Shivapurana 2.5.12: dvādaśo'dhyāyaḥ | devastutivarṇanam
Śivapurāṇa (complete text) 2.5.12
- Language
- Sanskrit
Contents
- 2.5.12.41 — 5 parts
dvādaśo'dhyāyaḥ | devastutivarṇanam
2.5.12.1
sanatkumāra uvāca |
etasminnantare śambhuṃ prasannaṃ vīkṣya dānavaḥ |
tatrājagāma suprīto mayo'dagdhaḥ kṛpābalāt ||
2.5.12.2
praṇanāma haraṃ prītyā surānanyānapi dhruvam |
kṛtāñjalirnataskandhaḥ praṇanāma punasśivam ||
2.5.12.3
athotthāya śivaṃ dṛṣṭvā premṇā gadgadasusvaraḥ |
tuṣṭāva bhaktipūrṇātmā sa dānavavaro mayaḥ ||
2.5.12.4
maya uvāca |
devadeva mahādeva bhaktavatsala śaṅkara |
kalpavṛkṣasvarūpo'si sarvapakṣavivarjitaḥ ||
2.5.12.5
jyotīrūpo namaste'stu viśvarūpa namo'stu te |
namaḥ pūtātmane tubhyaṃ pāvanāya namo namaḥ ||
2.5.12.6
citrarūpāya nityāya rūpātītāya te namaḥ |
divyarūpāya divyāya sudivyākṛtaye namaḥ ||
2.5.12.7
namaḥ praṇatasarvārtināśakāya śivātmane |
kartre bhartre ca saṃhartre trilokānāṃ namo namaḥ ||
2.5.12.8
bhaktigamyāya bhaktānāṃ namastubhyaṃ kṛpālave |
tapaḥsatphaladātre te śivākānta śiveśvara ||
2.5.12.9
na jānāmi stutiṃ kartuṃ stutipriya pareśvara |
prasanno bhava sarveśa pāhi māṃ śaraṇāgatam ||
2.5.12.10
sanatkumāra uvāca |
ityākarṇya mayoktāṃ hi saṃstutiṃ parameśvaraḥ |
prasanno'bhūd dvijaśreṣṭha mayaṃ provāca cādarāt ||
2.5.12.11
śiva uvāca |
varaṃ brūhi prasanno'haṃ maya dānavasattama |
mano'bhilaṣitaṃ yatte taddāsyāmi na saṃśayaḥ ||
2.5.12.12
sanatkumāra uvāca |
śrutvā śivaṃ vacaḥ śambhoḥ sa mayo dānavarṣabhaḥ |
pratyuvāca prabhuṃ natvā nataskandhaḥ kṛtāñjaliḥ ||
2.5.12.13
maya uvāca |
devadeva mahādeva prasanno yadi me bhavān |
varayogyo'smyahaṃ ceddhi svabhaktiṃ dehi śāśvatīm ||
2.5.12.14
svabhakteṣu sadā sakhyaṃ dīneṣu ca dayāṃ sadā |
upekṣāmanyajīveṣu khaleṣu parameśvara ||
2.5.12.15
kadāpi nāsuro bhāvo bhavenmama maheśvara |
nirbhayaḥ syāṃ sadā nātha magnastvadbhajane śubhe ||
2.5.12.16
sanatkumāra uvāca |
iti samprārthyamānastu śaṅkaraḥ parameśvaraḥ |
pratyuvāca mayaṃ nāthaḥ prasanno bhaktavatsalaḥ ||
2.5.12.17
maheśvara uvāca |
dānavarṣabha dhanyastvaṃ madbhakto nirvikāravān |
pradattāste varāḥ sarve'bhīpsitā ye tavādhunā ||
2.5.12.18
gaccha tvaṃ vitalaṃ lokaṃ ramaṇīyaṃ divo'pi hi |
sametaḥ parivāreṇa nijena mama śāsanāt ||
2.5.12.19
nirbhayastatra santiṣṭha saṃhṛṣṭo bhaktimānsadā |
kadāpi nāsuro bhāvo bhaviṣyati madājñayā ||
2.5.12.20
sanatkumāra uvāca |
ityājñāṃ śirasādhāya śaṅkarasya mahātmanaḥ |
taṃ praṇamya surāṃścāpi vitalaṃ prajagāma saḥ ||
2.5.12.21
etasminnantare te vai muṇḍinaśca samāgatāḥ |
praṇamyocuśca tānsarvānviṣṇubrahmādikān surān ||
2.5.12.22
kutra yāma vayaṃ devāḥ karma kiṃ karavāmahe |
ājñāpayata naḥ śīghraṃ bhavadādeśakārakān ||
2.5.12.23
kṛtaṃ duṣkarma cāsmābhirhe hare he vidhe surāḥ |
daityānāṃ śivabhaktānāṃ śivabhaktirvināśitā ||
2.5.12.24
koṭikalpāni narake no vāsastu bhaviṣyati |
noddhāro bhavitā nūnaṃ śivabhaktavirodhinām ||
2.5.12.25
parantu bhavadicchāta idaṃ duṣkarma naḥ kṛtam |
tacchāntiṃ kṛpayā brūta vayaṃ vaḥ śaraṇāgatāḥ ||
2.5.12.26
sanatkumāra uvāca |
teṣāṃ tadvacanaṃ śrutvā viṣṇubrahmādayaḥsurāḥ |
abruvanmuṇḍinastāṃste sthitānagre kṛtāñjalīn ||
2.5.12.27
viṣṇvādaya ūcuḥ |
na bhetavyaṃ bhavadbhistu muṇḍino vai kadācana |
śivājñayedaṃ sakalaṃ jātaṃ caritamuttamam ||
2.5.12.28
yuṣmākaṃ bhavitā naiva kugatirduḥkhadāyinī |
śivadāsā yato yūyaṃ devarṣihitakārakāḥ ||
2.5.12.29
surarṣihitakṛcchambhuḥ surarṣihitakṛtpriyaḥ |
surarṣihitakṛnnṝṇāṃ kadāpi kugatirna hi ||
2.5.12.30
adyato matametaṃ hi praviṣṭānāṃ nṛṇāṃ kalau |
kugatirbhavitā brūmaḥ satyaṃ naivātra saṃśayaḥ ||
2.5.12.31
bhavadbhirmuṇḍino dhīrā guptabhāvānmamājñayā |
tāvanmarusthalī sevyā kaliryāvatsamāvrajet ||
2.5.12.32
āgate ca kalau yūyaṃ svamataṃ sthāpayiṣyatha |
kalau tu mohitā mūḍhāḥsaṅgrahīṣyanti vo matam ||
2.5.12.33
ityājñaptāḥ sureśaiśca muṇḍinaste munīśvara |
namaskṛtya gatāstatra yathoddiṣṭaṃ svamāśramam ||
2.5.12.34
tataḥ sa bhagavān rudro dagdhvā tripuravāsinaḥ |
kṛtakṛtyo mahāyogī brahmādyairabhipūjitaḥ ||
2.5.12.35
svagaṇairnikhilairdevyā śivayā sahitaḥ prabhuḥ |
kṛtvāmaramahatkāryaṃ sasuto'ntaradhādatha ||
2.5.12.36
tataścāntarhite deve parivārānvite śive |
dhanuḥ śararathādyaiśca prākāro'ntarddhimāgamat ||
2.5.12.37
tato brahmā harirdevā munigandharvakinnarāḥ |
nāgāḥ sarpāścāpsarasaḥ saṃhṛṣṭāścātha mānuṣāḥ ||
2.5.12.38
svaṃ svaṃ sthānaṃ mudā jagmuḥ śaṃsantaḥ śāṅkaraṃ yaśaḥ |
svaṃ svaṃ sthānamanuprāpya nirvṛtiṃ paramāṃ yayuḥ ||
2.5.12.39
etatte kathitaṃ sarvaṃ caritaṃ śaśimaulinaḥ |
tripurakṣayasaṃsūci paralīlānvitaṃ mahat ||
2.5.12.40
dhanyaṃ yaśasyamāyuṣyaṃ dhanadhānyapravarddhakam |
svargadaṃ mokṣadaṃ cāpi kiṃ bhūyaḥ śrotumicchasi ||
2.5.12.41
idaṃ hi paramākhyānaṃ yaḥ paṭhecchṛṇuyātsadā |
iha bhuktvākhilānkāmān ante muktimavāpnuyāt ||
2.5.12.41.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe sanatkumārapārāśaryyasaṃvāde tripuravadhānantaradevastutimayastutimuṇḍiniveśanadevasvasthānagamanavarṇanaṃ nāma dvādaśo'dhyāyaḥ ||
2.5.12.41.p2
śrīgaṇeśāya namaḥ ||
2.5.12.41.p3
śrīgaurīśaṅkarābhyāṃ namaḥ ||
2.5.12.41.p4
śrīśivamahāpurāṇam ||
2.5.12.41.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (1)
- Merutantra — Gommaṭa, Sanskrit