Shivapurana 2.5.19: ekonaviṃśo'dhyāyaḥ | jalandharavadhopākhyāne dūtasaṃvādaḥ
Śivapurāṇa (complete text) 2.5.19
- Language
- Sanskrit
Contents
ekonaviṃśo'dhyāyaḥ | jalandharavadhopākhyāne dūtasaṃvādaḥ
2.5.19.1
vyāsa uvāca |
sanatkumāra sarvajña nārade hi gate divi |
daityarāṭ kimakārṣītsa tanme vada suvistarāt ||
2.5.19.2
sanatkumāra uvāca |
tamāmantrya gate daityaṃ nārade divi daityarāṭ |
tadrūpaśravaṇādāsīdanaṅgajvarapīḍitaḥ ||
2.5.19.3
atho jalandharo daityaḥ kālādhīnaḥ pranaṣṭadhīḥ |
dūtamāhvāyayāmāsa saiṃhikeyaṃ vimohitaḥ ||
2.5.19.4
āgataṃ taṃ samālokya kāmākrāntamanāḥ sa hi |
susambodhya samācaṣṭa sindhuputro jalandharaḥ ||
2.5.19.5
jalandhara uvāca |
bho bho dūtavaraśreṣṭha sarvakāryaprasādhaka |
saiṃhikeya mahāprājña kailāsaṃ gaccha parvatam ||
2.5.19.6
tatrāsti yogī śambhvākhyastapasvī ca jaṭādharaḥ |
bhasmabhūṣitasarvāṅgo virakto vijitendriyaḥ ||
2.5.19.7
tatra gatveti vaktavyaṃ yoginaṃ dūta śaṅkaram |
jaṭādharaṃ viraktaṃ taṃ nirbhayena hṛdā tvayā ||
2.5.19.8
he yogiṃste dayāsindho jāyāratnena kiṃ bhavet |
bhūtapretapiśācādisevitena vanaukasā ||
2.5.19.9
mannāthe bhuvane yoginnocitā gatirīdṛśī |
jāyāratnamatastvaṃ me dehi ratnabhuje nijam ||
2.5.19.10
yāni yāni suratnāni trailokye tāni santi me |
madadhīnaṃ jagatsarvaṃ viddhi tvaṃ sacarācaram ||
2.5.19.11
indrasya gajaratnaṃ coccaiḥśravoratnamuttamam |
balādgṛhītaṃ sahasā pārijātastarustathā ||
2.5.19.12
vimānaṃ haṃsasaṃyuktamaṅgaṇe mama tiṣṭhati |
ratnabhūtaṃ mahādivyamuttamaṃ vedhasodbhutam ||
2.5.19.13
mahāpadmādikaṃ divyaṃ nidhiratnaṃ svadasya ca |
chatraṃ me vāruṇaṃ gehe kāñcanasrāvi tiṣṭhati ||
2.5.19.14
kiñjalkinī mahāmālā sarvadā'mlānapaṅkajā |
matpituḥ sā mamaivāsti pāśaśca kapatestathā ||
2.5.19.15
mṛtyorutkrāntidā śaktirmayā nītā balādvarā |
dadau mahyaṃ śucirdivye śuciśauce ca vāsasī ||
2.5.19.16
evaṃ yogīndra ratnāni sarvāṇi vilasanti me |
atastvamapi me dehi svastrīratnaṃ jaṭādhara ||
2.5.19.17
sanatkumāra uvāca |
iti śrutvā vacastasya nandinā sa praveśitaḥ |
jagāmograsabhāṃ rāhurvismayodbhutalocanaḥ ||
2.5.19.18
tatra gatvā śivaṃ sākṣāddevadevaṃ mahāprabhum |
svatejodhvastatamasaṃ bhasmalepavirājitam ||
2.5.19.19
mahārājopacāreṇa vilasantaṃ mahādbhutam |
sarvāṅgasundaraṃ divyabhūṣaṇairbhūṣitaṃ haram ||
2.5.19.20
praṇanāma ca taṃ garvāttattejaḥ krāntavigrahaḥ |
nikaṭaṃ gatavān śambhoḥ sa dūto rāhusaṃjñakaḥ ||
2.5.19.21
atho tadagra āsīno vaktukāmo hi saiṃhikaḥ |
tryambakaṃ sa tadā saṃjñāprerito vākyamabravīt ||
2.5.19.22
rāhuruvāca |
daityapannagasevyasya trailokyādhipateḥ sadā |
dūto'haṃ preṣitastena tvatsakāśamihāgataḥ ||
2.5.19.22.p1
jalandharo'bdhitanayaḥ sarvadaityajaneśvaraḥ ||
2.5.19.23
' trailokyasyeśvarasso'thābhavatsarvādhināyakaḥ ||
2.5.19.24
sa daityarājo balavāndevānāmantakopamaḥ |
yoginaṃ tvāṃ samuddiśya sa yadāha śṛṇuṣva tat ||
2.5.19.25
mahādivyaprabhāvasya tasya daityapateḥ prabhoḥ |
sarvaratneśvarasya tvamājñāṃ śṛṇu vṛṣadhvaja ||
2.5.19.26
śmaśānavāsino nityamasthimālādharasya ca |
digambarasya te bhāryā kathaṃ haimavatī śubhā ||
2.5.19.27
ahaṃ ratnādhinātho'smi sā ca strīratnasaṃjñitā |
tasmānmamaiva sā yogyā naiva bhikṣāśinastava ||
2.5.19.28
mama vaśyāstrayo lokā bhuñje'haṃ makhabhāgakān |
yāni santi triloke'smin ratnāni mama sadmani ||
2.5.19.29
vayaṃ ratnabhujastvaṃ tu yogī khalu digambaraḥ |
svastrīratnaṃ dehi mahyaṃ rājñaḥ sukhakarāḥ prajāḥ ||
2.5.19.30
sanatkumāra uvāca |
vadatyevaṃ tathā rāhau bhrūmadhyācchūlapāṇinaḥ |
abhavatpuruṣo raudrastīvrāśanisamasvanaḥ ||
2.5.19.31
siṃhāsyapracalajjihvaḥ sajjvālanayano mahān |
ūrdhvakeśaḥ śuṣkatanurnṛsiṃha iva cāparaḥ ||
2.5.19.32
mahātanurmahābāhustālajaṅgho bhayaṅkaraḥ |
abhidudrāva vegena rāhuṃ sa puruṣo drutam ||
2.5.19.33
sa taṃ khāditumāyāntaṃ dṛṣṭvā rāhurbhayāturaḥ |
adhāvadātivegena bahiḥ sa ca dadhāra tam ||
2.5.19.34
rāhuruvāca |
devadeva maheśāna pāhi māṃ śaraṇāgatam |
surā'suraissadā vandyaḥ paramaiśvaryavān prabhuḥ ||
2.5.19.35
brāhmaṇaṃ māṃ mahādeva khādituṃ samupāgataḥ |
puruṣo'yaṃ taveśāna sevako'tibhayaṅkaraḥ ||
2.5.19.36
etasmādrakṣa deveśa śaraṇāgatavatsalaḥ |
na khādeta yathāyaṃ māṃ namaste'stu muhurmuhuḥ ||
2.5.19.37
sanatkumāra uvāca |
mahādevo vacaḥ śrutvā brāhmaṇasya tadā mune |
abravītsvagaṇaṃ taṃ vai dīnānāthapriyaḥ prabhuḥ ||
2.5.19.38
mahādeva uvāca |
prabhuṃ ca brāhmaṇaṃ dūtaṃ rāhvākhyaṃ śaraṇāgatam |
śaraṇyā rakṣaṇīyā hi na daṇḍyā gaṇasattama ||
2.5.19.39
sanatkumāra uvāca |
ityuktau girijeśena sagaṇaḥ karuṇātmanā |
rāhuṃ tatyāja sahasā brāhmaṇeti śrutākṣaraḥ ||
2.5.19.40
rāhuṃ tyaktvāmbare so'tha puruṣo dīnayā girā |
śivopakaṇṭhamāgatya mahādevaṃ vyajijñapat ||
2.5.19.41
puruṣa uvāca |
devadeva mahādeva karuṇākara śaṅkara |
tyājitaṃ mama bhakṣyaṃ te śaraṇāgatavatsala ||
2.5.19.42
kṣudhā māṃ bādhate svāminkṣutkṣāmaścāsmi sarvathā |
kiṃ bhakṣyaṃ mama deveśa tadājñāpaya māṃ prabho ||
2.5.19.43
sanatkumāra uvāca |
ityākarṇya vacastasya puruṣasya mahāprabhuḥ |
pratyuvācādbhutotiḥ sa kautukī svahitaṅkaraḥ ||
2.5.19.44
maheśvara uvāca |
bubhukṣā yadi te'tīva kṣudhā tvāṃ bādhate yadi |
sambhakṣayātmanaśśīghraṃ māṃsaṃ tvaṃ hastapādayoḥ ||
2.5.19.45
sanatkumāra uvāca |
sa śivenaivamājñaptaścakhāda puruṣaḥ svakam |
hastapādodbhavaṃ māṃsaṃ śiraḥ śeṣo'bhavadyathā ||
2.5.19.46
dṛṣṭvā śiro'vaśeṣaṃ tu suprasannaḥsadāśivaḥ |
puruṣaṃ bhīmakarmāṇaṃ tamuvāca savismayaḥ ||
2.5.19.47
śiva uvāca |
he mahāgaṇa dhanyastvaṃ madājñāpratipālakaḥ |
santuṣṭaścāsmi te'tīva karmaṇānena sattama ||
2.5.19.48
tvaṃ kīrtimukhasaṃjño hi bhava maddvārakaḥ sadā |
mahāgaṇo mahāvīraḥ sarvaduṣṭabhayaṅkaraḥ ||
2.5.19.49
matpriyastvaṃ madarcāyāṃ sadā pūjyo hi majjanaiḥ |
tvadarcāṃ ye na kurvanti naiva te matpriyaṅkarāḥ ||
2.5.19.50
sanatkumāra uvāca |
iti śambhorvaraṃ prāpya puruṣaḥ prajaharṣa saḥ |
tadāprabhṛti deveśadvāre kīrtimukhaḥ sthitaḥ ||
2.5.19.51
pūjanīyo viśeṣeṇa sa gaṇaśśivapūjane |
nārcayantīha ye pūrvaṃ teṣāmarcā vṛthā bhavet ||
2.5.19.51.c1
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalandharavadhopākhyāne dūtasaṃvādo nāmaikonaviṃśo'dhyāyaḥ ||
2.5.19.51.p2
śrīgaṇeśāya namaḥ ||
2.5.19.51.p3
śrīgaurīśaṅkarābhyāṃ namaḥ ||
2.5.19.51.p4
śrīśivamahāpurāṇam ||
2.5.19.51.p5
dvitīyāyāṃ rudrasaṃhitāyāṃ pañcamo yuddhakhaṇḍe
Linked texts (2)
- Padmapurāṇa — Vyāsa, Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit