Shivapurana 2.5.1: prathamo'dhyāyaḥ | tripuravarṇanam
Śivapurāṇa (complete text) 2.5.1
- Language
- Sanskrit
Contents
- 2.5.1.78 — 5 parts
prathamo'dhyāyaḥ | tripuravarṇanam
2.5.1.1
nārada uvāca |
śrutamasmābhirānandapradaṃ caritamuttamam |
gṛhasthasyaiva śambhośca gaṇaskandādisatkatham ||
2.5.1.2
idānīṃ brūhi suprītyā caritaṃ varamuttamam |
śaṅkaro hi yathā rudro jaghāna viharan khalān ||
2.5.1.3
kathaṃ dadāha bhagavānnagarāṇi suradviṣām |
trīṇyekena ca bāṇena yugapatkena vīryavān ||
2.5.1.4
etatsarvaṃ samācakṣva caritaṃ śaśimaulinaḥ |
devarṣisukhadaṃ śaśvanmāyāviharataḥ prabhoḥ ||
2.5.1.5
brahmovāca |
evametatpurā pṛṣṭo vyāsena ṛṣisattama |
sanatkumāraṃ provāca tadeva kathayāmyaham ||
2.5.1.6
sanatkumāra uvāca |
śṛṇu vyāsa mahāprājña caritaṃ śaśimaulinaḥ |
yathā dadāha tripuraṃ bāṇenaikena viśvahṛt ||
2.5.1.7
śivātmajena skandena nihate tārakāsure |
tatputrāstu trayo daityāḥ paryatapyanmunīśvara ||
2.5.1.8
tārakākṣastu tajjyeṣṭho vidyunmālī ca madhyamaḥ |
kamalākṣaḥ kanīyāṃśca sarve tulyabalāḥ sadā ||
2.5.1.9
jitendriyāḥ susannaddhāḥ saṃyatāḥ satyavādinaḥ |
dṛḍhacittā mahāvīrā devadrohiṇa eva ca ||
2.5.1.10
te tu meruguhāṃ gatvā tapaścakrurmahādbhutam |
trayaḥ sarvānsubhogāṃśca vihāya sumanoharān ||
2.5.1.11
vasante sarvakāmāṃśca gītavāditranissvanam |
vihāya sotsavaṃ tepustrayaste tārakātmajāḥ ||
2.5.1.12
grīṣme sūryaprabhāṃ jitvā dikṣu prajvālya pāvakam |
tanmadhyasaṃsthāḥ siddhyarthaṃ juhuvurhavyamādarāt ||
2.5.1.13
mahāpratāpapatitāḥsarve'pyāsan sumūrcchitāḥ |
varṣāsu gatasantrāsā vṛṣṭiṃ mūrddhanyadhārayan ||
2.5.1.14
śaratkāle prabhūtaṃ tu bhojanaṃ tu bubhukṣitāḥ |
ramyaṃ snigdhaṃ sthiraṃ hṛdyaṃ phalaṃ mūlamanuttamam ||
2.5.1.15
saṃyamātkṣuttṛṣo jitvā pānānyuccāvacānyapi |
bubhukṣitebhyo dattvā tu babhūvurupalā iva ||
2.5.1.16
saṃsthitāste mahātmāno nirādhārāścaturdiśam |
hemante girimāśritya dhairyeṇa parameṇa tu ||
2.5.1.17
tuṣāradehasañchannā jalaklinnena vāsasā |
āsādya dehaṃ kṣaumeṇa śiśire toyamadhyagāḥ ||
2.5.1.18
anirviṇṇāstataḥsarve kramaśo'varddhayaṃstapaḥ |
tepustrayaste tatputrā vidhimuddiśya sattamāḥ ||
2.5.1.19
tapa ugraṃ samāsthāya niyame parame sthitāḥ |
tapasā karṣayāmāsurdehān svān dānavottamāḥ ||
2.5.1.20
varṣāṇāṃ śatakaṃ caiva padamekaṃ nidhāya ca |
bhūmau sthitvā paraṃ tatra tepuste balavattarāḥ ||
2.5.1.21
te sahasraṃ tu varṣāṇāṃ vātabhakṣāḥ sudāruṇāḥ |
tapastepurdurātmānaḥ paraṃ tāpamupāgatāḥ ||
2.5.1.22
varṣāṇāṃ tu sahasraṃ vai mastakenāsthitāstathā |
varṣāṇāṃ tu śatenaiva ūrdhvabāhava āsthitāḥ ||
2.5.1.23
evaṃ duḥkhaṃ paraṃ prāptā durāgrahaparā ime |
īdṛk te saṃsthitā daityā divārātramatandritā ||
2.5.1.24
evaṃ teṣāṃ gataḥ kālo mahān sutapatāṃ mune |
brahmātmanāṃ tārakāṇāṃ dharmeṇeti matirmama ||
2.5.1.25
prādurāsīttato brahmā surāsuragururmahān |
santuṣṭastapasā teṣāṃ varaṃ dātuṃ mahāyaśāḥ ||
2.5.1.25_2
munidevāsuraiḥ sārddhaṃ sāntvapūrvamidaṃ vacaḥ |
tatastānabravītsarvān sarvabhūtapitāmahaḥ ||
2.5.1.27
brahmovāca |
prasanno'smi mahādaityā yuṣmākaṃ tapasā mune |
sarvaṃ dāsyāmi yuṣmabhyaṃ varaṃ brūta yadīpsitam ||
2.5.1.28
kimarthaṃ sutapastaptaṃ kathayadhvaṃ suradviṣaḥ |
sarveṣāṃ tapaso dātā sarvakartāsmi sarvadā ||
2.5.1.29
sanatkumāra uvāca |
tasya tadvacanaṃ śrutvā śanaiste svātmano gatam |
ūcuḥ prāñjalayaḥ sarve praṇipatya pitāmaham ||
2.5.1.30
daityā ūcuḥ |
yadi prasanno deveśa yadi deyo varastvayā |
avadhyatvaṃ ca sarveṣāṃ sarvabhūteṣu dehinaḥ ||
2.5.1.31
sthirān kuru jagannātha pāntu naḥ paripanthinaḥ |
jarārogādayaḥ sarve nāsmānmṛtyuragāt kvacit ||
2.5.1.32
ajarāścāmarāḥ sarve bhavāma iti no matam |
samṛtyavaḥ kariṣyāmaḥ sarvānanyāṃstrilokake ||
2.5.1.33
lakṣmyā kiṃ tadvipulayā kiṃ kāryaṃ hi purottamaiḥ |
anyaiśca vipulairbhogaiḥ sthānaiśvaryeṇa vā punaḥ ||
2.5.1.34
yatraiva mṛtyunā grasto niyataṃ pañcabhirdinaiḥ |
vyarthaṃ tasyākhilaṃ brahman niścitaṃ na itīva hi ||
2.5.1.35
sanatkumāra uvāca |
iti śrutvā vacasteṣāṃ daityānāṃ ca tapasvinām |
pratyuvāca śivaṃ smṛtvā svaprabhuṃ giriśaṃ vidhiḥ ||
2.5.1.36
brahmovāca |
nāsti sarvāmaratvaṃ ca nivartadhvamato'surāḥ |
anyaṃ varaṃ vṛṇīdhvaṃ vai yādṛśo vo hi rocate ||
2.5.1.37
jāto haniṣyate nūnaṃ jantuḥ ko'pyasurāḥ kvacit |
ajaraścāmaro loke na bhaviṣyati bhūtale ||
2.5.1.38
ṛte tu khaṇḍaparaśoḥ kālakālāddharestathā |
tau dharmādharmaparamāvavyaktau vyaktarūpiṇau ||
2.5.1.39
sampīḍanāya jagato yadi sa kriyate tapaḥ |
saphalaṃ tadgataṃ vedyaṃ tasmātsuvihitaṃ tapaḥ ||
2.5.1.40
tadvicārya svayaṃ buddhyā na śakyaṃ yatsurāsuraiḥ |
durlabhaṃ vā sudussādhyaṃ mṛtyuṃ vañcayatānaghāḥ ||
2.5.1.41
tatkiñcinmaraṇe hetuṃ vṛṇīdhvaṃ sattvamāśritāḥ |
yena mṛtyurnaiva vṛto rakṣatastatpṛthak pṛthak ||
2.5.1.42
sanatkumāra uvāca |
etadvidhivacaḥ śrutvā muhūrttaṃ dhyānamāsthitāḥ |
procuste cintayitvātha sarvalokapitāmaham ||
2.5.1.43
daityā ūcuḥ |
bhagavannāsti no veśma parākramavatāmapi |
adhṛṣyāḥ śātravānāṃ tu yanna vatsyāmahe sukham ||
2.5.1.44
purāṇi trīṇi no dehi nirmāyātyadbhutāni hi |
sarvasampatsamṛddhānyapradhṛṣyāṇi divaukasām ||
2.5.1.45
vayaṃ purāṇi trīṇyevaṃ samāsthāya mahīmimām |
cariṣyāmo hi lokeśa tvatprasādājjagadguro ||
2.5.1.46
tārakākṣastataḥ prāha yadabhedyaṃ surairapi |
karoti viśvakarmā tanmama hemamayaṃ puram ||
2.5.1.47
yayāce kamalākṣastu rājataṃ sumahatpuram |
vidyunmālī ca saṃhṛṣṭo vajrāyasamayaṃ mahat ||
2.5.1.48
pureṣveteṣu bho brahmannekasthānasthiteṣu ca |
madhyāhnābhijite kāle śītāṃśau puṣya saṃsthite ||
2.5.1.49
uparyuparyadṛṣṭeṣu vyomni līlābhrasaṃsthite |
varṣatsu kālamegheṣu puṣkarāvartanāmasu ||
2.5.1.50
tathā varṣasahasrānte sameṣyāmaḥ parasparam |
ekībhāvaṃ gamiṣyanti purāṇyetāni nānyathā ||
2.5.1.51
sarvadevamayo devaḥ sarveṣāṃ me kuhelayā |
asambhave rathe tiṣṭhan sarvopaskaraṇānvite ||
2.5.1.52
asambhāvyaikakāṇḍena bhinattu nagarāṇi naḥ |
nirvairaḥ kṛttivāsāstu yo'smākamiti nityaśaḥ ||
2.5.1.53
vandyaḥ pūjyo'bhivādyaśca so'smākaṃ nirdahetkatham |
iti cetasi sandhāya tādṛśo bhuvi durlabhaḥ ||
2.5.1.54
sanatkumāra uvāca |
etacchrutvā vacasteṣāṃ brahmā lokapitāmahaḥ |
evamastviti tān prāha sṛṣṭikartā smaran śivam ||
2.5.1.55
ājñāṃ dadau mayasyāpi kuru tvaṃ nagaratrayam |
kāñcanaṃ rājataṃ caiva āyasaṃ ceti bho maya ||
2.5.1.56
ityādiśya mayaṃ brahmā pratyakṣaṃ prāviśaddivam |
teṣāṃ tārakaputrāṇāṃ paśyatāṃ nijadhāma hi ||
2.5.1.57
tato mayaśca tapasā cakre dhīraḥ purāṇyatha |
kāñcanaṃ tārakākṣasya kamalākṣasya rājatam ||
2.5.1.58
vidyunmālyāyasaṃ caiva trividhaṃ durgamuttamam |
svarge vyomni ca bhūmau ca kramājjñeyāni tāni vai ||
2.5.1.59
dattvā tebhyo'surebhyaśca purāṇi trīṇi vai mayaḥ |
praviveśa svayaṃ tatra hitakāmaparāyaṇaḥ ||
2.5.1.60
evaṃ puratrayaṃ prāpya praviṣṭāstārakātmajāḥ |
bubhujuḥ sakalānbhogānmahābalaparākramāḥ ||
2.5.1.61
kalpadrumaiśca saṅkīrṇaṃ gajavājisamākulam |
nānāprāsādasaṅkīrṇaṃ maṇijālasamāvṛtam ||
2.5.1.62
sūryamaṇḍalasaṅkāśairvimānaiḥ sarvatomukhaiḥ |
padmarāgamayaiścaiva śobhitaṃ candrasannibhaiḥ ||
2.5.1.63
prāsādairgopurairdivyaiḥ kailāsaśikharopamaiḥ |
divyastrījanasaṅkīrṇairgandharvassiddhacāraṇaiḥ ||
2.5.1.64
rudrālayaiḥ pratigṛhamagnihotraiḥ pratiṣṭhitaiḥ |
dvijottamaiḥ śāstravijñaiḥ śivabhaktirataiḥ sadā ||
2.5.1.65
vāpīkūpataḍāgaiśca dīrghikābhiḥsuśobhitam |
udyānavanavṛkṣaiśca svargacyutaguṇottamaiḥ ||
2.5.1.66
nadīnadasarinmukhyapuṣkaraiḥ śobhitaṃ sadā |
sarvakāmaphalādyaiścānekairvṛkṣairmanoharam ||
2.5.1.67
mattamātaṅgayūthaiśca turaṅgaiśca suśobhanaiḥ |
rathaiśca vividhākāraiḥ śibikābhiralaṅkṛtam ||
2.5.1.68
samayādiśikaiścaiva krīḍāsthānaiḥ pṛthakpṛthak |
vedādhyayanaśālābhirvividhābhiḥ pṛthakpṛthak ||
2.5.1.69
adṛṣṭaṃ manasā vācā pāpānvitanaraissadā |
mahātmabhiśśubhācāraiḥ puṇyavadbhiḥ pravīkṣyate ||
2.5.1.70
pativratābhiḥ sarvatra pāvitaṃ sthalamuttamam |
patisevanaśīlābhirvimukhābhiḥ kudharmataḥ ||
2.5.1.71
daityaśūrairmahābhāgaiḥ sadāraiḥ sasutairdvijaiḥ |
śrautasmārtārthatattvajñaiḥ svadharmaniratairyutam ||
2.5.1.72
vyūḍhoraskairvṛṣaskandhaiḥ sāmayuddhadharaiḥ sadā |
praśāntaiḥ kupitaiścaiva kubjairvāmanakaistathā ||
2.5.1.73
nīlotpaladalaprakhyairnīlakuñcitamūrddhajaiḥ |
mayena rakṣitaiḥ sarvaiḥ śikṣitairyuddhalālasaiḥ ||
2.5.1.74
varasamararatairyutaṃ samantā-dajaśivapūjanayā viśuddhavīryaiḥ |
ravimarutamahendrasannikāśaiḥ suramathanaiḥ sudṛḍhaiḥ susevitaṃ yat ||
2.5.1.75
śāstravedapurāṇeṣu ye ye dharmāḥ prakīrtitāḥ |
śivapriyāḥsadā devāste dharmāstatra sarvataḥ ||
2.5.1.76
evaṃ labdhavarāste tu daiteyāstārakātmajāḥ |
śaivaṃ mayamupāśritya nivasanti sma tatra ha ||
2.5.1.77
sarvaṃ trailokyamutsārya praviśya nagarāṇi te |
kurvanti sma mahadrājyaṃ śivamārgaratāḥ sadā ||
2.5.1.78
tato mahān gataḥ kālo vasatāṃ puṇyakarmaṇām |
yathāsukhaṃ yathājoṣaṃ sadrājyaṃ kurvatāṃ mune ||
2.5.1.78.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe tripuravadhopākhyāne tripuravarṇanaṃ nāma prathamo'dhyāyaḥ ||
2.5.1.78.p2
śrīgaṇeśāya namaḥ ||
2.5.1.78.p3
śrīgaurīśaṅkarābhyāṃ namaḥ ||
2.5.1.78.p4
śrīśivamahāpurāṇam ||
2.5.1.78.p5
dvitīyāyāṃ rudrasaṃhitāyāṃ pañcamo yuddhakhaṇḍe
2.5.2.1
vyāsa uvāca |
brahmaputra mahāprājña vada me vadatāṃ vara |
tataḥ kimabhavaddevāḥ kathaṃ ca sukhino'bhavan ||
2.5.2.2
brahmovāca |
ityākarṇya vacastasya vyāsasyāmitadhīmataḥ |
sanatkumāraḥ provāca smṛtvā śivapadāmbujam ||
2.5.2.3
sanatkumāra uvāca |
atha tatprabhayā dagdhā devā hīndrādayastathā |
sammantrya duḥkhitāḥ sarve brahmāṇaṃ śaraṇaṃ yayuḥ ||
2.5.2.4
natvā pitāmahaṃ prītyā parikṣipyākhilāḥ surāḥ |
duḥkhaṃ vijñāpayāmāsurvilokyāvasaraṃ tataḥ ||
2.5.2.5
devā ūcuḥ |
dhātastripuranāthena satārakasutena hi |
sarve pratāpitā nūnaṃ mayena tridivaukasaḥ ||
2.5.2.6
ataste śaraṇaṃ yātā duḥkhitā hi vidhe vayam |
kuru tvaṃ tadvadhopāyaṃ sukhinaḥ syāma tadyathā ||
2.5.2.7
sanatkumāra uvāca |
iti vijñāpito devairvihasya bhavakṛdvidhiḥ |
pratyuvācātha tānsarvānmayato bhītamānasān ||
2.5.2.8
brahmovāca |
na bhetavyaṃ surāstebhyo dānavebhyo viśeṣataḥ |
ācakṣe tadvadhopāyaṃ śivaṃ śarvaḥ kariṣyati ||
2.5.2.9
matto vivardhito daityo vadhaṃ matto na cārhati |
tathāpi puṇyaṃ varddheta nagare tripure punaḥ ||
2.5.2.10
śivaṃ ca prārthayadhvaṃ vai sarve devāḥ savāsavāḥ |
sarvādhīśaḥ prasannaścetsa vaḥ kāryaṃ kariṣyati ||
2.5.2.11
sanatkumāra uvāca |
ityākarṇya vidhervāṇīṃ sarve devāḥ savāsavāḥ |
duḥkhitāste yayustatra yatrāste vṛṣabhadhvajaḥ ||
2.5.2.12
praṇamya bhaktyā deveśaṃ sarve prāñjalayastadā |
tuṣṭuvurvinataskandhāḥ śaṅkaraṃ lokaśaṅkaram ||
2.5.2.13
devā ūcuḥ |
namo hiraṇyagarbhāya sarvasṛṣṭividhāyine |
namaḥ sthitikṛte tubhyaṃ viṣṇave prabhaviṣṇave ||
2.5.2.14
namo harasvarūpāya bhūtasaṃhārakāriṇe |
nirguṇāya namastubhyaṃ śivāyāmitatejase ||
2.5.2.15
avasthārahitāyātha nirvikārāya varcase |
mahābhūtātmabhūtāya nirliptāya mahātmane ||
2.5.2.16
namaste bhūtapataye mahābhārasahiṣṇave |
tṛṣṇāharāya nirvairākṛtaye bhūritejase ||
2.5.2.17
mahādaityamahāraṇyanāśine dāvavahnaye |
daityadrumakuṭhārāya namaste śūlapāṇaye ||
2.5.2.18
mahādanujanāśāya namaste parameśvara |
ambikāpataye tubhyaṃ namaḥ sarvāstradhāraka ||
2.5.2.19
namaste pārvatīnātha paramātmanmaheśvara |
nīlakaṇṭhāya rudrāya namaste rudrarūpiṇe ||
2.5.2.20
namo vedāntavedyāya mārgātītāya te namaḥ |
namo guṇasvarūpāya guṇine guṇavarjite ||
2.5.2.21
mahādeva namastubhyaṃ trilokīnandanāya ca |
pradyumnāyāniruddhāya vāsudevāya te namaḥ ||
2.5.2.22
saṅkarṣaṇāya devāya namaste kaṃsanāśine |
cāṇūramardine tubhyaṃ dāmodara viṣādine ||
2.5.2.23
hṛṣīkeśācyuta vibho mṛḍa śaṅkara te namaḥ |
adhokṣaja gajārāte kāmāre viṣabhakṣaṇa ||
2.5.2.24
nārāyaṇāya devāya nārāyaṇaparāya ca |
nārāyaṇasvarūpāya nārāṇayatanūdbhava ||
2.5.2.25
namaste sarvarūpāya mahānarakahāriṇe |
pāpāpahāriṇe tubhyaṃ namo vṛṣabhavāhana ||
2.5.2.26
kṣaṇādikālarūpāya svabhaktabaladāyine |
nānārūpāya rūpāya daityacakravimardine ||
2.5.2.27
namo brahmaṇyadevāya gobrāhmaṇahitāya ca |
sahasramūrttaye tubhyaṃ sahasrāvayavāya ca ||
2.5.2.28
dharmarūpāya sattvāya namaḥ sattvātmane hara |
vedavedyasvarūpāya namo vedapriyāya ca ||
2.5.2.29
namo vedasvarūpāya vedavaktre namo namaḥ |
sadācārādhvagamyāya sadācārādhvagāmine ||
2.5.2.30
viṣṭaraśravase tubhyaṃ namaḥ satyamayāya ca |
satyapriyāya satyāya satyagamyāya te namaḥ ||
2.5.2.31
namaste māyine tubhyaṃ māyādhīśāya vai namaḥ |
brahmagāya namastubhyaṃ brahmaṇe brahmajāya ca ||
2.5.2.32
tapase te namastvīśa tapasā phaladāyine |
stutyāya stutaye nityaṃ stutisamprītacetase ||
2.5.2.33
śrutyācāraprasannāya stutyācārapriyāya ca |
caturvidhasvarūpāya jalasthalajarūpiṇe ||
2.5.2.34
sarve devādayo nātha śreṣṭhatvena vibhūtayaḥ |
devānāmindrarūpo'si grahāṇāṃ tvaṃ ravirmataḥ ||
2.5.2.35
satyaloko'si lokānāṃ saritāṃ dyusaridbhavān |
śvetavarṇo'si varṇānāṃ sarasāṃ mānasaṃ saraḥ ||
2.5.2.36
śailānāṃ girijātātaḥ kāmadhuktvaṃ ca goṣu ha |
kṣīrodadhistu sindhūnāṃ dhātūnāṃ hāṭako bhavān ||
2.5.2.37
varṇānāṃ brāhmaṇo'si tvaṃ nṛṇāṃ rājāsi śaṅkara |
muktikṣetreṣu kāśī tvaṃ tīrthānāṃ tīrtharāḍ bhavān ||
2.5.2.38
upaleṣu samasteṣu sphaṭikastvaṃ maheśvara |
kamalastvaṃ prasūneṣu śaileṣu himavāṃstathā ||
2.5.2.39
bhavānvāgvyavahāreṣu bhārgavastvaṃ kaviṣvapi |
pakṣiṣvevāsi śarabhaḥ siṃho hiṃsreṣu sammataḥ ||
2.5.2.40
śālagrāmaśilā ca tvaṃ śilāsu vṛṣabhadhvaja |
pūjyarūpeṣu sarveṣu narmadāliṅgameva hi ||
2.5.2.41
nandīśvaro'si paśuṣu vṛṣabhaḥ parameśvara |
vedeṣūpaniṣadrūpī yajvanāṃ śītabhānumān ||
2.5.2.42
pratāpināṃ pāvakastvaṃ śaivānāmacyuto bhavān |
bhārataṃ tvaṃ purāṇānāṃ makāro'syakṣareṣu ca ||
2.5.2.43
praṇavo bījamantrāṇāṃ dāruṇānāṃ viṣaṃ bhavān |
vyomavyāptimatāṃ tvaṃ vai paramātmāsi cātmanām ||
2.5.2.44
indriyāṇāṃ manaśca tvaṃ dānānāmabhayaṃ bhavān |
pāvanānāṃ jalaṃ cāsi jīvanānāṃ tathāmṛtam ||
2.5.2.45
lābhānāṃ putralābho'si vāyurvegavatāmasi |
nityakarmasu sarveṣu sandhyopāstirbhavānmataḥ ||
2.5.2.46
kratūnāmaśvamedho'si yugānāṃ prathamo yugaḥ |
puṣyastvaṃ sarvadhiṣṇyānāmamāvāsyā tithiṣvasi ||
2.5.2.47
sarvartuṣu vasantastvaṃ sarvaparvasu saṅkramaḥ |
kuśo'si tṛṇajātīnāṃ sthūlavṛkṣeṣu vai vaṭaḥ ||
2.5.2.48
yogeṣu ca vyatīpātaḥsomavallī latāsu ca |
buddhīnāṃ dharmabuddhistvaṃ kalatraṃ suhṛdāṃ bhavān ||
2.5.2.49
sādhakānāṃ śucīnāṃ tvaṃ prāṇāyāmo maheśvara |
jyotirliṅgeṣu sarveṣu bhavān viśveśvaro mataḥ ||
2.5.2.50
dharmastvaṃ sarvabandhūnāmāśramāṇāṃ paro bhavān |
mokṣastvaṃ sarvavargeṣu rudrāṇāṃ nīlalohitaḥ ||
2.5.2.51
ādityānāṃ vāsudevo hanūmānvānareṣu ca |
yajñānāṃ japayajño'si rāmaḥ śastrabhṛtāṃ bhavān ||
2.5.2.52
gandharvāṇāṃ citraratho vasūnāṃ pāvako dhruvam |
māsānāmadhimāsastvaṃ vratānāṃ tvaṃ caturdaśī ||
2.5.2.53
airāvato gajendrāṇāṃ siddhānāṃ kapilo mataḥ |
anantastvaṃ hi nāgānāṃ pitṝṇāmaryamā bhavān ||
2.5.2.54
kālaḥ kalayatāṃ ca tvaṃ daityānāṃ balireva ca |
kiṃ bahūktena deveśa sarvaṃ viṣṭabhya vai jagat ||
2.5.2.55
ekāṃśena sthitastvaṃ hi bahiḥstho'nvita eva ca ||
2.5.2.56
sanatkumāra uvāca |
iti stutvā surāḥ sarve mahādevaṃ vṛṣadhvajam |
stotrairnānāvidhairdivyaiḥ śūlinaṃ parameśvaram ||
2.5.2.57
pratyūcuḥ prastutaṃ dīnāḥ svārthaṃ svārthavicakṣaṇāḥ |
vāsavādyā nataskandhāḥ kṛtāñjalipuṭā mune ||
2.5.2.58
devā ūcuḥ |
parājitā mahādeva bhrātṛbhyāṃ sahitena tu |
bhagavaṃstārakotpannaiḥ sarve devāḥ savāsavāḥ ||
2.5.2.59
trailokyaṃ svavaśaṃ nītaṃ tathā ca munisattamāḥ |
vidhvastāḥ sarvasaṃsiddhāḥ sarvamutsāditaṃ jagat ||
2.5.2.60
yajñabhāgānsamagrām̐stu svayaṃ gṛhṇāti dāruṇaḥ |
pravartito hyadharmastairṛṣīṇāṃ ca nivāritaḥ ||
2.5.2.61
avadhyāḥ sarvabhūtānāṃ niyataṃ tārakātmajāḥ |
tadicchayā prakurvanti sarve karmāṇi śaṅkara ||
2.5.2.62
yāvanna kṣīyate daityairghoraistripuravāsibhiḥ |
tāvadvidhīyatāṃ nītiryayā saṃrakṣyate jagat ||
2.5.2.63
sanatkumāra uvāca |
ityākarṇya vacasteṣāmindrādīnāṃ divaukasām |
śivaḥ sambhāṣamāṇānāṃ prativākyamuvāca saḥ ||
2.5.2.63.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe devastutirnāma dvitīyo'dhyāyaḥ ||
2.5.2.63.p2
śrīgaṇeśāya namaḥ ||
2.5.2.63.p3
śrīgaurīśaṅkarābhyāṃ namaḥ ||
2.5.2.63.p4
śrīśivamahāpurāṇam ||
2.5.2.63.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (4)
- Liṅgapurāṇa — Vyāsa, Sanskrit
- Pārameśvarasaṃhitā — Sanskrit
- Liṅgapurāṇa — Ativīrarāma Pāṇṭiyar 1500, Sanskrit
- Samūrtārcanādhikaraṇa — Atri, Sanskrit