā vai |
jagrāha śaktiṃ paramādbhutāṃ ca sa tārako yuddhavatāṃ variṣṭhaḥ ||

2.4.9.37

taṃ bālāntikamāyāntaṃ tārakāsuramojasā |
ājaghāna ca vajreṇa śakro guhapurassaraḥ ||

2.4.9.38

tena vajraprahāreṇa tārako jarjarīkṛtaḥ |
bhūmau papāta sahasā nindāhatabalaḥ kṣaṇam ||

2.4.9.39

patito'pi samutthāya śaktyā taṃ prāharadruṣā |
purandaraṃ gajasthaṃ hi pātayāmāsa bhūtale ||

2.4.9.40

hāhākāro mahānāsītpatite ca purandare |
senāyāṃ nirjarāṇāṃ hi tad dṛṣṭvā kleśa āviśat ||

2.4.9.41

tārakeṇā'pi tatraiva yatkṛtaṃ karma duḥkhadam |
svanāśakāraṇaṃ dharmaviruddhaṃ tannibodha me ||

2.4.9.41.p1

patitaṃ ca padākramya hastādvajraṃ pragṛhya vai |
punarudvajraghātena śakramātāḍayadbhṛśam | 42 ||

2.4.9.43

evaṃ tiraskṛtaṃ dṛṣṭvā śakraṃ viṣṇuḥ pratāpavān |
cakramudyasya bhagavāṃstārakaṃ sa jaghāna ha ||

2.4.9.44

cakraprahārābhihato nipapāta kṣitau hi saḥ |
punarutthāya daityendraḥ śaktyā viṣṇuṃ jaghāna tam ||

2.4.9.45

tena śaktiprahāreṇa patito bhuvi cācyutaḥ |
hāhākaro mahānāsīccukruśuścā'tinirjarāḥ ||

2.4.9.46

nimeṣeṇa punarviṣṇuryāvaduttiṣṭhate svayam |
tāvatsa vīrabhadro hi tatkṣaṇādāgato'suram ||

2.4.9.47

triśūlaṃ ca samudyamya vīrabhadraḥ pratāpavān |
tārakaṃ ditijādhīśaṃ jaghāna prasabhaṃ balī ||

2.4.9.48

tattriśūlaprahāreṇa sa papāta kṣitau tadā |
patito'pi mahātejāstārakaḥ punarutthitaḥ ||

2.4.9.49

kṛtvā krodhaṃ mahāvīraḥsakalāsuranāyakaḥ |
jaghāna parayā śaktyā vīrabhadraṃ tadorasi ||

2.4.9.50

vīrabhadro'pi patito bhūtale mūrchitaḥ kṣaṇam |
tacchaktyā parayā krodhānnihato vakṣasi dhruvam ||

2.4.9.51

sagaṇāścaiva devāste gandharvoragarākṣasāḥ |
hāhākāreṇa mahatā cukruśuśca muhurmuhuḥ ||

2.4.9.52

nimeṣamātrātsahasā mahaujāḥ ssa vīrabhadro dviṣatāṃ nihantā |
triśūlamudyamya taḍitprakāśaṃ jājvalyamānaṃ prabhayā vireje ||

2.4.9.53

svarociṣā bhāsitadigvitānaṃ sūryendubimbāgnisamānamaṇḍalam |
mahāprabhaṃ vīrabhayāvahaṃ paraṃ kālākhyamatyantakaraṃ mahojjvalam ||

2.4.9.54

yāvattriśūlena tadā hantukāmo mahābalaḥ |
vīrabhadro'suraṃ tāvatkumāreṇa nivāritaḥ ||

2.4.9.54.c1

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe tārakavākyaśakraviṣṇuvīrabhadrayuddhavarṇanaṃ nāma navamo'dhyāyaḥ ||

2.4.9.54.p2

śrīgaṇeśāya namaḥ ||

2.4.9.54.p3

śrīgaurīśaṅkarābhyāṃ namaḥ ||

2.4.9.54.p4

śrīśivamahāpurāṇam ||

2.4.9.54.p5

dvitīyāyāṃ rudrasaṃhitāyāṃ caturthaḥ kumārakhaṇḍe

Linked texts (3)