Shivapurana 2.5.11: ekādaśo'dhyāyaḥ | devastutivarṇanam
Śivapurāṇa (complete text) 2.5.11
- Language
- Sanskrit
Contents
- 2.5.11.41 — 5 parts
ekādaśo'dhyāyaḥ | devastutivarṇanam
2.5.11.1
vyāsa uvāca |
brahmaputra mahāprājña dhanyastvaṃ śaivasattama |
kimakārṣustato devā dagdhe ca tripure'khilāḥ ||
2.5.11.2
mayaḥ kutra gato'dagdho yatayaḥ kutra te gatāḥ |
tatsarvaṃ me samācakṣva yadi śambhukathāśrayam ||
2.5.11.3
sūta uvāca |
vyāsavākyaṃ samākarṇya bhagavānbhavakṛtsutaḥ |
sanatkumāraḥ provāca śivapādayugaṃ smaran ||
2.5.11.4
sanatkumāra uvāca |
śṛṇu vyāsa mahābuddhe pārāśaryya maheśituḥ |
caritaṃ sarvapāpaghnaṃ lokalīlānusāriṇaḥ ||
2.5.11.5
maheśvareṇa sarvasmiṃstripure daityasaṅkule |
dagdhe viśeṣatastatra vismitāste'bhavansurāḥ ||
2.5.11.6
na kiñcidabruvandevāḥ sendropendrādayastadā |
mahātejasvinaṃ rudraṃ sarve vīkṣya sasambhramāḥ ||
2.5.11.7
mahābhayaṅkaraṃ raudraṃ prajvalantaṃ diśo daśa |
koṭisūryapratīkāśaṃ pralayānalasannibham ||
2.5.11.8
bhayāddevaṃ nirīkṣyaiva devīṃ ca himavatsutām |
bibhyire nikhilā devapramukhāstasthurānatāḥ ||
2.5.11.9
dṛṣṭvānīkaṃ tadā bhītaṃ devānāmṛṣipuṅgavāḥ |
na kiñcidūcuḥ santasthuḥ praṇemuste samantataḥ ||
2.5.11.10
atha brahmāpi sambhīto dṛṣṭvā rūpaṃ ca śāṅkaram |
tuṣṭāva tuṣṭahṛdayo devaiḥ saha samāhitaḥ ||
2.5.11.11
viṣṇunā ca sabhītena devadevaṃ bhavaṃ haram |
tripurāriṃ sagirijaṃ bhaktādhīnaṃ maheśvaram ||
2.5.11.12
brahmovāca |
devadeva mahādeva bhaktānugrahakāraka |
prasīda parameśāna sarvadevahitaprada ||
2.5.11.13
prasīda jagatāṃ nātha prasīdānandadāyaka |
prasīda śaṅkara svāmin prasīda parameśvara ||
2.5.11.14
oṅkārāya namastubhyamākāraparatāraka |
prasīda sarvadeveśa tripuraghna maheśvara ||
2.5.11.15
nānāvācyāya devāya praṇatapriya śaṅkara |
aguṇāya namastubhyaṃ prakṛteḥ puruṣātpara ||
2.5.11.16
nirvikārāya nityāya nityatṛptāya bhāsvate |
nirañjanāya divyāya triguṇāya namo'stu te ||
2.5.11.17
saguṇāya namastubhyaṃ svargeśāya namostu te |
sadāśivāya śāntāya maheśāya pinākine ||
2.5.11.18
sarvajñāya śaraṇyāya sadyojātāya te namaḥ |
vāmadevāya rudrāya tadāpyapuruṣāya ca ||
2.5.11.19
aghorāya susevyāya bhaktādhīnāya te namaḥ |
īśānāya vareṇyāya bhaktānandapradāyine ||
2.5.11.20
rakṣa rakṣa mahādeva bhītānnaḥ sakalāmarān |
dagdhvā ca tripuraṃ sarve kṛtārthā amarāḥ kṛtāḥ ||
2.5.11.21
stutvaivaṃ devatāḥsarve namaskāraṃ pṛthakpṛthak |
cakruste paramaprītā brahmādyāstu sadāśivam ||
2.5.11.22
atha brahmā svayaṃ devaṃ tripurāriṃ maheśvaram |
tuṣṭāva praṇato bhūtvā nataskandhaḥ kṛtāñjaliḥ ||
2.5.11.23
brahmovāca |
bhagavandevadeveśa tripurāntaka śaṅkara |
tvayi bhaktiḥ parā me'stu mahādevānapāyinī ||
2.5.11.24
sarvadā me'stu sārathyaṃ tava deveśa śaṅkara |
anukūlo bhava vibho sadā tvaṃ parameśvara ||
2.5.11.25
sanatkumāra uvāca |
iti stutvā vidhiḥ śambhuṃ bhaktavatsalamānataḥ |
virarāma nataskandhaḥ kṛtāñjalirudāradhīḥ ||
2.5.11.26
janārdano'pi bhagavān namaskṛtya maheśvaram |
kṛtāñjalipuṭo bhūtvā tuṣṭāva ca maheśvaram ||
2.5.11.27
viṣṇuruvāca |
devādhīśa maheśāna dīnabandho kṛpākara |
prasīda parameśāna kṛpāṃ kuru natapriya ||
2.5.11.28
nirguṇāya namastubhyaṃ punaśca saguṇāya ca |
punaḥ prakṛtirūpāya punaśca puruṣāya ca ||
2.5.11.29
paścād guṇasvarūpāya nato viśvātmane namaḥ |
bhaktipriyāya śāntāya śivāya paramātmane ||
2.5.11.30
sadāśivāya rudrāya jagatāṃ pataye namaḥ |
tvayi bhaktirdṛḍhā me'dya varddhamānā bhavatviti ||
2.5.11.31
sanatkumāra uvāca |
ityuktvā virarāmāsau śaivapravarasattamaḥ |
sarve devāḥ praṇamyocustatastaṃ parameśvaram ||
2.5.11.32
devā ūcuḥ |
devanātha mahādeva karuṇākara śaṅkara |
prasīda jagatāṃ nātha prasīda parameśvara ||
2.5.11.33
prasīda sarvakartā tvaṃ namāmastvāṃ vayaṃ mudā |
tvayi bhaktirdṛḍhāsmākaṃ nityaṃ syādanapāyinī ||
2.5.11.34
sanatkumāra uvāca |
iti stutaśca deveśo brahmaṇā hariṇāmaraiḥ |
pratyuvāca prasannātmā śaṅkaro lokaśaṅkaraḥ ||
2.5.11.35
śaṅkara uvāca |
he vidhe he hare devāḥ prasanno'smi viśeṣataḥ |
mano'bhilaṣitaṃ brūta varaṃ sarve vicārataḥ ||
2.5.11.36
sanatkumāraḥ uvāca |
ityuktaṃ vacanaṃ śrutvā hareṇa munisattama |
pratyūcuḥ sarvadevāśca prasannenāntarātmanā ||
2.5.11.37
sarve devā ūcuḥ |
yadi prasanno bhagavanyadi deyo varastvayā |
devadeveśa cāsmabhyaṃ jñātvā dāsānhi naḥ surān ||
2.5.11.38
yadā duḥkhaṃ tu devānāṃ sambhaveddevasattama |
tadā tvaṃ prakaṭo bhūtvā duḥkhaṃ nāśaya sarvadā ||
2.5.11.39
sanatkumāra uvāca |
ityukto bhagavān rudro brahmaṇā hariṇāmaraiḥ |
yugapatprāha tuṣṭātmā tathetyastu nirantaram ||
2.5.11.40
stavairetaiśca tuṣṭo'smi dāsyāmi sarvadā dhruvam |
yadabhīṣṭatamaṃ loke paṭhatāṃ śṛṇvatāṃ surāḥ ||
2.5.11.41
ityuktvā śaṅkaraḥ prīto devaduḥkhaharaḥ sadā |
sarvadevapriyaṃ yadvai tatsarvaṃ ca pradattavān ||
2.5.11.41.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe devastutivarṇanaṃ nāmaikādaśo'dhyāyaḥ ||
2.5.11.41.p2
śrīgaṇeśāya namaḥ ||
2.5.11.41.p3
śrīgaurīśaṅkarābhyāṃ namaḥ ||
2.5.11.41.p4
śrīśivamahāpurāṇam ||
2.5.11.41.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (1)
- Nāradapurāṇa — Vyāsa, Sanskrit