Pramāṇa · Search · About · API

Shivapurana 2.5.17: saptadaśo'dhyāyaḥ | jalandharopākhyāne viṣṇujalandharayuddhavarṇanam

Śivapurāṇa (complete text) 2.5.17

Language
Sanskrit

Contents

saptadaśo'dhyāyaḥ | jalandharopākhyāne viṣṇujalandharayuddhavarṇanam

2.5.17.1

sanatkumāra uvāca |
atha daityā mahāvīryāḥ śūlaiḥ paraśupaṭṭiśaiḥ |
nijaghnuḥsarvadevāṃśca bhayavyākulamānasān ||

2.5.17.2

daityāyudhaiḥ samāviddhadehā devāḥ savāsavāḥ |
raṇādvidudruvuḥ sarve bhayavyākulamānasāḥ ||

2.5.17.3

palāyanaparān dṛṣṭvā hṛṣīkeśaḥ surānatha |
viṣṇurvai garuḍārūḍho yoddhumabhyāyayau drutam ||

2.5.17.4

sudarśanena cakreṇa sarvataḥ prasphuran rucā |
suśobhitakarābjaśca reje bhaktābhayaṅkaraḥ ||

2.5.17.5

śaṅkhakhaḍgagadāśārṅgadhārī krodhasamanvitaḥ |
kaṭhorāstro mahāvīraḥ sarvayuddhaviśāradaḥ ||

2.5.17.6

dhanuṣaṃ śārṅganāmānaṃ visphūryya vinanāda ha |
tasya nādena trailokyaṃ pūritaṃ mahatā mune ||

2.5.17.7

śārṅganissṛtabāṇaiśca ditijānāṃ śirāṃsi vai |
cakartta bhagavān viṣṇuḥ koṭiśo ruṭsamākulaḥ ||

2.5.17.8

athāruṇānujajavapakṣavātaprapīḍitāḥ |
vātyāvivarttitā daityā babhramuḥ khe yathā ghanāḥ ||

2.5.17.9

tato jalandharo dṛṣṭvā daityānvātyāprapīḍitān |
cukrodhāti mahādaityo devavṛndabhayaṅkaraḥ ||

2.5.17.10

marddayantaṃ ca taṃ dṛṣṭvā daityān prasphuritādharaḥ |
yoddhumabhyāyayau vīro vegena hariṇā saha ||

2.5.17.11

sa cakāra mahānādaṃ devāsurabhayaṅkaram |
daityānāmadhipaḥ karṇā vidīrṇāḥ śravaṇāttataḥ ||

2.5.17.12

bhayaṃṅkareṇa daityasya nādenāpūritaṃ tadā |
jalandharasya mahatā cakampe sakalaṃ jagat ||

2.5.17.13

tataḥ samabhavadyuddhaṃ viṣṇudaityendrayormahat |
ākāśaṃ kurvatorbāṇaistadā niravakāśavat ||

2.5.17.14

tayośca tena yuddhena parasparamabhūnmune |
devāsurarṣisiddhānāṃ bhīkareṇātivismayaḥ ||

2.5.17.15

viṣṇurdaityasya bāṇaughairdhvajaṃ chatraṃ dhanuḥ śarān |
ciccheda taṃ ca hṛdaye bāṇenaikena tāḍayan ||

2.5.17.16

tato daityaḥ samutpatya gadāpāṇistvarānvitaḥ |
āhatya garuḍaṃ mūrdhni pātayāmāsa bhūtale ||

2.5.17.17

viṣṇuṃ jaghāna śūlena tīkṣṇena prasphuradrucā |
hṛdaye krodhasaṃyukto daityaḥ prasphuritādharaḥ ||

2.5.17.18

viṣṇurgadāṃ ca khaḍgena ciccheda prahasanniva |
taṃ vivyādha śaraistīkṣṇaiḥ śārṅgaṃ visphūrya daityahā ||

2.5.17.19

viṣṇurjalandharaṃ daityaṃ bhayadena śareṇa ha |
krodhāviṣṭo'titīkṣṇena jaghānāśu surārihā ||

2.5.17.20

āgataṃ tasya taṃ bāṇaṃ dṛṣṭvā daityo mahābalaḥ |
chittvā bāṇena viṣṇuṃ ca jaghāna hṛdaye drutam ||

2.5.17.21

keśavo'pi mahābāhuṃ vikṣiptamasureṇa tam |
śaraṃ tilapramāṇena cchittvā vīro nanāda ha ||

2.5.17.22

punarbāṇaṃ samādhatta dhanuṣi krodhavepitaḥ |
mahābalo'tha bāṇena ciccheda sa śilīmukham ||

2.5.17.23

vāsudevaḥ punarbāṇaṃ nāśāya vibudhadviṣaḥ |
krodhenādhatta dhanuṣi siṃhavadvinanāda ha ||

2.5.17.24

jalandharo'tha daityendraḥ kopācchinnādharo balī |
śareṇa svena śārṅgākhyaṃ dhanuściccheda vaiṣṇavam ||

2.5.17.25

punarbāṇaiḥ sutīkṣṇaiśca jaghāna madhusūdanam |
ugravīryo mahāvīro devānāṃ bhayakārakaḥ ||

2.5.17.26

sa cchinnadhanvā bhagavān keśavo lokarakṣakaḥ |
jalandharasya nāśāya cikṣepa svagadāṃ parām ||

2.5.17.27

sā gadā hariṇā kṣiptā jvalajjvalanasannibhā |
amoghagatikā śīghraṃ tasya dehe lalāga ha ||

2.5.17.28

tayā hato mahādaityo na cacālāpi kiñcana |
jalandharo madonmattaḥ puṣpamālāhato yathā ||

2.5.17.29

tato jalandharaḥ krodhī devatrāsakaro'kṣipat |
triśūlamanalākāraṃ haraye raṇadurmmadaḥ ||

2.5.17.30

atha viṣṇustattriśūlaṃ ciccheda tarasā drutam |
nandakākhyena khaḍgena smṛtvā śivapadāmbujam ||

2.5.17.31

chinne triśūle daityendra utplutya sahasā drutam |
āgatya hṛdaye viṣṇuṃ jaghāna dṛḍhamuṣṭinā ||

2.5.17.32

so'pi viṣṇurmahāvīro'vigaṇayya ca tadvyathāma |
jalandharaṃ ca hṛdaye jaghāna dṛḍhamuṣṭinā ||

2.5.17.33

tatastau bāhuyuddhena yuyudhāte mahābalau |
bāhubhirmuṣṭibhiścaiva jānubhirnādayanmahīm ||

2.5.17.34

evaṃ hi suciraṃ yuddhaṃ kṛtvā tenāsureṇa vai |
vismito'bhūnmuniśreṣṭha hṛdi glānimavāpa ha ||

2.5.17.35

atha prasanno bhagavānmāyī māyāvidāṃ varaḥ |
uvāca daityarājānaṃ meghagambhīrayā girā ||

2.5.17.36

viṣṇuruvāca |
bho bho daityavaraśreṣṭha dhanyastvaṃ raṇadurmadaḥ |
mahāyudhavarairyattvaṃ na bhīto hi mahāprabhuḥ ||

2.5.17.37

ebhirevāyudhairugrairdaityā hi bahavo hatāḥ |
mahājau durmadā vīrāśchinnadehā mṛtiṃ gatāḥ ||

2.5.17.38

yuddhena te mahādaitya prasanno'smi mahānbhavān |
na dṛṣṭastvatsamo vīrastrailokye sacarācare ||

2.5.17.39

varaṃ varaya daityendra prīto'smi tava vikramāt |
adeyamapi te dadmi yatte manasi vartate ||

2.5.17.40

sanatkumāra uvāca |
ityākarṇya vacastasya viṣṇormāyāvino hareḥ |
pratyuvāca mahābuddhirdaityarājo jalandharaḥ ||

2.5.17.41

jalandhara uvāca |
yadi bhāvuka tuṣṭo'si varametaṃ dadasva me |
madbhaginyā mayā sārddhaṃ madgehe sagaṇo vasa ||

2.5.17.42

sanatkumāra uvāca |
tadākarṇya vacastasya mahādaityasya khinnadhīḥ |
tathāstviti ca deveśo jagāda bhagavān hariḥ ||

2.5.17.43

uvāsa sa tato viṣṇuḥ sarvadevagaṇaissaha |
jalandharaṃ nāma puramāgatya ramayā saha ||

2.5.17.44

atho jalandharo daityaḥ svabhaginyā ca viṣṇunā |
uvāsa svālayaṃ prāpto harṣākulitamānasaḥ ||

2.5.17.45

jalandharo'tha devānāmadhikāreṣu dānavān |
sthāpayitvā saharṣaḥ san punarāgānmahītalam ||

2.5.17.46

devagandharvasiddheṣu yatkiñcidratnasañcitam |
tadātmavaśagaṃ kṛtvā'tiṣṭhatsāgaranandanaḥ ||

2.5.17.47

pātālabhavane daityaṃ niśumbhaṃ sumahābalam |
sthāpayitvā sa śeṣādīnānayadbhūtalaṃ balī ||

2.5.17.48

devagandharvasiddhaughān sarparākṣasamānuṣān |
svapure nāgarānkṛtvā śaśāsa bhuvanatrayam ||

2.5.17.49

evaṃ jalandharaḥ kṛtvā devānsvavaśavartinaḥ |
dharmeṇa pālayāmāsa prajāḥ putrānivaurasān ||

2.5.17.50

na kaścidvyādhito naiva duḥkhito na kṛśastathā |
na dīno dṛśyate tasmindharmādrājyaṃ praśāsati ||

2.5.17.50.c1

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalandharopākhyāne viṣṇujalandharayuddhavarṇanaṃ nāma saptadaśo'dhyāyaḥ ||

2.5.17.50.p2

śrīgaṇeśāya namaḥ ||

2.5.17.50.p3

śrīgaurīśaṅkarābhyāṃ namaḥ ||

2.5.17.50.p4

śrīśivamahāpurāṇam ||

2.5.17.50.p5

dvitīyāyāṃ rudrasaṃhitāyāṃ pañcamo yuddhakhaṇḍe

Linked texts (4)