Shivapurana 2.5.10: daśamo'dhyāyaḥ | tripuradāhavarṇanam
Śivapurāṇa (complete text) 2.5.10
- Language
- Sanskrit
Contents
- 2.5.10.44 — 5 parts
daśamo'dhyāyaḥ | tripuradāhavarṇanam
2.5.10.1
sanatkumāra uvāca |
atha śambhurmahādevo rathasthaḥ sarvasaṃyutaḥ |
tripuraṃ sakalaṃ dagdhumudyato'bhūtsuradviṣām ||
2.5.10.2
śīrṣaṃ sthānakamāsthāya sandhāya ca śarottamam |
sajjaṃ tatkārmukaṃ kṛtvā pratyālīḍhaṃ mahādbhutam ||
2.5.10.3
niveśya dṛḍhamuṣṭau ca dṛṣṭiṃ dṛṣṭau niveśya ca |
atiṣṭhanniścalastatra śataṃ varṣasahasrakam ||
2.5.10.4
tato'ṅguṣṭhe gaṇādhyakṣaḥ sa tudatyaniśaṃ sthitaḥ |
na lakṣyaṃ viviśustāni purāṇyasya triśūlinaḥ ||
2.5.10.5
tato'ntarikṣādaśṛṇoddhanurbāṇadharo haraḥ |
muñjakeśo virūpākṣo vācaṃ paramaśobhanām ||
2.5.10.6
bho bho na yāvadbhagavannarcito'sau vināyakaḥ |
purāṇi jagadīśeśa sāmprataṃ na haniṣyati ||
2.5.10.7
etacchrutvā tu vacanaṃ gajavaktramapūjayat |
bhadrakālīṃ samāhūya tato'ndhakaniṣūdanaḥ ||
2.5.10.8
tasmin sampūjite harṣātparituṣṭe purassare |
vināyake tato vyomni dadarśa bhagavānharaḥ ||
2.5.10.9
purāṇi trīṇi daityānāṃ tārakāṇāṃ mahātmanām |
yathātathaṃ hi yuktāni keciditthaṃ vadanti ha ||
2.5.10.10
parabrahmaṇi deveśa sarvopāsye maheśvare |
anyaprasādataḥ kāryasiddhirghaṭati neti hi ||
2.5.10.11
sa svatantraḥ paraṃ brahma saguṇo nirguṇo'pi ha |
alakṣyaḥ sakalaiḥ svāmī paramātmā nirañjanaḥ ||
2.5.10.12
pañcadevātmakaḥ pañcadevopāsyaḥ paraḥ prabhuḥ |
tasyopāsyo na ko'pyasti sa evopāsya ālayam ||
2.5.10.13
athavā līlayā tasya sarvaṃ saṅghaṭate mune |
caritaṃ devadevasya varadāturmaheśituḥ ||
2.5.10.14
tasmiṃsthite mahādeve pūjayitvā gaṇādhipam |
purāṇi tatra kālena jagmurekatvamāśu vai ||
2.5.10.15
ekībhāvaṃ mune tatra tripure samupāgate |
babhūva tumulo harṣo devādīnāṃ mahātmanām ||
2.5.10.16
tato devagaṇāḥ sarve siddhāśca paramarṣayaḥ |
jayeti vāco mumucuḥ stuvantaścāṣṭamūrtikam ||
2.5.10.17
athāheti tadā brahmā viṣṇuśca jagatāṃ patiḥ |
samayo'pi samāyāto daityānāṃ vadhakarmaṇaḥ ||
2.5.10.18
teṣāṃ tārakaputrāṇāṃ tripurāṇāṃ maheśvara |
devakāryaṃ kuru vibho ekatvamapi cāgatam ||
2.5.10.19
yāvanna yānti deveśa viprayogaṃ purāṇi vai |
tāvadbāṇaṃ vimuñcasva tripuraṃ bhasmasātkuru ||
2.5.10.20
atha sajyaṃ dhanuḥ kṛtvā śarvaḥ sandhāya taṃ śaram |
pūjyaṃ pāśupatāstraṃ sa tripuraṃ samacintayat ||
2.5.10.21
atha devo mahādevo varalīlāviśāradaḥ |
kenāpi kāraṇenātra sāvajñaṃ tadavaikṣata ||
2.5.10.22
puratrayaṃ virūpākṣaḥ kartuṃ tadbhasmasātkṣaṇāt |
samarthaḥ parameśāno jānātu ca satāṃ gatiḥ ||
2.5.10.23
dagdhuṃ samartho deveśo vīkṣaṇena jagattrayam |
asmadyaśo vivṛddhyarthaṃ śaraṃ moktumihārhasi ||
2.5.10.24
iti stuto'maraiḥ sarvairviṣṇvādividhibhistadā |
dagdhuṃ puratrayaṃ tadvai bāṇenaicchanmaheśvaraḥ ||
2.5.10.25
muhūrte'bhijidākhye tu vikṛṣya dhanuradbhutam |
kṛtvā jyātalanirghoṣaṃ nādamatyantadussaham ||
2.5.10.26
ātmano nāma viśrāvya samābhāṣya mahāsurān |
mārtaṇḍakoṭivapuṣaṃ kāṇḍamugro mumoca ha ||
2.5.10.27
dadāha tripurasthāṃstāndaityām̐strīnvimalāpahaḥ |
sa āśugo viṣṇumayo vahniśalyo mahājvalan ||
2.5.10.28
tataḥ purāṇi dagdhāni caturjaladhimekhalām |
gatāni yugapadbhūmiṃ trīṇi dagdhāni bhasmaśaḥ ||
2.5.10.29
daityāstu śataśo dagdhāstasya bāṇasthavahninā |
hāhākāraṃ prakurvantaśśivapūjāvyatikramāt ||
2.5.10.30
tārakākṣastu nirdagdho bhrātṛbhyāṃ sahito'bhavat |
sasmāra svaprabhuṃ devaṃ śaṅkaraṃ bhaktavatsalam ||
2.5.10.31
bhaktyā paramayā yuktaḥ pralapan vividhā giraḥ |
mahādevaṃ samudvīkṣya manasā tamuvāca saḥ ||
2.5.10.32
tārakākṣa uvāca |
bhava jñāto'si tuṣṭo'si yadyasmān saha bandhubhiḥ |
tena satyena bhūyo'pi kadā tvaṃ pradahiṣyasi ||
2.5.10.33
durlabhaṃ labdhamasmābhiryadaprāpyaṃ surāsuraiḥ |
tvadbhāvabhāvitā buddhirjāte jāte bhavatviti ||
2.5.10.34
ityevaṃ vibruvantaste dānavāstena vahninā |
śivājñayādbhutaṃ dagdhā bhasmasādabhavanmune ||
2.5.10.35
anye'pi bālā vṛddhāśca dānavāstena vahninā |
śivājñayā drutaṃ vyāsa nirdagdhā bhasmasātkṛtāḥ ||
2.5.10.36
striyo vā puruṣā vāpi vāhanāni ca tatra ye |
sarve tenāgninā dagdhāḥ kalpānte tu jagadyathā ||
2.5.10.37
bhartṛnkaṇṭhagatānhitvā kāściddagdhā varastriyaḥ |
kāścitsuptāḥ pramattāśca ratiśrāntāśca yoṣitaḥ ||
2.5.10.38
arddhadagdhā vibuddhāśca babhramurmohamūrcchitāḥ |
tena nāsītsusūkṣmo'pi ghoratripuravahninā ||
2.5.10.39
avidagdho vinirmuktaḥ sthāvaro jaṅgamo'pi vā |
varjayitvā mayaṃ daityaṃ viśvakarmāṇamavyayam ||
2.5.10.40
aviruddhaṃ tu devānāṃ rakṣitaṃ śambhutejasā |
vipatkāle'pi sadbhaktaṃ maheśaśaraṇāgatam ||
2.5.10.41
sannipāto hi yeṣāṃ no vidyate nāśakārakaḥ |
daityānāmanyasattvānāṃ bhāvābhāve kṛtākṛte ||
2.5.10.42
tasmādyatnaḥ susambhāvyaḥ sadbhiḥ kartavya eva hi |
garhaṇātkṣīyate loko na tatkarma samācaret ||
2.5.10.43
na saṃyogo yathā teṣāṃ bhūyāt tripuravāsinām |
matametaddhi sarveṣāṃ daivādyadi yato bhavet ||
2.5.10.44
ye pūjayantastatrāpi daityā rudraṃ sabāndhavāḥ |
gāṇapatyaṃ yayuḥ sarve śivapūjāvidherbalāt ||
2.5.10.44.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe tripuradāhavarṇanaṃ nāma daśamo'dhyāyaḥ ||
2.5.10.44.p2
śrīgaṇeśāya namaḥ ||
2.5.10.44.p3
śrīgaurīśaṅkarābhyāṃ namaḥ ||
2.5.10.44.p4
śrīśivamahāpurāṇam ||
2.5.10.44.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (3)
- Liṅgapurāṇa — Vyāsa, Sanskrit
- Saurapurāṇa — Sanskrit
- Liṅgapurāṇa — Ativīrarāma Pāṇṭiyar 1500, Sanskrit