Pramāṇa · Search · About · API

Shivapurana 2.5.13: trayodaśo'dhyāyaḥ | jalandharavadhopākhyāne śakrajīvanam

Śivapurāṇa (complete text) 2.5.13

Language
Sanskrit

Contents

trayodaśo'dhyāyaḥ | jalandharavadhopākhyāne śakrajīvanam

2.5.13.1

vyāsa uvāca |
bho brahmanbhagavanpūrvaṃ śrutaṃ me brahmaputraka |
jalandharaṃ mahādaityamavadhīcchaṅkaraḥ prabhuḥ ||

2.5.13.2

tattvaṃ vada mahāprājña caritaṃ śaśimaulinaḥ |
vistārapūrvakaṃ śṛṇvankastṛpyettadyaśo'malam ||

2.5.13.3

sūta uvāca |
ityevaṃ vyāsasampṛṣṭo brahmaputro mahāmuniḥ |
uvācārthavadavyagraṃ vākyaṃ vākyaviśāradaḥ ||

2.5.13.4

sanatkumāra uvāca |
ekadā jīvaśakrau ca bhaktyā paramayā mune |
darśanaṃ kartumīśasya kailāsaṃ jagmaturbhṛśam ||

2.5.13.5

atha gurvindrayorjñātvā''gamanaṃ śaṅkaraḥ prabhuḥ |
parīkṣituṃ tayorjñānaṃ svadarśanaratātmanoḥ ||

2.5.13.6

digambaro'tha tanmārgamāruddhya sadgatiḥ satām |
jaṭābaddhena śirasātiṣṭhatsaṃśobhitānanaḥ ||

2.5.13.7

atha tau guruśakrau ca kurvantau gamanaṃ mudā |
ālokya puruṣaṃ bhīmaṃ mārgamadhye'dbhutākṛtim ||

2.5.13.6_2

mahātejasvinaṃ śāntaṃ jaṭāsambaddhamastakam |
mahābāhuṃ mahoraskaṃ gauraṃ nayanabhīṣaṇam ||

2.5.13.9

atho purandaro'pṛcchatsvādhikāreṇa durmadaḥ |
puruṣaṃ taṃ svamārgāntaḥ sthitamajñāya śaṅkaram ||

2.5.13.10

purandara uvāca |
kastvaṃ bhoḥ kuta āyātaḥ kiṃ nāma vada tattvataḥ |
svasthāne saṃsthitaḥ śambhuḥ kiṃ vānyatra gataḥ prabhuḥ ||

2.5.13.11

sanatkumāra uvāca |
śakreṇetthaṃ sa pṛṣṭastu kiñcinnovāca tāpasaḥ |
śakraḥ punarapṛcchadvai novāca sa digambaraḥ ||

2.5.13.12

punaḥ purandaro'pṛcchallokānāmadhipeśvaraḥ |
tūṣṇīmāsa mahāyogī līlārūpadharaḥ prabhuḥ ||

2.5.13.13

itthaṃ punaḥ punaḥ pṛṣṭaḥ śakreṇa sa digambaraḥ |
novāca kiñcidbhagavān śakrajñānaparīkṣayā ||

2.5.13.14

atha cukrodha deveśastrailokyaiśvaryagarvitaḥ |
uvāca vacanaṃ caiva taṃ nirbhartsya jaṭādharam ||

2.5.13.15

indra uvāca |
re mayā pṛcchyamāno'pi nottaraṃ dattavānasi |
atastvāṃ hanmi vajreṇa kaste trātāsti durmate ||

2.5.13.16

sanatkumāra uvāca |
ityudīrya tato vajrī sannirīkṣya krudhā hi tam |
hantuṃ digambaraṃ vajramudyataṃ sa cakāra ha ||

2.5.13.17

purandaraṃ vajrahastaṃ dṛṣṭvā devassadāśivaḥ |
cakāra stambhanaṃ tasya vajrapātasya śaṅkaraḥ ||

2.5.13.18

tato rudraḥ krudhāviṣṭaḥ karālākṣo bhayaṅkaraḥ |
drutameva prajajvāla tejasā pradahanniva ||

2.5.13.19

bāhupratiṣṭambhabhuvā manyunāntaḥ śacīpatiḥ |
samadahyata bhogīva mantraruddhaparākramaḥ ||

2.5.13.20

dṛṣṭvā bṛhaspatistūrṇaṃ prajvalantaṃ svatejasā |
puruṣaṃ taṃ dhiyā jñātvā praṇanāma haraṃ prabhum ||

2.5.13.21

kṛtāñjalipuṭo bhūtvā tato gururudāradhīḥ |
natvā ca daṇḍavadbhūmau prabhuṃ stotuṃ pracakrame ||

2.5.13.22

gururuvāca |
namo devādhidevāya mahādevāya cātmane |
maheśvarāya prabhave tryambakāya kapardine ||

2.5.13.23

dīnanāthāya vibhave namo'ndhakaniṣūdine |
tripuraghnāya śarvāya brahmaṇe parameṣṭhine ||

2.5.13.24

virūpākṣāya rudrāya bahurūpāya śambhave |
virūpāyātirūpāya rūpātītāya te namaḥ ||

2.5.13.25

yajñavidhvaṃsakartre ca yajñānāṃ phaladāyine |
namaste makharūpāya parakarmapravartine ||

2.5.13.26

kālāntakāya kālāya kālabhogidharāya ca |
namaste parameśāya sarvatra vyāpine namaḥ ||

2.5.13.27

namo brahmaśirohantre brahmacandra stutāya ca |
brahmaṇyāya namaste'stu namaste paramātmane ||

2.5.13.28

tvamagniranilo vyoma tvamevāpo vasundharā |
tvaṃ sūryaścandramā bhāni jyotiścakraṃ tvameva hi ||

2.5.13.29

tvameva viṣṇustvaṃ brahmā tatstutastvaṃ pareśvaraḥ |
munayaḥ sanakādyāstvaṃ nāradastvaṃ tapodhanaḥ ||

2.5.13.30

tvameva sarvalokeśastvameva jagadātmakaḥ |
sarvānvayaḥ sarvabhinnastvameva prakṛteḥ paraḥ ||

2.5.13.31

tvaṃ vai sṛjasi lokāṃśca rajasā vidhināmabhāk |
sattvena harirūpastvaṃ sakalaṃ yāsi vai jagat ||

2.5.13.32

tvamevāsi mahādeva tamasā hararūpadhṛk |
līlayā bhuvanaṃ sarvaṃ nikhilaṃ pāñcabhautikam ||

2.5.13.33

tvaddhyānabalataḥsūryastapate viśvabhāvana |
amṛtaṃ cyavate loke śaśī vāti samīraṇaḥ ||

2.5.13.34

tvaddhyānabalato meghāścāmbu varṣanti śaṅkara |
tvaddhyānabalataḥ śakrastrilokīṃ pāti putravat ||

2.5.13.35

tvaddhyānabalato meghāḥ sarve devā munīśvarāḥ |
svādhikāraṃ ca kurvanti cakitā bhavato bhayāt ||

2.5.13.36

tvatpādakamalasyaiva sevanādbhuvi mānavāḥ |
nādriyante surān rudra lokaiśvaryaṃ ca bhuñjate ||

2.5.13.37

tvatpādakamalasyaiva sevanādagamanparām |
gatiṃ yogadhanānāmapyagamyāṃ sarvadurlabhām ||

2.5.13.38

sanatkumāra uvāca |
bṛhaspatiriti stutvā śaṅkaraṃ lokaśaṅkaram |
pādayoḥ pātayāmāsa tasyeśasya purandaram ||

2.5.13.39

pātayitvā ca deveśamindraṃ nataśirodharam |
bṛhaspatiruvācedaṃ praśrayāvanataśśivam ||

2.5.13.40

bṛhaspatiruvāca |
dīnānātha mahādeva praṇataṃ tava pādayoḥ |
samuddhara ca śāntaṃ svaṃ krodhaṃ nayanajaṃ kuru ||

2.5.13.41

tuṣṭo bhava mahādeva pāhīndraṃ śaraṇāgatam |
agnireṣa śamaṃ yātu bhālanetrasamudbhavaḥ ||

2.5.13.42

sanatkumāra uvāca |
ityākarṇya gurorvākyaṃ devadevo maheśvaraḥ |
uvāca karuṇāsindhurmeghanirhrādayā girā ||

2.5.13.43

maheśvara uvāca |
krodhaṃ ca nissṛtaṃ netrāddhārayāmi bṛhaspate |
kathaṃ hi kañcukīṃ sarpaḥ sandhatte nojjhitāṃ punaḥ ||

2.5.13.43.p1

sanatkumāra uvācu iti śrutvā vacastasya śaṅkarasya bṛhaspatiḥ ||

2.5.13.43.p2

uvāca kliṣṭarūpaśca bhayavyākulamānasaḥ | 44 ||

2.5.13.45

bṛhaspatiruvāca |
he deva bhagavanbhaktā anukampyāḥ sadaiva hi |
bhaktavatsalanāmeti tvaṃ satyaṃ kuru śaṅkara ||

2.5.13.46

kṣeptumanyatra deveśa svatejo'tyugramarhasi |
uddhartaḥ sarvabhaktānāṃ samuddhara purandaram ||

2.5.13.47

sanatkumāra uvāca |
ityukto guruṇā rudro bhaktavatsalanāmabhāk |
pratyuvāca prasannātmā surejyaṃ praṇatārttihā ||

2.5.13.48

śiva uvāca |
prītaḥ stutyānayā tāta dadāmi varamuttamam |
indrasya jīvadānena jīveti tvaṃ prathāṃ vraja ||

2.5.13.49

samudbhūto'nalo yo'yaṃ bhālanetrātsureśahā |
enaṃ tyakṣyāmyahaṃ dūre yathendraṃ naiva pīḍayet ||

2.5.13.49.p1

sanatkumāra uvāc |
ityuktvā taṃ kare dhṛtvā svatejo'nalamadbhutam ||

2.5.13.49.p2

bhālanetrātsamudbhūtaṃ prākṣipallavaṇāmbhasi | 50 ||

2.5.13.51

tataścāntardadhe rudro mahālīlākaraḥ prabhuḥ |
guruśakrau bhayānmuktau jagmatuḥ sukhamuttamam ||

2.5.13.52

yadarthaṃ gamanodyuktau darśanaṃ prāpya tasya vai |
kṛtārthau guruśakrau hi svasthānaṃ jagmaturmudā ||

2.5.13.52.c1

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalandharavadhopākhyāne śakrajīvanaṃ nāma trayodaśo'dhyāyaḥ ||

2.5.13.52.p2

śrīgaṇeśāya namaḥ ||

2.5.13.52.p3

śrīgaurīśaṅkarābhyāṃ namaḥ ||

2.5.13.52.p4

śrīśivamahāpurāṇam ||

2.5.13.52.p5

dvitīyāyāṃ rudrasaṃhitāyāṃ pañcamo yuddhakhaṇḍe

Linked texts (3)