Shivapurana 2.5.18: aṣṭādaśo'dhyāyaḥ | jalandharavadhopākhyāne devarṣijalandharasaṃvādaḥ
Śivapurāṇa (complete text) 2.5.18
- Language
- Sanskrit
Contents
aṣṭādaśo'dhyāyaḥ | jalandharavadhopākhyāne devarṣijalandharasaṃvādaḥ
2.5.18.1
sanatkumāra uvāca |
evaṃ śāsati dharmeṇa mahīṃ tasminmahāsure |
babhūvurduḥkhino devā bhartryabhāvānmunīśvara ||
2.5.18.2
duḥkhitāste surāḥ sarve śivaṃ śaraṇamāyayuḥ |
manasā śaṅkaraṃ devadevaṃ sarvaprabhuṃ prabhum ||
2.5.18.3
tuṣṭuvurvāgbhiriṣṭābhirbhagavantaṃ maheśvaram |
nivṛttaye svaduḥkhasya sarvadaṃ bhaktavatsalam ||
2.5.18.3.p1
āhūya sa mahādevo bhaktānāṃ sarvakāmadaḥ |
nāradaṃ prerayāmāsa devakāryacikīrṣayā | 4 ||
2.5.18.5
atha devamunirjñānī śambhubhaktaḥ satāṃ gatiḥ |
śivājñayā yayau daityapure devānsa nāradaḥ ||
2.5.18.6
vyākulāste surāḥ sarve vāsavādyā drutaṃ munim |
āgacchantaṃ samālokya samuttasthurhi nāradam ||
2.5.18.7
dadusta āsanaṃ nattvā munaye prītipūrvakam |
nāradāya surāḥ śakramukhā utkaṇṭhitānanāḥ ||
2.5.18.8
sukhāsīnaṃ munivaramāsane supraṇamya tam |
punaḥ procuḥ surā dīnā vāsavādyā munīśvaram ||
2.5.18.9
devā ūcuḥ |
bho bho munivaraśreṣṭha duḥkhaṃ śṛṇu kṛpākara |
śrutvā tannāśaya kṣipraṃ prabhustvaṃ śaṅkarapriyaḥ ||
2.5.18.10
jalandhareṇa daityena surā vidrāvitā bhṛśam |
svasthānādbhartṛbhāvācca duḥkhitā vayamākulāḥ ||
2.5.18.11
svasthānāduṣṇaraśmiśca candro nissāritastathā |
vahniśca dharmarājaśca lokapālāstathetare ||
2.5.18.12
subaliṣṭhena vai tena sarve devāḥ prapīḍitāḥ |
duḥkhaṃ prāptā vayaṃ cāti śaraṇaṃ tvāṃ samāgatāḥ ||
2.5.18.13
saṅgrāme sa hṛṣīkeśaṃ svavaśaṃ kṛtavān balī |
jalandharo mahādaityaḥ sarvāmaravimardakaḥ ||
2.5.18.14
tasya vaśyo varādhīno'vātsīttatsadane hariḥ |
sa lakṣmyā sahito viṣṇuryo naḥ sarvārthasādhakaḥ ||
2.5.18.15
jalandharavināśāya yatnaṃ kuru mahāmate |
tvaṃ no daivavaśātprāptaḥ sadā sarvārthasādhakaḥ ||
2.5.18.16
sanatkumāra uvāca |
ityākarṇya vacasteṣāmamarāṇāṃ sa nāradaḥ |
āśvāsya muniśārdūlastānuvāca kṛpākaraḥ ||
2.5.18.17
nārada uvāca |
jāne'haṃ vai surā yūyaṃ daityarājaparājitāḥ |
duḥkha prāptāḥ pīḍitāśca sthānānnissāritāḥ khalu ||
2.5.18.18
svaśaktyā bhavatāṃ svārthaṃ kariṣye nātra saṃśayaḥ |
anukūlo'hamiha vo duḥkhaṃ prāptā yato'marāḥ ||
2.5.18.19
sanatkumāra uvāca |
evamuktvā muniśreṣṭho draṣṭuṃ dānavavallabham |
āśvāsya sakalāndevāñjalandharasabhāṃ yayau ||
2.5.18.20
athāgataṃ muniśreṣṭhaṃ dṛṣṭvā daityo jalandharaḥ |
utthāya parayā bhaktyā dadau śreṣṭhāsanaṃ varam ||
2.5.18.21
sa taṃ sampūjya vidhivaddānavendro'tivismitaḥ |
suprahasya tadā vākyaṃ jagāda munisattamam ||
2.5.18.22
jalandhara uvāca |
kuta āgamyate brahman kiṃ ca dṛṣṭaṃ tvayā kvacit |
yadarthamiha āyātastadājñāpaya māṃ mune ||
2.5.18.23
sanatkumāra uvāca |
ityākarṇya vacastasya daityendrasya mahāmuniḥ |
pratyuvāca prasannātmā nārado hi jalandharam ||
2.5.18.24
nārada uvāca |
sarvadānavadaityendra jalandhara mahāmate |
dhanyastvaṃ sarvalokeśa ratnabhoktā tvameva hi ||
2.5.18.25
madāgamanahetuṃ vai śṛṇu daityendrasattama |
yadarthamiha cāyātastvahaṃ vakṣye'khilaṃ hi tat ||
2.5.18.26
gataḥ kailāsaśikharaṃ daityendrāhaṃ yadṛcchayā |
yojanāyutavistīrṇaṃ kalpadrumamahāvanam ||
2.5.18.27
kāmadhenuśatākīrṇaṃ cintāmaṇisudīpitam |
sarvarukmamayaṃ divyaṃ sarvatrādbhutaśobhitam ||
2.5.18.28
tatromayā sahāsīnaṃ dṛṣṭavānasmi śaṅkaram |
sarvāṅgasundaraṃ gauraṃ trinetraṃ candraśekharam ||
2.5.18.29
taṃ dṛṣṭvā mahadāścaryaṃ vitarko me'bhavattadā |
kvāpīdṛśī bhaved vṛddhistrailokye vā na veti ca ||
2.5.18.30
tāvattavāpi daityendra samṛddhiḥ saṃsmṛtā mayā |
tadvilokanakāmo'haṃ tvatsānnidhyamihāgataḥ ||
2.5.18.31
sanatkumāra uvāca |
iti nāradataḥ śrutvā sa daityendro jalandharaḥ |
svasamṛddhiṃ samagrāṃ vai darśayāmāsa sādaram ||
2.5.18.32
dṛṣṭvā sa nārado jñānī devakāryasusādhakaḥ |
prabhupreraṇayā prāha daityendraṃ taṃ jalandharam ||
2.5.18.33
nārad uvāca |
tavāsti susamṛddhirhi varavīrākhilādhunā |
trailokyasya patistvaṃ hi citraṃ kiṃ cātra sambhavam ||
2.5.18.34
maṇayo ratnapuñjāśca gajādyāśca samṛddhayaḥ |
te gṛhe'dya vibhāntīha yāni ratnāni tānyapi ||
2.5.18.35
gajaratnaṃ tvayānītaṃ śakrasyairāvatastathā |
aśvaratnaṃ mahāvīra sūryasyoccaiḥśravā hayaḥ ||
2.5.18.36
kalpavṛkṣastvayānīto nidhayo dhanadasya ca |
haṃsayuktavimānaṃ ca tvayānītaṃ hi vedhasaḥ ||
2.5.18.37
ityevaṃ vararatnāni divi pṛthvyāṃ rasātale |
yāni daityendra te bhānti gṛhe tāni samantataḥ ||
2.5.18.38
tvatsamṛddhimimāṃ paśyansampūrṇāṃ vividhāmaham |
prasanno'smi mahāvīra gajāśvādisuśobhitām ||
2.5.18.39
jāyāratnaṃ mahāśreṣṭhaṃ jalandhara na te gṛhe |
tadānetuṃ viśeṣeṇa strīratnaṃ vai tvamarhasi ||
2.5.18.40
yasya gehe suratnāni sarvāṇi hi jalandhara |
jāyāratnaṃ na cettāni na śobhante vṛthā dhruvam ||
2.5.18.41
sanatkumāra uvāca |
ityevaṃ vacanaṃ śrutvā nāradasya mahātmanaḥ |
uvāca daityarājo hi madanākulamānasaḥ ||
2.5.18.42
jalandhara uvāca |
bho bho nārada devarṣe namaste'stu mahāprabho |
jāyāratnavaraṃ kutra vartate tadvadādhunā ||
2.5.18.43
brahmāṇḍe yatra kutrāpi tadratnaṃ yadi varttate |
tadāneṣye tato brahmansatyaṃ satyaṃ na saṃśayaḥ ||
2.5.18.44
nārada uvāca |
kailāse hyatiramye ca sarvarddhisusamākule |
yogirūpadharaḥ śambhurasti tatra digambaraḥ ||
2.5.18.45
tasya bhāryā suramyā hi sarvalakṣaṇalakṣitā |
sarvāṅgasundarīnāmnā pārvatīti manoharā ||
2.5.18.46
tadīdṛśaṃ rūpamananyasaṅgataṃ dṛṣṭaṃ na kutrāpi kutūhalāḍhyam |
atyadbhutaṃ mohanakṛtsuyogināṃ sudarśanīyaṃ paramarddhikāri ||
2.5.18.47
svacitte kalpayāmyadya śivādanyaḥ samṛddhimān |
jāyāratnānvitādvīra trilokyāṃ na jalandhara ||
2.5.18.48
yasyā lāvaṇyajaladhau nimagnaścaturānanaḥ |
svadhairyyaṃ mumuce pūrvaṃ tayā kānyopamīyate ||
2.5.18.49
gatarāgo'pi hi yayā madanāriḥ svalīlayā |
nijatantro'pi yataḥ sa svātmavaśagaḥ kṛtaḥ ||
2.5.18.50
yathā strīratnasambhoktuḥ samṛddhistasya sābhavat |
tathā na tava daityendra sarvaratnādhipasya ca ||
2.5.18.51
sanatkumāra uvāca |
ityuktvā sa tu devarṣirnārado lokaviśrutaḥ |
yayau vihāyasā devopakārakaraṇodyataḥ ||
2.5.18.51.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalandharavadhopākhyāne devarṣijalandharasaṃvādo nāmāṣṭādaśo'dhyāyaḥ ||
2.5.18.51.p2
śrīgaṇeśāya namaḥ ||
2.5.18.51.p3
śrīgaurīśaṅkarābhyāṃ namaḥ ||
2.5.18.51.p4
śrīśivamahāpurāṇam ||
2.5.18.51.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Padmapurāṇa — Vyāsa, Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit