Shivapurana 2.5.16: ṣoḍaśo'dhyāyaḥ | devayuddhavarṇanam
Śivapurāṇa (complete text) 2.5.16
- Language
- Sanskrit
Contents
ṣoḍaśo'dhyāyaḥ | devayuddhavarṇanam
2.5.16.1
sanatkumāra uvāca |
punardaityaṃ samāyāntaṃ dṛṣṭvā devāḥ savāsavāḥ |
bhayātprakampitāḥ sarve sahaivādudruvurdrutam ||
2.5.16.2
vaikuṇṭhaṃ prayayuḥ sarve puraskṛtya prajāpatim |
tuṣṭuvuste surā natvā saprajāpatayo'khilāḥ ||
2.5.16.3
devā ūcuḥ |
hṛṣīkeśa mahābāho bhagavan madhusūdana |
namaste devadeveśa sarvadaityavināśaka ||
2.5.16.4
matsyarūpāya te viṣṇo vedānnītavate namaḥ |
satyavratena sadrājñā pralayābdhivihāriṇe ||
2.5.16.5
kurvāṇānāṃ surāṇāṃ ca mathanāyodyamaṃ bhṛśam |
bibhrate mandaragiriṃ kūrmarūpāya te namaḥ ||
2.5.16.6
namaste bhagavannātha kratave sūkarātmane |
vasundharāṃ janādhārāṃ mūrddhato bibhrate namaḥ ||
2.5.16.7
vāmanāya namastubhyamuprendrākhyāya viṣṇave |
viprarūpeṇa daityendraṃ baliṃ chalayate vibho ||
2.5.16.8
namaḥ paraśurāmāya kṣatraniḥ kṣatrakāriṇe |
māturhitakṛte tubhyaṃ kupitāyāsatāṃ druhe ||
2.5.16.9
rāmāya lokarāmāya maryādāpuruṣāya te |
rāvaṇāntakarāyāśu sītāyāḥ pataye namaḥ ||
2.5.16.10
namaste jñānagūḍhāya kṛṣṇāya paramātmane |
rādhāvihāraśīlāya nānālīlākarāya ca ||
2.5.16.11
namaste gūḍhadehāya vedanindākarāya ca |
yogācāryāya jaināya bauddharūpāya māpate ||
2.5.16.12
namaste kalkirūpāya mlecchānāmantakāriṇe |
anantaśaktirūpāya saddharmasthāpanāya ca ||
2.5.16.13
namaḥ kapilarūpāya devahūtyai mahātmane |
vadate sāṅkhyayogaṃ ca sāṅkhyācāryāya vai prabho ||
2.5.16.14
namaḥ paramahaṃsāya jñānaṃ saṃvadate param |
vidhātre jñānarūpāya yenātmā samprasīdati ||
2.5.16.15
vedavyāsāya vedānāṃ vibhāgaṃ kurvate namaḥ |
hitāya sarvalokānāṃ purāṇaracanāya ca ||
2.5.16.16
evaṃ matsyāditanubhirbhaktakāryodyatāya te |
sargasthitidhvaṃsakartre namaste brahmaṇe prabho ||
2.5.16.16.p1
ārtihantre svadāsānāṃ sukhadāya śubhāya ca |
pītāmbarāya haraye tārkṣyayānāya te namaḥ ||
2.5.16.16.p2
sarvakriyāyaikakartre śaraṇyāya namo namaḥ | 17 ||
2.5.16.18
daityasantāpitāmartyaduḥkhādidhvaṃsavajraka |
śeṣatalpaśayāyārkacandranetrāya te namaḥ ||
2.5.16.19
kṛpāsindho ramānātha pāhi naḥ śaraṇāgatān |
jalandhareṇa devāśca svargātsarve nirākṛtāḥ ||
2.5.16.20
sūryo nissāritaḥ sthānāccandro vahnistathaiva ca |
pātālānnāgarājaśca dharmarājo nirākṛtaḥ ||
2.5.16.21
vicaranti yathā martyāḥ śobhante naiva te surāḥ |
śaraṇaṃ te vayaṃ prāptā vadhastasya vicintyatām ||
2.5.16.22
sanatkumāra uvāca |
iti dīnavacaḥ śrutvā devānāṃ madhusūdanaḥ |
jagāda karuṇāsindhurmeghanirhrādayā girā ||
2.5.16.23
viṣṇuruvāca |
bhayaṃ tyajata he devā gamiṣyāmyahamāhavam |
jalandhareṇa daityena kariṣyāmi parākramam ||
2.5.16.24
ityuktvā sahasotthāya daityāriḥ khinnamānasaḥ |
ārohadgaruḍaṃ vegātkṛpayā bhaktavatsalaḥ ||
2.5.16.25
gacchantaṃ vallabhaṃ dṛṣṭvā devaissārddhaṃ samudrajā |
sāñjalirbāṣpanayanā lakṣmīrvacanamabravīt ||
2.5.16.26
lakṣmyuvāca |
ahaṃ te vallabhā nātha bhaktā yadi ca sarvadā |
tatkathaṃ te mama bhrātā yuddhe vadhyaḥ kṛpānidhe ||
2.5.16.27
viṣṇuruvāca |
jalandhareṇa daityena kariṣyāmi parākramam |
taiḥ saṃstuto gamiṣyāmi yuddhāya tvaritānvitaḥ ||
2.5.16.28
rudrāṃśasambhavatvācca brahmaṇo vacanādapi |
prītyā ca tava naivāyaṃ mama vadhyo jalandharaḥ ||
2.5.16.29
sanatkumāra uvāca |
ityuktvā garuḍārūḍhaḥ śaṅkhacakragadāsibhṛt |
viṣṇurvegādyayau yoddhuṃ devaiḥ śakrādibhissaha ||
2.5.16.30
drutaṃ sa prāpa tatraiva yatra daityo jalandharaḥ |
kurvan siṃharavaṃ devairjvaladbhirviṣṇutejasā ||
2.5.16.31
athāruṇānujajavapakṣavātaprapīḍitāḥ |
vātyāvivartitā daityā babhramuḥ khe yathā ghanāḥ ||
2.5.16.32
tato jalandharo dṛṣṭvā daityān vātyāprapīḍitān |
uddhṛtya vacanaṃ krodhād drutaṃ viṣṇuṃ samabhyagāt ||
2.5.16.33
etasminnantare devāścakruryuddhaṃ praharṣitāḥ |
tejasā ca hareḥ puṣṭā mahābalasamanvitāḥ ||
2.5.16.34
yuddhodyataṃ samālokya devasainyamupasthitam |
daityānājñāpayāmāsa samare cātidurmadān ||
2.5.16.35
jalandhara uvāca |
bho bho daityavarā yūyaṃ yuddhaṃ kuruta dustaram |
śakrādyairamarairadya prabalaiḥ kātaraiḥ sadā ||
2.5.16.36
mauryāstu lakṣasaṅkhyātā dhaumrā hi śatasaṅkhyakāḥ |
asurāḥ koṭisaṅkhyātāḥ kālakeyāstathaiva ca ||
2.5.16.37
kālakānāṃ daurhṛdānāṃ kaṅkānāṃ lakṣasaṅkhyayā |
anye'pi svabalairyuktā viniryāntu mamājñayā ||
2.5.16.38
sarve sajjā viniryāta bahusenābhisaṃyutāḥ |
nānāśastrāstrasaṃyuktā nirbhayā gatasaṃśayāḥ ||
2.5.16.39
bho bho śumbhaniśumbhau ca devānsamarakātarān |
kṣaṇena sumahāvīryau tucchānnāśayataṃ yuvām ||
2.5.16.40
sanatkumāra uvāca |
daityā jalandharājñaptā itthaṃ yuddhaviśāradāḥ |
yuyudhuste'surāḥ sarve caturaṅgabalānvitāḥ ||
2.5.16.41
gadābhistīkṣṇabāṇaiśca śūlapaṭṭiśatomaraiḥ |
kecitparaśuśūlaiśca nijaghnuste parasparam ||
2.5.16.41.p1
nānāyudhaiḥ paraistatra nijaghnuste balānvitāḥ |
devāstathā mahāvīrā hṛṣīkeśabalānvitāḥ |
yuyudhustīkṣṇabāṇāśca kṣipantaḥ siṃhavadravāḥ | 42 ||
2.5.16.43
kecidbāṇaiḥ sutīkṣṇaiśca kecinmusalatomaraiḥ |
kecitparaśuśūlaiśca nijaghnuste parasparam ||
2.5.16.44
itthaṃ surāṇāṃ daityānāṃ saṅgrāmaḥ samabhūnmahān |
atyulbaṇo munīnāṃ hi siddhānāṃ bhayakārakaḥ ||
2.5.16.44.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalandharavadhopākhyāne devayuddhavarṇanaṃ nāma ṣoḍaśo'dhyāyaḥ ||
2.5.16.44.p2
śrīgaṇeśāya namaḥ ||
2.5.16.44.p3
śrīgaurīśaṅkarābhyāṃ namaḥ ||
2.5.16.44.p4
śrīśivamahāpurāṇam ||
2.5.16.44.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Padmapurāṇa — Vyāsa, Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit