Shivapurana 2.5.14: caturdaśo'dhyāyaḥ | jalandharavadhopākhyāne jalandharotpattivivāhavarṇanam
Śivapurāṇa (complete text) 2.5.14
- Language
- Sanskrit
Contents
caturdaśo'dhyāyaḥ | jalandharavadhopākhyāne jalandharotpattivivāhavarṇanam
2.5.14.1
vyāsa uvāca |
sanatkumāra sarvajña brahmaputra namo'stu te |
śruteyamadbhutā me'dya kathā śambhormahātmanaḥ ||
2.5.14.2
kṣipte svatejasi brahmanbhālanetrasamudbhave |
lavaṇāmbhasi kiṃ tātābhavattatra vadāśu tat ||
2.5.14.3
sanatkumāra uvāca |
śṛṇu tāta mahāprājña śivalīlāṃ mahādbhutām |
yacchrutvā śraddhayā bhakto yogināṃ gatimāpnuyāt ||
2.5.14.4
atho śivasya tattejo bhālanetrasamudbhavam |
kṣiptaṃ ca lavaṇāmbhodhau sadyo bālatvamāpa ha ||
2.5.14.5
tatra vai sindhugaṅgāyāḥ sāgarasya ca saṅgame |
rurodoccaiḥ sa vai bālaḥ sarvalokabhayaṅkaraḥ ||
2.5.14.6
rudatastasya śabdena prākampaddharaṇī muhuḥ |
svargaśca satyalokaśca tatsvanād badhirīkṛtaḥ ||
2.5.14.7
bālasya rodanenaiva sarve lokāśca tatrasuḥ |
sarvato lokapālāśca vihvalīkṛtamānasāḥ ||
2.5.14.8
kiṃ bahūktena viprendra cacāla sacarācaram |
bhuvanaṃ nikhilaṃ tāta rodanāttacchiśorvibho ||
2.5.14.9
atha te vyākulāḥ sarve devāḥ samunayo drutam |
pitāmahaṃ lokaguruṃ brahmāṇaṃ śaraṇaṃ yayuḥ ||
2.5.14.10
tatra gatvā ca te devā munayaśca savāsavāḥ |
praṇamya ca susaṃstutya procustaṃ parameṣṭhinam ||
2.5.14.11
devā ūcuḥ |
lokādhīśa surādhīśa bhayaṃ naḥ samupasthitam |
tannāśaya mahāyogin jāto'yaṃ hyadbhuto ravaḥ ||
2.5.14.11.p1
sanatkumāra uvāca |
ityākarṇya vacasteṣāṃ brahmā lokapitāmahaḥ ||
2.5.14.11.p2
gantumaicchattatastatra kimetaditi vismitaḥ | 12 ||
2.5.14.13
tato brahmā suraistātāvataratsatyalokataḥ |
rasāṃ tajjñātumicchansa samudramagamattadā ||
2.5.14.14
yāvattatrāgato brahmā sarvalokapitāmahaḥ |
tāvatsamudrasyotsaṅge taṃ bālaṃ sa dadarśa ha ||
2.5.14.15
āgataṃ vidhimālokya devarūpyatha sāgaraḥ |
praṇamya śirasā bālaṃ tasyotsaṅge nyaveśayat ||
2.5.14.16
tato brahmābravīdvākyaṃ sāgaraṃ vismayānvitaḥ |
jalarāśe drutaṃ brūhi kasyāyaṃ śiśuradbhutaḥ ||
2.5.14.17
sanatkumāra uvāca |
brahmaṇo vākyamākarṇya muditaḥ sāgarastadā |
pratyuvāca prajeśaṃ sa natvā stutvā kṛtāñjaliḥ ||
2.5.14.18
samudra uvāca |
bho bho brahmanmayā prāpto bālako'yamajānatā |
prabhavaṃ sindhugaṅgāyāmakasmātsarvalokapa ||
2.5.14.19
jātakarmādisaṃskārānkuruṣvāsya jagadguro |
jātakoktaphalaṃ sarvaṃ vidhātarvaktumarhasi ||
2.5.14.20
sanatkumāra uvāca |
evaṃ vadati pāthodhau sa bālaḥ sāgarātmajaḥ |
brahmāṇamagrahītkaṇṭhe vidhunvantaṃ muhurmuhuḥ ||
2.5.14.21
vidhūnanaṃ ca tasyaivaṃ sarvalokakṛto vidheḥ |
pīḍitasya ca kāleya netrābhyāmagamajjalam ||
2.5.14.22
karābhyāmabdhijātasya tatsutasya mahaujasaḥ |
kathañcinmuktakaṇṭhastu brahmā provāca sādaram ||
2.5.14.23
brahmovāca |
śṛṇu sāgara vakṣyāmi tavāsya tanayasya hi |
jātakoktaphalaṃ sarvaṃ samādhānarataḥ khalu ||
2.5.14.24
netrābhyāṃ vidhṛtaṃ yasmādanenaiva jalaṃ mama |
tasmājjalandharetīha khyāto nāmnā bhavatvasau ||
2.5.14.25
adhunaivaiṣa taruṇaḥ sarvaśāstrārthapāragaḥ |
mahāparākramo dhīro yoddhā ca raṇadurmadaḥ ||
2.5.14.26
bhaviṣyati ca gambhīraḥ tvaṃ yathā samare guhaḥ |
sarvajetā ca saṅgrāme sarvasampadvirājitaḥ ||
2.5.14.27
daityānāmadhipo bālaḥ sarveṣāṃ ca bhaviṣyati |
viṣṇorapi bhavejjetā na kutaścitparābhavaḥ ||
2.5.14.28
avadhyaḥ sarvabhūtānāṃ vinā rudraṃ bhaviṣyati |
yata eṣa samudbhūtastatredānīṃ gamiṣyati ||
2.5.14.29
pativratāsya bhavitā patnī saubhāgyavarddhinī |
sarvāṅgasundarī ramyā priyavākchīlasāgarā ||
2.5.14.30
sanatkumāra uvāca |
ityuktvā śukramāhūya rājye taṃ cābhyaṣecayat |
āmantrya saritāṃ nāthaṃ brahmāntarddhānamanvagāt ||
2.5.14.31
atha taddarśanotphullanayanaḥ sāgarastadā |
tamātmajaṃ samādāya svagehamagamanmudā ||
2.5.14.32
apoṣayanmahopāyaiḥ svabālaṃ muditātmakaḥ |
sarvāṅgasundaraṃ ramyaṃ mahādbhutasutejasam ||
2.5.14.33
athāmbudhiḥ samāhūya kālanemiṃ mahāsuram |
vṛndābhidhāṃ sutāṃ tasya tadbhāryārthamayācata ||
2.5.14.34
kālanemyasuro vīro'surāṇāṃ pravaraḥ sudhīḥ |
sādhu menembudheryācñāṃ svakarmanipuṇo mune ||
2.5.14.35
jalandharāya vīrāya sāgaraprabhavāya ca |
dadau brahmavidhānena svasutāṃ prāṇavallabhām ||
2.5.14.36
tadotsavo mahānāsīdvivāhe ca tayostadā |
sukhaṃ prāpurnadā nadyo'surāścaivākhilā mune ||
2.5.14.37
samudro'ti sukhaṃ prāpa sutaṃ dṛṣṭvā hi sastriyam |
dānaṃ dadau dvijātibhyo'pyanyebhyaśca yathāvidhi ||
2.5.14.38
ye devairnirjitāḥ pūrvaṃ daityāḥ pātālasaṃsthitāḥ |
te hi bhūmaṇḍalaṃ yātā nirbhayāḥ tamupāśritāḥ ||
2.5.14.39
te kālanemipramukhāstato'surāḥ tasmai sutāṃ sindhusutāya dattvā |
babhūvuratyantamudānvitā hi tamāśritā devavinirjayāya ||
2.5.14.40
sa cāpi vīro'mbudhibālako'sau jalandharākhyo'suravīravīraḥ |
samprāpya bhāryāmatisundarīṃ vaśī cakāra rājyaṃ hi kaviprabhāvāt ||
2.5.14.40.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalandharavadhopākhyāne jalandharotpattivivāhavarṇanaṃ nāma caturdaśo'dhyāyaḥ ||
2.5.14.40.p2
śrīgaṇeśāya namaḥ ||
2.5.14.40.p3
śrīgaurīśaṅkarābhyāṃ namaḥ ||
2.5.14.40.p4
śrīśivamahāpurāṇam ||
2.5.14.40.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Padmapurāṇa — Vyāsa, Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit